प्रेरितों रा कांम 13

बरनबास अर साऊल नै भेज्या

1अन्ताकिया री कलीसिया में कई भविसयदाता अर उपदेसक हा, ज्यूं, बरनबास, अर समौन जिकौ नीगर कहीजै है, अर लूकियुस कुरेनी, अर मनाहेम जिकौ हेरोदेस रौ खास साथी हो, अर साऊल। 2जद वे उपवास समेत परभु री उपासना कर रिया हा, तो पवितर आतमा कयौ, “म्हारै वास्तै बरनबास अर साऊल नै उण कांम रै वास्तै अलग करौ जिणरै वास्तै म्हैं उणौनै बुलाया है।” 3तद उणौनै उपवास अर पराथना करनै रै पछै बरनबास अर साऊल माथै हाथ राखनै उणौनै रवाना किया।

पौलुस री पैली परचार यात्रा

4अतस वे पवितर आतमा रै भेजयोड़ा सिलूकिया गिया। अर उठै ऊं जहाज में चढ़नै साइप्रस टापू गिया। 5अर सलमीस नगर में पूगनै, परमेसर रौ वचन यहूदियो रै पराथना घरो में सुणाया। अर यूहन्‍ना उणरौ सेवक हो।

6वे उण सगळै टापू में होता होया पाफुस तांई पूगा। उठै उणौनै बार-यीसु नाम रौ एक यहूदी जादूगर झूठा भविसयदाता मिळियौ। 7अर वो हाकिम सिरगियुस पौलुस रै साथै हो, जिकौ बुद्धिमान मिनख हो। उणै बरनबास अर साऊल नै आपरै खनै बुलायनै परमेसर रौ वचन सुणणौ चाहता हा। 8पण बार-यीसु जिणनै इलीमास जादूगर भी कैवता हा, उणरौ विरोध करनै हाकिम नै विसवास करणै ऊं रोकणौ चाहयौ। 9अबै साऊल अपणै आपनै पौलुस कैवण लागौ, पवितर आतमा ऊं भरपूर हो उणरी तरफ टकटकी लगान देख्यौ अर कयौ,

10“हे सगळै कपट अर सगळी चालाकी ऊं भरयोड़ा सैतान री औळाद, सकल धरम रा बैरी। कांई थूं परभु रै सीधे मारगो नै टेडा करणा नीं छोड़ेला? 11अबै देख, परभु रौ हाथ थारै माथै लागौ है, अर थूं कीं वगत तांई आंधौ रैला अर सूरज नै नीं देखेला।”

तद तुरत धुंधलापन अर अंधारौ उण ऊपर छा गियौ, अर वो एठीनै उठीनै टटोलनै लागौ ताकी कोई उणरौ हाथ पकड़नै लेय चालै। 12तद हाकिम नै जिकौ होयौ हो उणै देखनै अर परभु रै उपदेस ऊं अचूम्बो करनै विसवास कियो।

पिसिदिया रै अन्ताकिया में पौलुस रौ उपदेस

13पौलुस अर उणरै साथी पाफुस ऊं जहाज खोलनै पंफूलिया रै पिरगा में आया। अर यूहन्‍ना उणौनै छोड़नै यरुसलेम चाल दियौ। 14पिरगा ऊं आगै बढ़नै वे पिसिदिया रै इलाके अन्ताकिया में पूगा, अर सब्त रै दिन यहूदी पराथना घर में जायनै बैठग्या। 15व्यवस्था अर भविसयदाताओ री किताब ऊं पढ़णै रै पछै पराथना घर रै सरदारो उणरै खनै केन भेज्यौ, “हे भाइयो, जे लोगां रै उपदेस रै लियै थौरे मन में कोई बात हो तो कैह दो।”

16तद पौलुस ऊभौ होयनै हाथ ऊं इछारौ करनै कयौ, “हे इजरालियो, अर परमेसर ऊं डरनै वाळौ, सुणौ। 17इण इजरायली लोगां रै परमेसर म्हौरै बापदादों नै चुण लिया, अर जद ऐ लोग मिसर देस में परदेसी होयनै रैवता हा, तो उण वगत महान बणाया, अर अपणी ताकत ऊं निकाळनै लायौ। 18वो कोई चाळीस बरस तांई रिंदरोही में उणौरी देखभाळ करी। 19अर कनान देस में सात जातियो रौ नास करनै उणौरौ देस कोई साढ़े च्यार सौ बरस इणौरै अधिकार में कर दियौ।

20“इणरै पछै उणै समूएल भविसयदाता तांई उणमे न्यावी ठैराया। 21उणरै पछै उणौ एक राजा मांग्यौ, तद परमेसर नै चाळीस बरस रै वास्तै बिन्यामीन रै गोत्र में ऊं एक मिनख, मतलब कीस रै बेटे साऊल नै उणौ माथै राजा ठैरायौ। 22पछै उणनै अलग करनै दाऊद नै उणौरौ राजा बणायौ। जिणरै बारै में उणै गवाई दी, ‘म्हनै एक मिनख, यिसै रौ बेटौ दाऊद, म्हारै मन रै लायक मिळग्यौ है। वोहीज म्हारी सगळी इछा पूरी करैला।’

23“दाऊद रै वंस में ऊं परमेसर अपणै वायदे रै मुजब इजरायल रै नजीक एक मुगतिदाता, मतलब यीसु नै भेज्यौ। 24#मरकु 1:4; लूक 3:3यीसु आवण ऊं पैला यूहन्‍ना सगळै इजरालियो में मन फिराव रै बतिस्मो रौ परचार कियो। 25#यूह 1:20; मत 3:11; मरकु 1:7; लूक 3:16; यूह 1:27जद यूहन्‍ना अपणी सेवा पूरी करनै वाळौ हो, तो उणै कयौ, ‘थै म्हनै कांई समझौ हो? म्हैं वो कोनीं! बल्कि देखौ, म्हारै पछै एक आवण वाळौ है, जिणरै पगरखो री डोरी भी म्हैं खोलणै रै लायक कोनीं।’

26“हे भाइयो, थै जिकौ अबराहम री औळाद हो। अर थै जिकौ परमेसर ऊं डरौ हो, थौरे खनै इण उद्धार रौ वचन भेज्यौ गियौ है। 27क्यूंकै यरुसलेम रा रैवणवाळा अर उणौरै सरदारो नै, नीं यीसु नै पिछांणयौ अर नीं भविसयदाताओ री बातां समझी, जिकौ हरैक सब्त रै दिन पढ़ता हा, इण वास्तै उणनै दोसी ठैरायनै उण बातां नै पूरी की। 28#मत 27:22,23; मरकु 15:13,14; लूक 23:21–23; यूह 19:15उणौ मार दैणै रै जोग कोई दोस उणमे नीं पायो, तौभी पिलातुस ऊं विनती किनी की उणनै मार दियौ जाय।

29 # मत 27:57–61; मरकु 15:42–47; लूक 23:50–56; यूह 19:38–42 “जद उणौ उणरै बारै में लिख्योड़ी सगळी बातां पूरी की, तो उणनै क्रूस माथै ऊं उतारनै कबर मांय राख्यौ। 30पण परमेसर उणनै मरयोड़ौ में ऊं जिलायौ, 31#प्रेरि 1:3अर वो जिकौ उणरै साथै गलील ऊं यरुसलेम आया हा, उणौनै घणै दिनां तांई देठाळौ देतो रियौ। अबै वे ही लोगां रै सांमै उणरा गवाई है।

32“म्हौ थांनै उण वायदे रै बारै में जिकौ बापदादों ऊं कियोड़ौ हो, ओ सुभ संदेस सुणावौ हो, 33की परमेसर यीसु नै जिलायनै, वोहीज वायदो म्हौरी औळाद रै लियै पूरौ कियो, ज्यूं दूजै भजन में भी लिख्यौ है, ‘थूं म्हारौ बेटौ है, आज म्हैं इज थनै जनमायो है।’ 34अर उणरै इण रीत ऊं मरयोड़ौ में ऊं जिलाने रै बारै में भी की वो कदैई नीं सड़ै, उणै यौं कयौ है, ‘म्हैं दाऊद माथै की पवितर अर अटल करपा थारै माथै करूंला।’ 35इण वास्तै उणै एक वळै भजन में भी कयौ है, ‘थूं अपणै पवितर जन नै सड़नै नीं दैला।’ 36क्यूंकै दाऊद तो परमेसर री इछा रै अनुसार अपणै वगत में सेवा करनै मरग्या, अर अपणै बापदादों में जा मिळियौ, अर सड़ भी गियौ। 37पण जिणनै परमेसर जिलायौ, उणनै सड़नै कोनीं दियौ।

38“इण वास्तै, हे भाइयो, थै जांण लौ की इणरै जरियै पापों री माफी रौ सुभ संदेस थांनै दियौ जावै है। 39अर जिण बातां में थै मूसा री व्यवस्था रै जरियै निरदोस नीं ठैर सकौ हो, उणी सगळा में हरैक विसवास करनैवाळा यीसु मसीह जरियै निरदोस ठैरै है। 40इण वास्तै सावचेत रौ, ऐड़ौ नीं होवै की जिकौ भविसयदाताओ री किताब में आया है, थौरे माथै भी आ पड़ै की,

41‘हे निंदा करणैवाळौ, देखौ,

अर अचूम्बो करौ, अर मर जाओ,

क्यूंकै म्हैं थौरे दिनां में एक ऐड़ौ कांम करूं हूं,

की जे कोई थौरे ऊं उणरी चरचा करै,

तो थै कदैई विसवास नीं करौला।’ ”

42पौलुस अर बरनबास रै बारै निकळते वैळा लोग उण ऊं विनती करनै लागा की, “अगले सब्त रै दिन म्हौ नै ऐ बातां वळै सुणाई जाय।” 43जद सभा उठ गी तो यहूदियो अर यहूदी मत में आयोड़ा भगतो में ऊं घणाहारा पौलुस अर बरनबास रै लारै हो गिया, अर उणौनै उणौ ऊं बातां करनै समझाया की परमेसर रै अनुग्रह में बण्या रैवौ।

44अगले सब्त रै दिन नगरी रै प्राय: सगळा लोग परमेसर रौ वचन सुणणै भेळा हो गिया। 45पण यहूदी भीड़ नै देखनै जळण लागा, अर निंदा करता होया पौलुस री बातां रै विरोध में बोलण लागा। 46तद पौलुस अर बरनबास बिना डरै कयौ, “जरुरी हो की परमेसर रौ वचन पैला थांनै सुणायो जातौ, पण जद थै उणनै आगौ करौ हो, अर खुद नै अनत जीवन रै लायक नीं ठैरावौ, तो देखौ, म्हौ दूजी जातियो री तरफ मुड़या हो। 47क्यूंकै परभु म्हौ नै आ आग्या दी है, ‘म्हैं थनै दूजी जातियो रै लियै उजाळौ ठैरायौ है, ताकी थूं धरती री छोर तांई उद्धार रौ द्धार हो।’ ”

48ओ सुणनै दूजी जातियो खुस होई, अर परमेसर रै वचन री बड़ाई करनै लागा। अर जिता अनत जीवन रै लियै ठैराया गिया हा, उणौ विसवास कियो।

49तद परभु रौ वचन उण सगळै देस में फैलनै लागौ। 50पण यहूदियो नै भगत अर कुलीन लुगाईयां नै अर नगर रा खास लोगां नै भड़काया, अर पौलुस अर बरनबास रै विरोध दगों करायनै उणौनै अपणी सीमा ऊं बारै निकाळ दिया। 51#मत 10:14; मरकु 6:11; लूक 9:5; 10:11तद वे उणरै सांमै अपणै पगां री धूड़ झाड़नै इकुनियुम जातौ रियौ। 52अर अन्ताकिया रा विसवासी आंणंद ऊं अर पवितर आतमा ऊं भरपूर होता गिया।

Currently Selected:

प्रेरितों रा कांम 13: RWR

Highlight

Copy