लुका 11
11
येसुले आप्न चेलासिका पर्थना कर सिखाइल
(मत्ति ६:९-१३; ७:७-११)
1एक दिन् येसुले एगो ठावम पर्थना कर्ति छले। अनि पर्थना करि सकल्के त एक जना चेलाले येसुका कहल्के, “हे प्रभु, युहन्नाले आप्न चेलासिका पर्थना कर सिखाइल जक्या हमर्स्योका पर्थना कर सिखा न।”
2तब येसुले ओकर्सिका कहल्के, “तोर्स्या पर्थना कर्त खुमा एना कह,
‘हे हमर्सिक सोर्गम रहलाहार बाप,
तोर पबित्र नामक आदर हउस,
तोर राज्ये आउस,
3हमर्सिका दिन-दिने चाहिलाहार खनाइ सब्दिन दे।
4हमर्सिक पाप छेमा करि दे,
जेनामे हमर्स्याहु आप्न दुस्मनसिका छेमा कर्स्यो,
आ हमर्सिका पापम फसाइलाहार जाँचस बचा।’”
5तब फेरि येसुले चेलासिका एना कहल्के, “मानिले तोर्सिभोरि कक्रो एक जना सङ् छो। अनि उ अधा रातम आप्न सङ्लग जाइक एनामे कहतो, ‘हम्रा तिनगो रोटि पैंच देन। 6किरकि हम्र एक जना सङ् बर्कि दुरिस आइल छो तर ओक्रा खुवाब लागि हम्रसङ कथ्यो नाइ छो।’ 7तर ओइले भित्रेस एनामे कहछे, ‘तुइं हम्रा दुख नाइ दे। हम केबारि बन् करिक आप्न बच्चा बुच्चिसङ सुति सक्ल स्यो। ओहेस हम उठिक तोरा कथ्यो दिअ नाइ सक्बो।’ 8हम तोर्सिका कह स्यो, भले ओइले सङ् सम्झिक उठिक नाइ देतो। तर ओइले एक्होरो बिन्ति करिक माङ्ल कारनस उ उठ्तो आ ओक्रा चाहिल जतेक देतो। 9ओहेस हम तोर्सिका कह स्यो, माङ्ब त पाइब, खोज्ब त भेटाइब आ ढक्ढकाइब त तोर्सिक लागि केबारि खुजालि देतो। 10किरकि माङ्लाहारले पाइतो, खोज्लाहारले भेटाइतो आ ढक्ढकाइलाहारक लागि केबारि खुजल्तो। 11तोर्सिभोरि कक्र बाप एहेन रहतो, जक्र बेटाले माछ माङ्त खुमा ओक्रा साँप देतो? 12आ दिम्मा माङ्त खुमा ओक्रा बिच्छि देतो? 13तोर्स्या पापि भइक पनि आप्न बेटा-बेटिसिका अस्लि चिज दिअ जान्छ त झन तोर्सिक सोर्गम रहलाहार बापले आप्नलगस माङ्लाहार्सिका कतेक बेसि पबित्र आत्मा देतो।”
येसुक कामम सङ्खा कर्ल
(मत्ति १२:२२-३०,४३-४५; मर्कुस ३:२०-२७)
14एक दिन् येसुले भुत लगिक लता भेल एक जना मान्खस भुत निकाल्ति छले। अनि उ भुत ओइ मान्खस निकल्ले त उ लता भेल मानुक बज लग्ले। यि देखिक सभे मानुकसिका अचम्म लग्ले। 15तर ओइलग भेल कुन्हुँ-कुन्हुँ मानुकस्या एनामे कहल्के, “अइले त भुतसिक मालिक बालजिबुलक#11:15 बालजिबुल सैतानक दस्रो ना स्यो। सक्तिस भुतका भगाइ छो।”#मत्ति ९:३४; १०:२५
16अनि कुन्हुँले चाहिं येसुक जाँच् कर लागि “हमर्सिका सोर्गस एगो चिनह देखा” कहिक कहल्के।#मत्ति १२:३८; १६:१; मर्कुस ८:११ 17तर येसुले ओकर्सिक बिचार बुझिक एनामे कहल्के, “जुन राज्येक मानुकस्या आपसम झग्रा कर्तो, उ राज्ये नास हेतो। अनि जुन परिबारक मानुकस्या आपसम झग्रा कर्तो, ओकर्स्याहु नास हेतो। 18ओनाहिमे सैतानले-सैतानेक बिरोध कर्तो त ओक्र राज्ये केनामे टिक सक्तो? किरकि तोर्स्या कहछ कि हम बालजिबुलक सक्तिस भुतसब भगाइ स्यो। 19हम बालजिबुलक सक्तिस भुतसब भगाइ स्यो त तोर्सिक चेलास्या चाहिं कक्र सक्तिस भुतसब भगाइ छो? ओहेस तोर्सिएक चेलास्या तोर्स्या कहल बात गलत स्यो कहिक पर्मान देछो। 20तर हम पर्मेसोरक सक्तिस भुतसब भगाइ स्यो त तोर्स्या यि जान कि पर्मेसोरक राज्ये तोर्सिक लगम आइसक्ल छो।
21“कुन्हुँ जोर्गर मानुकले सेना जक्या हथियार बोकिक आप्न घरक देख्भाल कर्तो त ओक्र धन-सम्पति बच्ले रहतो। 22तर दस्रो ओक्रस जोर्गर मानुक आइक ओक्रसङ लराइ करिक ओक्रा जित्तो त उ जुन हथियारक भरोसाम छलो, उ सभे छिन्तो आ सम्पति लुटिक बाँटि देतो।
23“जुन मानुक हम्र पछम नाइ छो, उ हम्र बिरोधि स्यो आ जुन मानुकले हम्रसङ नाइ धेर्याइतो, ओइले छिरोबित कर्तो।#मर्कुस ९:४०
भुत फेरि घुमिक एल
(मत्ति १२:४३-४५)
24“जब कुन्हुँ मान्खस भुत निक्लिक जाइछे त ओइले उजाड ठावम जाइक रह लागि डेरा खोज्ति हिंठ्छे। तर कटु न रहलाहार ठाउँ नाइ पाइछे त ओइले एनामे कहछे, ‘हम जतस निक्लिक आइल छल्यो ओहे घरम घुमिक जेबो।’ 25अनि जब उ घुमिक आब्छे त ओइले घरका सफा करिक सजाइल पाइछे। 26तब उ भुत जाइक आप्नस आरो नाइ अस्लि सातगो भुतसिका आनिक ओइ घरम रहछे। अनि उ मान्खक हालत अगल्कास झन आरो नाइ अस्लि हब्छे।”
साँच्चेक आसिक
27येसु बज्ति-बज्ति ओइ मान्खक भिरस एक जना जनिले बर्कि घार एनामे कहल्के, “तोरा जनम देल्हार आ दुध पियाइलाहार मतार धन्येक स्यो।”
28ओक्र बात सुनिक येसुले कहल्के, “बरु ओकर्स्या धन्येक स्यो, जकर्स्या पर्मेसोरक बचन सुनिक पालन कर्छो।”
येसुले योना अगमबक्ताक चिनह देल
(मत्ति १२:३८-४२)
29पछास थुप्रे मानुकसब धेर्याइति गेले त येसुले एनामे कहल्के, “यि बिगर्ल पुस्ता स्यो। यि पुस्ताक मानुकस्या अचम्मक चिनह देख चाहाछो। तर योना अगमबक्ताक चिनह बाहेक दस्रो कुन्हुँ चिनह देल नाइ जेतो।#मत्ति १६:४; मर्कुस ८:१२ 30जेनामे योना अगमबक्ता निनबे सहरक मानुकसिक लागि चिनह बन्ल छलो, ओनाहिमे मानुकक बेटा पनि यि पुस्ताक लागि चिनह हेतो।#योना ३:४ 31फैसलाक दिन् दखिनभर पर्लाहार सेबा देसक रानिले उठिक यि पुस्ताक मानुकसिका दोस लगाइतो। किरकि उ सुलेमान रजाक ग्यानक बात सुन लागि बर्कि दुरिक देसस आइल छलो। तर देख्, अइलग सुलेमानस पनि बर्कि एक जना छो।#१ रजा १०:१-१०; २ इतिहास ९:१-१२ 32एनाहिमे फैसलाक दिन् निनबे सहरक मानुकस्या पनि उठिक यि पुस्ताक मानुकसिका दोस लगाइतो किरकि ओकर्स्या योना अगमबक्ताले पर्चार कर्त खुमा पस्चताप कर्ल छलो। तर देख्, अइलग योनास पनि बर्कि एक जना छो।#योना ३:५
देहक इजोत
(मत्ति ५:१५; ६:२२-२३)
33“कुन्हुँ मानुकले दिब्याका बारिक घुसारिक नाइ राख्छे, न त ढक्यास झाँप्छे। तर घरम ढुक्लाहार मानुकसिका इजोत हउस कहिक बरु चेकाम राख्छे।#मत्ति ५:१५; मर्कुस ४:२१; लुका ८:१६ 34तोर आँख तोर देहक लागि इजोत देल्हार दिब्या जक्याहि स्यो। तोर आँख अस्लि रहतो त तोर सौंसे देह इजोत हेतो। तर बिगर्ल रहतो त तोर सौंसे देह अँन्हार हेतो। 35ओहेस होसियार रह, जुन इजोत तोर्सिम छो उ अँन्हार नाइ हउस। 36तोर सौंसे देह इजोतम छो आ कुन्हुँ अङम अँन्हार नाइ रहतो त तोर सौंसे देहेभोरि एक्दम इजोत हेतो, जेनामे दिब्याक इजोतले तोर्सिका इजोत देछो।”
फरिसिसिका धिक्कार
(मत्ति २३:१-३६; मर्कुस १२:३८-४०)
37येसु बजि सक्ले त यहुदि धर्मगुरु समुहक एक जना फरिसिले येसुका आप्न घरम खनाइ खाइ लागि बलाइल्के। ओहेस येसु ओक्र घरम गेले आ खाइ लागि बेठ्ले। 38तर येसुले खनाइ खाइस अगा हाथ नाइ धोइल देखिक उ फरिसि छक पर्ले। 39ओहेस प्रभुले ओक्रा कहल्के, “तुइं फरिसिस्या बाटि आ थारिक बाहारभर त धोइछ तर तोर्सिक भित्रि चाहिं लोभ आ छल-कपटस भोर्ल छो। 40ए मुर्ख मानुकसब, जुन पर्मेसोरले तोर्सिक देह बनाइल्को, ओहेले भित्रिक मन पनि बनाइल नाइ स्यो झन? 41तर जुन चिज तोर्स्या लोभ करिक भित्रिम राख्ल स्या, उ सभे गरिबसिका दान करि धि त तोर्सिक लागि सभे चिज सुद्द हेतो।
42“तुइं फरिसिसिका धिक्कार! किरकि तोर्स्या पुदिना, मसला आ आप्न बारिम जर्मल साग-पातक दसांस त पर्मेसोरका चर्हाइछ तर तोर्स्या पर्मेसोरका मयाँ नाइ कर्छ आ अरुक फैसला पनि अस्लिमे नाइ कर्छ। तोर्स्या पर्मेसोरका दसांस धि, ओक्र सङि मानुकसिक फैसला पनि अस्लिमे कर् आ पर्मेसोरका पनि मयाँ कर्।#लेबि २७:३०
43“तुइं फरिसिसिका धिक्कार! किरकि तोर्स्या सभाघरम आदरक ठावम बेठ आ बजारम मानुकस्या गोरलाग्ल चाहाछ। 44तोर्सिका धिक्कार! किरकि तोर्स्या धर्ति तरक नाइ देखाइलाहार चिर्यारि जक्या स्या, जइम मानुकसब थाहे नाइ पाइक हिंठ्छो।”
45यि बात सुनिक एक जना धर्मगुरुले येसुका कहल्के, “हे गुरु, एना कहिक त तुइं हमर्सिक बिजेत कर्छ।”
46तब येसुले कहल्के, “तुइं धर्मगुरुसिका पनि धिक्कार! किरकि तोर्स्या मानुकसिका बोक नाइ सक्लाहार बोझा लादि धि छ तर तोर्स्या आप्न चाहिं एगो अङ्रिस पनि नाइ छुइछ। 47तोर्सिका धिक्कार्! किरकि तोर्स्या तोर्सिक पुर्खास्या मार्ल अगमबक्तासिक चिर्यारि बनाइछ। 48एनामे तोर्स्या आप्न पुर्खास्या कर्ल कामक गबाह स्या आ ओकर्सिसङ सहमत स्या। किरकि ओकर्स्या अगमबक्तासिका मारल्को आ तोर्स्या चाहिं ओकर्सिक चिर्यारि बनाइछ। 49ओहेस सभे बात जान्लाहार पर्मेसोरले एनामे कहल छो, ‘हम ओकर्सिलग अगमबक्ता आ पेरेरितसिका पठाइबो। तर ओकर्सिभोरि कक्राहु ओकर्स्या मारि देतो आ कक्राहु चाहिं सताइतो।’ 50सन्सार बन्ललगस आजु तलिक जतेक अगमबक्तासिक रकत बहल छो, उ सभेक हिसाप यि पुस्ताक मानुकसिलगस लेतो। 51हम साँच्चेक कह स्यो, हाबिलक रकतस लइक मन्दिर आ बेदिक बिचम मार्ल जकरिया तलिकक रकतक हिसाप यि पुस्ताक मानुकसिसङ लेतो।#उत्पति ४:८; २ इतिहास २४:२०,२१
52“तुइं धर्मगुरुसिका धिक्कार! किरकि तोर्स्या ग्यानक कुजि लिअक त लेल तर तोर्स्या आप्न पनि भित्रि नाइ ढुक्ल आ अरुका पनि ढुक नाइ धिल।”
53जब येसु ओइ घरस निकल्ले त धर्मगुरु आ फरिसिस्या येसुक घोर बिरोध कर्ति थुप्रे परस्नसब पुछ लग्ले। 54अनि येसुले कथ्यो गलत बात कहतो त येसुका दोस लगाइक फसाब लागि मौका खोज लग्ले।
Currently Selected:
लुका 11: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
