मुध चेलर 6

सात गोड़े आलर ही चाजरना

1अबड़ा उल्‍ला नू पत्‍त'उर ही संख्‍या बग्‍गे मन्‍नुम कला हेल्‍लरा, ख़ने हिब्रू भखा कच्‍छनखर'ऊ यहुदिर ही बिड़दो नू ग्रिक भखा कच्‍छनखर'ऊ यहुदिर गनगन नना हेल्‍लरर। एन्‍देरगेका सगरो उल्‍ला ओन्‍ना-मोख़ना ख़ट्‍टो बिरी आर ही बेवार गे चाड़ पड़ारका ओन्‍ना-मोख़ना मला ख़क्‍खा लगियर। 2ताबसिले बारह गोड़े मुध चेलर होरमा पत्‍त'उरिन मिख़ियर की बाचर, “धर्मेस ही बचन प्रचार नन्‍नन अम्‍बा की ओन्‍त'अना मोख़त'अना सेवा नन्‍ना नू नमा गे ठिक मला मनो। 3औंगे अना भ'इ-बहिनरो, निम्‍हय मधे ती नेम्‍हा बोलतस ती अउर लुर ती निन्‍दका अउर होरमर ती आदर ख़क्‍खका सात गोड़े आलरिन चाजा। एम इबड़ा नलख ही जिम्‍मा आर गे चि'ओम। 4अन्‍ने ननोर होले एम गोहरारना नू अउर धर्मेस ही बचनन सिखाब'अना नलख नू लक्‍का र'ओम।”

5मुध चेलर ही विचार होरमर गे दव लग्‍गिया। औंगे आर पत्‍त'अना अउर नेम्‍हा बोलतस ती निन्‍दरका स्‍तिफनसस, फिलिपस, प्रखरसस, निकनोरस, तिमोनस, पर्मिनासस अउर एन्‍टि'ओखिया सहर ता यहुदी धरम होच्‍चका निकोला'उससिन हूँ चज्‍जियर। 6आर मुध चेलर गुसन ओन्‍दरर अउर मुध चेलर आर खतरी गोहरारर की आर म'इयाँ तम्‍हय ख़ेक्‍खन उइयर।

7एन्‍नेकी धर्मेस ही बचन बिड़रनुम केरा। यरुसलेम नू पत्‍त'उर ही गिनती और हूँ बग्‍गे मन्‍नुम केरा अउर बग्‍गे यहुदी नैगर हूँ पत्‍ताचर।

स्‍तिफनसस ही धरतारना

8स्‍तिफनसस अनुग्रह अउर सवंग ती निन्‍दियस की आलर ही मझी नू कोहाँ-कोहाँ हयकट नलख अउर चिन्‍हा गुट्‍ठी एद'आ लगियस। 9लेकिन जोक्‍क यहुदिर आस ही बिड़दो नना हेल्‍लरर, आर “अम्‍बरका आलर ही गोहड़ा” बारना यहुदिर ही सभा'एड़पा गुट्‍ठी ता अउर कुरेनी, अलेक्‍जेन्‍ड्रिया, किलिकिया अउर एसिया ता आलर रहचर। आर स्‍तिफनसस ही बिड़दो नू चोचर की आना-नखर'आ हेल्‍लरर। 10लेकिन नेम्‍हा बोलतस स्‍तिफनसस गे एन्‍ने लुर चिच्‍चस का आस कच्‍छनखर'आ लगियस होले दोसरर ने हूँ आस ही बिड़दो नना पोल्‍लर। 11ख़ने आर आलरिन एन्‍ने ब'आ गे कलेकले हुचकाचर, “एम स्‍तिफनससिन मोसस ही अउर धर्मेस ही बिड़दो नू कच्‍छनखरनन मेन्‍जकम।” 12अन्‍नेम आर आलर, यहुदिर ही अगुवर अउर मोसस ही व्‍यवस्‍था सिखाब'उरिन हूँ हुचकाचर। आर स्‍तिफनससिन धरचर की यहुदिर ही कोहाँ सभा नू ओन्‍दरर। 13आर स्‍तिफनसस ही बिड़दो नू झुट कच्‍छनखर'ऊ आलरिन हूँ ओन्‍दरर अउर बाचर, “ई आलस तो मोसस गे चिच्‍चका व्‍यवस्‍था ही बिड़दो नू अउर धर्मेस ही नेम्‍हा मन्‍दिर ही बिड़दो नू कच्‍छनखरदस। 14एम तो इस ती एन्‍ने ब'अनन मेन्‍जका र'अदम का नासरत ता येसुस धर्मेस ही मन्‍दिरन नास ननोस चि'ओस, अउर मोसस नमा गे चिच्‍चका धरम नियम गुट्‌ठिन हूँ बदल'ओस चि'ओस।” 15यहुदिर ही कोहाँ सभा नू मन्‍जका होरमा आलर स्‍तिफनससिन ख़न्‍नन गड़चर की एःरा लगियर ख़ने आस ही मुही मेर्ख़ादुतर ही मुही लेखा बिलचना एथर'आ लगिया।

Currently Selected:

मुध चेलर 6: KRUX

Highlight

Copy

Compare