Provebs 7
7
1San blong mi, yu mas tingim evri toktok blong mi.
Kipim evri strongfala toktok blong mi long maen blong yu.
2Kipim strongfala tok blong mi an bae yu laef,
gadem evri tising blong mi olsem spesol pikinini blong yu.
3Tingim toktok blong mi olowe,
raetem insaet haat blong yu.
4Tinghae long waes, olsem sista,
tinghae long save, olsem brata.
5Tufala bae stopem yu fo no go long ravis waef blong narafala man.
Tufala save mekem yu no herem suit toktok blong datfala woman.
Woman wea wei blong hem hemi nogud
6Taem mi stap long haos blong mi, mi luktru go long windo.
7Mi lukim plande yangman wakabaot nomoa.
Den mi luksave dat wanfala long olketa hemi no garem gudfala save yet.
8-9Long ivining taem hemi tudak finis, disfala yangman hemi goraon long kona long rod kolsap long haos blong wanfala ravis waef blong nara man.
10Hemi olsem juri woman, kaleko blong hem nao hemi som.
Hemi kamaot fo mitim hem wetem evri trik blong hem.
11Woman ya hemi no stap kuaet long haos,
hemi nating fraet, hemi nating sem.
12Hemi stap long rod, hemi stap long kona,
hemi stap long maket an evriwea.
13Hemi kasholem disfala yangman.
Hemi lukluk stret long ae blong hem,
hemi kisim hem, an tok olsem,
14“Fren, tude mi mekem sakrifaes long God,
so plande kaikai hemi stap long haos.
15Hem nao mi kam fo mitim yu.
Mi bin lukaotem yu, nao mi faendem yu.
16Olketa nambawan spesol sitbed from Ijip,
mi putum finis long bed blong mi.
17Olketa insens wea i barava smel naes tumas,
mi rabem finis tu long bed blong mi.
18!Yu kam, bae yumitufala save slip tugeta!
Fulnaet ya, bae yumitufala hapi an plei insaet long bed.
19Hasban blong mi hemi no stap,
hemi go long wanfala farawe kantri.
20Hemi tekem staka seleni, an bae hemi no kambaek kuiktaem.
Bihaen tufala wik, bae hemi kambaek.”
21Toktok blong woman ya hemi tanem finis tingting blong yangman.
Hemi drang finis long suit toktok blong hem.
22Hem no tingim, bat hemi go wetem nao, olsem buluka hemi go fo dae,
o olsem krangge man garem sen long lek blong hem.
23Seknomoa, wanfala aro hemi gotru long haat blong hem.
Hemi olsem bed wea hemi flae, bat hemi pas insaet long net.
Hemi nating save nomoa, hemi falom nao rod blong dae.
24Olketa yangman, lisin kam, herem gud toktok blong mi.
25Yu no letem woman olsem fo tanem tingting blong yu,
o lidim yu long rong wei.
26Plande man i dae finis long wei blong hem,
hemi spoelem staka man nao.
27Fo go long haos blong hem, hem nao bikrod godaon long grev.
Currently Selected:
Provebs 7: SIPB
Highlight
Copy
Compare
Share
Want to have your highlights saved across all your devices? Sign up or sign in
Solomon Islands Pijin Bible © Bible Society of the South Pacific, 2008.