Bikoluwa ndia Bhakwenda 28

Paulo nali ka kizinga ndia ka Malita

1Ndie ki̱ki̱dha kulungi ka mwalo, bhakpa ndibhe kibhudwanabe bhakitolia eti kili ka kizinga ndia yabhagiagaku̱ Malita. 2Bhakpa ndibha ka Malita bhakitangililia nibhadhedhelu̱. Bhagunga kala ka mwalo toli̱ nibhakikunga eti kiote nanga mbu̱la na dekaga sa kyalo. 3Paulo abi̱ki̱sa bhukia mu̱sa naki̱bi̱sa ka kala. Njoka nakitukaku̱ nanga zunga sa kala nakingueta Paulo ka kibhoko toli̱ nakinkomilianabe. 4Bhakpa ndibha ka Malita ndia bhantangia njoka nankomi̱li̱ Paulo ka kibhoko, nibhakigia bhiyo; “Muluku miyo kamazima andi muoli̱, alama ka li̱bho no mambombi̱ sa bwi̱ngani̱za ka kilagilo kakimbali̱sana li̱ka nalia mwomezi.” 5No Paulo adhingisa kibhoko ndiaki du̱mbi̱ njoka nakimuga ka kala toli̱ kankola zidhi. 6Bhakpa bheli̱li̱kana eti Paulo kibhoko aki̱mbi̱mba kedha aku̱we no bhabhundilia dhakia saha mamadha toli̱ kalibe kima poni ndia amuenikanabe du̱mbi̱ nibhakyeli̱li̱kana eti andi mambombi̱. 7Bi̱ya na mwalo kindie ki̱ki̱dhilia abha nalibe ti̱ko ndia abha nali ndia Pabbu̱lo, sali̱a mindia ka kizinga. Akitangililia ka i̱nji̱ ndiaki nadhedhelu̱ toli̱ kidhakiaku̱ tolo salo. 8Aba Pabbu̱lo abha nali ke ima nalwali̱ muswija na sanda magila. Paulo naki̱ya zi̱baki, naki̱mbi̱sabe kibhoko, nakinsabilia du̱mbi̱ nakilama. 9Yoho ndia aenikana, ndibhetolo ndibhabhi̱ nibhalwali̱ ka kizinga bhabi̱ka kindia Paulo lami̱sabho toli̱ nibhakilama. 10Paulo ndia abhulami̱sa bhakpa bhehe, bhakiani̱sa ngu̱ko toli̱ ka tolo sa dhaya meli̱ tukasu̱ku̱, bhaki̱pesi̱a kima poni ndie kibha kakabhai̱ ka gendo yoho.

Paulo naki̱ki̱dha ka Loma

11Sungi salo nalakoli̱be, bhesu̱ poni kidhaya meli̱ ndia adhakia bwile sa dekaga ka kizinga ndia ka Malita. Abha nali meli̱ natu̱ki̱ ka Alekizandu̱li̱ya ndia abhi̱be moli-moli ndia bhamambombi̱ bhalongo ndibhabhi̱ kibhugiagaku̱ Kasi̱toli̱ na Polaki̱si̱. 12Ki̱ki̱dha ka tau̱ni̱ ndia ka Si̱laku̱si̱ kindie kidhakia tolo salo. 13Ndie kituka menjo, ki̱ki̱dha ka tau̱ni̱ ndia ka Leji̱yamu̱. Tolo ndia adhabhiabe, wewelia tukai̱ yasi nakibhi̱nda toli̱ ka tolo bhali ki̱ki̱dha ka tau̱ni̱ ndia ka Pu̱toli̱. 14Menjo kibhutakanabe bhai̱ki̱li̱za ndibha bhakikunga eti kidhakie nabho wi̱ki̱ moti̱. Du̱mbi̱ ni̱ki̱ki̱ya ka Loma. 15Bhai̱ki̱li̱za ndibha ka Loma ndia bhaoka eti kili kayasu̱, bhatuka ka masela ka si̱mana ndia ka Apiyo na ndibhetolo nibhakituka ka ndabho salo kindie bhakpa ndibhali ka gendo bhakisiaga bi̱ka takanasu̱. Paulo ndia abhutangia, ansi̱ma Mambombi̱ toli̱ mani̱ naki̱nsi̱ki̱aku̱. 16Ndie ki̱ki̱dha ka Loma, bhasali̱a ndibha ka Loma bhambali̱sana Paulo eti apangise ndabho kindia aki̱li̱ka no nibhakimpa nsilikale mindia akimbundilia.

Paulo nakitebeza ka Loma

17Paulo naladhaki̱ tolo salo ka Loma, abhueka bhasali̱a ndibha Bhayu̱daya bhoponi bi̱kabho ka si̱dha-si̱dhana. Ndia bhasi̱dha-si̱dhana, abhugia bhiyo; “Bhanamami, bhasali̱a ndibha Bhayu̱daya bhadhuwa nibhakinigbelia ka Yelusalemu bhia nyankomo toli̱ nibhakinipesi̱aku̱ ka kusali̱a ndia Bhaloma ndie ki̱koli̱ kima poni zidhi ka bhakpa ndibhasu̱ kedha ongabe zidhi asi̱li̱ ndia bhatatasu̱. 18Bhaloma bhaniolu̱li̱aga ka kabha i̱ba ndie nikoli̱o toli̱ nibhakikabha eti bhanidhwelie nanga ki̱bhi̱ na musango poni ndia akidhuwa nibhakiniola. 19No Bhayu̱daya yabhakakabhi̱ eti bhanidhwelie, du̱mbi̱ ninikiju̱li̱li̱a eti bhani̱hi̱se kindia Kai̱sali̱ nanga yekikabhi̱ nyegela Bhayu̱daya dami. 20Nanga injo poni ndia abhabe, nikungi̱ eti ni̱bhu̱zi̱be toli̱ nionge na bhenu̱. Nindi nyankomo nanga ni̱mu̱hi̱ki̱li̱zi̱ Masiya mindia bhatatasu̱ Bhaisaleli̱ bhabhi̱ na nihila eti akikizuna.”

21Bhasali̱a ndibha Bhayu̱daya nibhaki̱nsi̱ki̱aku̱ Paulo bhiyo; “Bhikitungimbe bbaluwa poni ndia akugbei̱be tuka ka Yu̱deya, toli̱ kalibe Mu̱yu̱daya poni mindia alatu̱ki̱ ka Yu̱deya nyegelako kedha ongakobe kima zidhi. 22No kikikabha kioke kweli̱li̱kana ndiako nanga ki̱hi̱bi̱ nesi̱ bhakpa bhagbei̱ ongabe zidhi kpata ndia Bhanazaleni.”#28:22 Bhanazaleni Bhakpa yabhabhugiagaku̱ bhai̱ki̱li̱za ndibha Yesu mindia ka tau̱ni̱ ndia ka Nazaleti̱.

23Bhatekaniza toli̱ nibhakibhuwa tolo sa i̱ya si̱dha-si̱dhana kindia Paulo yali̱kaga. Bi̱ya bhakpa bhabi̱ka kindia Paulo nakibhutolia kigambo ndia agbei̱be kusali̱a ndia Mambombi̱ tukilia u̱ma-u̱ma doi̱sa tamabhugo-bhugo toli̱ nakikingabe liabho dhaka eti bhamu̱hi̱ki̱li̱ze Yesu nagbei̱ koli̱sa kilagilo ndia Musa na ndia bhanabbi̱ bhahandika. 24Bhakpa bemoti̱ bhahi̱ki̱li̱za ndia Paulo abhutolia, no ndibhetolo nibhakikoma. 25Bhakabhaliana ngu̱ngu̱abho du̱mbi̱ nibhakitandika yabho Paulo naladhaki̱ toliabho loki̱ sa dhakililia bhiyo; “Mwoyo Mawelikana aonga mazima ka bhatatanu̱ ndia aongilia kowa Isaya nabbi̱ bhiyo;

26‘Oye obhutolie bhakpa bhenjo bhiyo;

Bhukuoka no bhukukwetegeleza.

Bhu̱ku̱zi̱ba no bhukukutangia.

27Nanga mulima ndia bhakpa bhehe amoti̱a

toli̱ ki̱toi̱ ndiabho kakiokaga,

toli̱ i̱so ndiabho adhakania,

bhakakitoka zi̱ba,

toli̱ ki̱toi̱ ndiabho kakiokaga,

toli̱ bhakpa bhehe bhakakabhi̱ kenga,

toli̱ bhakakabhi̱ kuniesi̱ki̱si̱li̱a andu̱lu̱ nibhulami̱se.’ ”#Isaya 6:9-10

28“Ti̱-no nikikabha bhu̱i̱be eti makulu ndia Mambombi̱ ndia agbei̱be zunua bhati̱ki̱ kowa Bhakpa ndibha kali Bhayu̱daya toli̱ bhakiokiana.”

29Paulo ndia adhakia onga yoho, Bhayu̱daya nibhaki̱ya nibhagbei̱ sani̱ ngu̱ngu̱abho.#28:29 Bbai̱bbu̱li̱ ndietolo kali na nkala yoho. 30Paulo adhakia mwaka bhali ka ndabho ndia apangi̱si̱o ka Loma toli̱ yabhutangililiaga bhakpa poni ndibhabhi̱ ki̱bi̱kaga zi̱baki. 31Atebeza ndia agbei̱be kusali̱a ndia Mambombi̱ toli̱ nakiegesa ndia angbei̱be Sali̱a Yesu Ki̱li̱si̱to ndia kali na bhoko poni toli̱ ndia kalibe mindia akinkomi̱sa.

Currently Selected:

Bikoluwa ndia Bhakwenda 28: KWAMBA

Highlight

Compare

Copy