Fɔʼɔ 20
20
Bɔɔ gɛ̀ mu Masɛdonia ghɔŋbə Gili
1Ndʉʉ ndə mbyuutəmbyuutə-ɔ̄ŋ liʼ, Bɔɔ chə̀ŋ vâafɔʼɔ-Jiso, kwèʼhə bɔŋ, tíŋhə bɔŋ lɔ̀ gɛ̀ Masɛdonia. 2Ɔ kʉ̂ʉ tòʼ tíŋ hə mu biehə-ɔ̄ŋ, kwèʼhə bɔŋ nə ŋgie-yɔ́ŋyɔ́ŋ-bə, lɔ̀ gɛ̀ Gili, 3chí chɔ ndə bəchi itia. Ndə ɔ nɔʼ kə bɛ ndə məkóʼ buukwɛʼtəŋkə gɛ̀ Silia, ɔ chèʼnə mbɔ bʉə-Juubɛʼbə nɔ kə́ núu mənaa bɔ̌ŋ ɔŋ ndə məyí ɔ, ɔ lìʼ ndə məbʉ̀nə gɛ̀ tíŋ hə Masɛdonia.
4Bʉə ndə ghɔŋ bɔŋ kə gɛ̀ mɔʼɔ nɔ nə bɛ Sobata ndə ɔ lɔ̀ hə Bɛlia kə́ bɛ vaa-Bihu, Alistaku ghɔŋ Sɛkuŋndu ndə bɔ̂ŋ lɔ̀ hə Tɛsalonika, Gayo ndə ɔ lɔ̀ hə Debi, Timɔti, leʼnə Taikiku ghɔŋ Tolofimu ndə bɔ̂ŋ lɔ̀ hə Esia. 5Bʉə-bɔ̄ŋ gɛ̀ bəshʉ, gɛ̀ kʉ̀ʼ baʼa Tɔlɔs. 6C̃hîkə ndə bə yú Nchəŋtə ndə bə Kwó Bele təmə yî chɔ fɛ liʼ. Baʼa sɛŋ lɔ̀ hə Filibai kóʼ buukwɛʼtəŋkə chí fia ndə chîbə itaa, bìatə bɔŋ Tɔlɔs, baʼa bɔŋ chí chɔ ndə chîbə təkwiitia.
Ndyiʼtə mətòʼ-Bɔɔ-kə Tɔlɔs
7Kʉ̂ʉ bɛ ndə fəŋ kəchî mu vyii mbi, baʼa chə̀ŋtə ndə məgètə fɔyu-Tiekətʉ-bə, Bɔɔ kə́ lɔ̀ʼ ŋgieNyiikə, bʉʼka mbɔ ɔ tʉʼ sɛŋ gɛ̀ nə wi ndə biitə-kəchî-kə, ɔ kwə́ʼ duhəduhə tə mbi kwɔnə ndyʉndyʉ. 8Kɛʼtə nɔ kə́ báa yɔ́ŋyɔ́ŋ mu njəŋ-njaa-kweghɔʼ ndə baʼa chə̀ŋtə chɔ. 9Vaabələŋbɛʼ kə́ dùʼ chu wundu, yie-e kə́ bɛ Yutəku, ɔ nɔʼ kɛŋ bɛ́ŋ tə dɔ̀ŋnə bʉʼka Bɔɔ kə́ lɔ̀ʼ ŋgieNyiikə duhəduhə. Mbɛŋhə kʉ̂ʉ fí ghʉəʼkə-i, ɔ chóʼnə ndəŋ yuhəbə itia kweghɔʼ gwù sê, bə kə̂ chɔ̀ʼhə ɔŋ tʉ ɔ nɔʼ kwú. 10Bɔɔ shíʼ gwè, bʉ́ʉnə ndəŋ ɔŋ, bɛ̀ʼ ɔ ghɔ̀ŋ mbɔ, “Kə bii mə leʼ lə̀ŋnə fɛ, ɔ nɔ bíe ŋɛnə.” 11Ndʉʉ ndə Bɔɔ nɔʼ kə kóʼ gɛ̀ bə́ʼtə bele ghɔŋ bɔŋ kwó, ɔ kwə́ʼ tʉ bɔŋ dùhə tə mbi fíi, ɔ gɛ̀ nə wi. 12Bɔ̂ŋ gɛ̀ chunjaa nə tʉʉjyu yɔ́ŋyɔ́ŋ ghɔŋbə mbʉ vaabələŋ-ghɔ̄, ɔ kə́ bɛ ŋɛnə.
Bɔɔ fə́nə ghɔŋbə bʉəkwɛʼtəŋ Ɛfɛso
13Baʼa kóʼ buukwɛʼtəŋkə gɛ̀ bəshʉ gɛ̀ dàa Aso ndə baʼa kə́ kʉ́ʉ ndə məbɛ̀ʼ Bɔɔ chɔ baʼa bɔŋ gɛ̀ bʉʼka ɔ nɔʼ kə shʉ̀tə nɔ. Ɔ nɔ kə téʼ tʉ baʼa ndə məchìi nɔ bʉʼka mbəŋ-ɛŋ nɔ kə bɛ ndə mətòʼ sê. 14Ndʉʉ ndə baʼa bɔŋ fə́nə Aso, baʼa lʉ̀ ɔ, ɔ kóʼ mu kəbuukwɛʼtəŋ, baʼa bɔŋ gɛ̀ Mitilɛŋ. 15Baʼa kóʼ buukwɛʼtəŋkə chɔ, gɛ̀ mbi kʉ̂ʉ sɛŋ fíi baʼa shùɔ kəyəŋbɛʼ ndə i bə̀ŋhə Cheo, mbi kʉ̂ʉ bìʼ sɛŋ fíi baʼa dàa Samɔŋ, kʉ̂ʉ lɔ̀ hə chɔ mbi kʉ̂ʉ bìʼ kə sɛŋ fíi baʼa dàa Mɛlitu.
16Bɔɔ kə́ mʉ̀ʉ ndə məgwè tíŋ Ɛfɛso tíŋ bʉʼka ɔ kə kʉ̀ʉ ndə mə-leʼ-tə́nə Esia fɛ, bʉʼka ɔ nɔ kə́ lə̀ŋnə ndə mə-chʉʼ-dàa Jɛlosalɛŋ ndəŋ chî-Bɛŋntaku-kə. 17Ndʉʉ ndə ɔ kə bɛ Mɛlitu, ɔ tə́ŋ tíi bəntəŋbəshʉ-chɔshi Ɛfɛso.
18Ndʉʉ ndə bɔ̂ŋ kə gwè, ɔ ghɔ̀ŋ mbɔ, “Bəliŋ-bɔŋ, bii nɔ kínə ntɛ məchimbi-ɔ lʉ̀ hə ndəŋ fəŋ kəchî ndə mɔ gwè dàa Esia, 19kə́ fɔ̀ʼ fɔʼɔ-Tiekətʉ nə mbuɔnəbə inchəŋ, kə́ gwía bɔŋleʼ kə́ nyíɛ ŋgʉəʼ hə kəghɔ-bʉə-Juu ndə bɔ̂ŋ kə́ kʉ́ʉ ndə mənyíɛ mɔ fɛ. 20Bii nɔ kínə mbɔ mɔ kə lə̀ŋ nubɛʼkə kəghɔ-bii ndə bəkɔ i kɔ́ sii tʉ bii fɛ, kə́ dàhə bii mu bʉə ghɔŋbə chu-təlɔʼ-tə-ii. 21Mɔ kə́ fʉ̀ʼtə tʉ bʉə-Juu ghɔŋbə bʉə-Gili, te məshìe liɛŋtə-ʉə hə ndəŋ bʉ̂ʼtə-ʉə, gwè tʉ Nyii bɔŋleʼ mɔ̀ʼfyiihə-ʉə ndəŋ Tiekətʉ-yʉʼʉ Jiso, Wo ndə Nyii Kùŋ Tə́ŋ.
22“Bɔŋ nduɔ LyʉʉhəNyiikə nɔʼ chóʼ mɔ ndə məgɛ̀ Jɛlosalɛŋ təmə mɔ kínə nukə ndə i bu fyú chíe mɔ chɔ fɛ. 23Mɔ nɔ kínə haʼ mbɔ mu kəyəŋkwɛʼtəŋ təmiyɔŋ, LyʉʉhəNyiikə nɔ tʉʼ shyùu tyunəkə-ɔŋ mbɔ, chaŋ ghɔŋ ŋgʉəʼ la tʉʼ chyìi mɔ. 24Bɔŋ mbyu kənu kaa ghɔ mu nubə-ɔ̄ŋ ndə i tʉʼ fɛ̀ŋhə mɔ fɛ, təmə məchimbi-ɔ bɔŋ buŋ bɛ nubɛʼkə fɛ, yɔŋ-yə nɔ bɛ mbɔ mɔ mìʼtə fia-ɔ̄ ghɔŋbə fɔʼɔ ndə mɔ kie hə kəghɔ-Jiso Tiekətʉ, ndə məlɔ̀ʼ ntəŋjyujyu te buuŋjyu-Nyii.
25“Bɔŋ nduɔ mɔ nɔ kínə mbɔ bii bənchəŋ ndə mɔ nɔʼ lɔ̀ʼ Sɔ́ʼ-Nyii tʉ bii, bieleʼ nə bìʼ nyíɛ mbe-shʉ-ɔ fɛ. 26Nduɔ mɔ nɔ tʉʼ kʉ́ʉ shyíi bii mbɔ ghɔkə-ɔŋ nɔ bɛ ighʉ́ʉnə te fɔbʉə-wotəmiyɔŋ-kə mu bii, 27bʉʼka mbɔ mɔ kə bɔ́nə chu-ɔ ndə məshyíi bii nə nubə inchəŋ ndə bii kə kie ndə məkínə te Nyii fɛ.
28“B̈ii láa le nduɔ nə yii-yə tʉkə leʼnə bʉə bənchəŋ ndə LyʉʉhəNyiikə nɔʼ chɔ̀ʼhə bii tʉ́ʼ ndə məbɛ bəntəŋbəshʉ-bʉə, kə́ yúʼ bʉə-Nyii ndə ɔ nɔʼ nyúɔ nə yi-yə fɔbʉəkə. 29Bʉʼka mɔ nɔ kínə mbɔ ndʉʉ ndə mɔ bu lɔ̀ nɔ, bəbuu bu ŋíi mu bii, yítə bii təmə fɔkə gòʼ fɛ. 30Buŋ hə mu bii, bʉə bu fyú kə́ kíahə shʉəŋ ndəŋ lɛɛŋkə ndə mədùu vâafɔʼɔ-Jiso fyúhə hə mu bii gɛ̀ nə bɔŋ kəvia-bɔŋ.
31“B̈ii láa le, kə́ kwɛ́nə mbɔ ndəŋ ŋgʉʼhə itia mɔ kə́ káa ndə məshyùu tyunəkə-i ndʉʉnəchî ghɔŋ ndʉʉbətyuʼ nə shʉmə shʉmə-ɔŋ fɛ.
32“Nduɔ, mɔ nɔ mɛ̀ʼtə bii tʉ Nyii leʼnə ŋgiekə-i. I bu shyíi bii nə ntɛ buuŋjyu ndə ɔ kie, ndə bəkɔ i bɔ́ bii bɔŋleʼ chìi bii kie fʉʼkə ndə Nyii nɔʼ shʉ̀tə tʉ́ʼ tʉ bʉə-bi bənchəŋ ndə ɔ nɔʼ sʉ̀ bɔŋ, bɔ̂ŋ bɛ tʉ́ʉnə.
33“Ndʉʉ ndə bʉʼʉ kə bɛ mɔʼɔ, mɔ kə kʉ̀ʉ mbɔ kyʉə-wo byuunɔ ndyi-wo bɛ yɔŋ-yə fɛ. 34Bii nɔ kínə mbɔ nɔ nə bɛ ŋiikəghɔbə-ɔŋ ndə i kə́ kwáa mɔ bɔŋleʼ kwáa bʉə ndə baʼa bɔŋ kə bɛ mɔʼɔ. 35Ndə nchəŋnchəŋ bənu, mɔ nɔ kə dʉ̀ʼ tʉ bii mbɔ ndʉʉ ndə bii fɔ̀ʼ shʉ́əshʉ́ə, bii bu yaʼ kwáa bʉə-mbʉʼ. B̈ii kə́ kwɛ́nə ndə Jiso Tiekətʉ nə mbəŋ-ɛŋ kə ghɔ̀ŋ mbɔ, ‘Biʼbə nɔ tʉ bʉə ndə bɔ̂ŋ tʉʼ kɔ́ chàa bʉə ndə bɔ̂ŋ tʉʼ fífí.’”
36Ndʉʉ ndə ɔ gìe nubə-ɔ̄ŋ liʼ, ɔ bè kweʼtəbə-i sê ghɔŋ bɔŋ bənchəŋ gháaNyii. 37Bɔ̂ŋ bənchəŋ gwíatə, yá Bɔɔ bɔ́nə. 38I nɔ kɛŋ kə byʉ́ʼ bɔŋ bənchəŋ ndə ɔ gìe tʉ bɔŋ mbɔ bɔ̂ŋ bieleʼ nə bìʼ nyíɛ mbe-shʉ-i fɛ. Bɔ̂ŋ gɛ̀ tíŋhə ɔŋ chu-kəbuukwɛʼtəŋ.
Currently Selected:
Fɔʼɔ 20: bvm
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
Fɔʼɔ 20
20
Bɔɔ gɛ̀ mu Masɛdonia ghɔŋbə Gili
1Ndʉʉ ndə mbyuutəmbyuutə-ɔ̄ŋ liʼ, Bɔɔ chə̀ŋ vâafɔʼɔ-Jiso, kwèʼhə bɔŋ, tíŋhə bɔŋ lɔ̀ gɛ̀ Masɛdonia. 2Ɔ kʉ̂ʉ tòʼ tíŋ hə mu biehə-ɔ̄ŋ, kwèʼhə bɔŋ nə ŋgie-yɔ́ŋyɔ́ŋ-bə, lɔ̀ gɛ̀ Gili, 3chí chɔ ndə bəchi itia. Ndə ɔ nɔʼ kə bɛ ndə məkóʼ buukwɛʼtəŋkə gɛ̀ Silia, ɔ chèʼnə mbɔ bʉə-Juubɛʼbə nɔ kə́ núu mənaa bɔ̌ŋ ɔŋ ndə məyí ɔ, ɔ lìʼ ndə məbʉ̀nə gɛ̀ tíŋ hə Masɛdonia.
4Bʉə ndə ghɔŋ bɔŋ kə gɛ̀ mɔʼɔ nɔ nə bɛ Sobata ndə ɔ lɔ̀ hə Bɛlia kə́ bɛ vaa-Bihu, Alistaku ghɔŋ Sɛkuŋndu ndə bɔ̂ŋ lɔ̀ hə Tɛsalonika, Gayo ndə ɔ lɔ̀ hə Debi, Timɔti, leʼnə Taikiku ghɔŋ Tolofimu ndə bɔ̂ŋ lɔ̀ hə Esia. 5Bʉə-bɔ̄ŋ gɛ̀ bəshʉ, gɛ̀ kʉ̀ʼ baʼa Tɔlɔs. 6C̃hîkə ndə bə yú Nchəŋtə ndə bə Kwó Bele təmə yî chɔ fɛ liʼ. Baʼa sɛŋ lɔ̀ hə Filibai kóʼ buukwɛʼtəŋkə chí fia ndə chîbə itaa, bìatə bɔŋ Tɔlɔs, baʼa bɔŋ chí chɔ ndə chîbə təkwiitia.
Ndyiʼtə mətòʼ-Bɔɔ-kə Tɔlɔs
7Kʉ̂ʉ bɛ ndə fəŋ kəchî mu vyii mbi, baʼa chə̀ŋtə ndə məgètə fɔyu-Tiekətʉ-bə, Bɔɔ kə́ lɔ̀ʼ ŋgieNyiikə, bʉʼka mbɔ ɔ tʉʼ sɛŋ gɛ̀ nə wi ndə biitə-kəchî-kə, ɔ kwə́ʼ duhəduhə tə mbi kwɔnə ndyʉndyʉ. 8Kɛʼtə nɔ kə́ báa yɔ́ŋyɔ́ŋ mu njəŋ-njaa-kweghɔʼ ndə baʼa chə̀ŋtə chɔ. 9Vaabələŋbɛʼ kə́ dùʼ chu wundu, yie-e kə́ bɛ Yutəku, ɔ nɔʼ kɛŋ bɛ́ŋ tə dɔ̀ŋnə bʉʼka Bɔɔ kə́ lɔ̀ʼ ŋgieNyiikə duhəduhə. Mbɛŋhə kʉ̂ʉ fí ghʉəʼkə-i, ɔ chóʼnə ndəŋ yuhəbə itia kweghɔʼ gwù sê, bə kə̂ chɔ̀ʼhə ɔŋ tʉ ɔ nɔʼ kwú. 10Bɔɔ shíʼ gwè, bʉ́ʉnə ndəŋ ɔŋ, bɛ̀ʼ ɔ ghɔ̀ŋ mbɔ, “Kə bii mə leʼ lə̀ŋnə fɛ, ɔ nɔ bíe ŋɛnə.” 11Ndʉʉ ndə Bɔɔ nɔʼ kə kóʼ gɛ̀ bə́ʼtə bele ghɔŋ bɔŋ kwó, ɔ kwə́ʼ tʉ bɔŋ dùhə tə mbi fíi, ɔ gɛ̀ nə wi. 12Bɔ̂ŋ gɛ̀ chunjaa nə tʉʉjyu yɔ́ŋyɔ́ŋ ghɔŋbə mbʉ vaabələŋ-ghɔ̄, ɔ kə́ bɛ ŋɛnə.
Bɔɔ fə́nə ghɔŋbə bʉəkwɛʼtəŋ Ɛfɛso
13Baʼa kóʼ buukwɛʼtəŋkə gɛ̀ bəshʉ gɛ̀ dàa Aso ndə baʼa kə́ kʉ́ʉ ndə məbɛ̀ʼ Bɔɔ chɔ baʼa bɔŋ gɛ̀ bʉʼka ɔ nɔʼ kə shʉ̀tə nɔ. Ɔ nɔ kə téʼ tʉ baʼa ndə məchìi nɔ bʉʼka mbəŋ-ɛŋ nɔ kə bɛ ndə mətòʼ sê. 14Ndʉʉ ndə baʼa bɔŋ fə́nə Aso, baʼa lʉ̀ ɔ, ɔ kóʼ mu kəbuukwɛʼtəŋ, baʼa bɔŋ gɛ̀ Mitilɛŋ. 15Baʼa kóʼ buukwɛʼtəŋkə chɔ, gɛ̀ mbi kʉ̂ʉ sɛŋ fíi baʼa shùɔ kəyəŋbɛʼ ndə i bə̀ŋhə Cheo, mbi kʉ̂ʉ bìʼ sɛŋ fíi baʼa dàa Samɔŋ, kʉ̂ʉ lɔ̀ hə chɔ mbi kʉ̂ʉ bìʼ kə sɛŋ fíi baʼa dàa Mɛlitu.
16Bɔɔ kə́ mʉ̀ʉ ndə məgwè tíŋ Ɛfɛso tíŋ bʉʼka ɔ kə kʉ̀ʉ ndə mə-leʼ-tə́nə Esia fɛ, bʉʼka ɔ nɔ kə́ lə̀ŋnə ndə mə-chʉʼ-dàa Jɛlosalɛŋ ndəŋ chî-Bɛŋntaku-kə. 17Ndʉʉ ndə ɔ kə bɛ Mɛlitu, ɔ tə́ŋ tíi bəntəŋbəshʉ-chɔshi Ɛfɛso.
18Ndʉʉ ndə bɔ̂ŋ kə gwè, ɔ ghɔ̀ŋ mbɔ, “Bəliŋ-bɔŋ, bii nɔ kínə ntɛ məchimbi-ɔ lʉ̀ hə ndəŋ fəŋ kəchî ndə mɔ gwè dàa Esia, 19kə́ fɔ̀ʼ fɔʼɔ-Tiekətʉ nə mbuɔnəbə inchəŋ, kə́ gwía bɔŋleʼ kə́ nyíɛ ŋgʉəʼ hə kəghɔ-bʉə-Juu ndə bɔ̂ŋ kə́ kʉ́ʉ ndə mənyíɛ mɔ fɛ. 20Bii nɔ kínə mbɔ mɔ kə lə̀ŋ nubɛʼkə kəghɔ-bii ndə bəkɔ i kɔ́ sii tʉ bii fɛ, kə́ dàhə bii mu bʉə ghɔŋbə chu-təlɔʼ-tə-ii. 21Mɔ kə́ fʉ̀ʼtə tʉ bʉə-Juu ghɔŋbə bʉə-Gili, te məshìe liɛŋtə-ʉə hə ndəŋ bʉ̂ʼtə-ʉə, gwè tʉ Nyii bɔŋleʼ mɔ̀ʼfyiihə-ʉə ndəŋ Tiekətʉ-yʉʼʉ Jiso, Wo ndə Nyii Kùŋ Tə́ŋ.
22“Bɔŋ nduɔ LyʉʉhəNyiikə nɔʼ chóʼ mɔ ndə məgɛ̀ Jɛlosalɛŋ təmə mɔ kínə nukə ndə i bu fyú chíe mɔ chɔ fɛ. 23Mɔ nɔ kínə haʼ mbɔ mu kəyəŋkwɛʼtəŋ təmiyɔŋ, LyʉʉhəNyiikə nɔ tʉʼ shyùu tyunəkə-ɔŋ mbɔ, chaŋ ghɔŋ ŋgʉəʼ la tʉʼ chyìi mɔ. 24Bɔŋ mbyu kənu kaa ghɔ mu nubə-ɔ̄ŋ ndə i tʉʼ fɛ̀ŋhə mɔ fɛ, təmə məchimbi-ɔ bɔŋ buŋ bɛ nubɛʼkə fɛ, yɔŋ-yə nɔ bɛ mbɔ mɔ mìʼtə fia-ɔ̄ ghɔŋbə fɔʼɔ ndə mɔ kie hə kəghɔ-Jiso Tiekətʉ, ndə məlɔ̀ʼ ntəŋjyujyu te buuŋjyu-Nyii.
25“Bɔŋ nduɔ mɔ nɔ kínə mbɔ bii bənchəŋ ndə mɔ nɔʼ lɔ̀ʼ Sɔ́ʼ-Nyii tʉ bii, bieleʼ nə bìʼ nyíɛ mbe-shʉ-ɔ fɛ. 26Nduɔ mɔ nɔ tʉʼ kʉ́ʉ shyíi bii mbɔ ghɔkə-ɔŋ nɔ bɛ ighʉ́ʉnə te fɔbʉə-wotəmiyɔŋ-kə mu bii, 27bʉʼka mbɔ mɔ kə bɔ́nə chu-ɔ ndə məshyíi bii nə nubə inchəŋ ndə bii kə kie ndə məkínə te Nyii fɛ.
28“B̈ii láa le nduɔ nə yii-yə tʉkə leʼnə bʉə bənchəŋ ndə LyʉʉhəNyiikə nɔʼ chɔ̀ʼhə bii tʉ́ʼ ndə məbɛ bəntəŋbəshʉ-bʉə, kə́ yúʼ bʉə-Nyii ndə ɔ nɔʼ nyúɔ nə yi-yə fɔbʉəkə. 29Bʉʼka mɔ nɔ kínə mbɔ ndʉʉ ndə mɔ bu lɔ̀ nɔ, bəbuu bu ŋíi mu bii, yítə bii təmə fɔkə gòʼ fɛ. 30Buŋ hə mu bii, bʉə bu fyú kə́ kíahə shʉəŋ ndəŋ lɛɛŋkə ndə mədùu vâafɔʼɔ-Jiso fyúhə hə mu bii gɛ̀ nə bɔŋ kəvia-bɔŋ.
31“B̈ii láa le, kə́ kwɛ́nə mbɔ ndəŋ ŋgʉʼhə itia mɔ kə́ káa ndə məshyùu tyunəkə-i ndʉʉnəchî ghɔŋ ndʉʉbətyuʼ nə shʉmə shʉmə-ɔŋ fɛ.
32“Nduɔ, mɔ nɔ mɛ̀ʼtə bii tʉ Nyii leʼnə ŋgiekə-i. I bu shyíi bii nə ntɛ buuŋjyu ndə ɔ kie, ndə bəkɔ i bɔ́ bii bɔŋleʼ chìi bii kie fʉʼkə ndə Nyii nɔʼ shʉ̀tə tʉ́ʼ tʉ bʉə-bi bənchəŋ ndə ɔ nɔʼ sʉ̀ bɔŋ, bɔ̂ŋ bɛ tʉ́ʉnə.
33“Ndʉʉ ndə bʉʼʉ kə bɛ mɔʼɔ, mɔ kə kʉ̀ʉ mbɔ kyʉə-wo byuunɔ ndyi-wo bɛ yɔŋ-yə fɛ. 34Bii nɔ kínə mbɔ nɔ nə bɛ ŋiikəghɔbə-ɔŋ ndə i kə́ kwáa mɔ bɔŋleʼ kwáa bʉə ndə baʼa bɔŋ kə bɛ mɔʼɔ. 35Ndə nchəŋnchəŋ bənu, mɔ nɔ kə dʉ̀ʼ tʉ bii mbɔ ndʉʉ ndə bii fɔ̀ʼ shʉ́əshʉ́ə, bii bu yaʼ kwáa bʉə-mbʉʼ. B̈ii kə́ kwɛ́nə ndə Jiso Tiekətʉ nə mbəŋ-ɛŋ kə ghɔ̀ŋ mbɔ, ‘Biʼbə nɔ tʉ bʉə ndə bɔ̂ŋ tʉʼ kɔ́ chàa bʉə ndə bɔ̂ŋ tʉʼ fífí.’”
36Ndʉʉ ndə ɔ gìe nubə-ɔ̄ŋ liʼ, ɔ bè kweʼtəbə-i sê ghɔŋ bɔŋ bənchəŋ gháaNyii. 37Bɔ̂ŋ bənchəŋ gwíatə, yá Bɔɔ bɔ́nə. 38I nɔ kɛŋ kə byʉ́ʼ bɔŋ bənchəŋ ndə ɔ gìe tʉ bɔŋ mbɔ bɔ̂ŋ bieleʼ nə bìʼ nyíɛ mbe-shʉ-i fɛ. Bɔ̂ŋ gɛ̀ tíŋhə ɔŋ chu-kəbuukwɛʼtəŋ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.