Igalatian 2
2
1 #
Asw 11:30; 15:2. Kosodi akaulo naka ikar itomon kaluoŋon abu kadoka bobo Yerusalem, nepepe ka Baranaba, kayaŋaasi da Tito nenipe kasio, 2#Gal 6:9. Konye abu kadoka kanuka apukokinio; ido abu kapesik kes Akiro
Nukajokak nualimonokinit Imo, konye kaiyeiyea kakonyen nuka ŋul kaluecamunitai, kenyek asubit bala akeri, arai bo abu kaker atitai. 3#Asw 16:3. Konye Tito da lokijaa keoŋ, karaida erai Eyonanit, mam kitiŋaikinitai akepio. 4#Asw 15:1,24. Konye kanuka iinacan lukeŋalak lukitolomunitai kaiyeiyea, lualomunito airot aosikiniowok nakijaar kotoma Kristo Yesu, tetere kitubulesenete oni, 5#Gal 3:1. mam kipou kacamut anonokikin kes nepecep da, tetere kisalakini yes abeit naka Akiro Nukajokak. 6#Ikis 10:17. Konye kama kaŋul kaluecamunitai araut lukapolok, (kwape ejaatar kesi, mam eoŋ apodo; mam Edeke etiaki kotuŋa), mam ŋul luecamunitai apotu keyatakis eoŋ adiokirot, 7#Asw 9:15; 15:12; 22:21. konye kepuwai nakeanyuniata ebe aponi ketitiŋi Akiro Nukajokak alimonokin lumam ekepitai, kwape Petero da luekepitai, 8(naarai ŋol loiswamakinit Petero ekiyakiane mama ejaas luekepitai, ŋes keswamakinit eoŋ da mama ejaas Imo,) 9#Yok 1:42. nakejenuniata da asianut nakainakinitai eoŋ, apotu Yakob, ka Kepa, ka Yokana, luecamunitai araut ipirin, kainakis eoŋ ka Baranaba akan nakoteten naka eidicane, tetere kilosi isio mama ejaas Imo, konye kes mama ejaas luekepitai. 10#Asw 11:30; 12:25. Konye kokotosi sio aiitunite, lukican, akirot ŋin da nakadunyakinit aswam.
11Konye nakebunio Kepa Antiokia, abu kerebok ŋes atereikina, naarai kitelekarito ŋes akiro. 12#Asw 11:3. Naarai eriŋa ituŋa ice epona kama ka Yakob, abu komor ainyam nepepe ka Imo; konye nakedolunioto kesi, abu kikunya kogitar bon, ekuriana luekepitai. 13Kijoseikis da lyudayan ice kere nepepe kaŋes, kiton Baranaba da ayaŋaario kesoswaikec. 14Konye naabu kaanyunia ebe mam kes etenete kabeit naka Akiro Nukajokak, abu kalimok Kepa kakonyenekec kere ebe, “Arai jo loirai Eyudayat, itupi iponesio luka Imo, kwabo mam itupi luka Iyudayan, ikwaikini ai itiŋaikini Imo atupar iponesio luka Iyudayan?” 15Isio lukirai Iyudayan kauruunet kwabo mere Imo lukadiakanarak, 16#Sab 143:2; Rom 3:20,22,28; 4:5; 11:6; Asw 15:10,11; Pes 2:8. konye kijeni ebe mam ituŋanan itojokio araun yenedolit kanuka aswamisio nuka ikisila, dimarai kanuka aiyuun Kristo Yesu, isio da kipou keyuut Kristo Yesu, tetere kitojokio araut luedolito kanuka aiyuun Kristo, kwabo mere kanuka aswamisio nuka ikisila; naarai kanuka aswamisio nuka ikisila emamei yenejai akuan yenitojokio araun yenedolit. 17Konye arai nakimootor aitojokio araun lukidolit kotoma Kristo, kitakanuni kirai ikadiakanarak, erai kereka Kristo ekejaanakinan loka adiakar? Madi akuj! 18Naarai arai aduki bobo ŋun nuabu kamudia, etogogoŋi ebe arai ekebucaran. 19#Rom 7:6. Naarai kanuka ikisila abu eoŋ katwana mama ejaas ikisila, tetere ajari mama ejai Edeke, 20#Yok 13:1; 17:23; 1 Yok 3:16; Gal 1:4. Aponi kebubukin nepepe ka Kristo; konye ajari, kwabo mere bobo eoŋ, konye ejari Kristo kotomakaŋ; aijar da naajaria kwana toma akuan, ajari toma aiyuun Okoku loka Edeke lokamina eoŋ, lokijaikin bon da kanukaŋ. 21Mam etapalauni asianut naka Edeke; naarai arai ejai adolit kanuka ikisila, aso atwana Kristo atitai.
Currently Selected:
Igalatian 2: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.