२ तिमोथि 1
1
1पर्मेसोरक इच्छास खिरिस्ट येसुम भेल सब्दिन रहलार जिबनक बाचाक बारेम सुनाब लागि चुन्ल खिरिस्ट येसुक पेरेरित हम पावलले 2हम्र दुलार बेटा तिमोथिका यि चिठि निख्ति स्यो।
आपन्सिक पर्मेसोर बाप आ प्रभु खिरिस्ट येसुले तोरा किर्पा, दया आ सान्ति दिउस।
बिस्वासिलो भइक रह
3हम आप्न पुर्खास्या सेबा कर्ले जक्या पबित्र बिबेकस पर्मेसोरक सेबा कर्स्यो। अनि हम पर्थना कर्स्यो त सब्दिन तोरा सम्झिक पर्मेसोरका धन्येबाद देस्यो। 4जब हम्रा तोर आँखिस चुइल लोर याद आब्छो त तोरा भेट लागि एक्दम मन लग्छो। तोरा भेट पाइते त हम कत्का खुसि हेते। 5हम्रा तोर छल-कपट नाइ भेल बिस्वासक एक्दम याद आब्छो, जुन बिस्वास तोर नानि लोइस आ तोर मतार युनिसम छलो। उ बिस्वास तोरम पनि छो कहिक हम्रा पुरा बिस्वास छो। 6ओहेस हम तोरा यि बात याद कराब चाहास्यो कि हम तोर उप्रिम हाथ राख्त खुमा जुन बरदान पर्मेसोरले तोरा देल छो, उ बरदानका चलाइति रह। 7किरकि पर्मेसोरले आपन्सिका डरक आत्मा नाइ तर सक्ति, मयाँ आ आप्न मनका अधिनम राख्लाहार आत्मा देल छो।
8ओहेस तुइं आपन्सिक प्रभुक बारेम गबाहि दिअ लागि नाइ लजा अनि हम जेलम पर्ल बातम पनि लाज नाइ मान्। बरु तुहुँ पर्मेसोरक सक्तिम खुसिक खबर सुनाब लागि हम्र जक्या दुख भोग तयार हो। 9किरकि पर्मेसोरले आपन्सिका बचाइक पबित्र जिबन जिअ लागि बलाइल छो। पर्मेसोरले एना आपन्सिक कर्ल अस्लि कामक कारनस कर्ल नाइ स्यो तर यि त पर्मेसोरक आप्ने इच्छा आ किर्पाक कारनस स्यो, जुन किर्पा पर्मेसोरले सन्सार बनस अगाहि खिरिस्ट येसुम आपन्सिका कर्ल छलो। 10उ किर्पा अखन आपन्सिक मुक्ति देल्हार खिरिस्ट येसु आइलक पछा पर्कट भेल छो। येसुले कालका नास करिक खुसिक खबरक मार्फत कह्याहु नाइ मोर्लाहार जिबन पर्कट कर्ल छो।
11एहे खुसिक खबर सुनाब लागि पर्मेसोरले हम्रा पर्चारक, पेरेरित आ गुरु हब लागि चुन्ल छो। 12एहे कारन हम यि दुखसब भोग्ति स्यो। तर हम्रा यि बातम कनेक सना पनि लाज नाइ लग्छो किरकि हम कक्र उप्रिम बिस्वास राख्ल स्यो कहिक हम्रा थाहा छो। हम्रा एहो थाहा छो कि पर्मेसोरले जुन बातसब हम्रा सुम्पल छो, उ बातसब आप्न आइलाहार दिन् तलिक अस्लिमे बचाइक राख्तो कहिक। 13तुइं जुन ठिक सिछ्या हम्रस पाइलस्या, ओक्रा नमुना मानिक पछ्या। अनि खिरिस्ट येसुम भेल बिस्वास आ मयाँम जोर्गर भइक रह। 14अनि तोरा जिम्मा देल अस्लि बातसिका आपन्सिक भित्रिम रहलाहार पबित्र आत्माक सहयोगस बचाइक राख्।
15तोरा थाहा छो कि एसिया पर्देसक सभे बिस्वासिस्या हम्रा छोरिक गेलो। ओकर्सिभोरि फुगेलस आ हर्मोगेनस पनि स्यो। 16प्रभुले ओनेसिफरसक परिबारका किर्पा करुस किरकि ओइले हम्रा जखन पनि हौसला दियोक आ हम जेलम पर्ल बातम पनि लाज नाइ मानोक। 17तर जब उ रोम सहरम एलो त ओइले हम्रा नाइ भेट्ल तलिक खोज्ले-खोज्ले करिक भेटाइल्को। 18प्रभुक आइलाहार दिनम प्रभुले ओक्रा दया करुस। तोरा अस्लिमे थाहा छो कि जब हम एफिसस सहरम छल्यो त ओइले हम्रा कतेक सहयोग कर्ल छलो कहिक।
Currently Selected:
२ तिमोथि 1: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
