लुका 18
18
बिध्वा आ न्यायधिस
1तब येसुले आप्न चेलासिका सब्दिन पर्थना कर्ति रह आ कह्याहु निरास नाइ हब्ह्य कहिक बुझाब लागि एगो खिसा कहल्के, 2“एगो सहरम एक जना न्यायधिस छले। ओइले पर्मेसोरक डर नाइ मानेक आ मानुकसिक पनि वास्ता नाइ करेक। 3ओइ सहरम एक जना बिध्वा पनि छले। उ बिध्वा घरि-घरि न्यायधिसलग जाइक एनामे कहेक, ‘हम्र दुस्मन आ हम्र बिचम जुन झग्रा छो, ओक्र बारेम अस्लिमे फैसला करिक हम्रा बचाइ दे।’ 4सुरु-सुरुम त उ न्यायधिसले बिध्वाक बात नाइ मानल्के। तर पछास ओइले आप्न मनम एनामे सोचल्के, ‘हम न त पर्मेसोरक डर मान्स्यो, न त मानुकसिक वास्ता कर्स्यो। 5तर यि बिध्वाले हम्रा घरि-घरि आइक एक्दम हरान देल छो, ओहेस हम एक्र फैसला करि देबो। नत्रे त उ आइले-आइले करिक हम्रा दिक्दार लगाइतो।’”
6तब प्रभु येसुले फेरि कहल्के, “उ अधर्मि न्यायधिसले कहल बातका याद राख्। 7ओनाहिमे पर्मेसोरका दिन-रात पुकार्लाहार मानुकसिक लागि पर्मेसोरले फैसला करि देतो आ ओकर्सिका सहयोग कर लागि कनेक सना पनि अबेर नाइ कर्तो। 8हम तोर्सिका कह स्यो, पर्मेसोरले आप्न मानुकसिक लागि कनेक सना पनि अबेर नाइ करिक फैसला करि देतो। तर जब मानुकक बेटा फेरि एतो त ओइले पिर्थिबिक मानुकसिम बिस्वास पाइतो?”
फरिसि आ कर् उठाइलाहार मान्खक पर्थना
9तब येसुले आप्न चाहिं धर्मि आ अरुका चाहिं पापि सम्झलाहार मानुकसिक लागि यि खिसा कहल्के। 10“एक दिन् एक जना फरिसि आ एक जना कर् उठाइलाहार मानुक पर्थना कर लागि मन्दिरम गेले। 11अनि उ फरिसि बेग्रे ठेर्याइक एनामे पर्थना कर लग्ले, ‘हे पर्मेसोर, हम तोरा धन्येबाद देस्यो किरकि हम अरु मानुकसिक जक्या ठक्, बैमान आ बेभिचारि नाइ स्यो। यि कर् उठाइलाहार मानुक जक्या पनि नाइ स्यो। 12हम हप्ताम दुइ बाजि उपबास रह स्यो आ हम जतेक कमाइ स्यो उ सभेक दसांस देस्यो।’ 13तर कर् उठाइलाहार मानुक चाहिं भले दुरि ठेर्याइक सोर्गभर ताक्लाहार हिम्मतो नाइ करिक आप्न छाति पिट्ति एनामे कहल्के, ‘हे पर्मेसोर, हम पापि मानुक स्यो, हम्रा दया कर्।’ 14हम तोर्सिका कह स्यो, उ फरिसिस त बरु यि कर् उठाइलाहार मानुक धर्मि भइक आप्न घर गेलो। किरकि जुन मानुकले हम बर्कि स्यो कहिक सोच्तो, उ कन्कि हेतो तर जुन मानुक नम्र भइक कन्कि हेतो, उ बर्कि हेतो।”#मत्ति २३:१२; लुका १४:११
येसुले बच्चा-बुच्चिसिका आसिक देल
(मत्ति १९:१३-१५; मर्कुस १०:१३-१६)
15अनि जब मानुकस्या आप्न बच्चा-बुच्चिका येसुले छुइक आसिक दिउस कहिक येसुलग आनल्के त चेलास्या ओकर्सिका हप्काइल्के। 16तर येसुले बच्चा-बुच्चिका आप्नलग बलाइक एनामे कहल्के, “बच्चा-बुच्चिसिका हम्रलग आब धि, ओकर्सिका नाइ रोक। किरकि पर्मेसोरक राज्ये एहेने बच्चा-बुच्चिसि जक्या मानुकसिक स्यो। 17हम तोर्सिका साँच्चेक कह स्यो, जुन मानुकले बच्चा-बुच्चिसिक जक्या पर्मेसोरक राज्येका सुइकार नाइ कर्तो, उ कह्याहु ओत जाइ नाइ पाइतो।”
धनिक मानुक
(मत्ति १९:१६-३०; मर्कुस १०:१७-३१)
18एक दिन् एक जना यहुदि अगुवा आइक येसुका एनामे पुछल्के, “हे अस्लि गुरु, सब्दिन रहलाहार जिबन पाब लागि हम्रा कथि कर पर्तो?”
19येसुले ओक्रा जबाफ देति कहल्के, “तुइं हम्रा किर अस्लि कहछ? अस्लि त पर्मेसोर मत्रे छो। 20तोरा पर्मेसोरले देल आग्यासब त थाहा छिति छो, बेभिचार नाइ कर, मानुकका नाइ मार, नाइ चोराब, झुठा गबाहि नाइ दिअ आ आप्न बाप मतारका आदर कर।”#प्रस्थान २०:१८; ब्यबस्था ५:१३; प्रस्थान २०:१७; प्रस्थान २०:१५; ब्यबस्था ५:१९; प्रस्थान २०:१६; ब्यबस्था ५:२०; प्रस्थान २०:१२; ब्यबस्था ५:१६
21ओइले उत्तर देल्के, “यि सभे त हम कन्किस पालन कर्ति आइल स्यो।”
22यि बात सुनिक येसुले ओक्रा कहल्के, “तोरा आरो एगो काम कर बाँकि छो। तोरसङ भेल सभे सम्पति बेचिक गरिबसिका बाँटि धि अनि तुइं सोर्गम धन पाइब। तब आइक हम्रा पछ्या।” 23यि बात सुनिक उ अगुवा एक्दम उदास भेले किरकि उ बर्कि धनिक छले।
24येसुले ओक्रा उदास भेल देखिक एनामे कहल्के, “धनिक मानुकका पर्मेसोरक राज्येम ढुक लागि कत्का मस्किल छो। 25धनिक मानुकका पर्मेसोरक राज्येम ढुकस त बरु उँटका टिप्निक बिल्लिम छिर सजिलो हेतो।”
26यि बात सुनिक मानुकस्या येसुका पुछल्के, “ओनामे त कोन मुक्ति पाब सक्तो झन?”
27येसुले ओकर्सिका जबाफ देल्के, “जुन काम मानुकस्या कर नाइ सक्तो, उ काम पर्मेसोरले कर सक्तो।”
28पछास पत्रुसले पनि येसुका एनामे कहल्के, “हे प्रभु, हमर्स्या त आप्न सभे घर-दुवार छोरिक तोरा पछ्याइल स्यो।”
29ओहेस येसुले ओकर्सिका कहल्के, “तोर्सिका हम साँच्चेक कह स्यो, जुन मानुकले पर्मेसोरक राज्येक लागि आप्न घर, बाप-मतार, दाजुभाइ, बहु आ बेटा-बेटिका छोर्तो, 30ओइले एहे जिबनम अगल्कास थुप्रे दोब्र आसिक पाइतो अनि सोर्गम पनि सब्दिन रहलाहार जिबन पाइतो।”
येसुले फेरि आप्न मोरलाहार बारेम कहल
(मत्ति २०:१७-१९; मर्कुस १०:३२-३४)
31तब येसुले आप्न बार्हो जना चेलासिका एकभर लगाइक एनामे कहल्के, “आब् आपन्या यरुसलेम जाइति स्या। ओइलग मानुकक बेटाक बारेम अगमबक्तास्या जे निख्ल छो उ सभे पुरा हेतो। 32ओक्रा दस्रो जातक मानुकसिक हाथम जिम्मा लगाइ देतो। अनि ओकर्स्या ओक्र गिल्ला कर्तो आ बिजेत करिक ओक्र उप्रिम थुक फेक्तो। 33ओक्रा कोर्रास पिट्तो आ मारि देतो तर तेस्रो दिनम उ फेरि जिउँत हेतो।”
34तर चेलास्या यि बात बुझ नाइ सकल्के किरकि यि बातक अर्थ ओकर्सिस घुसारिक राख्ल छले। ओहेस येसुले कहल बात ओकर्सिक दिमाकेम नाइ ढुक्ले।
येसुले एक जना अन्धाका अस्लि कर्ल
(मत्ति २०:२९-३४; मर्कुस १०:४६-५२)
35जब येसु यरिहो सहरक लगम पुग्ले त ओइलग एक जना अन्धा मानुकले पैराक काटेम बेठिक भिख माङ्ति छले। 36ओइले थुप्रे मानुकसब ओहे पैराबाक जाइत अबाज सुनिक, “यि कथिक अबाज स्यो?” कहिक पुछल्के त,
37मानुकस्या ओक्रा कहल्के, “नासरतक येसु यि पैराबाक जाइति छो।”
38ओकर्सिक बात सुनिक ओइले कस्याइक एनामे कहल्के, “हे येसु, दाउदक सन्तान, हम्र दया कर्।”
39अन्धाका चिच्याइरहल देखिक अगा-अगा गेल्हार मानुकस्या “तुइं चुप-चाप रह” कहिक ओक्रा हप्काइल्के। तर ओइले झन आरो कस्याइक कह लग्ले, “हे दाउदक सन्तान, हम्रा दया कर्।”
40ओक्र अबाज सुनिक येसु ठेर्याइले आ ओक्रा आप्नलग आन लागि कहल्के। अनि उ अन्धाका आनल्के त येसुले ओक्रा पुछल्के, 41“हम तोर लागि कथि करि देल तुइं चाहाछ?”
ओइले उत्तर देल्के, “प्रभु, हम देख्लाहार बन सकुँ।”
42तब येसुले ओक्रा कहल्के, “तोर आँख देख्लाहार भइजाउस किरकि तोर बिस्वासले तोरा अस्लि कर्ल छो।”
43येसुले कहति बितिन ओइले देख लग्ले आ पर्मेसोरक पर्संसा कर्ति येसुक पछा लगिक गेले। यि देखिक सभे मानुकस्या पर्मेसोरक पर्संसा करल्के।
Currently Selected:
लुका 18: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
