Nambas 10
10
Tufala trampet wea olketa wakem long silva
1Yawe hemi tok olsem long Mosis, 2“Bae yufala mas wakem tufala trampet long silva wea olketa hamarem. Nao oltaem yufala mas yusim tufala trampet ya fo kolem kam olketa pipol, an fo mekem saen taem yufala mekredi fo muv go long narafala ples. 3Sapos olketa bloum tufala trampet ya tugeta, hemi minim olsem wea olketa pipol mas hipap tugeta long doa blong Tambu Haostent. 4Bat sapos olketa bloum wanfala nomoa, hemi minim olsem wea olketa sif blong olketa traeb blong yufala nao mas kam tugeta long ples wea yu stap long hem. 5An sapos olketa bloum tufala trampet tugeta kuiktaem fo trifala taem, fastaem hemi minim olsem wea olketa traeb long saet long ist mas muv goaot. 6An mektu taem olketa bloum tufala trampet tugeta kuiktaem fo trifala taem moa, hemi minim olsem wea olketa traeb long saet long saot mas muv goaot. Enitaem olketa pipol mas muv goaot, olketa mas bloum tufala trampet tugeta kuiktaem fo trifala taem. 7Bat taem olketa pipol mas hipap tugeta, olketa mas bloum tufala trampet tugeta fo lelebet longtaem, an i no kuiktaem fo trifala taem. 8Olketa long laen blong Haeprist Eron hu i prist, olketa nao mas bloum tufala trampet ya.
“Olketa lo long tufala trampet ya wea bae yufala mas kipim olowe, hemi olsem: 9Taem yufala go fo faet wetem olketa enemi hu trae fo spoelem lan blong yufala, yufala mas bloum tufala trampet ya kuiktaem fo trifala taem. An taem mi Yawe, God blong yufala, mi herem, bae mi tingim yufala, an sevem yufala from olketa enemi blong yufala. 10An olketa mas bloum tufala trampet ya long taem wea yufala hapi an mekem fist, an long taem blong olketa fist wea Lo hemi talem wetem olketa Fist blong Niumun. An olketa mas bloum tu taem yufala kam fo mekem olketa sakrifaes wea i barava bone, an olketa sakrifaes fo somaot dat yufala stapgud wetem mi. Saon blong trampet nao bae hemi mekem yufala fo tingim dat mi nao Yawe, God blong yufala.”
Pipol blong Israel i stat long gogo blong olketa
11Long mektu yia bihaen long taem wea olketa kamaot from Ijip, long mektu mans, long mektuenti de blong hem, disfala klaod blong Yawe hemi muv goaot from Tambu Haostent blong Tambu Boks long Spesol Agrimen. 12So olketa pipol blong Israel i muvaot from bikfala drae eria long Saenae. Bihaen, klaod ya hemi kamdaon moa long drae eria long Paran.
13Hem nao fastaem wea olketa muv go long narafala ples falom wanem Yawe hemi talem long Mosis. 14Olketa hu i stap andanit long flag blong traeb blong Jiuda, olketa nao i muvaot fastaem. Nason, san blong Aminadab, hem nao hemi lidim olketa long traeb blong Jiuda. 15An Netanel, san blong Sua, hemi nao lidim olketa long traeb blong Isaka. 16An Eliab, san blong Helon, hemi nao lidim olketa long traeb blong Sebulun.
17Den taem olketa long laen blong Geson an long laen blong Merari nao i tekemaot Tambu Haostent, olketa karim goaot bihaen long olketa hu i go wetem traeb blong Jiuda.
18Neks grup fo wakabaot go, olketa hu i stap andanit long flag blong traeb blong Ruben. Elisua, san blong Sedeua, hemi lidim olketa long traeb blong Ruben. 19An Selumiel, san blong Surisadae, hemi lidim olketa long traeb blong Simion. 20An Eliasaf, san blong Duel, hemi lidim olketa long traeb blong Gad.
21Den olketa long laen blong Kohat i muv goaot an olketa karim evri tambu samting blong Tambu Haostent.#Nambas 4:1-15. An taem olketa kasem niufala ples, olketa long laen blong Geson an Merari i putumap finis Tambu Haostent mekem hemi redi fo olketa tambu samting.
22Neks grup fo wakabaot go, olketa hu i stap andanit long flag blong traeb blong Efrem. Elisama, san blong Amihud, hemi lidim olketa long traeb blong Efrem. 23An Gamaliel, san blong Pedasua, hemi lidim olketa long traeb blong Manase. 24An Abidan, san blong Gideoni, hemi lidim olketa long traeb blong Benjamin.
25An las grup fo wakabaot go, olketa hu i stap andanit long flag blong traeb blong Dan. Olketa ya i stap long tugeta long bihaen, fo gadem olketa evriwan. Ahiesa, san blong Amisadae, hemi lidim olketa long traeb blong Dan. 26An Pagiel, san blong Okran, hemi lidim olketa long traeb blong Asa. 27An Ahira, san blong Enan, hemi lidim olketa long traeb blong Naftali.
28Evritaem hem nao wei wea olketa traeb blong Israel i falom fo muv goaot long narafala ples.
Mosis hemi askem inlo blong hem, Hobab, fo go wetem olketa
29Oraet, Hobab, san blong Ruel#10:29 “Ruel” Narafala nem blong “Ruel” hemi Jetro. disfala man blong Midian hu hemi dadi inlo blong Mosis, hemi stap wetem olketa. An Mosis hemi tok olsem long Hobab, “Hemi kasem taem blong mifala fo go long lan wea Yawe hemi sei bae hemi givim long mifala, an hemi promis olsem wea bae hemi givim olketa gudfala samting long mifala. Hemi gud fo yu kam wetem mifala. Sapos yu kam, bae mifala save barava lukaftarem yu.”
30Bat Hobab hemi tok olsem, “Nomoa, bae mi gobaek fo stap long ples blong mi wetem olketa famili blong mi.”
31Den Mosis hemi tok olsem long hem, “Plis yu no lusim mifala. Yu nao yu barava save long olketa ples long drae eria wea yumi save stap long hem, an yu save lidim mifala. 32An sapos yu kam wetem mifala, olketa gudfala samting wea Yawe bae hemi givim long mifala, bae mifala searem wetem yu.”
Evri pipol i goaot nao
33Taem olketa lusim maonten blong Yawe long Saenae, olketa wakabaot fo trifala de. Olketa karim go fastaem disfala Tambu Boks long Spesol Agrimen blong Yawe, mekem Yawe hemi save som ples wea bae olketa stap long hem. 34An evritaem olketa wakabaot long de fo go long narafala ples, klaod blong Yawe hemi long antap long olketa.
35Evritaem olketa karim Tambu Boks ya an stat fo wakabaot go, Mosis hemi prea olsem,
“Lod Yawe, mekem olketa enemi blong yu fo ran olobaot. Plis yu mekem olketa hu i heitem yu fo ranawe.”#Sams 68:1.
36An taem Tambu Boks hemi kasem ples fo stap long hem, Mosis hemi prea moa olsem,
“Lod Yawe, plis yu stap kam wetem mifala hu i plande taosen pipol blong Israel.”
Currently Selected:
Nambas 10: SIPB
Highlight
Share
Copy
Want to have your highlights saved across all your devices? Sign up or sign in
Solomon Islands Pijin Bible © Bible Society of the South Pacific, 2008.
