पेरेरित 2
2
पबित्र आत्मा एल
1जब पेन्तिकोसक पब्नि एले त प्रभु येसुका बिस्वास कर्लाहार सभे जना एके ठावम धेर्याइल छले।#लेबि २३:१५-२१; ब्यबस्था १६:९-११ 2ओहे जुमा अन्चक्एम सोर्गस बर्कि बिहारक हबा जक्या एगो अबाज एले आ ओकर्स्या रहल पुरा घर उ अबाजस गुन्जले। 3अनि आगिक जक्या जिसब ओकर्सिक अगाम देखा पर्ले आ बख्रा-बख्रा भइक सभेक उप्रिम बेठ्ले। 4तब ओकर्स्या सभे जना पबित्र आत्मास भोरिक पबित्र आत्माले ओकर्सिका देल भसा अन्सार ओकर्स्या दस्रो भसासिम बज लग्ले।
5उजुमा सन्सारक थुप्रे देसस पर्मेसोरक भक्ति कर्लाहार यहुदिसब यरुसलेमम आइक रहल छले। 6जब उ अबाज मानुकस्या सुनल्के त ओइलग थुप्रे मानुकसब धेर्याइले। अनि ओकर्स्या छक पर्ले किरकि दस्रो देसस आइल यहुदिस्या आप्न-आप्न देसक भसाम येसुक चेलासिका बज्त सुनल्के। 7ओहेस ओकर्स्या एक्दम छक परिक एना कह लग्ले, “यि बज्लाहार मानुकसब सभे गालिलक नाइ स्यो झन? 8त केनामे एकर्स्या आपन्सिक देसक भसाम बज्ल आपन्स्या सुन्ति स्या! 9आपन्स्या अइलग पार्थिसब, मादिसब, एलामिसब, मेसोपोटामियाक, यहुदियाक, कापाडोकियाक, पोन्टसक, एसियाक, 10फिरिगियाक, पाम्फिलियाक, मिस्र देसक, कुरेनि सहरक आस्पासम पर्लाहार लिबिया देसक, 11रोम सहरस आइल यहुदि आ यहुदि धर्म मान्लाहारसब अनि केरेट टापुक आ अरब देसस आइल मानुकसब स्या। तर आपन्स्या सभेले आपन्सिक आप्न-आप्न भसाम पर्मेसोरक सक्तिसालि कामक चर्चा एकर्स्या कर्त सुन्ति स्या।” 12एनामे ओकर्स्या छक पर्ले आ अचम्म लगिक आपसम एनामे कह लग्ले, “एक्र मत्लब कथि स्यो?”
13तर कुन्हुँ-कुन्हुँ मानुकस्या ओकर्सिक खिसि कर्ति एनामे कहल्के, “एकर्स्या त लया मध पिक मत्ल छो।”
पत्रुसले पर्चार कर्ल
14तर पत्रुस एघार जना पेरेरितसिसङ ठेर्याइले आ ओइलग भेल सभेले सुन जोगत कस्याइक एनामे कहल्के, “ए यहुदिया आ यरुसलेमक मानुकसब, तोर्स्या यि बात थाहा पाब लागि हम्र बातका ध्यान दैक सुन्। 15तोर्स्या सोच्ल जक्या एकर्स्या मत्ल नाइ स्यो किरकि अखन त बिहानक नौ मत्रे बज्ल छो। 16तर यि त योएल अगमबक्ताले कहल बात पुरा भेल स्यो,
17किरकि पर्मेसोरले एनामे कहल छो,
‘हम अन्तिम दिनम आप्न आत्मा सभे मानुकसिक उप्रिम झोकाइ देबो,
अनि तोर्सिक बेटा-बेटिस्या अगमबानि कर्तो,
आ तोर्सिक जबान मानुकस्या दर्सन देख्तो,
अनि बुर्भास्या चाहिं सप्ना देख्तो।#योएल २:२८-३२
18उ दिनम हम्र सेबा कर्लाहार जनि आ मरदसिक उप्रिम,
हम आप्न आत्मा झोकाइ देबो,
अनि ओकर्स्या अगमबानि कर्तो।
19हम उप्रि अकासम अचम्मक चिनहसब देखाइबो,
आ तर् पिर्थिबिम चाहिं अचम्मक कामसब कर्बो,
ओइलग रकत, आगि आ धुङाक मेघ देखा पर्तो।
20परमप्रभुक माहान आ अचम्मक दिन् आबस अगा
सुरुजले इजोत दिअ छोर्तो,
आ चन्ना चाहिं रकत जक्या लाल हेतो।
21अनि जुन मानुकले परमप्रभुक ना पुकार्तो ओइले मुक्ति पाइतो।’
22“ओहेस ए इस्राएलक मानुकसब, तोर्स्या हम्र बात सुन्। पर्मेसोरले नासरतक येसुक मार्फत तोर्सिक बिचम कतेक सक्तिसालि कामसब आ अचम्मक चिनहसब देखाइल्को तोर्सिका थाहा छिति छो। ओहे चिनहसिक मर्फत पर्मेसोरले आप्नि येसुका पठाइल स्यो कहिक पर्मान देल्को। 23पर्मेसोरले अगाहि पक्का कर्ल आप्न योजना आ ग्यान अन्सार येसुका तोर्सिक हाथम सुम्पि देल्को। अनि तोर्स्या चाहिं ओक्रा पापिसिक हाथम सुम्पिक कुरुसम लट्काइक मार लगाइल।#मत्ति २७:३५; मर्कुस १५:२४; लुका २३:३३; युहन्ना १९:१८ 24तर पर्मेसोरले येसुका मोर्लक बन्धनस छुट्करा दैक फेरि जिउँत करल्को किरकि येसु मोर्ले रह असम्भब छलो।#मत्ति २८:५-६; मर्कुस १६:६; लुका २४:५ 25रजा दाउदले पनि येसुक बारेम एनामे कहल छो,
‘हम प्रभुका सब्दिन आप्ने अगाम देख्ल्यो।
उ हम्र दहिना काटम छो, ओहेस हम कह्याहु नाइ डेराइबो।#भजन १६:८-११
26ओहेस हम एक्दम खुसि स्यो,
आ हम्र जिले पर्मेसोरक पर्संसा कर्छो।
एत्के मत्रे नाइ, हम मोरिक जेबो तैयो,
फेरि जिबो कहिक आस छो।
27किरकि तुइं न त हम्र आत्माका मोर्ल मानुकसब रहलाहार ठावम छोर्ब,
न त आप्न पबित्र मानुकक देहका सँर धिब।
28तुइं हम्रा जिबनक पैरा देखाइल,
आ तुइं हम्रसङ रहत खुमा हम खुसिस लबर्स्यो।’
29“ए हम्र दाजुभाइ आ दिदि-बहिनसब, आपन्सिक पुर्खा दाउदक बारेम हम तोर्सिका ठोक्वासङ यि कह सक्बो। उ मोर्ले त ओक्रा गारि देल्को अनि ओक्र चिर्यारि आजु तलिक आपन्सिएसङ छिति छो। 30तर दाउद अगमबक्ता भेल कारनस पर्मेसोरले बाचा कर्ल अन्सार ओक्रे सन्तानसिस एक जना ओक्र राजगद्दिम बेठ्तो कहिक ओक्रा थाहा छले।#भजन १३२:११; २ समुएल ७:१२-१३ 31ओहेस दाउदले खिरिस्ट फेरि जिउँत भेल्हार बात अगाहि थाहा पाइक एनामे कहल छो,
‘ओक्रा न त मोर्ल मानुकसब रहलाहार ठावम छोरल्को,
न त ओक्र देह सँर देल्को।’
32पर्मेसोरले ओहे येसुका जिउँत करल्को। यि बातक हमर्स्या गबाह स्यो। 33अनि पर्मेसोर बापले येसुका आप्न दहिना काटम बर्कि सम्मानक ठावम बेठाइल्को आ आप्न बाचा कर्ल अन्सार पबित्र आत्मा देल्को। ओहे पबित्र आत्मा अखन प्रभु येसुले हमर्सिक उप्रिम झोकाइ देल छो, जुन तोर्स्या देख्ति आ सुन्ति स्या। 34-35किरकि दाउद त सोर्ग नाइ गेलो तर ओइले आप्नि एनामे कहल छो,
‘परमप्रभुले हम्र प्रभुका कहल्को,
जखन तलिक हम तोर दुस्मनसिका तोर टाङक तरम नाइ राख्बो,
तुइं हम्र दहिना काटम बेठ्।’#भजन ११०:१
36“ओहेस इस्राएलक सभे मानुकस्या यि बात अस्लिमे बुझिक राखुस, जुन येसुका तोर्स्या कुरुसम लट्काइक मार्ल ओहे येसुका पर्मेसोरले प्रभु आ खिरिस्ट बनाइल्को।”
37पत्रुसक बात सुनिक ओकर्सिक मन एक्दम दुखि भेले। ओहेस ओकर्स्या पत्रुस आ अरु पेरेरितसिका एनामे पुछल्के, “ए भाइसब, आब् हमर्स्या कथि करुँ?”
38पत्रुसले ओकर्सिका कहल्के, “पस्चताप कर् आ आप्न पापक छेमा पाब लागि येसु खिरिस्टक नामम बप्तिस्मा ले। तब पर्मेसोरले तोर्सिका पबित्र आत्माक बरदान देतो। 39किरकि यि बाचा तोर्सिक लागि, तोर्सिक सन्ताससिक लागि आ बर्कि-बर्कि दुरि रहल सभे मानुकसिक लागि स्यो, जक्रा पर्मेसोरले आप्नलग बलाइतो।”
40पत्रुसले आरो थुप्रे बातसब कहिक ओकर्सिका गबाहि देल्के। अनि एना कहति सम्झाइल्के, “तोर्स्या भरस्ट पुस्तास बचिक रह।” 41ओहेस थुप्रे मानुकस्या पत्रुसले कहल बातका सुइकार करिक बप्तिस्मा लेल्के। ओहे दिन् तिन हजार मानुकसब चेलासिक समुहम थपाइले। 42अनि ओकर्स्या सब्दिन पेरेरितसिक सिछ्या सुन, सङ्गति कर, पर्थना कर आ सङि खान-पिन कर लग्ले।
बिस्वासिसिक रहन-सहन
43पछास पेरेरितसिक मार्फत थुप्रे अचम्मक कामसब हब लग्ले त सभे मानुकस्या डर मान लग्ले। 44तर येसुका बिस्वास कर्लाहारसब चाहिं सब्दिन एक ठिना धेर्याबेक। ओकर्सिक सभे चिज सझ्या छले।#पेरेरित ४:३२-३५ 45ओकर्स्या आप्न जग्गा-जमिन आ चिज-बिजसब बेचिक जक्रा जे-जे चिजक खाँचो परेक ओहे अन्सार ओकर्सिका बाँटि दिएक। 46ओकर्स्या एके मनक भइक सब्दिन मन्दिरम धेर्याबेक आ घर-घरम प्रभु भोज खाबेक। अनि ओकर्स्या नम्र भइक खुसिस खनाइ खाबेक, 47आ पर्मेसोरक पर्संसा करेक। ओहेस अरु मानुकस्या ओकर्सिका मन पराबेक। अनि मुक्ति पाइलाहार मानुकसिका दिन-दिने प्रभुले ओकर्सिक समुहम थपिदिएक।
Currently Selected:
पेरेरित 2: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
