Mātaiō 28
28
Te Tūwakawōunga o Iētū
(Māleko 16:1-10; Luka 24:1-12; Ioane 20:1-10)
1Kē pange te Tāpati, i nā mōtāyao loa o te ayo mua o te tāpati wōu, wō loa ia Mālia o Mākatala ma te toe Mālia onoono i te lua tanumate ia.
2Na peia wua ake, tupu loa te ngāluelue wenua ongo, nō tēlā na leilo mai te āngela a te Atu mai te Langi, wano loa ki te lua ia, wakatekateka i te watu ki tātea, nō ai ki lunga. 3Lāua loa tona tupu te uwila, ona kākawu oki mukavakevake wua pe te kīoná. 4Na kamuloa te kau nā leoleongiá vivili i te mataku, kaina loa nā tāngata na mamate.
5Eia, talatala loa te āngela ki nā wāwine ia, “Auyē mātataku. Ko aku iloa ko ulu kōlua ia Iētū na wakatātaulongiá. 6Ko yē i kinei iāna, na wakatū-wakawōungia ki lunga pē ana meanga lāi kia kōtoú. Lōmamai, onoono i te konga nā takoto ai iāna. 7Eia wua, limalima kōlua e te wō tala ki ana pipi: ‘Na tū wakawōu iāna mai te mate, ko angatu oki lā mua o kōtou ki Kalilea. Ka a kōtou kitea iāna i kiai.’ Ko taku talatala teia na aumai kia kōlua.”
8Eia, lapu loa lua wāwine ia e te wō mai te lua ia, ma te mātataku lāi, yaulā oki kamuloa pūmanava wua i tā lāua welele atunga tala ki ana pipi. 9Na peia wua ake, welāvei mai oki ia Iētū ia lāua, mea loa peia, “Kē ōla kōlua.” Yoloyolo atu loa lāua kia ana, kuku i ona vae, tautapa atu ai kia ana. 10Eia, talatala loa ia Iētū kia lāua pēnei, “Auyē mātataku. Wō lā, tala atu ki oku tāīna kē wō ki Kalilea; ko i kiai e kite ai lātou ia aku.”
Te līpōti a te pupu vāeau nā palea
11I nā wāwine e wō atu ki nā pipí, nīniko loa nā toe vāeau nā palea te lua ia ki te ōile, tala ki nā tatakuvai wowolo i te wī mea na tupu. 12Muyumuyu loa nā tatakuvai wowolo ma te kau mātutua, wakapono ake i tā lātou mau, kave loa lātou e wainga moni ki nā vāeau, 13tutuku loa kia lātou, “Tala kōtou pēnei, ‘Na lōmamai ana pipi i te pō tōyeyeu i tona tino i te vāia ko vayilowi mātou.’ 14Kē oko oki te longo nei ki te kāvana, ka puipui mātou ia kōtou maia ana kē yē tūngayala ai kōtou.” 15Eia, kave ai nā vāeau i nā moni ia, wai atu ai lātou kē tautonu ki nā muna na tutukungia kia lātou ia. Tola atu ai te tala nei ki te wī Ngāti Iūta, oko wua mai ki te ayo nei.
Te tutukunga matamatua a Iētū ki ana pipi
(Māleko 16:14-18; Luka 24:36-49; Ioane 20:19-23; Yanga 1:6-8)
16Eia, wō loa te tino angaulu mā tayi pipi ki Kalilea, ki te maunga na talā mai e Iētū́ kē wō lātou ki ai.#Mātaiō 26:32; Māleko 14:28 17I tā lātou kitenga ia ana, tautapa loa lātou ia ana; ko te toe kau lā nā mangalua nā manako. 18Eia, yau loa ia Iētū kia lātou, mea loa pēnei, “Ko te wī mana tākatoa i te Langi ma te ao nei na aumaingia pau kia aku. 19Nō kiai, wō kōtou ki te wī wenua tangata tākatoa, wakalilo atu ia lātou wai pipi ma te pāpetītō atu ia lātou i te ingoa o te Matua, o te Tama ma te Vaelua Yā;#Yanga 1:8 20wai kōtou ma te akoako atu ia lātou kē talingatai i te wī mea āku na wakauwe atu kia kōtou nā. Na pono ngaleka oki, ka nō wua au i o kōtou tawa, oko wua atu ki te wakayawenga o te ao nei.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau