लुका 20
20
येसुक अधिकारक बारेम पुछ्ल
(मत्ति २१:२३-२७; मर्कुस ११:२७-३३)
1एक दिन् येसुले मन्दिरम मानुकसिका सिछ्या देति खुसिक खबर सुनाइत खुमा मुल पुजारि, धर्मगुरु आ यहुदि अगुवास्या आइक येसुका पुछल्के, 2“तुइं हमर्सिका यि कह, कुन अधिकारस तुइं यि कामसब कर्छ? यि अधिकार तोरा कोन देल्को?”
3येसुले ओकर्सिका जबाफ देति पुछल्के, “हमु तोर्सिका एगो बात पुछ्स्यो। 4बप्तिस्मा देल्हार युहन्नाले बप्तिस्मा देल्हार अधिकार कतस पाइल्को, पर्मेसोरस कि मानुकसिस कह त?”
5यि बात सुनिक ओकर्स्या आपसम एना कहिक छल-फल कर लग्ले, “आब् आपन्स्या कथि कहब? पर्मेसोरस कहब त, ‘तोर्स्या किर युहन्नाका बिस्वास नाइ कर्ल?’ कहिक ओइले पुछ्तो। 6अनि मानुकसिस कहब त सभे मानुकस्या आपन्सिका पाख्नस मार्तो किरकि सभे मानुकसिका थाहा छो कि युहन्ना अगमबक्ता स्यो कहिक।” 7ओहेस ओकर्स्या एनामे उत्तर देल्के, “हमर्सिका थाहा नाइ छो, ओइले कतस अधिकार पाइल्को।”
8तब येसुले पनि ओकर्सिका जबाफ देल्के, “हमु तोर्सिका नाइ कहबो, हम कुन अधिकारस यि कामसब कर्स्यो कहिक।”
बतैया लेल्हार्सिक खिसा
(मत्ति २१:३३-४६; मर्कुस १२:१-१२)
9पछास येसुले मानुकसिका यि खिसा सुनाब लग्ले, “एक जना मानुकले आप्न बारिम अङ्गुर रोपिक अरु मानुकसिका बटैया देल्के आ थुप्रे दिनक लागि उ दस्रो देस गेले।#यसैया ५:१ 10जब अङ्गुर पकिक तोर्लाहार समै एले त अङ्गुर बारिक मालिकले आप्न बख्रा लिअ लागि एक जना नोकरका बटैया लेल्हार्सिलग पठाइल्के। तर बतैया लेल्हार मानुकस्या ओक्रा पिटिक सुधे हाथ घुमाइ देल्के। 11ओहेस अङ्गुर बारिक मालिकले दस्रो नोकरका पठाइल्के। तर बतैया लेल्हार्स्या ओक्राहु पिटल्के आ बिजेत करिक सुधे हाथ घुमाइ देल्के। 12पछास अङ्गुर बारिक मालिकले फेरि दस्रो नोकरका पठाइल्के। तर बटैया लेल्हार्स्या ओक्राहु साफिस पिटिक अङ्गुरक बारिस बाहार निकालि देल्के। 13तब अङ्गुर बारिक मालिकले एनामे सोच लग्ले, ‘आब् हम कथि करुँ? आब् हम आप्न दुलार बेटाका पठाइबो। सायद ओक्र चाहिं ओकर्स्या इज्जत कर्तो।’ 14तर बतैया लेल्हार मानुकस्या मालिकक बेटाका आब्त देखिक एनामे सल्लाहा करल्के, ‘यि त आप्न बापक सम्पतिक हकबला स्यो। ले आब् आपन्स्या एक्रा मारुम अनि यि सभे सम्पति आपन्सिएक हेतो।’ 15ओहेस ओकर्स्या मालिकक बेटाका अङ्गुर बारिक बाहारम लगाइक मारल्के।” तब येसुले ओकर्सिका पुछल्के, “ले आब् कह त अङ्गुर बारिक मालिकले ओकर्सिका कथि कर्तो?
16“आब् उ आप्नि आइक बतैया लेल्हार सभेका मार्तो आ अङ्गुरक बारि अरुका बतैया देतो।”
यि बात सुनिक मानुकस्या कहल्के, “एहेन त कह्याहु नाइ हउस।”
17तर येसुले ओकर्सिभर ताकिक एनामे कहल्के, “धर्मसास्तरम निख्ल एक्र मत्लब कथि स्यो त?
‘जुन पाखन्का घर बनाइलाहार मिस्तिरिस्या काम नाइ छो कहिक फेक्ल छलो,
ओहे पाखन घर बनाइत खुमा मुल पाखन बन्लो।’#भजन ११८:२२ 18ओइ पाख्नम खस्लाहारसब टुक्रा-टुक्रा हेतो आ जक्र उप्रिम उ पाखन खस्तो उ थेक्चा-थेक्चा हेतो।”
कर् तिर्लाहार बारेम परस्न
(मत्ति २२:१५-२२; मर्कुस १२:१३-१७)
19येसुक बात सुनिक धर्मगुरु आ मुल पुजारिस्या येसुका ओहेलग पक्र खोजेक किरकि ओकर्स्या बुझि सक्ल छले कि येसुले यि खिसा हमर्सिएक बारेम कहल स्यो कहिक तर ओकर्स्या मानुकसिसङ डेराइले। 20ओहेस धर्मगुरु आ मुल पुजारिस्या येसुका दोस लगाइक फसाब लागि येसुक अगाम धर्मि बनिक देखाइलाहार मानुकसिका जासुस कर पठाइल्के। अनि उ जासुसस्या कुन्हुँ न कुन्हुँ बातम येसुका फसाइक रोमि सासकक हाथम सुम्प लागि मौका खोज लग्ले। 21ओहेस उ जासुससब आइक येसुका पुछल्के, “हे गुरु, हमर्सिका थाहा छो, तुइं एक्दम ठिक बात कहछ आ ठिक सिखाइछ। तुइं कक्रो पक्छेपात नाइ करिक सभेका पर्मेसोरक ठिक पैरा देखाइछ। 22ओहेस तुइं हमर्सिका यि कह त हमर्सिक यहुदि नियम अन्सार रोमि माहारजाका कर् तिर ठिक स्यो कि नाइ स्यो?”
23तर येसुले ओकर्सिक कप्टि मन बुझिक एनामे कहल्के, 24“हम्रा एगो डलर देखा। अइम कक्र चित्र आ कक्र ना निख्ल छो?”
ओकर्स्या उत्तर देति कहल्के, “रोमि माहारजाक चित्र आ ना छो।”
25तब येसुले ओकर्सिका कहल्के, “जे रोमि माहारजाक स्यो, उ रोमि माहारजाका धि आ जे पर्मेसोरक स्यो, उ पर्मेसोरका धि।”
26उ जासुसस्या ओइलग धेर्याइल मानुकसिक अगाम येसुका कुन्हुँ बातम पनि फसाब नाइ सकल्के। ओहेस ओकर्स्या येसुक जबाफ सुनिक छक परिक चुप-चाप रहले।
मोर्ल मानुक फेरि जिउँत भेल्हार बारेम परस्न
(मत्ति २२:२३-३३; मर्कुस १२:१८-२७)
27ओक्र पछास मोर्ल मानुकसिक फेरि दस्रो जिबन नाइ छो कहिक बिस्वास कर्लाहार सदुकि दलक मानुकसब आइक येसुका पुछल्के,#पेरेरित २३:८ 28“हे गुरु, मोसाले हमर्सिका एनामे निखिक देल छो, ‘कक्रो बिह्या भेल दाजु बेटा-बेटि नाइ भइक मोर्तो त भाइले भौजिका बिह्या करिक दाजुक लागि बेटा-बेटिका जनम दिउस।’#ब्यबस्था २५:५ 29एक जबनाम एगो परिबारम सात भाइ छले। एक दिन् जेठ्काले बिह्या करिक बहु आनल्के तर उ बेटा-बेटिए नाइ भइक मोर्ले। 30ओहेस मझ्लाले भौजिका बिह्या करल्के तर ओहो बेटा-बेटिए नाइ भइक मोर्ले। 31तब सझ्लाले भौजिका बिह्या करल्के। एनाहिमे सातो भाइले उ जनिसङ बिह्या करल्के तर सभे जना बेटा-बेटिए नाइ भइक मोर्ले। 32अनि सभेस पछा उ जनि पनि मोर्ले। 33ओहेस आब् मोर्ल मानुकस्या फेरि जिबन पाइतो त उ जनि कक्र बहु हेतो? किरकि उ त सातो जनाक बहु भइसक्ल छो।”
34तब येसुले ओकर्सिका जबाफ देल्के, “यि सन्सारम भेल्हार मानुकस्या बिह्या कर्छो आ बिह्या करि देछो। 35तर सोर्गम एनामे नाइ हेतो। मोरिक फेरि जिउँत भइक सोर्ग गेल्हार लायकक मानुकस्या न त बिह्या कर्तो, न त करि देतो। 36ओकर्स्या फेरि नाइ मोर्तो किरकि ओकर्स्या सोर्गदुतसिक जक्या हेतो आ मोरिक फेरि जिउँत भेल कारनस ओकर्स्या पर्मेसोरक सन्तान हेतो। 37मोसाले पनि जिगिरहल झाङक घट्नाक बारेम निख्त खुमा मोर्ल मानुकसब फेरि जिउँत भइक उठ्तो कहिक पर्मान देल छो। मोसाले परमप्रभु पर्मेसोरका ‘अब्राहामक पर्मेसोर, इस्हाकक पर्मेसोर आ याकुबक पर्मेसोर’ कहिक पुकार्ल छो।#प्रस्थान ३:६ 38ओहेस पर्मेसोर मोर्ल मानुकसिक पर्मेसोर नाइ स्यो तर जिउँतसिक स्यो किरकि पर्मेसोरक लागि त सभे जना जिउँते छो।”
39यि बात सुनिक कुन्हुँ-कुन्हुँ धर्मगुरुस्या येसुका एनामे कहल्के, “हे गुरु, तुइं एक्दम ठिक कहल।” 40पछास कुन्हुँ मानुकले पनि येसुका परस्न पुछ लागि हिम्मत कर नाइ सकल्के।
खिरिस्ट कक्र सन्तान स्यो
(मत्ति २२:४१-४६; मर्कुस १२:३५-३७)
41तर येसुले ओकर्सिका पुछल्के, “मानुकस्या यि केनामे कह सक्छो कि खिरिस्ट दाउदक सन्तान स्यो कहिक? 42किरकि रजा दाउदले आप्नि भजनक कितापम एनामे कहल छो,
‘परमप्रभुले हम्र प्रभुका कहल्को,
जखन तलिक हम तोर दुस्मनसिका तोर टाङक तरम नाइ राख्बो,
43तुइं हम्र दहिना काटम बेठ्।’#भजन ११०:१
44जब कि दाउदले आप्नि खिरिस्टका हम्र प्रभु कहिक कहछो त खिरिस्ट केनामे दाउदक सन्तान भेलो?”
येसुले चेलासिका सचेत कर्ल
(मत्ति २३:१-३६; मर्कुस १२:३८-४०)
45ओइलग भेल सभे मानुकस्या सुन्तिरहल जुमा येसुले आप्न चेलासिका कहल्के, 46“तोर्स्या नाम-नाम कप्रा पिन्हिंक घुम्फिर कर्लाहार, बजारम मानुकसिस सम्मान खोज्लाहार, सभाघर आ भोजसिम आदरक ठाउँ खोज्लाहार धर्मगुरुसिस होसियार रह। 47किरकि ओकर्स्या बिध्वासिक घर आ सम्पति लुट्छो अनि आप्न एक्दम अस्लि स्यो कहिक देखाब लागि नाम-नाम पर्थना कर्छो। एहेन मानुकस्या बेसि सजाए पाइतो।”
Currently Selected:
लुका 20: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
