Matayo 15

Yesu nakiongabe egesa ndia bhatatasu̱

(Maliko 7:1-13)

1Du̱mbi̱ bemoti̱ ka bhaegesi̱ sa Kilagilo ndia Mambombi̱ ampesi̱a Musa na Bhafali̱sayo bhatuka ka tau̱ni̱ ndia ka Yelusalemu nibhaki̱ya kindia Yesu nibhakimuolu̱li̱a bhiyo; 2“Ndia akidhuaga bhaegi̱ ndibhako bhabhu̱na asi̱li̱ ndia bhatatasu̱ andiki? Bhakakyesukusaga ka kibhoko ndia bhakaliagi̱mbe.”

3Yesu naki̱bhu̱si̱ki̱aku̱ bhiyo; “Ndia akidhuaga bhu̱bhu̱na kilagilo ndia Mambombi̱ du̱mbi̱ bhu̱yeli̱a ka asi̱li̱ ndio bhukuegesaga andiki? 4Mambombi̱ agia bhiyo; ‘Ombi̱sageku̱ abako na amako ngu̱ko, toli̱ nkpa poni mindia akimuongia abaki kedha amaki loki̱ zidhi, agbokiliani̱ bhamuole.’#15:4 Tuka 20:12; Kilagilo 5:16; Tuka 21:17; Bhalevi̱ 20:9; Isaya 29:13. 5No bhukugiaga eti, kali zidhi nkpa poni kangia abaki kedha amaki bhiyo; ‘Ndie ni̱bhi̱ kakabha koniako nai̱ ni̱mpesi̱ Mambombi̱ bhia kisembo,’ 6kagbokiliani̱ bi̱saku̱ abaki kedha amaki ngu̱ko, bhukugia bhinjo bhukubhaga ni̱bhu̱komi̱ kilagilo ndia Mambombi̱ du̱mbi̱ bhu̱yeli̱a ka asi̱li̱ ndianu̱. 7Bhenu̱ bhangobhi̱a! Nabbi̱ Isaya ai̱ki̱sa ndia apesi̱a bhunabbi̱ ndia abhu̱gbei̱be ndia agia bhiyo;

8‘Bhakpa bhehe bhaki̱ni̱bi̱sagaku̱ ngu̱ko ka loki̱ u̱kaka,

no ka mulima ndiabho ndia bhakani̱bi̱si̱ku̱ ngu̱ko.

9Bhakinilami̱li̱aga kitelu,

nanga egesa ndiabho ali sa asi̱li̱ ndia bhakpa.’ ”#Isaya 29:13

Yesu nakiongabe kima ndia aki̱mu̱lu̱zaga nkpa

(Maliko 7:14-23)

10Du̱mbi̱ Yesu abhueka bi̱ya bhakpa eti bhamwebhingie, nakibhugia bhiyo; “Bhuniokiane toli̱ bhukenge ndie nikionga. 11Ndia nkpa aki̱bi̱saga nanoko kaki̱mu̱lu̱zaga, no ndia akintukaga nanoko aki̱mu̱lu̱zaga ndu̱lu̱.”

12Du̱mbi̱ bhaegi̱ nibhakimuyabe nibhakingia bhiyo; “Oi̱bi̱ nesi̱ obhu̱sobhi̱li̱li̱ Bhafali̱sayo nanga ndio ongi̱o?”

13Yesu naki̱bhu̱si̱ki̱aku̱ bhiyo; “Ndimo poni ndia Aba mindia ali gulu ndia kagu̱bi̱ bhada ki̱tu̱ba na mi̱li̱ poni. 14Bhubhudhuwe, bhali bhia bhadhakanagi̱ i̱so ndibha bhabhu̱i̱ki̱li̱ bhadhakanagi̱ i̱so dabho, toli̱ nkpa ndakanagi̱ i̱so kamuikilia ndakanagi̱ i̱so daki, bhoponi bhaki̱gu̱aga ka ki̱na.”

15Du̱mbi̱ Petelo nakingia Yesu bhiyo; “Okitolie makulu sa nsi̱mo injo.”

16Yesu nakibhuolu̱li̱a bhiyo; “Na bhenu̱ bhukukengimbe makulu sa nsi̱mo yoho? 17Bhu̱ku̱i̱bi̱ nesi̱ li̱eli̱ ndio bhukuliaga aki̱yaga ka soho du̱mbi̱ abhu̱hu̱wa ka kozo? 18No loki̱ ndia aki̱mu̱hu̱waga nkpa nanoko nantu̱ki̱ ka mulima andu̱lu̱ ndia aki̱mu̱lu̱zaga. 19Ka mulima akitukaga kau̱ kweli̱li̱kana zidhi bhia ola bhakpa, li̱ana, bhusuma, mbela na habhi̱li̱li̱a dako. 20Kima injo aki̱mu̱lu̱zaga ndu̱lu̱ nkpa. Liya liaga ndio kwesu̱ku̱si̱ ka kibhoko kaku̱ku̱lu̱zaga.”

Hi̱ki̱li̱za ndia nkali̱ Munakanani

(Maliko 7:24-30)

21Du̱mbi̱ Yesu na bhaegi̱ ndibhaki nibhakituka ka kikalo injo i̱yabho ka kyalo ndia ka Taya na Si̱doni̱. 22Nkali̱ mindia kali Mu̱yu̱daya mindia yali̱kaga ka kyalo injo naki̱ya kindia Yesu nakihabhaga bhiyo; “Sali̱a, nana Dhau̱dhi̱ onigbelie kobhu̱! Mi̱ki̱ mindiamo nkali̱aki abhubhandu̱ bhali̱mo toli̱ bhali kaeni̱saki bhu̱su̱.”

23No Yesu kansi̱ki̱aku̱ kedha toliaki loki̱ poni. Du̱mbi̱ bhaegi̱ ndibhaki nibhaki̱mbi̱kabe toli̱ nibhakinkunga bhiyo; “Ongie ai̱ye nanga ali kaoli̱sasu̱ mpebhe.”

24Du̱mbi̱ Yesu naki̱bhu̱si̱ki̱aku̱ bhiyo; “Mambombi̱ anitika ka bhakpa ndibha ka Isaleli̱ bhokaka nanga bhali bhia bhantama ndibha bhabhu̱li̱o.”

25No nkali̱ naki̱ya naki̱su̱ku̱mana ka kiguaki toli̱ nakigia bhiyo; “Sali̱a, onikonie!”

26Yesu naki̱nsi̱ki̱aku̱ bhiyo; “Kabhongi̱ pesi̱a bhambuwa li̱eli̱ ndia bhani̱ki̱.”

27Nkali̱ naki̱nsi̱ki̱aku̱ bhiyo; “Ali mazima Sali̱a, no na bhambuwa nabho bhakiliagaga ku̱mbu̱lu̱ sa li̱eli̱ ndia akitukaga gua meza ndia nkumabho nali kaliaga.”

28Yesu naki̱nsi̱ki̱aku̱ bhiyo; “Uwe nkali̱ hi̱ki̱li̱za ndiako ali sa mani̱. Nibhali̱ kola ndio oni̱ku̱ngi̱o.” Du̱mbi̱ menjo mi̱ki̱ mindiaki nakilamiliabe.

Yesu nakibhulami̱sa bi̱ya bhakpa

29Yesu nakituka ka kyalo injo naki̱ya ka ki̱si̱yo se tu̱li̱ Galilaya, nakidhaya gua gu̱si̱a naki̱li̱kaga. 30Bhakpa bi̱yabho bhabhu̱i̱sa bhalema na bhadhakani̱ i̱so na ndibha yabhakatimani̱o na bhaki̱ngi̱ na ndibhetolo bi̱yabho nibhaki̱bhu̱bi̱sa bi̱ya naye. Bhoponi nakibhulami̱sa. 31Bhakpa nki̱li̱ nakibhutina ndia bhatangia bhaki̱ngi̱ nibhakitandika onga, ndibha yabhakatimani̱o nibhakilama, bhalema nibhakitandika dhetaga na bhadhakani̱ i̱so nibhaki̱zi̱ba. Toli̱ nibhakinsinda Mambombi̱ mindia bhakpa ndibha ka Isaleli̱.

Yesu naki̱bhu̱li̱si̱a bhakpa nku̱mi̱ i̱ni̱

(Maliko 8:1-10)

32Du̱mbi̱ Yesu nakibhueka bhaegi̱ ndibhaki nakibhugia bhiyo; “Ni̱bhu̱gbei̱li̱ bhakpa bhehe kobhu̱. Bhadhaki nemi mehe tolo salo ndia bhakali̱mbe li̱eli̱ poni. Kikikabha bhai̱ye nanga inja akibhuolilia nesi̱yo.”

33Bhaegi̱ ndibhaki nibhakimuolu̱li̱a bhiyo; “Kikibhuwa mani li̱eli̱ mamadha ka kyalo ndia kali̱ku̱ bhakpa yoho?”

34Yesu nakibhuolu̱li̱a bhiyo; “Bhuli na mugati̱ nga?”

Nibhaki̱nsi̱ki̱aku̱ bhiyo; “Kili na mugati̱ ncambu̱ na bhasu̱ bhamadhiaga bhake.”

35Du̱mbi̱ nakibhugia bi̱ya bhakpa eti bhali̱ki̱ane gwabhi̱mba. 36Nakibhuwa mugati̱ ncambu̱ na bhanikia bhasu̱, naki̱zi̱ba gulu naki̱nsi̱ma Mambombi̱ nanga li̱eli̱ injo. Naki̱u̱dha mugati̱, nakibhupesi̱a bhaegi̱ ndibhaki tambula bhakpa bhenjo. 37Bhoponi nibhakiliaga toli̱ nibhaki̱ku̱ta. Du̱mbi̱ bhaegi̱ nibhakionaga kigega ncambu̱ sa mugati̱ ndia abhusaga. 38Bhakpa bhoponi ndibha bhaliaga tolo injo bhabhi̱ nku̱mi̱ i̱ni̱, ndio kobhu̱bi̱si̱be bhakali̱ na bhani̱ki̱. 39Andu̱lu̱ Yesu ndia abhulaka si̱ki̱abho kindiabho du̱mbi̱ nakidhaya bhwati̱ zabaki ka mwalo ndia ali bi̱ya na tau̱ni̱ ndia ka Magadani.

Currently Selected:

Matayo 15: KWAMBA

Highlight

Copy