तितस 3
3
अस्लि काम कर लागि सब्दिन तयार रह
1बिस्वासिसिका सरकार आ सरकारि हाकिमसिक अधिनम रह आ ओकर्सिक कहल बात पालन कर लागि सम्झा। ओकर्स्या सभे खालक अस्लि कामसब कर लागि तयार रहुस। 2ओकर्स्या कक्रो बद्नाम आ लराइ-झग्रा नाइ करुस, बरु नम्र भइक सभे मानुकसिसङ अस्लि बेबहार करुस। 3किरकि आपन्स्याहु एक समैम मुर्ख, आग्या पालन नाइ कर्लाहार, भरमम पर्ल अनि सभे खालक खराब इच्छा आ मौज-मज्जाम फस्ल छल। आपन्सिक जिबन रिस आ छल-कपटस भोर्ल छलो। अनि आपन्स्या अरु मानुकसिका घिलाबक आ अरु मानुकस्या चाहिं आपन्सिका घिलाबोक। 4तर जब आपन्सिका मुक्ति देल्हार पर्मेसोरक किर्पा आ मयाँ पर्कट भेलो, 5तब पर्मेसोरले आपन्सिका बचाइल्को। यि आपन्सिक कर्ल अस्लि कामक कारनस नाइ तर पर्मेसोरले आपन्सिका दया कर्ल कारनस बचाइल स्यो। पर्मेसोरले आपन्सिक पापका धोइक पबित्र आत्माक मार्फत लया जनम आ लया जिबन देल छो। 6ओहे पबित्र आत्माका पर्मेसोरले आपन्सिक मुक्ति देल्हार येसु खिरिस्टक मार्फत आपन्सिक उप्रिम ओल-छोल करिक झोकाइ देल छो। 7एनामे पर्मेसोरले आप्न किर्पास आपन्सिका धर्मि ठहराइल्को आ आपन्स्या आस कर्ल सब्दिन रहलाहार जिबनक हक्दार बनाइल्को। 8यि बात साँच्चेक स्यो। ओहेस हम यि चाहास्यो कि तुइं यि बातसिका एक्दम जोर दैक सिखा, ताकि जुन मानुकस्या पर्मेसोरका बिस्वास कर्ल छो ओकर्स्या अस्लि कामसब कर लागि ध्यान दिउस किरकि यि बात सभे मानुकसिक लागि अस्लि आ फैदाक स्यो।
9तर बिना कामक बाद-बिबाद, पेहन्क पुर्खासिक बंसाबलिक खिसा, फुट आन्लाहार बात आ यहुदि नियमक बारेम भेल्हार झग्रास दुर रह। किरकि उ सब काम नाइ लग्लाहार आ बेकारक बात स्यो। 10मन्डलिम फुट आन्लाहार मानुकका एक-दुइ बाजि चेताबनि धि तर ओइले नाइ मान्तो त ओक्रसङ कथ्यो सम्बन्ध नाइ राख्। 11तोरा थाहे छो, ओहोन मानुक बिगर्ल आ पापि रहछो कहिक उ आप्ने पापक कारनस दोसि ठहर्छो।
अन्तिम सल्लाहा
12जब हम अर्तिमास आ तुखिकस यि दुइ जनाम एक जनाका तोरलग पठाइबो त तुइं जेनामे हेतो तैयो निकोपोलिस सहरम हम्रलग आब्ह्य। किरकि हम ओहेलग जारक समै बिताइलाहार फैसला कर्ल स्यो। 13वकिल जेनस आ अपल्लोस ओइलगस जाइत खुमा तुहुँ ओकर्सिसङ सक्ल जतेक जाइक सघाह्य अनि ओकर्सिका चाहिलाहार सभे चिजक पनि बेबस्ता करि धिह्य। 14आपन्सिक मानुकस्या बिना कामेम समै बर्बाद नाइ करुस, बरु ओकर्स्या अस्लि कामसब करिक आप्न समै बिताउस, ताकि खाँचो पर्ल जुमा ओकर्स्या सहयोग कर सकुस।
15अइलग हम्रसङ भेल सभे जनाले तोरा गोरलाग्ल स्यो कहिक कहल छो। हमर्सिका मयाँ कर्लाहार ओइलगक सभे बिस्वासिसिका हमर्स्या गोरलाग्ल स्यो कहिक सुनाइ धि।
पर्मेसोरक किर्पा तोर्सिसङ रहुस। आमेन।
Currently Selected:
तितस 3: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
