मुध चेलर 4
4
यहुदिर ही कोहाँ सभा ही अगू पतरुसस अउर युहन्नस
1पतरुसस अउर युहन्नस आलर गने कच्छनखरनुम रहचर ख़ने यहुदी नैगर, धर्मेस ही मन्दिर ता सिपाहिर ही कप्तानस अउर सदुकिर आर गुसन बरचर। 2आर कयरारका रहचर एन्देरगेका पतरुसस अउर युहन्नस आलरिन सिखाब'आ लगियर का येसुस केच्चका ती उज्जा चोचका लेखा और आलर हूँ केच्चका ती उज्जा चो'ओर। 3औंगे आर पतरुसस अउर युहन्नसिन धरचर की जेहेल नू सज्जर चिच्चर। आबिरी बिड़ी पुत्तिया किरकी रहचा ख़ने आरिन दोसरा उल्ला गुटी जेहेल नू उइय्काचर। 4लेकिन आ दु'ई गोड़े मुध चेलर ही तेंगनन मेन्जकर मधे बग्गे आलर पत्ताचर अउर पत्त'ऊ आलर लगभग पाँच हजार लेखा मन्जर।
5पैरी बाकी यहुदी सासकर, मोसस ही व्यवस्था सिखाब'उर अउर यहुदी अगुवर यरुसलेम नू ख़ोड़रर। 6ई सभा नू कोहाँ यहुदी नैग हन्नासस, कैयाफस, युहन्नस, अलेक्जेन्ड्रस अउर हन्नासस ही एड़पा ता दोसरा आलर हूँ रहचर। 7आर पतरुसस अउर युहन्नसिन कोहाँ सभा ही अगू नू इजताचर की इबड़ा कत्थन मेना हेल्लरर, “निम एका सवंग ती या नेख़ाय नामे ती ई नलखन नन्जकर?”
8नेम्हा बोलतस ती निन्दरस की पतरुसस आरिन बाचस, “आलर ही सासक अउर अगुवा आलरो, 9इन्ना एम ई लेंगड़ा आलस गे ओन्टा दव नलख नन्जकादम, अदिही पत्त नू इस एकसे कोड़े मन्जस ब'आ की अदिन निम अख़'आ बेद्ददर होले, 10निम होरमर अउर इस्रा'एल ता होरमा आलर अख़'आ नेक'आ का नासरत ता येसू ख्रिस्तस ही नामे नू ई आलस कोड़े मन्जस की निम्हय अगू नू इज्जका र'अदस। निम येसुसिन क्रुस नू टंगचकर अउर धर्मेस आसिन केच्चका ती उज्जताचस। 11ई येसुस ही पत्त नुम धरमपुथी नू एन्ने लिखिरकी र'ई,
‘एका पखनन निम एड़पा कम'उर दुस्सकर,
आ पखना दुम अक्कुन जग ही मुध पखना कम्मरा।’#अस्सनापाड़ना ११८:२२
12येसुस अम्बरकी दोसरर नू बछरना मल्ला एन्देरगेका नम्हय बछरना ख़क्खा गे मेर्ख़ा ती किय्या आलर ही मझी नू दोसरा एक'अम नामे मल्ला।”
13एकाबिरी आर पतरुसस अउर युहन्नस ही मा एल्चा की कच्छनखरनन इरियर अउर इदिन अख़चर का इर मला पढ़चका अउर सधारन आलर र'अनर। इदिन इरियर की सभा ता आलर हयकट मन्जर अउर आर येसुस गने र'आ लगियर ब'आ की आर हूँ अख़चर। 14लेकिन कोड़े मन्जका लेंगड़ा आलसिन पतरुसस अउर युहन्नस गने इज्जका इरियर की आर ही बिड़दो नू एन्दरा हूँ ब'आ पोल्लर। 15औंगे आर पतरुस अउर युहन्नसिन यहुदिर ही कोहाँ सभा ती बाहरी कला गे पेसर अउर आर ताम-ताम नू सलहा नना हेल्लरर, 16अउर बाचर, “नाम ई आलरिन एन्दरा ननोत? एन्देरगेका यरुसलेम ता होरमा आलर तो इर नन्जका हयकट नलखन अख़नर। अक्कुन नाम ई कत्थन मला एकसे ब'ओत। 17लेकिन ई कत्था आलर गुसन मला बिड़र'आ नेक'आ ब'आ की आरिन अक्कू ती येसुस ही नामे नू सिखाब'आ गे अम्बा ब'आ की चेताब चि'आ पड़ार'ओ।”
18ताबसिले आर पतरुस अउर युहन्नसिन मिख़ियर की अक्कू ती येसुस ही नामे नू सिखाब'आ गे अउर कच्छनखर'आ गे अम्बा चि'आ बाचर की पेसर। 19लेकिन पतरुसस अउर युहन्नस आरिन बिड़दाचर, “निम्हय बाचका कत्थन मन'ओम का धर्मेस ही बाचका कत्थन मन'ओम? धर्मेस ही एरना नू एकदा ठिक हिके? निम अपनेम बिचार नना। 20एन्देरगेका एम एन्दरा मेन्जकम अउर एन्दरा इरकम अदी ही पत्त नू मला तेंगा की र'अम पोल्लोम।” 21इदिन मेन्जर की सभा ता आलर आरिन फेर एलेकताचर की अम्बियर चिच्चर। आर आरिन दन्डे चि'अना उपाय मला ख़क्खियर, एन्देरगेका आर इबड़ा नन्जका हयकट नलखन इरका करने होरमा आलर धर्मेस ही ओहमा नना लगियर। 22एन्देरगेका एका आलस हयकट ती कोड़े मन्तारका रहचस। आस ही उमेर चालिस बछर ती बग्गे रहचा।
पत्त'उर ही गोहरारना
23अस्ते ती अम्बरका ख़ोख़ा पतरुसस अउर युहन्नस तंग्हय संगेर गुसन केरर अउर आर यहुदी सासकर अउर अगुवर बाचका कत्थन तिंगियर चिच्चर। 24एकाबिरी आर इदिन मेन्जर, ताब आर संगेम धर्मेसिन एन्ने की गोहरारर, “अना उर्बायो, निन मेर्ख़ा, ख़ेख़ेल, समुन्दर अउर अइय्या नू र'ऊ हुरमिन कमचकय।#उरख़ाकाना २०:११; नहेम्याहस ९:६; अस्सनापाड़ना १४६:६ 25निन नेम्हा बोलतस ती एम्हय पुरखा दा'उदस ही ब'ई ती एन्ने बाचकय,
‘नन-यहुदिर एन्देरगे कयरारनर?
आलर व्यर्थ नू एन्देरगे मला बेस्स योजना गुट्ठी कमनर?
26धर्मेस ही बिड़दो नू अउर आस ही ख्रिस्तस ही बिड़दो नू ख़ेख़ेल ता बेलर चोचर,
अउर सासकर ओन्द जुट मन्जर की ख़ोड़रर।’#अस्सनापाड़ना २:१-२
27मानिम हेरोद बेलस, पन्तियस पिलातुसस, नन-यहुदिर अउर इस्रा'एली आलर निन चज्जका निंग्हय नेम्हा सेवा ननू येसू ख्रिस्तस ही बिड़दो नू ई सहर नू ख़ोड़रका र'अनर।#मत्तिस २७:१-२; मरकुस १५:१; लुकस २३:१, ७-११; युहन्नस १८:२८-२९ 28लेकिन आर निंग्हय सवंग ती अउर मने ती निन अगुतिम सोच्चका नलखन लेका नन्जर। 29अक्कू अना उर्बायो, आर ही धम्किन एःरा अउर निंग्हय सेवा ननुर गे निंग्हय बचन ड़िढ ती मेन्त'आ गे सवंग चि'आ। 30निंग्हय सेवा ननुरिन निंग्हय नेम्हा सेवक येसुस ही नामे नू बेमरहा आलरिन कोड़े नन्ना, हयकट नलख नन्ना अउर चिन्हा गुट्ठी एद'आ गे सवंग चि'आ।”
31एकाबिरी आर गोहरारर की मुन्जियर आ बिरी आ ख़ोड़रका अड्डा नुक्रा। आर होरमर नेम्हा बोलतस ती निन्दरर अउर धर्मेस ही बचन डिढ़ ती कच्छनखर'आ हेल्लरर।
पत्त'उर ही सझिया खुर्जी
32पत्त'उर ही गोहड़ा होरमर ओन्टेम जिया अउर ओन्टेम बोलता नू ओन्द मन्जका रहचर। आर मधे ने हूँ तम्हय धन-खुर्जिन एंग्हय हिके ब'आ की मला ब'आ लगियर लेकिन आर ही हुरमी चिज सझिया रहचा।#मुध चेलर २:४४-४५ 33मुध चेलर कोहाँ सवंग गने आलरिन उर्बा येसुस मानिम केच्चका ती उज्जा चोचस बाचर की गोवाह चि'आ लगियर अउर अबड़ा होरमर गे धर्मेस कोहड़े आसिस चिच्चस। 34अबड़र मधे नेका गे हूँ एन्दरुम चिज ही चाड़ मला रहचा एन्देरगेका नेका-नेका ख़ल्ल-उखड़ी या एड़पा रहचा आर अबड़न बिसा लगियर अउर ढिबन ओन्दर'आ लगियर, 35अउर मुध चेलर गुसन ओन्दर'आ चि'आ लगियर। असन नेका-नेका चाड़ मना लगिया, अदिन होरमर गे ख़ट्टा चि'आ लगियर।
36योसेफ नामे मन्जका सा'इप्रस राजी ता लेवी गोतर ता ओर्तोस रहचस, नेकन मुध चेलर बरनाबास (इदिही मने “रिझरत'ऊ आलस” हिके) नामे पिन्जका रहचर। 37आस हूँ तंग्हय ख़ल्लन बिसियस की ढिबन मुध चेलर गे चिच्चस।
Currently Selected:
मुध चेलर 4: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
