२ तिमोथि 4
4
1हम तोरा पर्मेसोर आ खिरिस्ट येसुक अगाम, जुन खिरिस्ट येसु एक दिन् आप्न राज्येम एतो अनि जिउँत आ मोर्ल सभे मानुकसिक फैसला कर्तो, ओक्रे अगाम आग्या दैक यि कह स्यो कि, 2पर्मेसोरक बारेम खुसिक खबर सुना। बेला हउस कि कुबेला हउस जखन पनि खुसिक खबर सुनाब लागि तयार रह। धिरजस मानुकसिका सम्झा, चेताबनि धि आ अस्लि सिछ्या दैक ओकर्सिका हौसला धि। 3किरकि आब् एहेन समै आब्ति छो कि मानुकस्या ठिक सिछ्या सुन लागि मन नाइ पराइतो तर आप्न मन पर्लाहार बात मत्रे सुन चाहातो। ओहेस ओकर्स्या आप्न मन पर्लाहार बात सुनाइलाहार गुरुसिका मत्रे बलाइतो। 4ओकर्स्या साँच्चेक बातका सुन इन्कार करिक कल्पना करिक बनाइल खिसाभर आप्न मन लगाइतो। 5तर तुइं यि सभे बातम होसयार भइक रह। दुख सह आ खुसिक खबर पर्चार कर् अनि पर्मेसोरले तोरा जिम्मा देल सेबाकाइ पुरा कर्।
6किरकि आब् हम्रा बलि चर्हाइलाहार भेरा जक्याहि मार लग्ल छो। अनि हम्र यि सन्सारस गेल्हार दिन् लगम आइसक्ल छो। 7हम बिस्वासक लराइ एक्दम अस्लिमे लर्ल स्यो। हम दोग्लाहार काम ओराइ सक्ल स्यो अनि आप्न बिस्वासका पनि बचाइक राख्ल स्यो। 8ओहेस आब् पर्मेसोर हम्रसङ खुसि भइक हम्र लागि एगो मुकुट तयार करिक राखि देल छो, उ मुकुट ठिक फैसला कर्लाहार प्रभुले आप्न आइलाहार दिनम हम्रा देतो। हम्रा मत्रे नाइ तर ओक्र आइलाहार पैरा ताकिक रहलाहार सभेका देतो।
पावलक अन्तिम बात
9तुइं झप्सिन हम्रलग आब लागि कोसिस कर्। 10किरकि डेमासले यि सन्सारका मयाँ करिक हम्रा छोरिक थेस्लोनिका सहर गेलो। अनि केरेसेन्स गलतिया पर्देस गेल छो आ तितस चाहिं दलमातिया पर्देस गेल छो। 11अखन हम्रसङ लुका मत्रे छो। तुइं आब्त खुमा मर्कुसका पनि आप्नसङ लइक आब्ह्य किरकि ओइले हम्र सेबाकाइम थुप्रे सघाब सक्तो। 12तर तुखिकसका चाहिं हम एफिसस सहर पठाइल स्यो। 13तुइं आब्त खुमा हम जुन कप्रा आ कितापसब तोरोआस सहरम कार्पसक घरम छोर्ल स्यो, उ सब लइक आब्ह्य। खास करिक छल्लाम निख्ल किताप चाहिं नाइ बिस्राइक आनि धिह्य।
14तमाक भरासब बनाइलाहार अलेक्जेडरले हम्रसङ एक्दम खराबि करल्को। प्रभुले ओक्र कर्ल काम अन्सार ओक्रसङ बद्ला लेतो। 15ओक्रसङ तुहुँ होसयार भइक रह किरकि ओइले हमर्सिक पर्चारक थुप्रे बिरोध करल्को।
16जब अग्ला बाजि हम्र मुद्दाक बहस चल्ति छलो त कुन्हुँ हम्र पछम नाइ बज्लो, बरु सभेले हम्रा छोरिक गेलो। यि बातक दोस ओकर्सिका नाइ लगुस। 17तर प्रभु हम्रसङ रहिक हम्रा सक्ति देल्को। ओहेस हम दस्रो जातक मानुकसिका पर्मेसोरक बारेम खुसिक खबर अस्लिमे सुनाब सक्ल्यो। एनामे पर्मेसोरले हम्रा बाघक मुहस बचाइल्को। 18प्रभुले हम्रा सभे खराबिसिस बचाइतो आ आप्न सोर्गक राज्येम एक्दम अस्लिमे लगाइतो। प्रभुक महिमा जुग-जुग तलिक हब्ति रहुस। आमेन।
अन्तिम गोरलगाइ
19पिरिस्किला, अकिलास आ ओनेसिफरसक परिबारका हम गोरलाग्ल स्यो कहिक सुनाइ धि। 20इरास्तस त कोरिन्थ सहरेम छो। अनि तोरोफिमसका चाहिं हम मिलेटस सहरेम छोरि देल्यो किरकि उ बिरामि भइक हम्रसङ जाइ नाइ सक्लाहार भेल छलो। 21जारक समै सुरु हबस अगाहि तुइं हम्रलग आब लागि कोसिस कर्।
युबलस, पुडेस, लिनस, कलौडिया आ अइलगक सभे दाजुभाइस्या पनि तोरा गोरलाग्ल स्यो कहिक पठाइल छो।
22प्रभु तोर आत्मासङ रहुस। अनि पर्मेसोरक किर्पा तोर्सिसङ रहुस।
Currently Selected:
२ तिमोथि 4: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
