Yanga 26
26
Na puipui ia Paulo ia ana i mua o Ākelipa
1Eia, mea mai loa ia Ākelipa kia Paulo, “Na pole ia aku kē talatala mai koe nō koe lāi.”
Tālo atu loa te lima o Paulo, kāmata ai iāna e te puipui ia ana, mea loa pēnei:
2“E te aliki e Ākelipa, i taku manatunga, na matala au i te tūnga ki mua o koe i te ayo nei, kē maua ai aku talatala kē puipui ai au mai te wī talatala tāyī tākatoa a te Ngāti Iūta, 3nō tēlā oki na taka lelei ia koe nā tāpingā-wenua tākatoa a te Ngāti Iūta ma te wī tīonga a lātou e wakataumea ai. Nō kiai, ko wakavale atu au kia koe, kē wakalongo ake koe kia aku ma te manavatoka.
4Ko īloloa tākatoa e te kau Ngāti Iūta te tū o toku olānga mai oku lewunga, mai toku tupu mainga i toku wenua wānau, peia oki i Iēlūtalema. 5Na loa te vāia na kite ai lātou ko ai au. Pē ka pole lātou, ka maua oki ia lātou e te wakapono mai ē, nā nō au wai Pālitea i te wakayaelenga a te pupu tule malu a tā mātou Pule Ngāti Iūta.#Yanga 23:6; Pilipi 3:5 6I te vāia nei nō aku manakinga ki nā mea a te Atua nā wakapono mai ki o mātou tūpuná, nō kiai au na wakavāngia ai i te ayo nei. 7Ko te wakapononga tēnei nā manaki ai tō mātou laungaulu mā lua yōlongá, ke a lātou kitea te vāia e tupu ai, i a lātou yinumakinga kē tautapa i te Atua i te pō ma te ao. E te aliki ē, nō te manakinga nei e tāyīngia ai au e te kau Ngāti Iūta nei. 8E wea kōtou e manatu ai ē, e mea waingatā i te Atua kē wakatū wakawōu mai i te kau na mamaté?
9Ēeke lava, na pole oki toku ngākau i te wainga i te wī mea pau na kaleka kē pātali atu ai i te ingoa o Iētū o Nātalēta.#Yanga 8:1-3; 22:4-5 10Ko taku yanga lāi teia nā wai i Iēlūtalema. Lā loto o te mana na tukuna mai kia aku e nā tatakuvai wowoló, nā tili ai ēku te wainga pipi ki loto o te waleāuli. Pē oki lātou na pae kē patua mamate, nā aku oki te toe tika nā tuku kē peia. 11E wolo te vāia nā tatapa ai au lā loto o te wī walepule kē wakautunga ia lātou, i te pā vāvenga kē wakakino lātou i te Atua. Nō te ita ongo o toku lili ia lātou, wano atu loa au ki nā ōile i nā wenua kekē kē takikino ia lātou.
12Kē oko lā ki toku toe tele, na wano atu au ki Tāmāteko lā loto o te mana ma te wakatikanga a nā tatakuvai wowolo.#Yanga 9:1-19; 22:6-16 13E te aliki ē, ko i lunga au o te ngutuala i te tūtonunga o te lā, aku kitea loa te yila mai te Langi, ko ongo atu tona tea i te lā. Na takapini loa tona yilatea ia aku ma oku yoa nā i oku tawá. 14Yīyinga loa mātou tākatoa ki lalo, eia, wakalongo atu au i te leo ia ko talatala mai peia kia aku i loto o te leo Ālama,#26:14 te leo Ālama: ko te leo teia e taliweolo ki te leo Ēpela. ‘E Taula ē, e Taula, e wea koe e takikino mai ai ia aku? E mea loa waingatā kē tue koe i te lākau mata kokoi.’#26:14 E mea loa waingatā kē tue koe i te lākau mata kokoi: ko te wakamaepanga, “ia koe ko wakatīngā wua tō vae e te tue pe te puakatolo e tue i te lākau mata kokoi a tona pū”.
15Eia, pau atu loa au, ‘E te Atu, ko ai koe?’
Mea mai oki iāna, ‘Ko oku tēnei ko Iētū tau mea e takikino ai nā. 16Tū lā koe ki lunga i te vāia nei. Na wakaāli atu oki au kia koe i te ikinga ia koe wai tāvini, wai kite oki, kē tala koe i te wī mea āu na kite ia aku nei, peia aku mea ka wakaāli atu kia koe i nā vāia lā mua nei. 17Ka wakaola au ia koe mai tō ititangata Ītalāela, peia oki te kau Ētene. Ka yeunga oki au ia koe ki te Ētene, 18kē yūkena o lātou mata, kē wūlia mai lātou mai te pōuli ki te mālama, mai loto o te mana o Tātani ki te Atua, kē yuangia ai a lātou yala, kē maua ai e konga mō lātou i te puyo o te kau na wakayāina lā loto o te tū lotokono kia aku.’
19Nō kiai e te aliki e Ākelipa, na talingatai au ki te wakaatanga mai te Langi ia. 20Na ako au taumua ki te kau i Tāmāteko, peia te kau i Iēlūtalema, puni wua atu ia Iūtea tākatoa, peia oki ki te kau Ētené. Na ako au kē yalayala i a lātou yala ma te wuli āngai mai ki te Atua, kē kitea oki te mea ia lā loto o a lātou waiwai.#Yanga 9:20, 28-29 21Nō nā mea ia na likoa ai au e te kau Ngāti Iūta i loto o te Waleyā, nā yanga ē kē patu ia aku. 22Yaulā na paletua mai te Atua ia aku, oko wua mai ki te ayo nei, nō kiai au na tū ai i kinei kē wakamamata atu au ki te kau yakayaka ma te kau wowoló. Kāyi aku toe talatala atu mai nā mea nā talā mai e nā peloveta ma Mōte ka tupú: 23ēnei oki, ka pānakia lāi te Metia, ko ona oki ka tū taumua mai te kau na mamaté, kē vānanga ai iāna i te mālama o te ola ki te kau Ngāti Iūta ma te kau Ētené.”#Ītaia 42:6; 49:6; 1 Kōlīnētia 15:20
24I te meanga peia a Paulo, kakā mai loa pēnei ia Pētito ki ai, “Paulo ē, ia koe mō na yeyē tō manako! Na wolo loa tau āpī na wakamau, nō kiai koe koa mūlalea ai.”
25“E Pētito Tiketike ē, e kiai au na mūlalea,” te pau atunga a Paulo. “Ko aku talatala e avatu nei ni muna tautonu, ko tauyala wua toku manako. 26Ko taka wua oki i te aliki nā mea nei, nō kiai au e yē mataku ai e te talatala kia ana. Na pono oki ia aku ē, kāe loa mea lewu o nā mea na tupu ia ko ngalo ia ana, nō tēlā, e kiai nā mea ia na tupu i te konga ngaongao. 27E te aliki e Ākelipa ē, ko lotokono mō koe i nā pelovetá? Ko aku iloa ko peia koe.”
28Kākole lā te mea mainga a Ākelipa kia Paulo, “I tau manatunga, ka āwū atu au kia koe i nā mō vāia pūpoto nei kē lilo wai Keletitiano?”
29Pau atu loa ia Paulo, “Wua atu te pūpoto pēkole te loa o te taime, ko tataku au ki te Atua, e kiai nō koe wua, yaulā nō te wī tāngata e wakalongo mai kia aku i te ayo nei, kē weolo ngaleka kōtou pē eku nei, auyē lā kē yelea ki nā vivi nei.”
30Eia, matete loa te aliki ki lunga, peia te kāvana ma Pelenike, ma te kau nā nōnō i tawa. 31Maka loa lātou i te pia o te wakavānga, wai lā ma te wakatau talatala, mea loa lātou peia, “Kāe loa yanga a te tangata nei na wai e kaleka ai kē pae iāna i te utunga o te mate, pēkole kē tilia ki te waleāuli.”
32Eia, talatala loa ia Ākelipa kia Pētito, “Pī pē te tangata nei e kiai na mea kē wakavāngia iāna e Kaitala, ēnei pā iāna na tukua kē wano.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau