Matayo 21

Yesu nakigodha ka Yelusalemu bhia Sali̱a

(Maliko 11:1-11; Luka 19:28-40; Yohana 12:12-19)

1Ka bwile injo, Yesu na bhaegi̱ ndibhaki ndia bhabha ka godhabho ka tau̱ni̱ ndia ka Yelusalemu, bhaduwa ka tau̱ni̱ ndia ka Bbeti̱fagi̱ ka gu̱si̱a ndia ali na mili ndia bhakigiagaku̱ Oli̱va. Yesu nakibhutika bhebhali ka bhaegi̱ ndibhaki, 2nakibhugia bhiyo; “Bhu̱ye ka ngongwa-mbi̱li̱ ndia ali namusa sanu̱, bhukuntakana nibhankpangbi̱ ndogoi̱ mindia amuli na mi̱ki̱ nekpengbu̱ saki, bhubhukudhe bhu̱bhu̱bi̱ki̱se kami. 3Nkpa poni kabhuolu̱li̱a, bhuntolie eti Sali̱a aki̱ti̱ki̱ ndiye toli̱ aki̱bhu̱si̱ki̱sa yau̱.”

4Yesu akola yoho poni tu̱mi̱sa ndia bhanabbi̱ bhaonga ndia bhagia bhiyo;

5“Bhubhutolie bhakpa ndibha ka Sayu̱ni̱ eti,

bhu̱nzi̱be, Sali̱a mindianu̱ ali kabi̱kaki

‘adhoti̱a toli̱ andai̱ mu̱ku̱a ndogoi̱.’ ”#Zakaliya 9:9

6Bhaegi̱ bhehe bhai̱ya nibhakikola nesi̱ Yesu abhulagi̱li̱o. 7Bhambi̱ki̱sa mu̱ku̱a ndogoi̱ na amaki nibhakimualabe gandula ndiabho andu̱lu̱ Yesu ali̱ki̱dhi̱e. 8Bi̱ya bhakpa nibhakiala gandula ndiabho ka nesi̱yo, ndibhetolo nibhakizomba kongu̱bho tobhoi̱ nibhakiala ka nesi̱yo. 9Bi̱ya bhakpa ndibha bhabhi̱ namusa na nambu̱sa Yesu bhai̱ya nibhakihabhaga bhiyo;

“Hozana,#21:9 Hozana Ka Kuhebbulania makulu si̱ ali Sinda. Nana Dhau̱dhi̱.

Ali na nki̱sa minjo mindia aki̱bi̱kaga ka mani̱ ndia Mambombi̱.#Zabbu̱li̱ 118:26

Mambombi̱ mindia ali gulu si̱ni̱, okizune.”

10Yesu ndia agodha ka Yelusalemu, tau̱ni̱ poni naki̱tu̱mi̱ana bhakpa nibhadhedhelu̱ toli̱ nibhakiolu̱li̱a bhiyo; “Miyo andi ani̱?”

11Bi̱ya bhakpa nibhaki̱si̱ki̱aku̱ bhiyo; “Miyo andi nabbi̱ Yesu mindia atu̱ki̱ ka tau̱ni̱ ndia ka Nazaleti̱ ndia ka Galilaya.”

Yesu naki̱ya ka Hekalo

(Maliko 11:15-19; Luka 19:45-48; Yohana 2:13-22)

12Yesu agodha ka mulima-bala sa Hekalo nakibhubhiyaku̱ bhakpa bhoponi ndibha bhabha ka sumbesiliaku̱ na sumbiliai̱ku̱ kima. Naki̱tu̱li̱kaga meza ndia bhahi̱ngi̱ mbangana yabhakoli̱saga na mbata ndia bhenjo ndibha bhabha ka sumbesiliaku̱ bhapi̱so. 13Yesu nakibhugia bhiyo; “Bhahandi̱ki̱ bhiyo; ‘Ndabho ndiamo bhada kigiaku̱ ndabho sa sabiliai̱ku̱, no bhuli ka dhua nakibha ndabho kindia bhasuma bhakyesomiliaga.’ ”#Yelemiya 7:11

14Bhakpa ndibha yabhalamali̱o na ndibha yabhadhakanagi̱ i̱so bhabi̱ka kindia Yesu ka Hekalo toli̱ nakibhulami̱sa. 15No bhabhembi̱ bhangbeku ndibha Mambombi̱ na bhaegesi̱ sa kilagilo ndia Mambombi̱ ampesi̱a Musa ndia bhatangia kima ndia akitina nki̱li̱ ndia Yesu akola na bhani̱ki̱ nibhalia kihabhaga ka mulima-bala sa Hekalo bhiyo; “Hozana nana Dhau̱dhi̱.” Bhabhembi̱ bhangbeku na bhaegesi̱ sa kilagilo nibhakizigidhilua.

16Nibhakimuolu̱li̱a Yesu bhiyo; “Oʼki̱ ndia bhani̱ki̱ bhehe bhali ka ongai̱?”

Yesu naki̱bhu̱si̱ki̱aku̱ bhiyo; “Ni̱oki̱a, bhu̱ku̱somi̱mbebe Ndia Bhahandika ndia akigiaga bhiyo; ‘Bhubhuegesi̱ bhabenje na bhadhodhodho sinda Mambombi̱.’ ”#Zabbu̱li̱ 8:2

17Du̱mbi̱ Yesu nakibhutukabe naki̱ya ka tau̱ni̱ manyeta ndia ka Bbetani̱ya kindia asiya.

Yesu nakikina mili sa mu̱ti̱ni̱

(Maliko 11:12-14, 20-24)

18U̱ma-u̱ma, Yesu ndia abha nali kasi̱ki̱aki ka tau̱ni̱ manyeta, inja nakingba. 19Ndia atangia mili sa mu̱ti̱ni̱ nekpengbu̱a nesi̱yo, naki̱ya nakiduwabe no katakanaku̱ mbu̱ka poni bhuai̱be kasamili u̱kaka. Du̱mbi̱ nakigia mili yoho bhiyo; “Kolokutodha kpetakoku̱ mbu̱ka.” Menjo mili yoho nakiotokiliabe.

20Bhaegi̱ ndibhaki ndia bhatangia yoho, nki̱li̱ nakibhutina. Nibhakiolu̱li̱a bhiyo; “Mili sa mu̱ti̱ni̱ yoho aotoki̱ bhoni̱ yau̱?”

21Yesu naki̱bhu̱si̱ki̱aku̱ bhiyo; “Ka mazima nikibhutolia eti, kabha nomu̱hi̱ki̱li̱zi̱ Mambombi̱ na mulima moti̱, kokukola ndia aenikani̱o ka mili sa mu̱ti̱ni̱ yoho u̱kaka, no okutoka lagilia gu̱si̱a yoho bhiyo; ‘Oye wemakie ke tu̱li̱,’ toli̱ akibhabhu. 22Kohi̱ki̱li̱za, okutunga poni ndio okukunga ka saba.”

Olu̱li̱a ndia agbei̱be Mani̱ ndia Yesu

(Maliko 11:27-33; Luka 20:1-8)

23Yesu ndia asi̱ki̱a ka mulima-bala sa Hekalo, toli̱ nalia kiegesa, bhabhembi̱ bhangbeku ndibha Mambombi̱ bhai̱ya nibhakimuolu̱li̱a bhiyo; “Ali ka mani̱ ti̱na ndio ogbei̱ koliliaku̱ kima injo poni? Toli̱ andi ani̱ mindia akupesi̱a mani̱ yoho?”

24Yesu naki̱bhu̱si̱ki̱aku̱ bhiyo; “Nemi nikibhuolu̱li̱a, bhu̱ku̱ni̱si̱ki̱aku̱, nikibhutolia ali ka mani̱ ndia ani̱ ndie nikikoliliagaku̱ kima injo. 25Bati̱za ndia Yohana atuka mani? Atuka kindia Mambombi̱ kedha ka bhakpa?”

Nibhakitandika olu̱li̱ana ngu̱ngu̱abho bhiyo; “Bhikigia eti, atuka gulu, akikiolu̱li̱a bhiyo; ‘Toli̱ ndia adhua nibhukukoma hi̱ki̱li̱zaki andiki?’ 26No kyeyu̱ngi̱ gia eti atuka ka bhakpa nanga bhakpa bhoponi yabhai̱bi̱ nesi̱ Yohana Mbati̱zi̱ abha nali nabbi̱.” 27Du̱mbi̱ nibhaki̱nsi̱ki̱aku̱ Yesu bhiyo; “Bhi̱ki̱bi̱.”

Yesu nakibhugia bhiyo; “Nemi kikibhutolia ka mani̱ ti̱na ndie nikikoliliagaku̱ kima injo.”

Nsi̱mo ndia Muluku na bhani̱ki̱ ndibhaki bhalu̱ku̱abho bhebhali

28Yesu nakitodha nakibhugia bhiyo; “Bhukweli̱li̱kana eki ka kima yoho? Abha nalibe muluku mindia abhi̱ na bhani̱ki̱ ndibhaki bhalu̱ku̱abho bhebhali. Nakingia ngbekuabho bhiyo; ‘Mi̱ki̱ mindiamo, oye okole ka ti̱ko sa muzabbi̱bbu̱ lelu.’

29“Mi̱ki̱ naki̱nsi̱ki̱aku̱ bhiyo; ‘Kikabhi̱ kola,’ no ka dhakililia nakihinduka naki̱ya.

30“Du̱mbi̱ muluku miyo nakingia mi̱ki̱ mindia kebhali andiahau̱ moti̱. Mi̱ki̱ naki̱nsi̱ki̱aku̱ bhiyo; ‘Nikikola aba,’ no nakikoma yaki̱ku̱. 31Ka bhebhali bhenjo mindia akola ndia abaki akabhi̱o andi ani̱?”

Nibhaki̱nsi̱ki̱aku̱ bhiyo; “Ngbekuabho akola ndiye ndia abaki akabhi̱o.” Du̱mbi̱ Yesu nakibhugia bhiyo; “Ka mazima nikibhutolia eti, bhaku̱mesi̱ musolo na bhamalaya bhakiteketa godhabho ka kusali̱a ndia Mambombi̱ bhenu̱ ndio bhukugodhi̱mbeku̱. 32Yohana abi̱ka ani̱sanu̱ nesi̱ bhugbokiliani̱ li̱kanu̱ nesi̱ Mambombi̱ akikabha bhu̱li̱ke toli̱ bhu̱ku̱mu̱hi̱ki̱li̱za, no bhaku̱mesi̱ musolo na bhamalaya nibhaki̱mu̱hi̱ki̱li̱za. Toli̱ nakabha nibhutangia yoho, bhukwesi̱ki̱aku̱ na hi̱ki̱li̱za ka egesa ndiaki.”

Nsi̱mo ndia bhapangi̱si̱ sa ti̱ko sa muzabbi̱bbu̱

(Maliko 12:1-12; Luka 20:9-19)

33Yesu nakibhugia bhabhembi̱ bhangbeku ndibha Mambombi̱ bhiyo; “Bhuokiane nsi̱mo ndietolo. Abha nalibe nkuma ti̱ko moti̱ mindia agu̱ba mbulu sa muzabbi̱bbu̱, naki̱ki̱ta ti̱ko injo na lugo toli̱ nakitungaku̱ ndeba sa kamiliagai̱ku̱ maondo tukai̱ ka muzabbi̱bbu̱. Du̱mbi̱ nakialikaku̱ ngbali, nakibhupangi̱si̱a bhapangi̱si̱ ye naki̱ya ka kyalo ndietolo. 34Bwile ndia aduwa sa kodha muzabbi̱bbu̱, nkuma ti̱ko abhutika bhakoli̱ ndibhaki eti bhai̱ye bhampesi̱e ngaluza sa hulula.

35“Bhapangi̱si̱ bhabhugba bhakoli̱ bhehe, nibhaki̱mbi̱nda moti̱ kowabho, nibhakimuola mindietolo toli̱ mindietolo nibhaki̱mbi̱ndaga na tali. 36Nkuma ti̱ko nakibhutika bhakoli̱ ndibha bhabhukoli̱ ndibha kateketa madha. Toli̱ bhapangi̱si̱ nibhakibhukola nesi̱ bhabhukola ndibha kateketa. 37Ka dhakililia nkuma ti̱ko nakintika mi̱ki̱ mindiaki mu̱lu̱ku̱aki nakigia bhiyo; ‘Ka mazima bhaki̱mbi̱saku̱ mi̱ki̱ mindiamo ngu̱ko.’

38“No bhapangi̱si̱ ndia bhantangia mi̱ki̱ mu̱lu̱ku̱aki miyo, nibhakigia bhiyo; ‘Miyo andi ngwetwa. Bhu̱bi̱ke bhudhuwe kimuole, toli̱ ki̱ki̱sa mwandu ndia abaki poni ndia akingweta.’ 39Du̱mbi̱ bhangba nibhakimumaka kansenge sa ti̱ko sa muzabbi̱bbu̱, toli̱ nibhakimuola.”

40Du̱mbi̱ Yesu nakibhuolu̱li̱a bhiyo, “Nkuma ti̱ko kabi̱ka akibhukole eki bhapangi̱si̱ bhenjo?”

41Nibhaki̱nsi̱ki̱aku̱ bhiyo; “Nkuma ti̱ko akibhuola, toli̱ akibhupangi̱sa bhakpa ndibhetolo ti̱ko injo ndibha bhaki̱li̱ka pesi̱aki ngaluza.”

42Yesu nakigia bhiyo; “Bhu̱ku̱somi̱mbebe ka Ndia Bhahandika ndia akigia bhiyo;

‘Tali ndianu̱ bhʼali̱ki̱ ndie bhukoma eti kabhongi̱,

andu̱lu̱ ndia ahagi̱ki̱ ndabho koli̱sa tali ndietolo.

Mambombi̱ akoli̱ ndiye yoho

toli̱ ali kima mabhonga kei̱soasu̱.’#21:42 Zabbu̱li̱ 118:22-23.

43“Ti̱-no nikibhutolia eti, bhakibhubhuwabe kusali̱a ndia Mambombi̱ bhabhu̱pesi̱e bhenjo ndibha bhaki̱kpeti̱sa mbu̱kasi̱. 44Nkpa poni mindia aki̱gu̱wa ka tali yoho akinzombaga toli̱ mindia tali yoho aki̱ngu̱eli̱a, aki̱mbu̱naga.”#21:44 Bbai̱bbu̱li̱ ndietolo kali na nkala yoho.

45Bhabhembi̱ bhangbeku na Bhafali̱sayo ndia bhaoka nsi̱mo ndia Yesu aongabe, nibhaki̱ba nesi̱ ali kaongabhobe. 46Bhakabha nesi̱yo sa gbaki, no nibhakibhutiya bi̱ya bhakpa nanga bhabha nibhai̱bi̱ si̱ni̱ eti Yesu abhi Nabbi̱.

Currently Selected:

Matayo 21: KWAMBA

Highlight

Copy