Lōma 16
16
Ni leo welāvei ki nā yoa
1Ko tuku atu au kia kōtou i te talatala nō tō tātou tuaine manakia, ia Pēpē, e tiākono nō te ēkālētia i Kenekelea.#16:1 Ko Kenekelea e ōile ko i ai te ava ko tūtau ai nā payī, ko yē mamao mai Kōlīnētia, te ōile wolo. 2Ko wakavale atu au kē āliki ake kōtou ia ana i loto o te Atu kē kaleka lāi ki nā yanga e waingia ki ona tāngata tatapú. Paletua atu kōtou ia ana i ana mea wua ka winangalo, na lilo oki iāna wai paletua matamatua ki te wī tāngata, peia oki au.
3Kave atu te aloa kia Peletila ma Akuila, oku yoa e yanga wakatai mātou i loto o Iētū Metia.#Yanga 18:2 4Na wakapau oki i o lāua olānga i te ngakinga ia aku. E kiai ko oku wua ko wakaatawai ia lāua, ko peia mai oki te wī ēkālētia o te Ētene na kamuloa wai nā wakanau i te tokalua ia.
5Kave atu te aloa ki te ēkālētia e lulululu i tō lāua wale.
Aloa atu i toku mōuli ko Epeneto, ko ona oki te mōmua o te wī pipi a Iētū Metia mai te wuti wenua o Ātia.
6Kave atu te aloa kia Mele, te wawine vavenui e yanga nō kōtou nā.
7Avatu te aloa kia Ānetelōniko ma Iūnia, oku yoa Ngāti Iūta, ko mātou oki nā i loto o te waleāuli. Ni lua āpōtetolo tau-ki-mua oki lāua, nō mua atu lāua ia aku na Keletitiano ai.
8Avatu te aloa kia Āmepēliāto, toku mōuli i loto o te Atu.
9Avatu te aloa kia Ulopāno, tō mātou yoa i loto o te yanga a te Metia, peia oki ki toku mōuli ia Tetāku.
10Avatu te aloa kia Āpele, te kovi na mailonga tona tū manakia i loto o te Metia.
Avatu te aloa ki te wale tangata o Alitetōpulo.
11Aloa atu ia Elōtiōna, toku yoa Ngāti Iūta.
Aloa atu i te wale tangata o Nalekito, lātou e i loto o te Atu.
12Avatu te aloa kia Telupaina ma Telupota, te tokalua wawine vavenui i te yanga a te Atu.
Aloa atu i toku mōuli ia Pēleti, te toe wawine vavenui i te yanga a te Atu.
13Avatu te aloa kia Lūputa, te kovi na ikingia e te Atu, peia tona matua wawine, na lāua iāna te matua wawine kia aku.#Māleko 15:21
14Avatu te aloa kia Atūnekilito, kia Pelēkona, kia Ēleme, kia Patelōpa, kia Ēlema, peia ki nā tāīna ma nā tuaine i kinā.
15Avatu te aloa kia Pilōloko, Iūlia, Nēlea ma tona tuaine, peia kia Olumepa ma te wī tāngata o te Atu i kinā.
16Aloa atu kōtou te toe ki te toe ki te yongi tapu.
Ko avatu te wī ēkālētia a te Metia i tō lātou aloa kia kōtou.
17Ko umati atu au, e oku tāīna, kē onoono wakalelei kōtou i te kau e mea kē mavete kōtou, lātou na mātau e te kave yala ia kōtou mai nā āpī tika na āpīngia ai kōtou. Wakamamao kōtou ki tātea maia lātou. 18Ko nā tāngata ia ko yē tāvini lātou nō te Metia tō tātou Atu, ko wai wua i nā mea e vavaka ai lātou. Lā loto o a lātou tīonga ma nā talatala wakaleka, ko vati ai lātou i te kau yalakolé. 19Na langona e te wī tāngata tō kōtou tū talingatai, kamuloa au lele wua i te vēvēia ia kōtou. Eia wua, ko winangalo au kē māwuwutu kōtou i nā mea lelei, kē yalakole oki i nā yanga kikino.
20Ko yē loa oki koa yoli te Atua o te yauleka ia Tātani kē papangi ki lalo o o kōtou papāvae.
Kē wakaāwi mai nā yauyau nunui o tō tātou Atu ko Iētū kia kōtou.
21Ko avatu au i te aloa o toku yoa ia Tīmōteo e yanga wakatai māua nei kia kōtou, peia ia Lūkio, ia Iātona ma Totipata, oku yoa Ngāti Iūta.#Yanga 16:1
22Ko oku tēnei, ko Teletiu, na kotikotia te leta nei, e aloa atu nei ia kōtou i loto o te Atu.
23Ia Kaiō, toku taute i kinei, nō ona oki te wale e wakalulu ai te ēkālētia i kinei, ko avatu i tona aloa kia kōtou.#Yanga 19:29; 1 Kōlīnētia 1:14; 2 Tīmōteo 4:20
Ia Ēlāteto, te wakayaele o nā yanga o te ōile nei ma tō tātou taina ia Kuāleto, ko avatu i tō lāua aloa kia kōtou.
24[Kē ia kōtou nā yauyau nunui o tō tātou Atu ko Iētū Metia. Āmene.]#16:24 Ko i loto wua o nā toe pōkai talatala te yīlava nei.
25Kē i te Atua te yilatū, ia ana e maua e te wakamakeke ia kōtou lā loto o te Longo Lelei āku e wakamamata nō Iētū Metia nei, kē kaleka ki te yūkena mainga o nā talatala ngalo nā nanāngia mai nā vāia na pangé. 26Yaulā i te vāia nei, na wakaālia mai te talatala ia kē kitea lā loto o nā muna yivayiva na tutingia i te wakauwenga a te Atua kāe ona mutunga, kē nunumi ai te wī wenua tangata ma te māmalu kia ana. 27Kē i te Atua māwutu tokotai te yilatū ē vāia wua atu lā loto o Iētū Metia. Āmene.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau