Yanga 2
2
Te yaunga o te Vaelua Yā i te Penetekote
1I te okonga ki te ayo o te Penetekote, nā wakalulu ki te konga e tayi lātou tākatoa.#Levitiku 23:15-21; Teutelonomi 16:9-11 2Alaala wua ake, pā mai loa te yalulu mai lunga o te Langi kaina loa te pupuyi o te matangi laloao, na kamuloa te wale e nōnō ai lātou ia yalulutia. 3Eia, kite atu loa lātou i nā mea pe nā alelo awi na tuavaevaea ia, ko wetau mai ki lunga o lātou takitai e i kiai ia. 4Na kamuloa lātou yeyele wua i te Vaelua Yā, kāmata loa e te talatala i nā toe leo, na wakaulua mai e te Vaelua Yā kē talatala lātou.
5I te vāia ia oki e tokawolo te tangata Ngāti Iūta tau Atua nā nōnō i Iēlūtalema, nā lōmamai mai te wī wenua o te ao nei. 6Ke a lātou langona te yalulu ia, wakalulu mai loa lātou ki te maliunga tangata tokawolo ia. Na kamuloa lātou nenu nā manako i te longonga ko talatala mai te kau ia kia lātou i o lātou leo wenua takitai. 7Na ongo loa tō lātou mīmīngutu, wakatau iliili wua ai lātou pēnei, “E kiai lā te kau e talatala nei ni tāngata nō Kalilea? 8Nō wea ai tātou e wakalongo ai ia lātou ko talatala mai i o tātou leo wenua takitai? 9Ia tātou oki nā lōmamai mai Paletia, Mātai ma Ēlama, nā tāngata o Metopotāmia, Iūtea ma Kapatōkia, Ponoto ma Ātia, 10Pelikia ma Pāmēpūlia, Aipiti ma nā tuanga wenua o Līpia i tawa o Kūlene; peia oki nā toe tāngata nā lōmamai mai Lōma 11(ko kānoni wua te Ngāti Iūta ma te kau Ētene na ō lātou ki te ākonoanga Ngāti Iūtá); peia te toe kau o tātou mai Kēleta ma Ālāpia. Ko a tātou langona oki ko wakamamata lātou i o tātou leo wenua i nā yanga wotu a te Atua nā wai.” 12Mīmīngutu wua ai lātou ma te yeyē nā manako, wakatau iliili wua ai te toe ki te toe pēnei, “E wea lā mō te wakamaepanga o te mea nei?”
13Yaulā te toe kau, vayikata loa ma te wai akanau ia lātou, mea loa peia, “Wō, auwā mō te kau nei na kokona i te uwaina!”
Te akoakonga a Pētelo
14Eia, lakai mai loa ki mua ia Pētelo mai te tino angaulu mā tai āpōtetolo e wetū ia, kakā mai loa i te ātanga o tona leo, vānanga atu ai ki te maliunga tangata ia: “E te wī Ngāti Iūta ma te wī tāngata e nōnō i Iēlūtalema nei, wakalongo mai kōtou wakalelei, kē wakamaepa atu au kia kōtou e wea na peia ai. 15E kiai te kau nei na kokona pē a kōtou manatunga nā. E ola iva wua i te mōtāyao te mea nei. 16Ēkole lava, ko tēnei oki te mea a te peloveta ko Ioela nā talatala aí, mea loa pēnei:
17 #
Ioela 2:28-32 (LXX) ‘Kē oko ki nā ayo mumulí, ko tala mai te Atua,
ka lilingi atu au i toku Vaelua ki lunga o te wī tāngata tākatoa.
Ka yivayiva mai a kōtou tamatāne ma a kōtou tamāwine i aku muna,
ka wakaālia ki a kōtou lōpā nā wakaatanga,
ka wai ki te miti o kōtou pōvivī.
18Peia oki ki lunga o oku tāvini, te kau tāne ma te kau wāwine,
ka lilingi atu au i toku Vaelua i nā ayo ia,
ko lātou oki ka yivayiva i aku talatala.
19Ka wakaāli atu au i nā wakailo mana i te langi i lunga,
peia nā wakamailonga wotu i te wenua i lalo:
te toto ma te awi, ma te kāpuāo au makauli mātolutū.
20Ka wakapōulingia te lā,
ka kulakeye te māina pe te toto
i mua ake ka oko mai ai te Ayo wolo yila kakaya o te Atu.
21Ko te tangata oki e valovalo atu i te ingoa o te Atú, ka ola iāna.’
22E te wī tāngata o Ītalāela ē, wakalongo mai ake ki nā muna nei. Ko Iētū o Nātalēta e tangata na ungaina mai e te Atua kia kōtou nei. Na wakamaepa mai oki i tona mana kia kōtou lā loto o te wī yanga wotu, nā yanga mana ma nā wakailo wotu nā waia mai kia kōtou e te Atua lā loto ōna. Na mailonga oki ia kōtou nā mea ia. 23Na wakataka wua taumua te Atua i loto o tana palāni ma ana manatunga taumamao kē tuku atu ia Iētū kia kōtou. Ko kōtou oki ma te kau kikinó na patua iāna kē payako, pātiti atu ai ia ana ki lunga o te tātaulo.#Mātaiō 27:35; Māleko 15:24; Luka 23:33; Ioane 19:18 24Yaulā, na wakatū te Atua ia ana ki lunga mai te mate, na matala mai oki ia ana mai te tīngā o te mate, nō tēlā, e yē maua loa i te mate e te pupulu ia ana.#Mātaiō 28:5-6; Māleko 16:6; Luka 24:5 25Nō kiai oki ia Tāvita na mea ai peia nō ona ia:#Talamo 16:8-11 (LXX)
‘Na aku kitea te Atu ko lā mua wua ōku i te wī vāia.
Ko i toku lima mātau oki iāna,
e yē ngāluelue loa au.
26Nō kiai e pūmanava ai toku ngākau, ko wakalele oki toku alelo i nā muna vēvēia;
ka nō wua toku tino ma te manaki,
27nō tēlā, e yē maka koe i toku tino vaelua ki te Pō i lalo,
e yē pā oki koe i tau Kovi Yā ke ana tongia te papala.
28Na wakaāli mai koe kia aku i nā ala o te ola,
ka wakakī oki koe ia aku ki te vēvēia i mua o tō aloalo.’
29E oku tāīna ē, ka tala atu au ma te manavaleka kia kōtou nō lunga i tō tātou tupuna longonui ko Tāvita. Na mate iāna, na tanua oki, ko i kinei i te konga ia tātou nei tona menema, oko mai ki te ayo nei. 30Yaulā oki e peloveta iāna, na taka wua iāna te wakapononga a te Atua kia ana. Na tuku oki te tika a te Atua ki ai ka wakatū mai iāna e aliki pē Tāvita ia mai loto o tona ulaula.#Talamo 132:11; 2 Tāmuela 7:12-13 31Na kite ia Tāvita e wea te yanga a te Atua ka wai i nā vāia lā mua, nō kiai na talatala ai i te tūwakawōunga o te Metia#2:31 te Metia: Ēleni, Christos. Ko te wulinga o te muna Ēpela (Mashiach); ko te wakamaepanga, “Ia ana na wakayinua” i tana talatalanga ia,
‘e kiai iāna na makaina wua ki te Pō i lalo,
e kiai oki tona tino na tongia te papala.’
32Ko Iētū oki teia na wakatūa mai ki lunga e te Atua mai te mate, ko mātou tākatoa oki nā kite o te yanga ia. 33Na wakatiketikeina iāna ki te lima mātau o te Atua tona Matua, maua mai ai iāna te Vaelua Yā na wakaponoa mai e te Atuá, na lilingi mai oki ēna ki lunga o mātou, ēnei e onoono ai kōtou, e wakalongo ai nei. 34E kiai oki ia Tāvita na wano ki lunga o te Langi; yaulā na mea mai iāna pēnei,#Talamo 110:1
‘Na mea mai te Atua ki toku Atu peia,
“Nō koe ki toku lima mātau
35ke aku tukungia ō veiá
wai yolingā-vae mō koe.” ’
36Nō kiai, kē pono ngaleka oki i te wī tāngata Ītalāela tākatoa, ko Iētū a kōtou na wakatātauló na wakaliloa e te Atua ko ona te Atu ma te Metia!”
37I te wakalongonga a te kakai i te talatala ia, na kamuloa yoka ki loto o nā ngākau, mea loa lātou kia Pētelo ma nā toe āpōtetolo, “E o mātou tāīna ē, ka mea ai mātou pēwea?”
38Mea atu loa ia Pētelo kia lātou, “Wulikē kōtou takitai mai a kōtou yala kē pāpetītōngia ki loto o te ingoa o Iētū Metia, kē yuaina a kōtou yala, e maua ai ia kōtou te utu a te Atua, ko te Vaelua Yā. 39Ko te wakapononga nei na meaina mai mō kōtou ma a kōtou tama, peia oki ki te kau i te wī konga mamao, te wī tāngata tākatoa ka valovaloa e te Atu tō tātou Atua mō ona.”
40Wolo atu te talatala a Pētelo nā wakalapa kia lātou, wakavale atu loa iāna peia, “Kē yayao kōtou mai te utunga ka yau ki te taitangata kikino nei!” 41E tokawolo te kau na āwuwū ki ana muna ia, pāpetītōngia loa, wakataia mai ai kia lātou, ka taliweolo wua ki te tolunga mano tangata i te ayo ia.
Te olānga o te kau e lotokonó
42Wakapau loa te kau ia i o lātou vāvenga e te wakamau i nā akoakonga a nā āpōtetolo, peia nā lulunga wakatai, i te taumayanga wakatai ma te tataku. 43E wolo te wī yanga wakawotu ma nā wakailo mana nā waingia e nā āpōtetolo, na kamuloa te wī tāngata mālili wua. 44Wakatayi wua ai peia te kau e lotokonó, tanga wua loa kē tau i a lātou wī penupenu kia lātou tākatoa.#Yanga 4:32-35 45Oko atu loa lātou i o lātou potonga wenua ma nā penupenu, tau ai i nā moni ki te kau e kāyayā. 46Kaputi wakatai wua ai lātou peia i te wī ayo i loto o te kolo o te Waleyā. Nā taumamaya wakatayi oki i nā popoa i o lātou wale ma te ngākau vēvēia peia te yaumālū, 47talayikayika wua ai lātou i te Atua ma te minangia mai e te kakai tākatoa. Wāpiki mai ai te Atu kia lātou i te wī ayo i te kau na wakaolainá.
Currently Selected:
Yanga 2: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau