Lukas 1
1
Tujuwan Lukas nateꞌèl bukuk doh
1Yãng Tiòpilus rik behormad,
Jajéh sènꞌòy hòj umripod ilok rik Allah hòj nateꞌèl èn kalangan èk.
2Umnak umhoh ma cherite nòm sènꞌòy rik umnéh hal nak nòm mulak bok umtèrlòy gah nak ma èk. 3Jadik, sebab yék hòj ikaji kenèmbek hal nak nòm mulak eh, yék ibèdlod méj lah imtulis keꞌjèk renipod rik terator ma hãk. 4Yék iteꞌèl gerèk doh supaye hamlèkh kenèmbek gah rik sènꞌòy hòj umtènglèkh ma hãk mémang kemën.
Melaykat nachèl-chal tentang nèsyos Yohanès Pembaptis
5Bil jènman Hèrodès rajak negerik Yudéya, mok néy sènꞌòy imam bekenëh Sakariya. Rik nak nòm pitak imam Abiya.#1:5 pitak imam Abiya. Abiya nak néy sènꞌòy imam Yahudi rik manah tòp. Èn mase Sakariya, mok 24 pitak imam rik umkod giliran umlãj ma Yèrusalèm untok umbetugas èn Dékh Tuhan. Léh Sakariya bekenëh Elisabet, dak rik nak keꞌjèk nòm waris imam Harun#1:5 waris imam Harun Harun nak kelok Musa. Allah najadik ma Harun imam Yahudi rik mulak. Kenèmbek imam Yahudi nòm waris Harun. — imam Yahudi rik mulak anin tòp. #1 Sej 24:10. 6Nèsgos tòw léh nak kemën èn mad Allah, dak wèhoh ma kenèmbek hukom ròb nèrꞌor Tuhan. 7Tapik wènar nak tok mèk-mok kuwòt, sebab Elisabet manang, dak wènar nak hòj jèꞌjak tèꞌtak.
8Mok néy arik Sakariya ròb kéy-kéy golongan imam eh umdapad giliran#1:8 Golongan imam nak umbetugas èn Dékh Tuhan 2 kalik setiyab tawon. untok mubetugas èn Dékh Tuhan. 9Gerèk biyase mèn imam umbes undi#1:9 umbes undi Mèn imam Yahudi umgunak undi supaye mulèkh nènchèn Tuhan. Umteꞌèl kenëh um èn batuk undi nak, dak umdol èn kelòj bekas. Pas nak umkod néy batuk nak. Dak umpechaye imam rik kenëh eh natulis èn batuk nak penili Tuhan untok nachur nèshos nak. mupili chok rik nammòj Ruwang Kudus èn kelòj Dékh Tuhan untok namchur nèschos.#1:9 nèschos bende chèsngẽs rik sènꞌòy umchur supaye namhos ma Tuhan. Dak umpili kenëh Sakariya. 10Bil nachèr-chur nèschos nak, sènꞌòy jajéh umherimung èn béng dak umpèꞌtak. 11Dak bil nak melaykat Tuhan napèrnéh rik eh ma Sakariya, nated ènlẽng tep tempad umchur nèschos. 12Bil Sakariya nanéh melaykat nak, rik nak nakeròkh dak natukh geb. 13Tapik melaykat nak nachal ma rik nak, “Agok lah tukh, Sakariya! Allah hòj nakeyòkh pèntak hãk. Léh hãk, Elisabet, akal nayos kuwòt babeh. Hãk haros tèrjal kenëh eh Yohanès. 14Hãk akal haꞌadés geb sebab kuwòt hãh nak, bok jajéh sènꞌòy akal umbeꞌadés keꞌjèk sebab nèsyos eh! 15Nanak akal najadik sènꞌòy rayak èn mad Tuhan. Rik nak tok boléh naꞌòng anggor atòw òng lènywény mòy. Mulak èn kelòj éj amèk eh, Ruway Kudus nakuwase ma rik nak. #Ken 6:3. 16Dak nanak akal nabetènglèkh jajéh sènꞌòy Israꞌèl supaye mulos muhoh wèl ma Tuhan, Allah umnak. 17Rik nak akal nacheroh ma Tuhan, nòm kènwad bok kuwase gerèk Nabi Èliya. Nanak akal nabema-méj ma apak ròb kuwòt, dak natèrlos sènꞌòy rik tok tèdꞌãd supaye mulos ma nèbchib benèdlod rik kemën. Rik nak akal nateꞌèl kenèmbek doh untok namtabéh kaum untok Tuhan.” #Mal 4:5,6.
18Tapik Sakariya nachal ma melaykat nak, “Yék doh hòj tatak bok léh yék pon hòj jajak! Rèk lok yék boléh imlèkh hal doh akal nabelakuk?”
19Melaykat nak natèdchod, “Yék doh Gabrièl! Yék ited tilok ma Allah, selaluk ibetabéh untok imhoh ma nèrꞌor Eh. Dak Allah irik natèrꞌèn yék untok imbecharak ma hãk bok imtèrlòy gah méj doh ma hãk. #Dan 8:16; 9:21. 20Keyòkh lah! Ilok rik yék ichal pastik akal nabelakuk ma mase eh. Tapik sebab hãk tok hapechaye, hãk akal tok dapad habecharak wèl sampéy ilok rik yék ichal nabelakuk.”
21Bil nak, sènꞌòy jajéh tik umdèh-deh Sakariya. Umnak umbèlꞌih sebab rik nak gerèk nak lamad èn kelòj Ruwang Kudus. 22Bil Sakariya nahuwòl, nanak tok dapad nacharak ma umnak, had naꞌèg-og sarad nòm tikh. Jadik sènꞌòy èn anak umlèkh Sakariya hòj nanéh néy perènnéh èn kelòj Ruwang Kudus.
23Dak bil hòj sòj nabetugas èn Dékh Tuhan, Sakariya namak ma dékh rik eh. 24Tok lamad nòm kerek nak léh eh, Elisabet, nakayod. Dak rik nak tok nahèlwòl nòm dékh selamak limak gechèk. 25Dak Elisabet nachal, “Tuhan nateꞌèl hal doh ma yék! Hòj lamad sènꞌòy umpègyog ma yék sebab imanang, tapik puꞌdoh Tuhan hòj natèrhõy penègyog yéh èn mad sènꞌòy.”
Melaykat naꞌoglèkh ma Maria tentang nèsyos Yèsus
26Nòm kerek Elisabet nakayod enam gechèk, Allah naꞌor melaykat Gabrièl namwèk ma kampong Nasarèt èn tèk Galiliya, 27ma néy babok benaléh rik bekenëh Maria. Babok nak tok pernah nasèglòg ma babeh. Kewarge eh hòj napèrhod Maria nambabéy ma néy babeh rik bekenëh Yusop, nòm waris Rajak Daud. #Mat 1:18. 28Melaykat nak nalãj ma Maria dak nachal, “Selamad! Tuhan mok samak hãk, bok nateꞌèl méj ma hãk ibuk geb!”
29Maria nasuwéh geb bil nakeyòkh ma nèlchal melaykat nak, dak nabetanyak-tanyak èn kelòj hup eh ilok maksod nèlchal nak. 30Dak melaykat nak nachal wèl ma rik nak, “Agok tukh, Maria! Allah méj geb hup Eh ma hãk! 31Keyòkh lah: hãk akal hakayod dak hayos néy kuwòt babeh, dak hatèrjal kenëh Eh Yèsus. #Mat 1:21. 32Nanak akal najadik rayak geb, dak akal sènꞌòy umdéh Rik Nak Kuwòt Allah Rik Paléng Balikh. Tuhan Allah akal najadik Nanak rajak gerèk Rajak Daud, yak dòt bej Eh. #2 Sam 7:12,13,16; Yès 9:6. 33Nanak akal naperintah ma kaum Israꞌèl#1:33 kaum Israꞌèl Tèks asli “dékh Yakob” — maksod eh, kenèmbek waris Yakob. Yakob nak yak dòt bej kenèmbek sènꞌòy Israꞌèl. Manah tòp Allah natèrjal kenëh pay Yakob “Israꞌèl” — jadik kewarge Yakob ròb kenèmbek waris eh “kaum Israꞌèl.” sampéy bilok-bilok, dak Kerajaꞌan Eh akal tok sèj-sòj.”
34Dak Maria nachal ma melaykat nak, “Yék tok pernah isèglòg ma babeh, jadik rèk lok hal doh boléh nambelakuk?”
35Melaykat nak nasaꞌod, “Ruway Allah akal nalãj ma hãk, dak kuwase Allah Rik Paléng Balikh akal nasèrmuk ma hãk gerèk sagub nasèrmuk ma bumi. Sebab nak Kuwòt rik akal hayos nak kudus, bok akal umdéh ma Rik Nak Kuwòt Allah. 36Dak keyòkh lah: sakèy hãk Elisabet, rik umchal manang, hòj nakayod enam gechèk, yab umor eh hòj jajak. 37Sebab Allah boléh teꞌèl ilok-ilok pon.” #Jen 18:14.
38Maria nachal, “Yék doh milik Tuhan, yék ihoh ma nènchèn Eh. Perak lah nambelakuk ma yék gerèk rik hãk hachal.” Dak melaykat nak nawèk dak naperak ma Maria.
Maria nawèk natèrbuk ma Elisabet
39Kerek nak tok lamad, Maria hès nawèk ma néy kote èn Yudéya, èn kawasan pok-pok. 40Nanak namòj ma kelòj dékh Sakariya dak nachal ma Elisabet, “Selamad!” 41Bil Elisabet nakeyòkh chenarak Maria, kuwòt èn kelòj éj eh natet kuwad, dak Ruway Kudus nakuwase ma Elisabet. 42Nanak naꞌèh-éh, “Tuhan nateꞌèl méj ma hãk lebéh nòm kenèmbek bèꞌbok, dak nateꞌèl méj keꞌjèk ma kuwòt hãh! 43Wah! Hãk, amèk Tuhan yéh, halãj hamtèrbuk ma yék? Yék tok behakak untok hal méj doh nabelakuk ma yék! 44Bil yék ikeyòkh chenarak hãk, kuwòt èn kelòj éj yék naꞌadés bok natet. 45Beꞌadés lah hãk sebab hapechaye perènhod Tuhan ma hãk akal nabelakuk!”
Maria naꞌèhmah ma Tuhan
46Kerek nakeyòkh nèlchal Elisabet naꞌtèk, Maria nasaꞌod:
“Hup yék iꞌèhmah ma Tuhan rik rayak,
47dak hup yék iꞌadés geb sebab Allah, Terèsgos yék!
48Sebab Rik Nak hòj nanéh ma yék, milik Eh, yab yék tok bepenting èn mad sènꞌòy. #1 Sam 1:11.
Néh lah! Nòm puꞌdoh sampéy bilok-bilok, sènꞌòy nòm kenèmbek jaman akal umdéh yék beꞌadés,
49sebab Allah Rik Paléng Bekuwase hòj nateꞌèl gah rik rayak untok yék.
Kenëh Eh suchi.
50Nòm néy jaman ma néy jaman rik mòy,
Allah selaluk nakalõn ma sènꞌòy rik umtèng-tukh ma Rik Nak.
51Nanak hòj napèrnéh kuwase Eh nòm tènꞌèl rik rayak geb,
dak hòj nakèrlah ma umnak
rik umbelalay èn kelòj hup um.
52Nanak nabèrtaw sènꞌòy bekuwase nòm tempad umgel èn balikh, #Ayb 5:11; 12:19.
dak umnak rik tok bepenting èn mad sènꞌòy, Allah natayod mujadik rayak.
53Rik Nak nabèrhik ma sènꞌòy rik umchèꞌrok nòm nèygéy rik méj-méj,
tapik sènꞌòy kaye nakiron, dak umwèk nòm tikh tok beꞌilok.
54-55 #
Jen 17:7. #
1 Sam 2:1-10. Gerèk napèrhod ma yak dòt bej èk,
Tuhan nalãj namtulong ma sènꞌòy Israꞌèl, kaum milik Eh rik hòj napili untok musindol ma Rik Nak.
Dak tok nawèl-wel perènhod Eh untok namkalõn ma Abraham
ròb kenèmbek waris eh, sampéy bilok-bilok!”
56Maria nagel samak Elisabet kirak-kirak tigak gechèk, pas nak namak ma dékh eh.
Nèsyos Yohanès Pembaptis
57Kerek nak nalòy lah mase eh Elisabet nayos, dak nanak nayos néy kuwòt babeh. 58Dak kenèmbek kewarge eh ròb sènꞌòy rik umgel tilok ma umnak umkeyòkh rèk lok Tuhan nakalõn ma Elisabet, dak umnak umhoh umꞌadés samak rik nak.
59Bil sayẽd nak umor eh hòj lapan arik, umnak umlãj untok musunat#1:59 sunat Sènꞌòy Yahudi umsunat ma kenèmbek kuwòt babeh um, sebab Allah naꞌor umteꞌèl gerèk nak bil nateꞌèl perènhod Eh samak Abraham ròb kenèmbek sènꞌòy Israꞌèl nèng-nèng tòp. sayẽd nak, gerèk Hukom Tuhan. Dak umnak umchèn mutèrjal kenëh eh Sakariya gerèk kenëh apak eh. #Im 12:3. 60Tapik amèk eh nachal, “Hõy! Yohanès lok kenëh eh.”
61Umnak umchal ma rik nak, “Tapik tok mèk-mok néy sènꞌòy pon èn kewarge hãk bekenëh rèk nak!” 62Jadik nòm sarad umnak umtanyak ma apak sayẽd nak kenëh ilok rik nachèn namtèrjal ma kuwòt eh.
63Sakariya nasemany papan tènꞌèl dak natulis, “Kenëh eh Yohanès.” Umnak kenèmbek umbèlꞌih. 64Bil nak keꞌjèk, Sakariya dapad nabecharak wèl, dak namulak naꞌèhmah ma Allah. 65Dak kenèmbek sènꞌòy rik umgel tilok èn belah nak umtukh, dak gah nak najekh ma kenèmbek pok-pok Yudéya. 66Kenèmbek sènꞌòy rik umkèngyòkh gah nak umchal kelòj hup, “Kuwòt doh pastik akal najadik sènꞌòy rayak!” Umnak umchal gerèk nak sebab tèꞌlalah kuwase Tuhan mok samak rik nak.
Sakariya naꞌog renamal nòm Allah
67Dak Ruway Kudus nakuwase ma apak Yohanès, Sakariya, dak nanak naꞌog renamal doh:
68“Jok lah èꞌèhmah ma Tuhan,
Allah kaum Israꞌèl!
Sebab Nanak hòj nalãj untok namtèrgos kaum Eh
dak nambébas ma umnak.
69Nanak naꞌog ma èk néy Terèsgos rik bekuwase,
nòm waris sènꞌòy penili Eh Rajak Daud, rik nahoh ma nènchèn Allah.
70Nèng-nèng tòp nabi-nabi penili Tuhan hòj umtèrlòy perènhod Eh,
71akal natèrgos èk nòm mèsmus,
bok nòm kuwase sènꞌòy rik umchèsꞌẽs ma èk.
72Nèng-nèng tòp Allah napèrhod ma yak dòt bej èk namkalõn ma umnak ròb kenèmbek kaum èk.
Nanak tok nawèl-wel ma perènhod suchi Eh, dak puꞌdoh nateꞌèl ilok rik napèrhod nak.
73-74Rik Nak napèrhod napantakh ma yak dòt bej èk Abraham,
akal natèrgos èk nòm mèsmus,
supaye èk èmsindol ma Rik Nak bok tok èbegahmak ètèng-tukh,
75supaye èk èjadik kudus bok kènmën èn mad Tuhan
kenèmbek nèsgos èk.”
76Sakariya naramal wèl nachal ma Yohanès, “Dak hãk, kuwòt yék, akal hacheroh nòm Tuhan #Mal 3:1.
supaye hamtabéh nòng ma Rik Nak.
Dak akal umdéh hãk nabi Allah Rik Paléng Balikh.
77Hãk akal haꞌoglèkh ma kaum Allah rèk lok Allah namtèrgos ma umnak
bok naꞌampon dose umnak.
78-79 #
Yès 9:1. Sebab Allah èk nasayèkh bok nakalõn ma èk,
akal nachelakh beyug terèngos Eh gerèk mad is rik najuray nòm tempad balikh,
untok namchelakh sènꞌòy rik umgel èn kelòj rèhngah dak bayakh kènbes.
Dak Nanak akal napimpin jukh èk
ma chare nèbchib bema-méj.”
80Dak Yohanès naberayak dak nabetabeh kuwad ruway eh. Nanak nagel èn pantil gurun sampéy nalòy mase napèrnéh rik eh ma sènꞌòy Israꞌèl.
Currently Selected:
Lukas 1: KKT
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.
