Luka 7
7
1 #
Mat 8:5-13. Nakedaunia akekiro kere kopupete ituŋa, koloma Kaparanaum, 2#Yok 4:47. Keiai ekapolokiton-erioŋet ekebulesit lokemina noi, lokedeka eapikinit airidakin, 3Nakiiraria ŋol eemut loka Yesu, kiyakia imakio luka Iyudayan ailip ŋes abunore aitaŋaleun ekebulesit. 4Nakedolioto kesi mama ejai Yesu, kiŋaiŋaata noi, kobalas ebe, “Ibus ŋesi, kiswamaki nu: 5naarai emin awokoteker, kidukok sio akositukos.” 6Kouparos Yesu kakes, Nakeapikinia etogoke, kiyakik ekapolokiton ikepapero kotema atiar, “Ejakait, sirikitaar: naarai mam eoŋ kebusakinit jo alomun kwap kekaswi. 7Ŋes mam aomitor aibusakin abunore mamakon: konye kolim akirot bon, eŋaleuni ekatelepat. 8Naarai eoŋ da arai etuŋanan lokayaitai, ejaas iserikalei luayait eoŋ: ido alimokini ediopet ebe, ‘Kolot’, elosi; ece da ebe, ‘Bia,’ ebuni; ekabulesit da ebe, ‘Kiswama na,’ ido iswamai.” 9Nakiiraria Yesu akiro ŋun, koumok kanukeŋ, kibelokin kolimok ekodet loketupit ŋes ebe, “Katemari yes atiar, Mam lem adumunit aiyuun naepol naetia na, karaida toma Isirael kere.” 10Nakeboŋoriata lueyakunitai ore, kodumut ebulesit keŋaleu.
11Kosodi kanen ketubor apak naedit kolot ore loenyaritai Nain, koupas ikekesisiak kaŋes ka ekodet loepol. 12#Luk 8:42; 1 Ika 17:17. Nakeapiaria orute loka ere, koany, kibwokunitai lokatwan kiŋa, lokerai loteluna, totoke da kerai apuserut: kejaas ituŋa luipu lukore nenipe kaŋes. 13Nakeanyunia Ejakait ŋin kitim, kotema ŋes atiar, “Sirikimony.” 14Kikunyak kotiro ekirigi lokibwokitere, kobwout lukibwokito. Kotema atiar, “Etelepat, katemari jo atiar, Konyou.” 15#1 Ika 17:23; 2 Ika 4:36. Kiboikin lokatwan kogeu einer. Koinak ŋes totoke, 16#Luk 1:68; 19:44. Kokuriakaros kere; kitopoloosi Edeke, kobalas ebe, “Atakanu cama enabi lokapolon kamawok!” ebe da, “Aanyana Edeke iketuŋol” 17Kisiarakinos akiro ŋun toma Yudaya kere, ka akwap kere naidunyatar.
18 #
Mat 11:2-19. Apotu ikesisiak luka Yokana kolimokis ŋes akiro ŋun kere. 19#Sab 40:7; 118:26; Mal 3:1; Dan 9:26. Kenyarau Yokana iarei kokesisiakake kiyakia mama ejai Ejakait, iŋisit ebe, “Irai kereka ijo ŋol loebunit, arai bo kedarata ece?” 20Nakedolioto ituŋa mamakeŋ, kobalas ebe, “Kijukunit Yokana Lokebatisan sio mamakon iŋisit ebe, ‘Irai kereka ijo ŋol Iocbunit, arai bo kedarata ece?’ ” 21Kosawa kaŋol kitaŋaleu luipu akecedekesia, ka ican ka imoyon lueroko; koinak imudukiok luipu aanyun. 22#Isa 35:5-6; 61:1. Koboŋok kotema kes atiar, “Koloto, kolimokis Yokana ŋun nuianyut ka nuiirarito da; ekwenyunete imudukiok, elosete iŋwalasik, iswagio lukatapon, epupete ikimiŋiok, itajario lukatwak, elimonokinio da lukican akiro nukajokak. 23Isirereŋitoi da ŋol lomam itiguikin kanukaŋ.”
24Kosodi kedaut ikiyakia luka Yokana alosit, kogeu alimokin ikodeta nuka Yokana ebe, “Kilomarete alosit amodiŋ aanyun inyo? Egada lokijaŋijaŋ! ekwam? 25Konye bo kilomarete asesen inyo? Etuŋanan lokenapit anapito naanebek? Koany, luisiritoi kaluibusak, luenyamete da luetaitaete, ejaas toma alaroi nuka ikabakan. 26#Luk 1:76. Konye kilomarete asesen inyo? Enabi? Eebo, katemari yes atiar, loitelekarit enabi. 27#Mal 3:1. Ŋol ŋes iwadikatere nu ebe,
‘Koany, ejukari ekakiyakia kakonyenekon,
Loitemonokini ekonirot kakonyenekon.’
28 #
Luk 1:15. Katemari yes atiar, Kotoma lukeuriete aŋor emamei yenepol aitelekarit Yokana: konye loedit kotoma ajakanut naka Edeke ŋes epol aitelekarit ŋes.” 29#Mat 21:32; Luk 3:7,12. (Nakiirariata ituŋa kere, ka iketelemak esolo da, kitogogoŋoto adolit naka Edeke, naarai kibatisauna kaibatisa naka Yokana. 30#Asw 13:46. Konye koŋeroto Iparisayon ka iricakisila ainerun naka Edeke, naarai mam apotu kibatisaunos kamakeŋ.)
31“Aso do etupusi kinyo ituŋa luka atur kana, eputosi kesi kinyo? 32Eputosi kidwe luiboiete kagwelanaret, konyaras, kobalas ebe,
‘Kikut alamarun, mam yes esoma;
Kibwolol, mam yes emonya.’
33 #
Luk 15:2. Naarai kobu Yokana Lokebatisan komam enyami karaida aimat ebino; ibalasi yesi ebe, ‘Ejai ajokit’. 34Kobu Okoku loka etuŋanan enyami emasi da; ibalasi yesi ebe, ‘Koany, ekeraŋat lo, ekameran da, epapero loka iketelemak esolo ka ikadiakanarak!’ 35Konye ikedwe kere kes itojokere Acoa.”
36 #
Luk 11:37. Kosodi konyara ediopet koParisayon Yesu aimor kaŋes. Koloma togo loka Eparisayot, kiboikin ainyam. 37#Mat 26:7-13; Mk 14:3; Yok 12:3-8. Ido koany, kepupu aberu nakore kaŋol, nakerai nakadiakanaran ebe eboikin togo loka Eparisayot ainyam, koyau ekube loka akinyet; 38#Mat 26:7-13; Yok 12:3-8. kobwo kokauke koapie kakejeke, emonyi, kogeu aitodoonokin akiyo akejeke, koninana kitima luka akouke, konu akejeke, kinyonyoanak akinyet. 39Keanyu Eparisayot lokenyararit, kotema kotauke atiar, “Arai kerai etuŋanan lo enabi, tikejenu aberu ŋin erai iŋai, ido nakepone enyoin, naetironori ŋes, naarai erai nakadiakanaran.” 40Koboŋok Yesu kotema atiar, “Simon, ejai akirot naakoto alimokin jo.” Kotema atiar, “Aso, Ekesisianakinan, kiner.” 41Kotema atiar, “Kejaas etuŋanan kalukapesen iarei; kiburai ediopet adenarin akwat akany, lokiareit da akaisakany. 42Amameete kes nutacet, abu kitim kes kere iarei. Kotoma kes luarei, iŋai bo eminuni ŋes aitelekarit?” 43Koboŋok Simon ebe, “Aomit ebe je lokisionio nuipu.” Kotema ŋes atiar, “Itub kotenan.” 44#Age 18:4. Kibelokin mama ejai aberu kotema ŋesi Simon atiar, “Iany ijo aberu na? Alom eoŋ togokon, mam jo einakina akipi nuka akejeka, konye na etodoonoki akiyo akejeka ka anina da kitimake. 45#Rom 16:16. Mam jo ibu konu eoŋ, konye ameun napenan alomunia mam na inyeina ainu noi akakeje. 46Mam jo ibu kinyonyo akinyet akouka, konye na enyonyo akinyet akejeka, 47Kanuka ŋun katemari jo atiar, Isionio akediakanareta nuipu, naarai epol akemin; konye yenisionio nuikidioko, edit akemin.” 48#Luk 5:20,21. Kotema ŋesi ŋin atiar, “Esionii akonidiakanareta.” 49Kosodete kogeutu lukemorete kaŋes atemanar atiar, “Iŋai ca lo, loisioniei adiakanareta?” 50#Luk 8:48; 17:19; 18:42. Kotema ŋesi aberu atiar, “Kitajar jo akoniiyuun; kolot inapakina.”
Currently Selected:
Luka 7: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.