इब्रानियो 7

मलिकिसिदक याजक

1मलिकिसिदक सालेम नगर रौ राजा हो, अर महान परमेसर रौ याजक हो। जद अबराहम राजाओ नै हरा नै पाछौ आ रियौ हो, तो वो अबराहम नै मिळनै आयौ अर आसीस दी। 2इणनै अबराहम युध में हासल की सगळी चीजों रौ दसवो भाग भी दियौ।

मलिकिसिदक नाम रौ अरथ है, “धारमिकता रौ राजा,” अर पछै सालेम रौ राजा मतलब “सानति रौ राजा है।” 3उणरै पिता, अर माता, अर उणरी वंसावली रौ कोई इतिहास कोनीं मिळै है। उणरै जनम अर मौत रौ भी कोई लेख कोनीं है। पण परमेसर रै बेटे रै रूप में ठैहर नै वो हमेसां रै लियै याजक बण्यौ रैवै है।

4अबै इण माथै विचार करौ की मलिकिसिदक कैड़ौ महान हो। जिणनै कुलपिता अबराहम बड़िया ऊं बड़िया माल जिकौ युध में हासल कियो हो उणरौ दसवो हिस्सो दियौ। 5लेवी रै वंस में ऊं जिकौ याजक बणै है, उणौनै आग्या मिळी है, की वे सगळै लोगां, मतलब अपणै भाइयो ऊं, चाहे वे अबराहम री देह ऊं क्यूं नीं जनमियौ हो, मूसा री व्यवस्था रै अनुसार दसवो भाग ले। 6पण मलिकिसिदक लेवी वंस रौ भी नीं हो, तौभी अबराहम ऊं दसवो भाग लियौ, अर उणै अबराहम नै आसीस दी, जिणरै खनै परमेसर रौ वायदो हो। 7इणमे वेम कोनीं की छोटौ मोटे ऊं आसीस पावै है। 8अर एठै तो लेवी याजक जिकौ मरणवाळा मिनख है वे दसवो भाग लेवे है। पण उठै मलिकिसिदक लेवे है, जिणरी गवाई दी जावै है की वो जीवतौ है। 9तो म्हौ ओ भी कैह सकौ हो की लेवी भी, जिकौ दसवो भाग लेवे है, अपणै पूरवज अबराहम रै द्धारा मलिकिसिदक नै दसवो भाग दियौ। 10क्यूंकै जिण वगत मलिकिसिदक लेवी वंस रै पूरवज अबराहम ऊं भेट की, उण वगत लेवी वंस आपरै पूरवज अबराहम री देह में हो।

मलिकिसिदक रै जैड़ौ दूजौ याजक

11जे लेवीय परिवार रै याजक पद रै जरियै सिद्धी हासल हो सकै जिणरै सहारे ऊं लोगां नै व्यवस्था मिळी ही, तो पछै कांई जरुत ही, की दूजौ याजक मलिकिसिदक री रीति ऊपर ऊभौ हो, अर हारून#7:11 हारून लेवी वंस में ऊं पैला महायाजक हो। परिवार री रीति रौ नीं कहीजै? 12क्यूंकै जद याजक रौ पद बदळयौ जावै है, तो व्यवस्था रौ भी बदळनौ जरुरी है। 13क्यूंकै जिणरै बारै में ऐ बातां कही जावै है की वो दूजी गोत्र रौ है, जिणमे ऊं किणी वेदी री सेवा कोनीं की। 14तो परगट है, की म्हौरौ परभु यीसु यहूदा रै वंस में ऊं है। अर इण वंस रै बारै में मूसा नै याजक पद री कीं भी चरचा कोनीं की।

15अर जिकौ म्हौ कयौ है, वो और ही सही है की मलिकिसिदक रै जैड़ौ एक वळै याजक परगट हो जावै है, 16जिकौ सांसारिक आग्या री व्यवस्था रै अनुसार कोनीं, पण अमर जीवन री सामरथ ऊं याजक बण गियौ है। 17क्यूंकै उणरै बारै में पवितर सास्तर आ गवाई दियोड़ी है, “थूं मलिकिसिदक री रीति ज्यूं अनत काल रौ याजक है।”

18पुराणी आग्या इण वास्तै ना रै बराबर हो गई क्यूंकै वो कमजोर अर बिना फायदे री ही। 19इण वास्तै की मूसा री व्यवस्था में किणी बात री सिद्धी कोनीं होई, अर उणरै जगा माथै एक ऐड़ी उतम आसा राखी है जिणरै जरियै म्हौ परमेसर रै नजीक जा सकौ हो।

20अर इण वास्तै की मसीह री नियुक्ति बिना सौगन कोनीं होई, क्यूंकै दूजा तो बिना सौगन याजक बणाया गिया। 21पण यीसु सौगन रै साथै परमेसर री तरफ ऊं नियुक्त कियोड़ौ, जिणै उणरै बारै में कयौ,

“परभु नै सौगन खाई,

अर वो आपरौ मन कदैई नीं बदळैला,

‘थूं अनत काल रौ याजक है।’ ”

22इण सौगन री वजैऊं यीसु एक उतम वाचा रौ जमानत बण गियौ है।

23देखौ, ऐड़ा तो घणा ही याजक बणता आया, इण रौ कारण ओ हो, की मौत उणौनै रैवण कोनीं दिया हा। 24पण यीसु अमर है, इण कारण उणरौ याजक पद अनत काल तांई बण्यौ रैला। 25इण वास्तै जिकौ उणरै जरियै परमेसर रै खनै आवै है, वो उणरौ पूरौ पूरौ उद्धार कर सकै है, क्यूंकै वो उणौरै लियै विनती करणै हमेसां जीवतौ है।

26अतस ऐड़ौ ही महायाजक म्हौरै लायक हो, जिकौ पवितर, अर बिना दोस रौ, अर सुद्ध, अर पापियो ऊं अलग, अर सरग ऊं ही ऊंचौ उठायोड़ो हो। 27उण महायाजको रै ज्यौ उणनै जरुरी कोनीं, की हमेसां पैला आपरै पापों अर पछै लोगां रै पापों रै लियै बलि चढ़ाए। उणै तो हमेसां रै लियै लोगां रै पापों रै लियै खुद अपणै आप नै बलि कर दिया। 28क्यूंकै व्यवस्था तो कमजोर मिनखौ नै महायाजक नियुक्त करै है। पण उण सौगन री वाचा जिकौ व्यवस्था रै पछै खाई ही, उण बेटे नै नियुक्त करै है जिकौ अनत काल रै लियै सिद्ध कियो गयो है।

Currently Selected:

इब्रानियो 7: RWR

Highlight

Copy