२ थेस्लोनिकि 2
2
पापक मानुक
1ए हम्र दाजुभाइ आ दिदि-बहिनसब, आपन्सिक प्रभु येसु खिरिस्ट फेरि आइलाहार बारेम आ ओक्रा भेट लागि आपन्स्या धेर्याइलाहार बारेम हमर्स्या तोर्सिका बिन्ति करिक यि कह स्यो कि, 2कुन्हुँ मानुकले आपन्सिक प्रभु आइलाहार दिन् आइसक्ल छो कहिक कहतो त तोर्स्या नाइ अताल्ह्य आ नाइ डेराह्य। उ दिनक बारेम कुन्हुँले चिठिस, कुन्हुँले अगमबानिस आ कुन्हुँले बचनस हमर्सिक तर्फस आइल स्यो कहिक कहतो त तोर्स्या बिस्वास नाइ कर्ह्य। 3कुन्हुँले तोर्सिका कथ्यो करिक पनि ठक नाइ पाउस। किरकि जखन तलिक पर्मेसोरक बिरोधम बर्कि-बर्कि हुल-दङ्ङा नाइ हेतो आ नास भेल्हार पापक मानुक पर्कट नाइ हेतो, उ समै तलिक प्रभुक दिन् नाइ एतो। 4ओइले मानुकस्या पर्मेसोर मानिक पुज्लाहार सभे चिजक बिरोध कर्तो। अनि आप्न चाहिं सभेस बर्कि स्यो कहिक दाबि कर्तो। एत्के मत्रे नाइ, ओइले “हमि पर्मेसोर स्यो” कहिक कहतो आ पर्मेसोरक मन्दिरम जाइक रहतो।
5हम तोर्सिसङ रहति खुमा यि सभे बातसब कहल छल्यो, कथि तोर्स्या बिस्राइल? 6उ पापक मानुक आप्न समैम पर्कट हउस कहिक कुन सक्तिले ओक्रा अखन तलिक रोकिक राख्ल छो, यि बात तोर्सिका थाहे छो। 7किरकि उ पापक मानुकक सक्तिले अगाहिस भित्रे-भित्रे काम कर्ति छो। तर ओक्रा अखन रोकिक राख्लाहार सक्ति नाइ हट्ल तलिक उ देखा नाइ पर्तो। 8जब ओक्रा रोकिक राख्लाहार सक्तिले ओक्रा छोर्तो, तब उ पापक मानुक पर्कट हेतो। तर प्रभु येसुले ओक्रा आप्न मुहस फुकिक नास करि देतो आ आप्न आइलाहार दिनक महिमाक इजोतस भस्म करि देतो। 9उ पापक मानुकले सैतानक बर्कि सक्ति लइक एतो आ सभे खालक चमत्कार आ अचम्म-अचम्मक कामसब कर्ल बाहाना कर्तो। 10ओइले नास भेल्हार मानुकसिका मुर्ख बनाइक सभे खालक पापम अल्झाइतो। किरकि ओकर्स्या मुक्ति देल्हार सत्ये बचनका इन्कार कर्छो। 11एहे कारन ओकर्स्या झुठा बातम बिस्वास करुस कहिक पर्मेसोरले ओकर्सिलग भरमम पार्लाहार सक्ति पठाइछो, 12ताकि सत्येका बिस्वास नाइ कर्लाहार आ पापम खुसि भइक लबर्लाहार सभे मानुकसब दोसि ठहरुस।
बिस्वासम जोर्गर भइक रह
13तर ए हम्र दाजुभाइ आ दिदि-बहिनसब, हमर्स्या तोर्सिक लागि पर्मेसोरका धन्येबाद दिइ पर्तो किरकि प्रभुले तोर्सिका थुप्रे मयाँ कर्छो। पर्मेसोरले तोर्सिका अगाहि पबित्र आत्माक पबित्र बनाइलाहार कामक मार्फत आ सत्येम बिस्वास कर्ल कारनस मुक्ति दिअ लागि चुन्ल छो। 14एहे मुक्तिक लागि हमर्स्या सुनाइल खुसिक खबरक मार्फत पर्मेसोरले तोर्सिका बलाइल्को, ताकि तोर्स्या आपन्सिक प्रभु येसु खिरिस्टक महिमा पाब सक। 15ओहेस ए हम्र दाजुभाइ आ दिदि-बहिनसब, तोर्स्या बिस्वासम जोर्गर भइक रह। अनि उ सभे बचनका पालन कर्, जुन हमर्स्या आप्न मुहस आ चिठिक मार्फतस कहल स्यो।
16आब् आपन्सिका मयाँ कर्लाहार आ किर्पा करिक कह्याहु नाइ ओराइलाहार हौसला आ अस्लि आस देल्हार आपन्सिक प्रभु येसु खिरिस्ट आ पर्मेसोर बापले, 17तोर्सिक मनम हौसला दिउस अनि सभे अस्लि काम आ बचनम जोर्गर बनाउस।
Currently Selected:
२ थेस्लोनिकि 2: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
