Matayo 17
17
Yesu wʉ́rá nɨ ɨꞌdajʉ mgbi vɨɨ
(Mariko 9:2-13; Luka 9:28-30)
1Oꞌdú azɨa butia Yesu ꞌdʉ nɨ be Petero ɨ, Yakobo ɨ díká Yakobo adripi Yohana ɨ, ce ɨnɨ drì ꞌbee ɨ̀zʉʉ vɨ́ɨvɨɨ drìa oru ɨnɨ nɨ ovʉjʉ aꞌdúle òꞌbɨ ꞌbʉ vɨɨ yɨ̀. 2Nàa àle, ɨ̀rɨ wúrá òjanɨ mgbi ꞌba ndee ɨnɨ mule be. Andretia rɨ di kɨ̀le ìtú lé, díká bòngo ɨ̀rɨ rúá vɨɨ òjanɨ ɨmve hwɨ́ɨ́ dìzà lé. 3Acete ꞌba ɨ̀rɨ nɨ ɨmbale na vɨɨ ndré Musa ɨnɨ Elia be ɨ̀tàrɨa Yesu be.
4Ànɨ Petero ꞌyo Yesu yɨ́ kɨ́nɨ̀, “Opɨ, ɨ̀rɨ ònyɨ̀be àmanɨ ovʉjʉ vɨ̀a. Mɨ tè àꞌɨ̀ɨ ra, Ma nga bòrò sii vɨ̀a na, àlʉa mɨ́yɨ́, àloo Musa yɨ́ díká àloo vɨɨ Elia yɨ́.”
5Ɨ̀rɨ nɨ ngà kíríá ɨ̀tàrɨa ꞌdɨ̀, iríti hwɨ́ɨ́ vɨ́ɨvɨɨ aꞌbú ɨnɨ cɨ díká àálé nga iríti ndee alɨa kɨ́nɨ̀, “Dɨ̀vɨɨ mvamàa manɨ lèle tʉ̀ vɨɨ ɨ díká ma ɨ̀rɨ yɨ̀ àfʉ́ yɨ̀ tʉ̀. Ànɨ lè àmɨ ɨrɨ́ ɨ̀rɨ ti ra!”
6ꞌBa ɨ̀rɨ nɨ ɨmbale vɨɨ ɨnɨ nɨ àálé vɨɨ ɨrɨjʉ ꞌba, oꞌbé ànɨ òꞌbúu drʉ andreti drìa àrɨ̀yɨ̀kʉ cá òrì yɨ̀ tʉ̀. 7Te Yesu mu ɨnɨ ꞌbʉ, ɨlo ɨnɨ díká ꞌyo ɨnɨ yɨ́ kɨ́nɨ̀, “Àmɨ ngá oru, díká àmɨ ꞌó òrì kʉ!” 8Ɨnɨ nɨ àngʉ̀ ndrèrɨa oru, isú lʉ́ Yesu nɨ aꞌdúle.
9Ɨnɨ nɨ ɨlʉrɨa ꞌbee drìa vɨɨ yɨ̀ ɨ̀lèè, Yesu lɨ ɨnɨ bílé kɨ́nɨ̀, “Àmɨ òlʉ́ eꞌyo àmɨ nɨ ndrèle ꞌdɨ̀vɨɨ ꞌba àloo yɨ́ kʉ kpere ꞌBa Mvápi nɨ ɨ̀gàrɨa drà alɨa vɨɨ yɨ̀ ɨdrɨ drʉ.”
10ꞌBa ɨ̀rɨ nɨ ɨmbale vɨɨ zí ɨ̀rɨ kɨ́nɨ̀, “ꞌBa àzítáá ɨmbaꞌba vɨɨ ɨ́ ꞌyo lè Elia ɨrɨ ca òkò àrɨ yɨ̀ yà?”
11Yesu òmvɨ ɨnɨ yɨ́ kɨ́nɨ̀, “Adadrʉ, Elia nɨ ngaa caa òkò, díká ɨ̀rɨ ngaa eꞌyo drɨ́á ka òꞌbàa kílílí drʉ ngónde. 12Te ma lè ꞌyo àmɨ́ yɨ́, Elia ca ndráánɨ́ ꞌba díká òꞌbɨ awɨɨ ni kʉ te ꞌó ɨ̀rɨ bʉ eꞌyo ɨnɨ así nɨ́ lèle vɨɨ ɨ. Kòꞌbò ꞌdɨ̀vɨɨ lé ꞌBa Mvápi nɨ ngaa càndɨ nyaa ɨnɨ gíá rá.”
13ꞌBa Yesu nɨ ɨmbale vɨɨ vá ace ɨ̀rɨ ɨ̀tàa Yohana bàbùtízìmù fèle vɨɨ drìa vɨɨ ra.
Yesu nɨ mva drìa orɨndɨ ònzɨ be vɨɨ àtɨ̀jʉ vɨɨ
14Ɨnɨ nɨ drì kàjʉ òꞌbɨ alɨa ꞌba, agú àloo ca Yesu bʉ díká sì ùlùúti ɨ̀rɨ drìlia. 15Agú ndee ꞌyo ɨ̀rɨ́ yɨ́ kɨ́nɨ̀, “Opɨ, mɨ ꞌbà asíndrɨ̀zà mvamàa drìa, ɨ̀rɨ ɨ̀drɨ̀à be díká ɨ̀drɨ̀à ndee ɨ rɨ ɨ̀rɨ oꞌbe tʉ̀. Ɨ rɨ ɨ̀rɨ oꞌbe òzo àcɨ alɨa díká yí alɨa. 16Ma ji ɨ̀rɨ ꞌba mɨnɨ ɨmbale vɨɨ ɨnɨ bʉ te ɨcóó ɨ̀rɨ àtɨ kʉ.”
17Yesu òmvɨ kɨ́nɨ̀, “Àmɨ ꞌba àꞌɨ̀taa ko díká asíònzɨ be drʉ, ma ngaa ovʉ àmɨ be ngòpɨ ka yà? Ma ngaa àmɨ ti taa ngòpɨ ká yà? Mɨ ji mva ndee mabʉ nòa.” 18Yesu tre orɨndɨònzɨ ꞌdɨ̀vɨɨ drìa, díká orɨndɨònzɨ ndee pʉ̀ agúámvá vɨɨ alɨa vɨɨ yɨ̀ ra, díká mva ndee àtɨ̀ cotícotí.
19Acete ꞌba Yesu nɨ ɨmbale vɨɨ mú ɨ̀rɨ bʉ aꞌdúle díká zí ɨ̀rɨ kɨ́nɨ̀, “Àma òꞌbì orɨndɨònzɨ vɨɨ ɨ̀pʉ̀le té àja kpé àrɨ eꞌyo yɨ̀ yà?”
20Òmvɨ ɨnɨ yɨ́ kɨ́nɨ̀, “Àrɨ̀yɨ̀kʉ àꞌɨ̀taa àmɨ ꞌyowa vɨɨ wereá drʉ. Ma lè ꞌyo àmɨ́ yɨ́ tàándí drʉ, àmɨ àꞌɨ̀taa tè té ovʉʉ kɨ̀le òrɨ ɨkɨ́ nyɨ́rɨ́á vɨɨ lé, àmɨ ɨco ꞌyo ꞌbee vɨɨ yɨ́ kɨ́nɨ̀, ‘Mɨ mu ɨngajʉ vɨ̀a vɨɨ yɨ̀ nálé’ díká ɨ mu ra. Eꞌyo àloo ngaa ovʉ àmɨ yɨ́ ɨ̀wa be kʉ.”#17:20 Eꞌyo sɨ̀zà alóo mɨ. 21 Te ꞌdɨ̀vɨɨ ꞌonɨ Orɨ nɨ zɨkokò drʉ díká àbírí ꞌdàzà kokò drʉ kʉ.
Yesu nɨ eꞌyo ɨ̀cejʉ nɨ awo dràtaa àloo ɨngataa drìa vɨɨ
22ꞌBa Yesu nɨ ɨmbale vɨɨ ɨnɨ nɨ cajʉ túàlʉ Galilia ꞌba, ꞌyo ɨnɨ yɨ́ kɨ́nɨ̀, “Àsì were ꞌba koo ꞌBa Mvápi òꞌdɨ nyaa, fèjʉ àgu yɨ́ 23ɨ̀rɨ kijʉ ra. Te oꞌdú na butia Orɨ nɨ ngaa ɨ̀rɨ ɨ̀gàa ra.” ꞌBa ɨ̀rɨ nɨ ɨmbale vɨɨ cá càndɨ yɨ̀.
Mùsorò òfèjʉ Orɨ jó nɨ vɨɨ
24Yesu ɨnɨ nɨ mujʉ ꞌba ɨ̀rɨ nɨ ɨmbale vɨɨ ɨbe Kaperenaumi alɨa ba, àgu mʉ̀sorò Orɨ jó nɨ vɨɨ traꞌba vɨɨ mú Petero bʉ díká zí ɨ̀rɨ kɨ́nɨ̀, “Ɨmbaápi mɨ awo vɨɨ ɨ mʉ̀sorò Orɨ jó nɨ vɨɨ òfe ra yà#17:24 Giriki yɨ̀ dracimasi ìrì. ?”
25Petero òmvɨ ɨnɨ yɨ́ kɨ́nɨ̀, “Èè.”
Petero nɨ fɨjʉ jóá ꞌbá, Yesu nɨ ꞌbarʉʉ òkò ɨ̀rɨ zile vɨɨ ɨ. Zi ɨ̀rɨ kɨ́nɨ̀, “Simoni, mɨ ɨgataa ngóni yà? Òpɨ nyawú drìa vɨɨ ɨ́ mʉ̀sorò òkʉ ꞌba ngoo ɨnɨ bʉ yà? Súrú anzɨ bʉ yà nòsɨ̀kʉ júrú anzɨ bʉ yà?”
26Petero òmvɨ kɨ́nɨ̀, “ꞌBa júrú drʉ vɨɨ ɨnɨ bʉ.”
Yesu ꞌyo ɨ̀rɨ́ yɨ́ kɨ́nɨ̀, “Acete kárí anzɨ ꞌbá trʉ ra. 27Te àma nɨ lèle ꞌba ꞌdɨ̀vɨɨ ɨnɨ ale ɨnzole kʉ vɨɨ yɨ̀, mɨ mʉ yíá, mɨ ꞌbe mɨ awo gòlɨ̀ yíá díká mɨ àzì ìꞌbi mɨnɨ ꞌbele òkò vɨɨ tilia, mɨ nze séndè ɨcoo àma ꞌyowa mʉ̀sorò vɨɨ òfèle mɨ be ra vɨɨ fe ꞌba vɨɨ ɨnɨ yɨ́.”
Currently Selected:
Matayo 17: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
Matayo 17
17
Yesu wʉ́rá nɨ ɨꞌdajʉ mgbi vɨɨ
(Mariko 9:2-13; Luka 9:28-30)
1Oꞌdú azɨa butia Yesu ꞌdʉ nɨ be Petero ɨ, Yakobo ɨ díká Yakobo adripi Yohana ɨ, ce ɨnɨ drì ꞌbee ɨ̀zʉʉ vɨ́ɨvɨɨ drìa oru ɨnɨ nɨ ovʉjʉ aꞌdúle òꞌbɨ ꞌbʉ vɨɨ yɨ̀. 2Nàa àle, ɨ̀rɨ wúrá òjanɨ mgbi ꞌba ndee ɨnɨ mule be. Andretia rɨ di kɨ̀le ìtú lé, díká bòngo ɨ̀rɨ rúá vɨɨ òjanɨ ɨmve hwɨ́ɨ́ dìzà lé. 3Acete ꞌba ɨ̀rɨ nɨ ɨmbale na vɨɨ ndré Musa ɨnɨ Elia be ɨ̀tàrɨa Yesu be.
4Ànɨ Petero ꞌyo Yesu yɨ́ kɨ́nɨ̀, “Opɨ, ɨ̀rɨ ònyɨ̀be àmanɨ ovʉjʉ vɨ̀a. Mɨ tè àꞌɨ̀ɨ ra, Ma nga bòrò sii vɨ̀a na, àlʉa mɨ́yɨ́, àloo Musa yɨ́ díká àloo vɨɨ Elia yɨ́.”
5Ɨ̀rɨ nɨ ngà kíríá ɨ̀tàrɨa ꞌdɨ̀, iríti hwɨ́ɨ́ vɨ́ɨvɨɨ aꞌbú ɨnɨ cɨ díká àálé nga iríti ndee alɨa kɨ́nɨ̀, “Dɨ̀vɨɨ mvamàa manɨ lèle tʉ̀ vɨɨ ɨ díká ma ɨ̀rɨ yɨ̀ àfʉ́ yɨ̀ tʉ̀. Ànɨ lè àmɨ ɨrɨ́ ɨ̀rɨ ti ra!”
6ꞌBa ɨ̀rɨ nɨ ɨmbale vɨɨ ɨnɨ nɨ àálé vɨɨ ɨrɨjʉ ꞌba, oꞌbé ànɨ òꞌbúu drʉ andreti drìa àrɨ̀yɨ̀kʉ cá òrì yɨ̀ tʉ̀. 7Te Yesu mu ɨnɨ ꞌbʉ, ɨlo ɨnɨ díká ꞌyo ɨnɨ yɨ́ kɨ́nɨ̀, “Àmɨ ngá oru, díká àmɨ ꞌó òrì kʉ!” 8Ɨnɨ nɨ àngʉ̀ ndrèrɨa oru, isú lʉ́ Yesu nɨ aꞌdúle.
9Ɨnɨ nɨ ɨlʉrɨa ꞌbee drìa vɨɨ yɨ̀ ɨ̀lèè, Yesu lɨ ɨnɨ bílé kɨ́nɨ̀, “Àmɨ òlʉ́ eꞌyo àmɨ nɨ ndrèle ꞌdɨ̀vɨɨ ꞌba àloo yɨ́ kʉ kpere ꞌBa Mvápi nɨ ɨ̀gàrɨa drà alɨa vɨɨ yɨ̀ ɨdrɨ drʉ.”
10ꞌBa ɨ̀rɨ nɨ ɨmbale vɨɨ zí ɨ̀rɨ kɨ́nɨ̀, “ꞌBa àzítáá ɨmbaꞌba vɨɨ ɨ́ ꞌyo lè Elia ɨrɨ ca òkò àrɨ yɨ̀ yà?”
11Yesu òmvɨ ɨnɨ yɨ́ kɨ́nɨ̀, “Adadrʉ, Elia nɨ ngaa caa òkò, díká ɨ̀rɨ ngaa eꞌyo drɨ́á ka òꞌbàa kílílí drʉ ngónde. 12Te ma lè ꞌyo àmɨ́ yɨ́, Elia ca ndráánɨ́ ꞌba díká òꞌbɨ awɨɨ ni kʉ te ꞌó ɨ̀rɨ bʉ eꞌyo ɨnɨ así nɨ́ lèle vɨɨ ɨ. Kòꞌbò ꞌdɨ̀vɨɨ lé ꞌBa Mvápi nɨ ngaa càndɨ nyaa ɨnɨ gíá rá.”
13ꞌBa Yesu nɨ ɨmbale vɨɨ vá ace ɨ̀rɨ ɨ̀tàa Yohana bàbùtízìmù fèle vɨɨ drìa vɨɨ ra.
Yesu nɨ mva drìa orɨndɨ ònzɨ be vɨɨ àtɨ̀jʉ vɨɨ
14Ɨnɨ nɨ drì kàjʉ òꞌbɨ alɨa ꞌba, agú àloo ca Yesu bʉ díká sì ùlùúti ɨ̀rɨ drìlia. 15Agú ndee ꞌyo ɨ̀rɨ́ yɨ́ kɨ́nɨ̀, “Opɨ, mɨ ꞌbà asíndrɨ̀zà mvamàa drìa, ɨ̀rɨ ɨ̀drɨ̀à be díká ɨ̀drɨ̀à ndee ɨ rɨ ɨ̀rɨ oꞌbe tʉ̀. Ɨ rɨ ɨ̀rɨ oꞌbe òzo àcɨ alɨa díká yí alɨa. 16Ma ji ɨ̀rɨ ꞌba mɨnɨ ɨmbale vɨɨ ɨnɨ bʉ te ɨcóó ɨ̀rɨ àtɨ kʉ.”
17Yesu òmvɨ kɨ́nɨ̀, “Àmɨ ꞌba àꞌɨ̀taa ko díká asíònzɨ be drʉ, ma ngaa ovʉ àmɨ be ngòpɨ ka yà? Ma ngaa àmɨ ti taa ngòpɨ ká yà? Mɨ ji mva ndee mabʉ nòa.” 18Yesu tre orɨndɨònzɨ ꞌdɨ̀vɨɨ drìa, díká orɨndɨònzɨ ndee pʉ̀ agúámvá vɨɨ alɨa vɨɨ yɨ̀ ra, díká mva ndee àtɨ̀ cotícotí.
19Acete ꞌba Yesu nɨ ɨmbale vɨɨ mú ɨ̀rɨ bʉ aꞌdúle díká zí ɨ̀rɨ kɨ́nɨ̀, “Àma òꞌbì orɨndɨònzɨ vɨɨ ɨ̀pʉ̀le té àja kpé àrɨ eꞌyo yɨ̀ yà?”
20Òmvɨ ɨnɨ yɨ́ kɨ́nɨ̀, “Àrɨ̀yɨ̀kʉ àꞌɨ̀taa àmɨ ꞌyowa vɨɨ wereá drʉ. Ma lè ꞌyo àmɨ́ yɨ́ tàándí drʉ, àmɨ àꞌɨ̀taa tè té ovʉʉ kɨ̀le òrɨ ɨkɨ́ nyɨ́rɨ́á vɨɨ lé, àmɨ ɨco ꞌyo ꞌbee vɨɨ yɨ́ kɨ́nɨ̀, ‘Mɨ mu ɨngajʉ vɨ̀a vɨɨ yɨ̀ nálé’ díká ɨ mu ra. Eꞌyo àloo ngaa ovʉ àmɨ yɨ́ ɨ̀wa be kʉ.”#17:20 Eꞌyo sɨ̀zà alóo mɨ. 21 Te ꞌdɨ̀vɨɨ ꞌonɨ Orɨ nɨ zɨkokò drʉ díká àbírí ꞌdàzà kokò drʉ kʉ.
Yesu nɨ eꞌyo ɨ̀cejʉ nɨ awo dràtaa àloo ɨngataa drìa vɨɨ
22ꞌBa Yesu nɨ ɨmbale vɨɨ ɨnɨ nɨ cajʉ túàlʉ Galilia ꞌba, ꞌyo ɨnɨ yɨ́ kɨ́nɨ̀, “Àsì were ꞌba koo ꞌBa Mvápi òꞌdɨ nyaa, fèjʉ àgu yɨ́ 23ɨ̀rɨ kijʉ ra. Te oꞌdú na butia Orɨ nɨ ngaa ɨ̀rɨ ɨ̀gàa ra.” ꞌBa ɨ̀rɨ nɨ ɨmbale vɨɨ cá càndɨ yɨ̀.
Mùsorò òfèjʉ Orɨ jó nɨ vɨɨ
24Yesu ɨnɨ nɨ mujʉ ꞌba ɨ̀rɨ nɨ ɨmbale vɨɨ ɨbe Kaperenaumi alɨa ba, àgu mʉ̀sorò Orɨ jó nɨ vɨɨ traꞌba vɨɨ mú Petero bʉ díká zí ɨ̀rɨ kɨ́nɨ̀, “Ɨmbaápi mɨ awo vɨɨ ɨ mʉ̀sorò Orɨ jó nɨ vɨɨ òfe ra yà#17:24 Giriki yɨ̀ dracimasi ìrì. ?”
25Petero òmvɨ ɨnɨ yɨ́ kɨ́nɨ̀, “Èè.”
Petero nɨ fɨjʉ jóá ꞌbá, Yesu nɨ ꞌbarʉʉ òkò ɨ̀rɨ zile vɨɨ ɨ. Zi ɨ̀rɨ kɨ́nɨ̀, “Simoni, mɨ ɨgataa ngóni yà? Òpɨ nyawú drìa vɨɨ ɨ́ mʉ̀sorò òkʉ ꞌba ngoo ɨnɨ bʉ yà? Súrú anzɨ bʉ yà nòsɨ̀kʉ júrú anzɨ bʉ yà?”
26Petero òmvɨ kɨ́nɨ̀, “ꞌBa júrú drʉ vɨɨ ɨnɨ bʉ.”
Yesu ꞌyo ɨ̀rɨ́ yɨ́ kɨ́nɨ̀, “Acete kárí anzɨ ꞌbá trʉ ra. 27Te àma nɨ lèle ꞌba ꞌdɨ̀vɨɨ ɨnɨ ale ɨnzole kʉ vɨɨ yɨ̀, mɨ mʉ yíá, mɨ ꞌbe mɨ awo gòlɨ̀ yíá díká mɨ àzì ìꞌbi mɨnɨ ꞌbele òkò vɨɨ tilia, mɨ nze séndè ɨcoo àma ꞌyowa mʉ̀sorò vɨɨ òfèle mɨ be ra vɨɨ fe ꞌba vɨɨ ɨnɨ yɨ́.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved