Bikoluwa ndia Bhakwenda 22

1Paulo nakibhugia bhiyo; “Bhaba na bhanamami, bhuokiane ntongani ndiamo.” 2Ndia bhamuoka nakionga nabho ka Kuhebbulania, nibhakidakiana. Du̱mbi̱ Paulo nakigia bhiyo; 3“Nindi Mu̱yu̱daya, mindia abhokotiana ka tau̱ni̱ manyeta ndia ka Talu̱so ndia ka kyalo ndia ka Ki̱li̱ki̱ya no nibombi̱li̱ ka tau̱ni̱ ndia ka Yelusalemu. Gamali̱eli̱, mweghesa ntua mani̱ si̱ni̱, aniegesa ndiye si̱ni̱ nesi̱ nigbokiliani̱ gba kilagilo ndia Mambombi̱ ampesi̱a Musa. Yeninkoliliaga Mambombi̱ nesi̱ na bhenu̱ bhuli̱o lelu. 4Nibhueni̱sa bhu̱su̱ si̱ni̱ bhakpa ndibha bhakidhetiliaga ka nesi̱yo ndia Yesu, ndibhetolo ninikibhuolisana, nilagilia eti bhabhugbe bhaluku na bhakali̱ poni nibhalia ki̱bhu̱bi̱sa ka nkomo. 5Ngbekua bhabhembi̱ ndibha Mambombi̱ na ku̱sei̱ ndia bhangbeku bhakitoka pesi̱li̱ami bwakai̱so eti ndie ni̱ongi̱o alibhu. Ngbekua bhabhembi̱ na bhangbeku ka ku̱sei̱ bhanipa bbaluwa i̱sai̱ ka Bhayu̱daya dasu̱ ndibha ka Damasi̱ko bhali̱sanami gba bhai̱ki̱li̱za poni bi̱ki̱sabho bhia bhanyankomo ka Yelusalemu ninibhubhoi̱ na njegele andu̱lu̱ bhabhufubilie.”

6“Bhia saha nkaga ndia ntangali ninilibi̱ya duwami ka Damasi̱ko, menjo kubha atuka gulu naki̱zi̱ga kindie ni̱bhi̱o.” 7Ni̱gu̱wa gwabhi̱mba ninikioka nkpa nakinigia bhiyo; “Saulo, Saulo, olika eni̱sami bhu̱su̱ nangeki?”

8Ninikiolu̱li̱a bhiyo; “Anduwe ani, Sali̱a?” Naki̱ni̱si̱ki̱aku̱ bhiyo; “Andimi Yesu mindia ka tau̱ni̱ ndia ka Nazaleti̱, mindia olika eni̱saki bhu̱su̱.ʼ 9Bhadami ndibhe ni̱bhi̱ nabho ka gendo bhatangia bemu, no bhaka i̱bi̱li̱a laso ndia nkpa mindia ali̱ka onga nemi.”

10Ninikiolu̱li̱a nikole eki Sali̱a Yesu?

Sali̱a Yesu naki̱ni̱si̱ki̱aku̱ bhiyo; “Ome, oye ka Damasi̱ko bhakukutolilia kau̱ poni ndio ogbokiliani̱ kolai̱.” 11Bhadami bhanigbeliaga nibhaki̱ni̱hi̱sa ka Damasi̱ko nanga bemu yanidhakagi i̱so.

12Muluku i̱naki nandiye Anania abi̱ka zi̱bami. Abhi̱ muluku mindia yamulami̱aga Mambombi̱ tolo poni na agbei̱ kilagilo ndia Musa toli̱ nali ntua ngu̱ko si̱ni̱ ka Bhayu̱daya. 13Anitelema naseke sami nakigia bhiyo; “Namami Saulo, i̱so aku̱oku̱dhane, du̱mbi̱ i̱so nakinioku̱dhana menjo toto.”

14“Du̱mbi̱ Anania nakinigia bhiyo; ‘Mambombi̱ mindia bhatatasu̱ yabhamulami̱aga akubhoi̱ya andu̱lu̱ oi̱be ndia akikabha eti onkolilie toli̱ ontangie Yesu mindia agbokiliani̱o na oka kigambo tuka ka nanoko ndiaki.’ 15Okubha kai̱so mindiaki ka bhakpa poni nanga kima ndio otangi̱o na ndio oki̱o. 16Andiki ndio obhu̱ndi̱li̱o? Ome, bhakubati̱ze toli̱ kibi ndiako aku̱si̱ebe nolia kusaba na sinda Yesu.”

17Ndie ni̱si̱ki̱a ka Yelusalemu, nigodha ka Hekalo ninikitandika saba. Du̱mbi̱ Mambombi̱ nakiniani̱sa kima. 18Nintangia Sali̱a Yesu kaonga nemi. Nakigia bhiyo; “Osakimane, otuke ka Yelusalemu nanga bhakpa mehe bhakakibhala bwakai̱so ndio okubhutolia ndia anigbei̱be.”

19Ni̱ni̱ki̱nsi̱ki̱aku̱ bhiyo; “Sali̱a Yesu bhakpa bhehe bhai̱bi̱ nesi̱ ni̱ya ka Ndabho kindia Bhayu̱daya yabhalami̱li̱aga ninikilagilia eti bhabhu̱bhi̱nde toli̱ bhabhu̱bi̱se bhai̱ki̱li̱za ndibhako ka nkomo.” 20Ka ola Sitefano mindia bhamuola nanga hi̱ki̱li̱za ndiaki, nitelema menjo ninikibhala eti bhamuole toli̱ ninikibhundilia ngoye ndia bhenjo ndibhabhi̱ ka olaki.

21“Du̱mbi̱ Sali̱a Yesu nakinigia bhiyo; ‘Oye nikukutika kamasela ka Bhakpa ndibha kali Bhayu̱daya.’ ”

Paulo na ngbekua bhasilikale ndibha ka Loma

22Bi̱ya bhakpa nibhakimuokiana Paulo doi̱sa kindia aongabe i̱ya ndiaki ka Bhakpa ndibha kali Bhayu̱daya. Du̱mbi̱ nibhakihabhaga nibhakigia bhiyo; “Bhumuole, bhumuole agbokiliani̱ aku̱we.”

23Nibhalia kihabhaga na makaga ngoye ndiabho imamoti̱ na hanja bu̱lu̱ gulu ani̱sa nesi̱ bhazigidhiluo, 24ngbekua bhasilikale poni nakilagilia eti bhamu̱i̱se Paulo ka nkambi̱ ndia bhasilikale. Toli̱ nakibhulagilia eti bhambi̱nde si̱ni̱ na luga na olu̱li̱agaki andu̱lu̱ ai̱be ndia adhu̱ bhakpa nibhakimuongabe zidhi. 25Ndia bhadhakia bhuwaki andu̱lu̱ bhambi̱nde, Paulo amuolu̱li̱a ngbekua bhasilikale ki̱ku̱mi̱ mindia abha natelemi̱be bhiyo; “Ali ka kilagilo uwe bhi̱nda Muloma mindia bhakampesi̱ nki̱sa sa kwetonganabe?”

26Ngbeku miyo ndia aoka yoho, naki̱ya kindia ngbekua bhasilikale bhoponi nakimuolu̱li̱a bhiyo; “Andiki ndio okaya kolai̱ injo? Muluku miyo andi Muloma.”

27Du̱mbi̱ ngbekua bhasilikale bhoponi naki̱ya kindia Paulo nakimuolu̱li̱a bhiyo; “Onitoliye, ondi Muloma?” Paulo naki̱nsi̱ki̱aku̱ “Andi mazima, nindi Muloma.”

28Du̱mbi̱ ngbekua bhasilikale nakigia bhiyo; “Nibhuwa mbangana bi̱yai̱ sasulilia bhokotiana ndiamo ka gavumenti ndia ka Loma.”

Paulo naki̱nsi̱ki̱aku̱ bhiyo; “Emi ni bhokotiana ka Loma.”

29Bhasilikale ndibhabhi̱ ka tandika olu̱li̱aga Paulo bhadhweliabe. Ngbekua bhasilikale bhoponi nakitiya si̱ni̱ ndia ai̱ba nesi̱ abhi̱ namboi̱ Muloma na njegele.

Paulo nakyetonganabe kei̱soa ku̱sei̱ ndia Bhayu̱daya

30Ngbekua bhasilikale abha kakabha i̱ba mazima toto ndia adhu̱ Bhayu̱daya nibhaki̱mbi̱sabe Paulo musango. Tolo ndia adhabhiabe, nibhakindwelia, ngbekua bhasilikale nakibhulagilia bhabhembi̱ bhangbeku na bhangbeku ndibhetolo bi̱ka ka ku̱sei̱ ndia Bhayu̱daya. Du̱mbi̱ naki̱mbi̱ki̱sa Paulo kei̱soabho.

Currently Selected:

Bikoluwa ndia Bhakwenda 22: KWAMBA

Highlight

Copy