Bikoluwa ndia Bhakwenda 10

Koloneli̱ nakintikisa Petelo

1Ka tau̱ni̱ ndia ka Kai̱sali̱ya abhi̱ku̱ muluku moti̱ i̱naki nandiye Koloneli̱, ngbekua bhasilikale ki̱ku̱mi̱ ndibha ka Itale. 2Yabhi̱ muluku mu̱i̱ki̱li̱za na i̱nji̱ ndiaki poni yamulami̱aga Mambombi̱. Yabhukoniaga si̱ni̱ bhanako toli̱ yansabaga Mambombi̱ tolo poni. 3Tolo moti̱ saha sobhi̱ ndia ntangali̱, malai̱ka mindia Mambombi̱ amuani̱sa Koloneli̱ kima, du̱mbi̱ nakimueka ka i̱na bhiyo; “Koloneli̱.”

4Du̱mbi̱ Koloneli̱ naki̱li̱ka nanzi̱bi̱li̱li̱agi̱ nali na bhoko bi̱yai̱ nakimuolu̱li̱a bhiyo; “Andiki, Sali̱a?”

Malai̱ka naki̱nsi̱ki̱aku̱ bhiyo; “Mambombi̱ aoki̱ saba ndiako toli̱ akasi̱ki̱akoku̱ nanga kima mabhonga ndio okubhupaga bhanako. 5Endindi obhutike bhaluku ka Yopa bhambi̱ki̱se muluku mindia i̱naki andiye Si̱moni̱ Petelo. 6Aki̱li̱kaga na Si̱moni̱ mwomi̱si̱ ngubu mindia ndabho ndiaki ali nekpengbu̱a tu̱li̱.”

7Malai̱ka mindia abhi̱ kaonga na Koloneli̱ ndia ai̱ya, Koloneli̱ nakibhueka bhebhali kowa bhakoli̱ ndibhaki na nsilikale mindiaki moti̱ mindia yamulami̱aga Mambombi̱. 8Nakibhutolia poni ndia aenikani̱o du̱mbi̱ nakibhutika ka Yopa.

Mambombi̱ nakimuani̱sa Petelo kima

9Ka tolo ndia adhabhiabe nali saha nkaga nibhalia ka gendo nibhali bi̱ya kwebhingia tau̱ni̱ ndia ka Yopa, Petelo nakidhaya gua ndabho saba. 10Inja nakingba du̱mbi̱ nakikabha liya li̱eli̱. Nibhalia kyeyambia kaki, Mambombi̱ nakimuani̱sa kima. 11Nakitangia gulu nakioku̱dhana du̱mbi̱ kima ndie nyagi̱ suka manyeta na nsondosi̱ i̱ni̱ naki̱si̱ma gwabhi̱mba. 12Ka suka injo yabhi̱ku̱ bhanyama poni bhatua kigu i̱ni̱ na ndibha bhakimamaga nibhakyekulula na bhambu̱lu̱. 13Du̱mbi̱ nakioka laso ndia nkpa nakingia bhiyo; “Petelo, ome, obhuole toli̱ obhuliye bhanyama na bhambu̱lu̱ bhenjo.”

14Petelo naki̱nsi̱ki̱aku̱ bhiyo; “Kamazima kakitokikana Sali̱a. Kilimbebe gi̱na ndiamo na kima poni ndia kabhongi̱ liyai̱.”

15No laso ndia nkpa nakionga naye ndiake dou̱ bhali bhiyo; “Odhuwe i̱sa kima ndia Mambombi̱ abhongi̱si̱o bhai̱ ndia kabhongi̱ liyai̱.”

16Yoho aenikana dou̱ salo du̱mbi̱ kima ndie nyagi̱ suka yoho naki̱si̱ki̱a gulu.

17Petelo nalia kyeli̱li̱kana makulu sa kima ndia Mambombi̱ amuani̱sa, bhaluku ndibha Koloneli̱ yabhu̱ti̱ki̱o bhatelema kangba sa i̱nji̱ ndia Si̱moni̱. 18Bhaolu̱li̱a kabha muluku Si̱moni̱ Petelo naki̱li̱kaga menjo.

19Petelo nalia kweli̱li̱kana makulu sa kima ndia Mambombi̱ amuani̱sa, Mwoyo Mawelikana angia bhiyo; “Si̱moni̱, bhaluku bhesalo bhali kakabhako. 20Osi̱me gwabhi̱mba sa ndabho. Kolo kukoma i̱ya nabho nanga ni̱bhu̱ti̱ki̱ ndimi.”

21Petelo atuka gua ndabho naki̱si̱ma gwabhi̱mba kindia bhaluku bhehe bhabhi̱o du̱mbi̱ nakibhugia bhiyo; “Andimi mindie bhuli ka kabhaki. Bhu̱bi̱ki̱ nangeki?”

22Bhaluku bhesalo bhehe nibhaki̱nsi̱ki̱aku̱ Petelo bhiyo; “Mindia aki̱ti̱ki̱o andiye Koloneli̱ ngbekua bhasilikale ki̱ku̱mi̱ ndibha ka Loma, muluku mindia agbokiliani̱o toli̱ mindia akimulami̱aga Mambombi̱ mindia Bhayu̱daya bhampesi̱ ngu̱ko. Malai̱ka angia eti oye ka i̱nji̱ ndiaki andu̱lu̱ aoke ndio okuntolia.” 23Du̱mbi̱ Petelo naki̱bhu̱i̱sa bhaluku bhesalo bhehe kindiaki siyabhoku̱.

Petelo na Koloneli̱

Tolo ndia adhabhiabe naki̱ya imamoti̱ nabho na bemoti̱ kowa bhai̱ki̱li̱za tukabho ka Yopa. 24U̱mali̱ bhaki̱dha ka Kai̱sali̱ya kindia Koloneli̱ na bhalugandaki na bhabhotuaki yabhekumesi̱o nibhambu̱ndi̱li̱ Petelo. 25Petelo kagodhaki ka ndabho, Koloneli̱ nakintangililia si̱ni̱ du̱mbi̱ naki̱ngu̱wa ka kigu ka ani̱saki ngu̱ko. 26No Petelo nakimumei̱sa nakingia bhiyo; “Ome, nili nkpa dako.”

27Petelo ali̱ka nalia kionga na Koloneli̱ nalia ki̱ya ka ndabho kindia abhutakana bhakpa bi̱yabho nibhekumesi. 28Du̱mbi̱ nakibhugia bhiyo; “Bhenu̱ ku̱mi̱ bhu̱i̱bi̱ bhiani eti Mu̱yu̱daya sigikilia ka di̱ni̱ ndiaki kagbokiliani̱ li̱ka kedha duwa kindia Nkpa mindia kali Mu̱yu̱daya. No Mambombi̱ aniani̱si̱ eti kalibe nkpa mindia kabhongi̱. 29Ndio oni̱ti̱ki̱sa, kikoma. Onitolie ndia adhu̱ noku̱ni̱ti̱ki̱sa.”

30Koloneli̱ naki̱nsi̱ki̱aku̱ bhiyo; “Tolo i̱ni̱ mbu̱sa, nibha ninili ka saba ka ndabho ndiamo saha sobhi̱ ndia ntangali̱, andu̱lu̱ ndie nintangia nkpa naloli̱ ngoye mabebenia nanitelemi̱li̱, 31nakigia bhiyo; ‘Koloneli̱, Mambombi̱ aoki̱ nsala ndiako toli̱ akasi̱ki̱akoku̱ nanga kima mabhonga ndio okubhupaga bhanako. 32Endindi obhutike bhaluku ka Yopa bhambi̱ki̱se muluku mindia i̱naki andiye Si̱moni̱ Petelo. Ali kindia Si̱moni̱ mwomi̱si̱ ngubu mindia ndabho ndiaki ali nekpengbu̱a tu̱li̱. 33Du̱mbi̱ ninikukuti̱ki̱sa bi̱kako toli̱ abhongi̱ newe ndio obi̱ki̱o. Endindi bhesu̱ poni kili mehe kei̱soa Mambombi̱ okaniaga kigambo ndia Sali̱a akulagi̱li̱ toliasu̱.’ ”

34Du̱mbi̱ Petelo nakitandika onga bhiyo; “Tukiliya endindi ni̱mesi̱ i̱ba nesi̱ andi mazima eti Mambombi̱ kali na solola ka bhakpa 35toli̱ akibhubhalaga bhakpa ndibha ka nsi poni ndibha bhaki̱mbi̱sagaku̱ ngu̱ko na kola kima mabhonga. 36Bhu̱i̱bi̱ nesi̱ Mambombi̱ ati̱ki̱sa makulu ka bhakpa ndibha ka Isaleli̱ na langililiabho Makulu Mabhonga nesi̱ bhakitoka dudhukana ka mulima na Mambombi̱ kolilia ka i̱na Yesu Ki̱li̱si̱to, Sali̱a mindia bhakpa bhoponi. 37Bhu̱i̱bi̱ poni ndia aenikana ka kyalo ndia ka Yu̱deya, tandikilia ka Galilaya, Yohana naladhaki̱ tebeza makulu mabhonga sa bati̱za. 38Mambombi̱ ampesi̱a Yesu mindia ka tau̱ni̱ ndia ka Nazaleti̱ Mwoyo Mawelikana na mani̱. Yesu yai̱yaga ka kyalo poni nakikola kima mabhonga na lami̱sa bhenjo ndibhabhi̱ na bhali̱mo guabho nanga Mambombi̱ abhi̱ naye.”

39“Kili bhakai̱so ka kima poni ndia akola ka nsi ndia Bhayu̱daya na ka Yelusalemu. Bhambamba nibhakimuola ka musalaba, 40no ka tolo ndia kesalo Mambombi̱ nakimu̱hu̱mbu̱la toli̱ nibhaki̱nzi̱ba. 41Kali nkpa poni mindia antangia. Andi bhesu̱ ndibhe kitangia ndibha liaga na nu̱wa naye nala hu̱mbu̱ki̱. Andi bhesu̱ ndibha Mambombi̱ abhubhuwa tolia ndia angbei̱be. 42Akilagilia tebeza Makulu Mabhonga ka bhakpa poni eti andiye yekaka mindia Mambombi̱ ambuwa bhia mu̱cu̱ musango ndia ndibha bhali̱ki̱o na ndibha bhaku̱wo. 43Bhanabbi̱ bhoponi bhamuongi̱be eti nkpa poni mindia aki̱mu̱hi̱ki̱li̱za Yesu, Mambombi̱ akingani̱li̱a kibi ndiaki ka i̱naki.”

Mwoyo Mawelikana naki̱bhu̱bi̱kabe Bhakpa ndibha kali Bhayu̱daya

44Petelo nalia kionga kigambo injo, Mwoyo Mawelikana abhu̱bi̱kabe bhenjo poni ndibhabha nibhaokiani̱ makulu injo. 45Bhai̱ki̱li̱za poni Bhayu̱daya ndibha bhabi̱ka na Petelo nki̱li̱ nakibhutina zi̱ba nesi̱ kisembo sa Mwoyo Mawelikana abhu̱bi̱kabe na Bhakpa ndibha kali Bhayu̱daya. 46Nanga bhabhuoka nibhakionga loki̱ ndia kali ndiabho nibhalia kinsinda Mambombi̱.

Du̱mbi̱ Petelo nakigia bhiyo; 47“Kamazima kalibe mindia aki̱bhu̱komi̱sa bhakpa bhehe bati̱zabho na li̱bho. Mwoyo Mawelikana abhu̱bi̱ki̱be nesi̱ na bhesu̱ aki̱bi̱kabe.” 48Petelo alagilia eti bhabhu̱bati̱ze ka i̱na Yesu Ki̱li̱si̱to. Du̱mbi̱ nibhakinkunga Petelo li̱ka nabho dhakia tolo nke.

Currently Selected:

Bikoluwa ndia Bhakwenda 10: KWAMBA

Highlight

Copy