Provebs 26
26
1Olsem komburu long taem blong ara,
i no stret fo tokhae long krangge man.
2Olsem smol bed i no save stap kuaet,
toktok fo spoelem stretfala man i no save mekem trabol kasem hem.
3Yusim stik an rop fo kontrolem animol,
yusim wip long baeksaet blong krangge man.
4Sapos yu givim krangge ansa long krangge man,
hemi luk olsem yu krangge tu.
5Bat yu mas givim ansa wea hemi fitim krangge man,
mekem hemi no tingse hemi waes.
6Taem yu sendem toktok blong yu wetem krangge man,
hemi olsem yu dringim poesen, o katemaot lek blong yu.
7Waes toktok long maos blong krangge man,
hemi olsem nogud lek blong man no save wakabaot.
8Taem yu tokhae long krangge man,
hemi olsem yu taengem ston nating long sling.
9Waes toktok long maos blong krangge man,
hemi olsem ropnila long han blong spakmasta.
10Man hemi givim waka long olketa krangge masta liu,
hemi olsem man hemi su-sutim aro olobaot.#26:10 Long Hibru Baebol, mining blong disfala ves hemi no klia.
11Krangge man wea i duim sem krangge samting moa,
hemi olsem dog i kaikaim toraot blong hem.
12Sapos yu lukim man hu hemi talem dat hemi smat,
oraet, krangge man hemi garem moa sans fo kasem save winim man ya.
13Lesibon hemi sei,
“Wanfala laeon hemi stap aotsaet. Hem long rod an ating hem laek fo kilim mi dae.”
14Lesibon ta-tane long bed,
olsem doa ta-tane long hins blong hem.
15Lesibon putum han long kaikai,
bat wea, hem les tumas fo putum kaikai long maos.
16Lesibon hemi tingse hemi save moa winim
sevenfala man hu save ansarem enikaen kuestin.
17Taem yu joenem raoa blong nara man
hemi olsem yu kasholem dog long ia blong hem.
18-19Taem man hemi laea long wantok,
an talem dat hemi mekfan nomoa,
hemi olsem man hu i mentol an hemi sutim olketa aro.
20No eni faeawud, faea bae dae.
No eni ravis tok, raoa bae dae.
21Faeawud mekem faea bone,
man fo raoa mekem faet bone.
22Toktok abaotem nara man,
hemi olsem nambawan samting fo kaikaim.
23Olsem penda long kofin hemi saen,
hem nao smut tok blong ravis man.
24Man hu hemi heitem yu,
hem mekem naes toktok fo haedem ravis plan.
25Nomata toktok blong hem hemi heregud, yu no bilivim.
Haat blong hem i fulap nomoa long nogud tingting.
26Maet hemi haedem nogud tingting,
bat olketa bae lukim ravis wei blong hem.
27Man digim hol blong trap, bae foldaon long hem.
Man rolem ston, ston bae rol long hem.
28Man fo laea, hemi heitem olketa hemi spoelem.
Suit toktok save spoelem evrisamting.
Solomon Islands Pijin Bible © Bible Society of the South Pacific, 2008.