कुलुस्सियो 2

1म्हैं चावूं के, थै ओ जांण लौ के, म्हैं थौरे वास्तै, लौदीकिया रा विसवासियो वास्तै अर उणौरै वास्तै जिकौ म्हनै कदैई देखियौ कोनीं, किती मेनत करूं हूं। 2ओ में इण वास्तै कहूं ताकी उणौनै हीमत मिळै अर वे परैम रै साथै एक रैवै जिण ऊं उणौनै वो ग्यांन रौ धन मिळै अर वे परमेसर रै गेरे भेद नै समझ सकै, जिकौ खुद यीसु मसीह है। 3जिणमे बुद्धि अर ग्यांन रा भंडार लुकयोड़ा है।

4ओ म्हैं थांनै इण वास्तै कहूं के, कोई थांनै मीठी बातां ऊं धोखो नीं दैवै। 5म्हैं सरीर ऊं तो थौरे ऊं आगौ हूं। पर आतमा ऊं थौरे नजीक हूं अर म्हैं ओ देख नै राजी हूं के, थै मसीह में वैवार अर विसवास में मजबुत हो।

मसीह में जीवन री भरपुरी

6जिण तरैह ऊं थै यीसु मसीह नै परभु मांन्या, उण तरैह ऊं उणरै बतायोड़े मारग माथै चालता रौ। 7उणमे मजबुत होन बढ़ता जाओ। जिण तरैह ऊं थांनै विसवास री सीख मिळी है, उणमे मजबुत होता जाओ अर परमेसर नै धन्यवाद देता रैवौ।

8सावचेत रैवौ के, कोई थांनै मिनखां रा बणायोड़ा ग्यांन, रीति रिवाज अर संसार री सीख ऊं धोखे में नीं घाल दे, जिकौ मसीह रा नीं है। 9क्यूंकै परमेसर पूरी तरैह ऊं मसीह री काया में वास करै है। 10थै उण ऊं हीज भरपूर हो, जिकौ सगळै राज अर अधिकारो रै ऊपर है।

11उणौ में ऐड़ौ थौरो खतनो होयौ है। जिकौ मिनखां रै हाथ ऊं नीं, पर मसीह ऊं होयौ है। जिणमे थै थौरे पाप रा सरीर नै उतार दियौ है। 12#रोमि 6:4जद थै बतिस्मो लियौ, तो थै यीसु मसीह रै साथै बूर दिया गिया अर परमेसर री उण सगति माथै विसवास रै कारण थै जीवता भी हो गिया, जिकौ यीसु मसीह नै मरयोड़ा ऊं जीवता करया हा।

13 # इफि 2:1–5 थै जिकौ पाप अर सरीर में खतनो नीं करणा रै कारण मरयोड़ा हा, परमेसर थांनै मसीह रै साथै जीवता करिया अर अपांरा सगळा पाप माफ करिया। 14#इफि 2:15कायदे रौ वो लेख जिकौ अपांरै नाम ऊं अर विरोध में हो, उणनै सूली माथै खिलो ऊं जड़ नै अपांरै सांमै ऊं आगौ कर दियौ। 15वे सैतान रा राज अर अधिकारो नै आपरै माथै ऊं उतारनै उणौनै सगळौ रै सांमै सूली माथै हरा नै आपरै पगां नीचे दिया।

मसीह री आजादी में रैवौ

16 # रोमि 14:1–6 इण वास्तै किणी रौ ओ हक कोनीं के वो खाणै पीणै में या तैंवार मनाणै में, यहूदियो रै आराम रा दिन रै बारै में या नवा चांद रै बारै में थौरे माथै दोस लगावै। 17क्यूंकै ऐ सगळी आवण वाळी बातां री छाया है। सई बातां तो मसीह में है। 18कोई मिनख थांनै आपरौ घणौ तप या सरगदूतो री पूजा रौ दिखावो कर नै थांनै सरग रा फळ ऊं आगा नीं कर दैवै। ऐड़ा मिनख झूठै परचां री बातां करै अर दुनिया रा घमण्ड में भरयोड़ा रैवै। 19#इफि 4:16ऐड़ा लोग मसीह में नीं रैवै है। मसीह जिकौ मंडली रूपी काया रौ माथो है। जिण ऊं पूरी काया, जोड़ अर हाडका ऊं ताकत पाने अर एक साथै मिळ नै, परमेसर में बढ़ती जावै।

20जद थै मसीह रै साथै मरनै संसार री बातां ऊं आगा हो गिया हो तो, थै संसार रै ज्यूं क्यूं जीवो हो? मिनखां रा हुकम अर सीख माथै अर नेमो रै वस में क्यूं रैवौ हो? 21ज्यूं इणनै हाथ नीं लगाणौ, इणनै मत चाखो अर इण ऊं आगा रौ। 22ऐ सगळा कायदा मानता मानता नास हो जावैला। क्यूंकै ऐ लोगां रा बणायोड़ा कायदा है। 23इण में मिनखां री बणायोड़ी भगती री रीत, झूठी दया अर सरीर री तपसया रौ फायदो तो है। पर सरीर री वासना नै नीं रोक सकै।

Currently Selected:

कुलुस्सियो 2: RWR

Highlight

Copy