Matayo 13
13
Nsi̱mo ndia nkoli̱
(Maliko 4:1-9; Luka 8:4-8)
1Ka tolo injo toto, Yesu ahu̱wa ka ndabho naki̱ya nekpengbu̱a tu̱li̱ kindia ali̱kaga nakitandika egesa. 2Bhakpa bhabho bi̱yabho, nakidhaya subha bhwati̱, naki̱li̱kaku̱ ke tu̱li̱, nakitandika egesa bhakpa nibhalia nibhatelemagi̱ ka mwalo. 3Nakibhutolia kima bi̱yai̱ ka nsi̱mo, nakigia bhiyo; “Nkoli̱ ai̱ya gu̱ba mbulu ndiaki. 4Nalia kimisa mbulu ndiaki, mbulu ndietolo naki̱gu̱wa ka nesi̱yo, toli̱ bhambu̱lu̱ nibhaki̱bi̱ka nibhakitoyaga poni. 5Mbulu ndietolo naki̱gu̱wa ka kuka kindia dhudhu yabhi̱ nke. Ahu̱wa yau̱ nanga dhudhu abhi̱ gu̱li̱. 6No mani ndia azi̱ga, nakihotoka nanga makanga bhai̱ na mi̱li̱ ndia akitoka koliai̱ ka kuka. 7Mbulu ndietolo naki̱gu̱wa ka dhudhu kindia kasamili maku̱wa-ku̱wa yatoi̱yo, toli̱ mbulu ndia ahu̱wa, kasamili maku̱wa-ku̱wa nakiola. 8Mbulu ndietolo naki̱gu̱wa ka dhudhu mabhonga, nakikpetaku̱ li̱eli̱ bi̱yai̱. 9Bhuokiane bhiani ndie nili kaongai̱.”
10Du̱mbi̱ bhaegi̱ ndibhaki nibhakimuolu̱li̱a bhiyo; “Okuongiliaga ka nsi̱mo ka ongilia bhakpa nangeki?”
11Yesu naki̱bhu̱si̱ki̱aku̱ bhiyo; “Bhenu̱ Mambombi̱ adhu̱ ni̱bhu̱ku̱i̱ba nsobho ndia agbei̱be kusali̱a ndiaki ka nsi, no bho bhakabhu̱pesi̱. 12Mindia alibe nai̱ bhada kintodhiabe toli̱ ada kimadhi̱sa, na mindia kalibe nai̱ na ndia ali nai̱ bhada kimbuwabe.” 13Yoho akidhuaga ndu̱lu̱ nionga nabho ka nsi̱mo bhiyo;
“Bhaki̱zi̱baga no bhakakitangiaga,
bhakiokaga no bhakakikengaga.” 14Yoho andu̱lu̱ ndia aki̱tu̱mi̱sa bhunabbi̱ ndia Isaya apesi̱a nakigia bhiyo;
“Bhukuokaga no bhukukukengaga.
Bhu̱ku̱zi̱baga no bhukukutangiaga,
15nanga bhakpa bhenjo mulima ndiabho ati̱gi̱kani̱a,
bhedhaki̱sagi̱ ki̱toi̱,
toli̱ nibhakyedhaki̱saga i̱so.
Bhakatandika zi̱ba na i̱so ndiabho,
bhaoka na ki̱toi̱ ndiabho,
bhakenga na bhongo ndiabho toli̱ bhesi̱ki̱aku̱, nikibhulami̱sa.”#13:15 Isaya 6:9.
16“No bhenu̱ Mambombi̱ abhupesi̱ nki̱sa. Bhu̱ku̱zi̱baga toli̱ bhuoka. 17Ka mazima nikibhutolia eti, bhanabbi̱ bi̱yabho na bhakpa ndibha bhagbokiliani̱o bhakabha tangia ndio bhutangia na oka ndio bhukuokaga no bhakatangia na okai̱.
Yesu nakibhutolia bhaegi̱ ndibhaki makulu sa nsi̱mo ndia nkoli̱
(Maliko 4:13-20; Luka 8:11-15)
18“Bhuokiane makulu sa nsi̱mo ndia nkoli̱. 19Nkpa poni kaoka kigambo ndia agbei̱be kusali̱a ndia Mambombi̱ toli̱ amulema kengai̱ ali bhia mbulu ndia agu̱wa nesi̱yo. Sitani aki̱bi̱kaga ai̱sa kigambo ndia Mambombi̱ abi̱si̱ ka mulima ndiabho. 20Mbulu ndia agu̱wa ka kuka, andibho bhakpa ndibha bhakiokaga kigambo ndia agbei̱be kusali̱a ndia Mambombi̱ nibhadhedhelu̱ katuka okai̱ bhiyo. 21No nesi̱ li̱eli̱ kakitoka lebai̱ ndia kali na mi̱li̱ ndia adu̱eli̱o ka dhudhu andiahau̱ dhe na bhakpa ndibha bhakiteketa oka kigambo ndia Mambombi̱, no ena-bhu̱su̱ kabi̱ka nanga kigambo ndia Mambombi̱, bhatuka ka hi̱ki̱li̱za ndiabho. 22Toli̱ mbulu ndia agu̱wa ka kuka, andibho bhakpa ndibha bhakiokaga kigambo ndia Mambombi̱, no tuntula ndiabho imamoti̱ na kabha tungo adhua kigambo ndia Mambombi̱ kali̱ke ka mulima ndiabho. 23Mbulu ndia agu̱wa ka dhudhu mabhonga ndia ali na luezo, atani̱sa li̱eli̱ bi̱yai̱, andibho bhakpa ndibha bhakiokaga kigambo ndia Mambombi̱ toli̱ bhagba. Bhakikolaga kima mabhonga bi̱yai̱, tabhi mbulu ndia akpeti̱sa li̱eli̱ bi̱yai̱.”
Nsi̱mo sa kasamili ka ti̱ko
24Yesu nakibhutolia nsi̱mo ndietolo bhiyo; “Kusali̱a ndia Mambombi̱ ali bhia muluku mindia agu̱ba mbulu mabhonga ka ti̱ko ndiaki. 25Tolo moti̱ abha nali ki̱li̱ya bhakoli̱ nibhalali̱, ngi̱gu̱ ai̱ya naki̱gu̱ba lu̱mbu̱-lu̱mbu̱#13:25 lu̱mbu̱-lu̱mbu̱ Yoho ali kasamili ndia enyagi̱ ngano. ka ti̱ko sa ngano naki̱si̱ki̱aku̱. 26Ngano ndia atuwa toli̱ nakikpeta, du̱mbi̱ lu̱mbu̱-lu̱mbu̱ nakienikana.
27“Bhakoli̱ ndibha nkuma ti̱ko nibhaki̱bi̱ka olu̱li̱aki bhiyo; Nkumasu̱, ogu̱ba mbulu mabhonga sa ngano ka ti̱ko, toli̱ kasamili atuka mani?
28“Naki̱bhu̱si̱ki̱aku̱ bhiyo; ‘Minjo ali ngi̱gu̱ mindia akola injo.’ Nibhakimuolu̱li̱a bhiyo; ‘Okukabha ki̱ye ki̱tu̱bageku̱?’
29“Naki̱bhu̱si̱ki̱aku̱ bhiyo; ‘Bba,’ nanga bhu̱tu̱bi̱li̱agaku̱ na ngano. 30Bhudhuwe ngano na kasamili u̱poni abombilie imamoti̱ doi̱sa ni̱ki̱kesi̱. Du̱mbi̱ nida kibhutolia bhakesi̱ bhatekete bhatu̱bageku̱ kasamili toli̱ bhasumbe andu̱lu̱ bhasenge ngano bhabi̱se ka nguli.”
Nsi̱mo sa mbulu madhiaga si̱ni̱ na ki̱tu̱mbi̱so
31Yesu nakibhutoliabe nsi̱mo ndietolo sa mbulu madhiaga si̱ni̱ bhiyo; “Kusali̱a ndia gulu ali bhia mbulu madhiaga si̱ni̱ sa mili sa bhilala ndia bhakigiagaku̱ kali̱dali̱#13:31 Kali̱dali̱ ali mili sa bhilala ka Isaleli̱ ndia ali na mbulu madhiaga si̱ni̱. ndia muluku ai̱sa gu̱bai̱ ka ti̱ko ndiaki, 32andu̱lu̱ mbulu madhiaga ka mbulu poni, no ka bomba, akinyetaga koli̱sa mili poni, du̱mbi̱ bhambu̱lu̱ bhabi̱ka bhaʼlika ka kpata si̱.”
33Atodha nakibhutolia nsi̱mo ndietolo bhiyo; “Kusali̱a ndia gulu ali bhia ki̱tu̱mbi̱so ndia nkali̱ abi̱sa ka bi̱ya ntu̱bu̱ sa ngano doi̱sa ndia adhakiaga ntu̱bu̱.”
34Yesu abhuongilia bi̱ya bhakpa kima injo poni ka nsi̱mo, kalibe ndia kabhi̱ kiongaga ndia kali ka nsi̱mo. 35Yoho abhi̱ ka tu̱mi̱sa ndia nabbi̱ aonga bhiyo;
“Nikiongilia ka nsi̱mo,
Nikibhutolia kima poni ndia bhasomi̱a tukilia kindia Mambombi̱ ahanga nsi.”#13:35 Zabbu̱li̱ 78:2.
Yesu nakibhutolia bhakpa makulu sa nsi̱mo sa kasamili ka ti̱ko.
36Du̱mbi̱ Yesu abhutukabe bi̱ya bhakpa bhenjo, naki̱ya ka i̱nji̱ kindia yali̱kaga. Bhaegi̱ ndibhaki nibhakingia bhiyo; “Okitolie makulu sa nsi̱mo sa kasamili ka ti̱ko.”
37Yesu naki̱bhu̱si̱ki̱aku̱ bhiyo; “Mi̱ki̱ mindia Nkpa andiye mindia agu̱ba mbulu mabhonga.” 38Ti̱ko andu̱lu̱ nsi, toli̱ mbulu mabhonga andibho bhakpa ndibha bhepesi̱aku̱ ka kusali̱a ndia Mambombi̱. Kasamili andibho bhakpa ndibha Mubi. 39Ngi̱gu̱ mindia agu̱ba kasamili ka ti̱ko sa ngano ali sitani. Kesa andu̱lu̱ mpelo sa nsi, toli̱ bhakesi̱ andibho bhamalai̱ka.
40Nesi̱ kasamili bhakibhagalaga na su̱mbai̱, ada kibha bhinjo na bhakpa ndibha sitani ka tolo sa mpelo. 41Mi̱ki̱ mindia Nkpa ada kibhutika bhamalai̱ka ndibhaki tukabho gulu toli̱ bhakpa ndibha bhakidhuaga ndibhetolo bhakola kibi na bhakoli̱ kibi, bhada kibhubhuwa ka kusali̱a ndiaki. 42Bhada kibhumaka ka kala sa mani̱ kindia ada kibha ngamu na kwebhabhu̱a ngaga. 43Ndibha bhagbokiliani̱o bhada kibebenia bhia mani ka kusali̱a ndia Ababho Mambombi̱. Mindia ali na ki̱toi̱, aoke.
Nsi̱mo sa tungo ndia bhasomi̱a ka ti̱ko
44“Kusali̱a ndia gulu ali bhia tungo ndia bhasomi̱a ka ti̱ko. Nkoli̱ ndia atangia kindia yabhasomi̱o, naye nakitodha nakisomi̱a kindietolo, du̱mbi̱ na dhedhelua ndiaki ai̱ya nakisumbesa kima ndiaki poni nakisumba ti̱ko injo.”
Nsi̱mo sa tali sa mugaso
45Yesu atodha nakigia bhiyo; “Kusali̱a ndia gulu ali bhia nsu̱bu̱li̱ mindia ali kakabha tali sa bbei̱. 46Ndia atangia tali moti̱ sa bbei̱ si̱ni̱, ai̱ya nakisumbesa kima ndiaki poni nakisumba tali injo.
Nsi̱mo sa kati̱mba sa bhasu̱
47“Yesu atodha nakigia bhiyo; Kusali̱a ndia gulu ali bhia kati̱mba ndia bhakilekaga ke tu̱li̱ abhugba bhasu̱ i̱ya-i̱ya. 48Bhasu̱ ndia bhatu̱ma ka kati̱mba, bhakomani̱ nibhakitandika bhula kati̱mba bhuwai̱ ke tu̱li̱ i̱sai̱ ka mwalo, du̱mbi̱ nibhaki̱li̱kaga bhuaku̱ bhasu̱ bhamabhongaga nibhalia ki̱bhu̱bi̱sa ka zalu toli̱ ndibha bhakabhongi̱ nibhalia kibhumaka. 49Ada kibha bhinjo ka bwile sa mpelo. Mambombi̱ ada kibhutika bhamalai̱ka ndibhaki bhuwa bhakoli̱ kibi ka bhenjo ndibha bhagbokiliani̱o 50toli̱ bhada kibhumaka ka kala sa mani̱ kindia ada kibha ngamu na kwebhabhu̱a ngaga.”
51Yesu nakibhuolu̱li̱a bhaegi̱ ndibhaki bhiyo; “Kima yoho poni bhu̱kengi̱a?”
Nibhakibhala.
52“Ti̱-no mwegesi̱ poni sa kilagilo mindia adhaki̱ bhaki mwegi̱ ka kusali̱a ndia gulu ali bhia nkuma i̱nji̱ mindia aki̱hu̱i̱saga tungo ndiaki mpiaka na zali̱ei̱ ka ndabho ndiaki.”
Bhakpa ndibha ka Nazaleti̱ nibhakinkoma Yesu
(Maliko 6:1-6; Luka 4:16-30)
53Yesu ndia adhakia egesa bhakpa ka nsi̱mo, atuka ka kikalo injo. 54Ndia aki̱dha ka tau̱ni̱ ndie kindiabho, nakitandika egesa bhakpa ka Ndabho kindia Bhayu̱daya yabhalami̱li̱aga toli̱ nki̱li̱ nakibhutina, nibhakyeolu̱li̱a bhiyo; “Muluku miyo abhua mani magezi̱ na mani̱ sa kola ndia akitina nki̱li̱?” 55“Miyo kandi mi̱ki̱ mindia mulandi̱ mbau? Amaki kandiye Mali̱ya, bhanamaki kandi Yakobbo na Yozefu na Si̱moni̱ na Yu̱da? 56Bhanyamu̱su̱aki poni bhakaki̱li̱kaga na bhesu̱ ka kyalo yoho? Toli̱ muluku miyo abhua mani magezi̱ na mani̱ yoho poni?” 57Du̱mbi̱ nibhakinkoma.
No Yesu nakibhugia bhiyo; “Nabbi̱ bhaki̱mbi̱sagaku̱ ngu̱ko ka kyalo poni bhuai̱be ka tau̱ni̱ ndie kindiaki na ka i̱nji̱ ndiaki.”
58Toli̱ kakola ndia akitina nki̱li̱ bi̱yai̱ nanga bhakoma hi̱ki̱li̱zaki.
Currently Selected:
Matayo 13: KWAMBA
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., 2025
