Matayo 8

Yesu nɨ òpʉꞌba àtɨ̀jʉ vɨɨ

(Mariko 1:40-45; Luka 5:12-16)

1Yesu nɨ sijʉ ꞌbee drìa vɨɨ yɨ̀ nyáá ꞌbá, òꞌbɨ mʉ̀mʉrà bɨ́ ɨ̀rɨ buti nɨ̀. 2Acete agú àloo òpʉ#8:2 Giriki yɨ̀ ꞌbà àyʉ òpʉ vɨɨ àzo ꞌba rúá nyale vɨɨ ɨnɨ yɨ́ drɨ́á. nɨ nyale vɨ́ɨvɨɨ ca ɨ̀rɨ bʉ díká sì kùmúti ɨ̀rɨ andretia kɨ̀nɨ̀ “Kɨ́rɨ́kɨ̀rɨ̀ Opɨ, mɨ tè lèe ra, mɨ ɨco ma àtɨ ra.”

3Ànɨ Yesu ɨ̀jʉ̀ nɨ gí, ɨlo agú ndee díká kɨ́nɨ̀, “Èè ma ngaa ꞌoo ra, mɨ rúá ɨ̀rɨ àtɨ̀ ra!” Cotícotí agú ndee rúá òpʉ àtɨ̀ ra.#8:3 Greek yɨ̀ ꞌBà ɨ̀rɨ rúa àlá. 4Àcete Yesu ꞌyo ɨ̀rɨ yɨ́ kɨ́nɨ̀, “Mɨ nè ngà, mɨ òlʉ̀ eꞌyo ꞌdɨ̀vɨɨ ꞌba àloo yɨ́ kʉ. Te mɨ mu ꞌbarʉʉ orɨ ɨtee vɨɨ bʉ, ɨ̀rɨ andrí mɨ rúá. Acete lè mɨ fè àfa fèzà Musa nɨ ndráánɨ́ azílé vɨɨ ɨnɨ ɨ̀cetaa drʉ ɨ̀cejʉ ꞌba drɨ́á yɨ́ kɨ́nɨ̀ mɨ rúá ace òpʉ denɨ ꞌba.”

Yesu nɨ ose àsɨ̀kárɨ̀ tʉrʉàlʉ drìle awo àzíꞌbá àtɨ̀jʉ vɨɨ

(Luka 7:1-10)

5Yesu nɨ ace fɨjʉ àkú ìmgbélé Kaperenaumia ꞌba, ose àsɨ̀kárɨ̀ tʉrʉàlʉ drìle drʉ vɨɨ ca ɨ̀rɨ bʉ àzàkoma àꞌí kɨ́nɨ̀, 6“Opɨ, àzíꞌbá ma awo vɨɨ ɨ̀rɨ àzo drʉ gbóló drìa àkúá, ɨcoo ací kʉ díká ɨ̀rɨ drì cii ònzɨ.”

7Yesu ꞌyo ɨ̀rɨ yɨ́ kɨ́nɨ̀, “Ma ngaa muu àle ɨ̀rɨ àtɨ̀ɨ ra.”

8Ose àsɨ̀kárɨ̀ tʉrʉàlʉ drìle drʉ ndee òmvɨ ɨ̀rɨ kɨ́nɨ̀, “Yʉ Opɨ lá, sìi tà kʉ mɨnɨ fɨjʉ ma awo jóá. Te mɨ ꞌyo lʉ́ eꞌyo ndee ɨ, àzíꞌbá ma awo vɨɨ rúá nɨ ngaa àtɨ̀ɨ ra. 9Àrɨ̀yɨ̀kʉ ma pàbaa ́ꞌbarʉʉ àloo àzí ngale òkpo ꞌba àloo yɨ̀ vɨ́ɨvɨɨ ɨ, díká ma awo àsɨ̀kárɨ̀ àzí ngale ma kalɨa vɨɨ ɨnɨ cɨ. Ma tè ꞌyo àloo yɨ́, ‘Mɨ mu,’ ɨ mu ra, ma tè ꞌyo àloo yɨ́, ‘Mɨ mu ngà ma bʉ ꞌdò,’ ɨ ca ma bʉ ra. Ma tè ꞌyo àzíꞌbá ma awo vɨɨ yɨ́, ‘Mɨ o nóni,’ ɨ pàbaa o ra.”

10Yesu nɨ eꞌyo ꞌdɨ̀vɨɨ ɨrɨjʉ ꞌba, ovʉ òsùtaa yɨ̀ díká ꞌyo ꞌba ɨ̀rɨ buti bɨ̀le vɨɨ ɨnɨ yɨ́ kɨ́nɨ̀, “Ma lè ꞌyo àmɨ yɨ́ tàándí drʉ, ma isúú drɨ̀ò ngà ꞌba àloo àꞌɨ̀taa be Isiralia kɨ̀le agú ꞌdɨ̀vɨɨ lé kʉ. 11Ma lè ɨ̀ce àmɨ yɨ́ ndɨtɨrɨ, ꞌba òꞌbɨ́ nɨ ngaa muu caa ɨngajʉ ɨ̀ga ìtú nɨ́ pʉ̀jʉ àloo ìtú nɨ́ zòjʉ vɨɨ alɨa, díká ɨnɨ ngaa muu òrɨɨ túàlʉ Iburahimu ɨbe, Isaka ɨbe díká Yakobo ɨbe òmù nyajʉ Kárí ꞌBùnɨ vɨɨ alɨa. 12Te anzɨ té koꞌba ovʉꞌba kárí anzɨ drʉ vɨɨ ɨnɨ, ꞌba ngaa ɨnɨ oꞌbee àja dúmú alɨa, díká nàa àle àwʉ nɨ ngaa ovʉʉ sí nyazà be cɨ.”

13Acete Yesu ꞌyo ose àsɨ̀kárɨ̀ tʉrʉàlʉ drìle drʉ vɨɨ yɨ́ kɨ́nɨ̀, “Mɨ mvɨ àkúá àle, díká àꞌɨ̀taa mɨ awo vɨɨ nɨ ngaa fèe ɨ̀rɨ nɨ ꞌoo mɨ́ yɨ́ rá.” Cotícotí àzíꞌbá ɨ̀rɨ awo vɨɨ rúa àtɨ̀ sawà naa yɨ̀ ra.

Yesu nɨ ꞌba òꞌbɨ́ àtɨ̀jʉ vɨɨ

(Mariko 1:29-34; Luka 4:38-41)

14Yesu nɨ carɨa Petero awo àkúá ꞌbá, ndrè Petero ɨ̀drápi nɨ jóá àzo drʉ gbóló drìa rúá drɨzà be. 15Ɨlo izí ndee gíá ꞌba dèè rúá drɨzà ndee denɨ ra, díká nga oru, ɨꞌdo ɨnɨ yɨ́ nyaká fe ra.

16Òndrotilébe, ꞌba jí Yesu bʉ ꞌba drìa orɨndɨ onzɨ be vɨ́ɨvɨɨ ɨnɨ òꞌbɨ́, díká Yesu ɨdro orɨndɨ onzɨ ꞌba ndee ɨnɨ drìa vɨɨ ɨnɨ kírí eꞌyo ꞌyozà yɨ̀ aꞌdúle díká àtɨ̀ ꞌba àzo be vɨɨ ɨnɨ drɨ́á rá. 17Yesu ꞌo eꞌyo ꞌdɨ̀vɨɨ ɨnɨ fèjʉ eꞌyo ndráánɨ́ agú eꞌyo ondrílé Isaya drʉ vɨɨ nɨ ꞌyole vɨɨ ɨ̀rɨ ca ànɨ kòꞌbò benì kɨ́nɨ̀:

“Ɨ̀rɨ ngʉlʉpɨ wù òkpo àkò àma rúá vɨɨ ɨnɨ ra

díká àtɨ̀ àzo àma rúá vɨɨ ɨnɨ drɨ́á nɨ̀.”#Isaya 53:4

Àje Yesu buti bɨ̀jʉ vɨɨ

(Luka 9:57-62)

18Yesu nɨ òꞌbɨ ànɨ traꞌba nɨ àgapíá kúrù vɨɨ ɨnɨ nèjʉ ꞌba, fè àyotaa ꞌba ɨ̀rɨ nɨ ɨmbale vɨɨ ɨnɨ yɨ́ àlijʉ mèrè ɨ̀ga àlele vɨɨ alɨa. 19Acete ɨmbaápi àloo àzítáá Musa awo vɨɨ ɨmbale vɨ́ɨvɨɨ ca Yesu bʉ kɨ́nɨ̀, “Ɨmbare, ma ngónde mujʉ mɨ be kara cɨ mɨnɨ mujʉ vɨɨ alɨa.”

20Yesu òmvɨ ɨ̀rɨ yɨ́ kɨ́nɨ̀, “Òbalakʉ ꞌyowa gʉ cɨ, díká ɨ̀rɨ́á òlɨ́ alɨa vɨɨ ꞌyowa jó cɨ, te ꞌba mvápi awo kara lajʉ díká ava lɨjʉ vɨ́ɨvɨɨ yʉ.”

21ꞌBa ɨ̀rɨ nɨ ɨmbale vɨɨ àloo ꞌyo ɨ̀rɨ yɨ́ kɨ̀nɨ̀, “Ose, mɨ fè ngà màa kàdrì àva mu atamà nɨ sa ráká.”

22Te Yesu òmvɨ ɨ̀rɨ yɨ́ kɨ́nɨ̀, “Mɨ bɨ̀ ma buti, díká mɨ kʉ ꞌba òdràle ꞌba vɨɨ ɨnɨ sá ꞌba dràzà ꞌyowa vɨɨ ɨnɨ.”

Yesu nɨ vìlìrì ombejʉ vɨɨ

(Mariko 4:35-41; Luka 8:22-25)

23Acete Yesu tu yee alɨa díká ꞌba ɨ̀rɨ nɨ ɨmbale vɨɨ mú ɨ̀rɨ buti yɨ̀ ɨ̀ndɨ̀. 24Butia vìlìrì àloo òkpo vɨ́ɨvɨɨ ɨꞌdo lɨ yà mèrè drìa díká yí ndee ɨꞌdo nɨ ꞌbe ngʉ̀làngʉ̀là fè ace yee kole ru apaapa. Te isú vɨɨ dèè Yesu nɨ oꞌdúá. 25ꞌBa ɨ̀rɨ nɨ ɨmbale vɨɨ mú ɨ̀rɨ orʉ oꞌdúá vɨɨ yɨ̀ díká kɨ́nɨ̀, “Opɨ, mɨ òpa àma! Àma lèe ambúu ꞌdò!”

26Yesu òmvɨ ɨnɨ yɨ́ kɨ́nɨ̀, “Àmɨ ꞌba àꞌɨ̀taa be were drʉ, àmɨ oo òrì yɨ̀ àrɨ eꞌyo yɨ̀ yà?” Acete nga oru, tre vìlìrì ɨnɨ drìa yí nɨ ꞌbele ngʉ̀làngʉ̀là vɨɨ be ꞌbadèè, àngʉ̀ ajɨ ace yii.

27Eꞌyo ꞌdɨ̀vɨɨ fè ꞌba ndee cá òsùtaa yɨ̀ díká zí ànɨ ànɨ ɨ̀sɨlɨa kɨ́nɨ̀, “ꞌDɨ̀vɨɨ agú ngóongoo ɨ! Vìlìrì ɨnɨ káꞌdí ɨ̀rɨ ti ɨrɨjʉ yí ꞌole ngʉ̀langʉ̀la vɨɨ be ɨ̀ndɨ̀?”

Yesu nɨ àgu ìrì orɨndɨ onzɨ be vɨɨ ɨnɨ àtɨ̀jʉ vɨɨ

(Mariko 5:1-20; Luka 8:26-39)

28Yesu nɨ cajʉ ɨ̀sɨlemule àngʉ̀ ꞌba Gadara#8:28 Eꞌyo sɨzà alóo kɨ́nɨ̀ Gerageseni. Alóo ɨnɨ Geraseni.drʉ vɨɨ ꞌyowa mèrè ɨ̀ga ìtú nɨ́ pʉ̀jʉ vɨɨ alɨa ꞌba, àgu ìrì orɨndɨònzɨ be pʉ̀le ɨngajʉ nyadrì ɨ̀sɨlɨa vɨɨ fúdrì ɨ̀rɨ be. Àgu ndee ɨnɨ nɨ ovʉle àdrà be vɨɨ yɨ̀, fè ànɨ ꞌba àloo ɨcoo àli léti naa yɨ̀ kʉ. 29Cotícotí àgu ndee ɨꞌdó tre ɨ̀rɨ bʉ kɨ́nɨ̀, “Mɨ lè àma bu àrɨ nɨ, Orɨ mvápi lá? Mɨ caa ngɨ́á vɨɨ àma ɨnza dèè ngà oꞌdú eꞌyo lijʉ vɨɨ caa kʉ vɨ́nɨ nɨ kʉ yà?”

30ꞌDɨ̀vɨɨ isú dèe ngùrúbè òꞌbɨ́ányá rɨ́ onya nàa ògògò. 31Ànɨ Orɨndɨonzɨ vɨɨ má ànɨ Yesu bʉ kɨ́nɨ̀, “Mɨ tè té àma ɨ̀pʉ̀ʉ àja ra, mɨ dro àma ngùrúbè òꞌbɨ́ányá ꞌdànaa ɨnɨ alɨa.”

32Yesu ꞌyo ɨnɨ yɨ́ kɨ́nɨ̀, “Àmɨ pʉ́!” Ànɨ pʉ́ àja ra díká dú fɨ ngùrúbè òꞌbɨ́ányá naa ɨnɨ alɨa. Tèvɨ́nɨ ngùrúbè ndee àfɨ́ du rùù òzó kúti gokolo naa yɨ̀ mèrèa díká ambú drɨ́á rá. 33Àgu ngùrúbè ndee ɨnɨ ocele vɨɨ dú rá, mú eꞌyo nɨ ꞌole àgu orɨndɨònzɨ be vɨɨ ɨnɨ be vɨɨ òlʉ àkú ìmgbélé vɨɨ alɨa. 34Ànɨ ꞌba drɨ́á àkú ìmgbélé ꞌdɨ̀vɨɨ alɨa vɨɨ pʉ́ mu drì fu Yesu be. Ɨnɨ nɨ ɨ̀rɨ ndrèjʉ ꞌba, má ànɨ ɨ̀rɨ bʉ, ɨ̀rɨ nɨ pʉ̀jʉ àngʉ̀ ɨnɨ bʉ vɨɨ alɨa vɨɨ yɨ̀ ra.

Currently Selected:

Matayo 8: MADI-URL

Highlight

Copy