2 Timeteo 1
1
1Waragà ꞌdɨ̀vɨɨ ɨngajʉ ma bʉ Paulo ovʉle kòndè Kristo Yesu awo drʉ òkpo Orɨ awo vɨɨ yɨ̀, ꞌbanɨ pèle mujʉ òyòsòzà Orɨ nɨ sòle ɨdrɨ ꞌba Kristo Yesu nɨ àꞌɨ̀le ra vɨɨ ꞌyowa vɨɨ àràa ꞌdajʉ òꞌbɨ yɨ́ vɨɨ bʉ.
2Ma sɨ̀ ɨ̀rɨ Timitayo ma nɨ lèle tʉ̀ kɨ̀le mva ma awo lé vɨɨ yɨ́.
Ma zii kɨ́nɨ̀, lè Orɨ Ata àma ꞌyowa díká Opɨ àma ꞌyowa Kristo Yesu ɨ̀rɨ fè ɨ̀rɨ yɨ́ asíndrɨ̀zà díká kɨ̀sà àloo ɨ̀rɨ fè ɨ̀rɨ yɨ́ asíánzú.
Así ɨmbazà ovʉjʉ àꞌɨ̀taa yɨ̀ vɨɨ
3Ma Orɨ manɨ àzí ngale ɨ̀rɨ yɨ́ vɨɨ ìnzìi, ɨgataa àlá yɨ̀, kòꞌbò àꞌbimà nɨ ndráánɨ́ ꞌole vɨɨ lé. Ma rɨ àmɨ eꞌyo yɨ̀ ɨ̀rɨ zii sawà drɨ́á yɨ̀ ìtú ɨnɨ iní be izítáá ma awo vɨɨ ɨnɨ alɨa. 4Manɨ mɨ awo musí sʉ̀zà vɨɨ eꞌyoa ɨgarɨa, mɨ àva ɨ ma ki lè té àꞌbaa màá ndre mɨ ma mule yɨ̀, azílé ma así ɨ̀rɨ isú àyɨ̀kò benì. 5Ma nìra ada àmɨ àꞌɨ̀ Opɨ nɨ ra àrɨ̀yɨ̀kʉ àmɨ ꞌdu àꞌɨ̀taa ayèè Yunesi awo vɨɨ ɨ díká adèè Loisi awo vɨɨ be. 6Eꞌyo ꞌdìvɨɨ yɨ̀, ma àmɨ orʉʉ así drɨ́á yɨ̀ fètaa Orɨ nɨ fèle àmɨ yɨ́ sawà manɨ gí tìjʉ àmɨ drìa vɨɨ yɨ̀ vɨɨ àyʉjʉ kílílí. 7Àrɨ̀yɨ̀kʉ Orɨ fèe àma yɨ́ Orɨndɨ ovʉjʉ òrì yɨ̀ vɨɨ ɨ kʉ te orɨndɨ òkpo nɨ vɨɨ ɨ, alè nɨ vɨɨ ɨ díká ìnzìtaa fèjʉ àma ngʉlʉpɨ yɨ́ vɨɨ ɨ.
8Ànɨ àmɨ ꞌó drìnza kʉ eꞌyo nzejʉ Opɨ àma ꞌyowa vɨɨ drìa díká ma drìa káꞌdí manɨ ovʉjʉ màbúsù nɨ eꞌyo ɨ̀rɨ awo vɨɨ òlʉ̀taa yɨ̀ ra kpé. Ɨ̀ndɨa ráaka àmɨ bɨ́ ma buti càndɨ Eꞌyo ba òlʉ̀jʉ vɨɨ alɨa, òkpo Orɨ awo vɨɨ yɨ̀. 9ꞌDɨ̀vɨɨ Orɨ àma òpale vɨɨ ɨ díká pè àma ovʉjʉ ɨdrɨ àlátárá drʉ vɨɨ alɨa nɨ̀. ꞌOo ꞌdɨ̀vɨɨ àmanɨ tà sìle ra vɨɨ yɨ̀ kʉ te ɨ̀rɨ nɨ ovʉle òtìtaa ɨ̀rɨ awo ndráánɨ́ drɨ̀ò lètaa ɨ̀cejʉ asíndrɨ̀zà be nɨ vɨɨ yɨ̀. Fè àma yɨ́ asíndrɨ̀zà ꞌdɨ̀vɨɨ léti Kristo Yesu bʉ vɨɨ yɨ̀ dèèngà wúdrìkúrù ɨꞌdoo kʉ. 10Te ace Orɨ fè eꞌyo ꞌdɨ̀vɨɨ ɨꞌdá ànɨ mgboo drʉ cataa ꞌbarʉʉ àma òpale Yesu Kristo drʉ, drà drì arúlé cɨ́ díká àma yɨ́ léti ɨdrɨ nánináni nɨ vɨɨ ɨꞌdale Eꞌyo ba vɨɨ yɨ̀ vɨɨ bʉ vɨɨ yɨ̀. 11Orɨ pè ma ovʉjʉ òlùúpi drʉ, kòndè drʉ, díká ɨmbaápi Eꞌyo ba vɨɨ òlʉ̀le vɨɨ drʉ. 12Ànɨ eꞌyo ꞌdɨ̀vɨɨ yɨ̀ ma drì cii ꞌdɨ̀ ɨ. Te ma ovʉʉ drìnza yɨ̀ kʉ àrɨ̀yɨ̀kʉ ma nì ꞌbarʉʉ manɨ àꞌɨ̀le vɨɨ ra díká manɨ nìra ɨ ɨco Eꞌyo ba ɨ̀rɨ nɨ ma ìgènijʉ ànɨ vɨɨ tàamba kpere oꞌdú ɨ̀rɨ nɨ ngajʉ cajʉ vɨɨ alɨa ra.#1:12 Eꞌyo sɨ̀zà alóo ꞌyo kɨ́nɨ̀, eꞌyo manɨ fèle tàamble Òrɨ vɨɨ.
13Mɨ mba eꞌyo ada manɨ òlʉ̀le vɨɨ ɨnɨ tà ovʉjʉ ɨ̀cetaa drʉ mɨ́ yɨ́, butia bɨ̀jʉ díká ovʉjʉ àꞌɨ̀taa ɨnɨ alɨa alè àma nɨ àma ɨ̀cɨjʉ Kristo Yesu be vɨɨ be. 14Mɨ mba eꞌyo ada òròdrí drʉ ꞌbanɨ òlʉ̀le mɨ yɨ́ vɨɨ tàa àzàkoma Orɨndɨ Àlátárá awo mɨ alɨa vɨɨ yɨ̀.
15Àmɨ nì eꞌyo Kristiani súrú Asia nɨ vɨɨ alɨa vɨɨ ɨnɨ nɨ ma gà jʉ sɨ̀ vɨɨ ra, átà Figelo ɨnɨ Hemojini be alɨa ɨ̀ndɨ̀.
16Ma zii kɨ́nɨ̀ lè Opɨ ɨ̀rɨ ꞌbà asíndrɨ̀zà àkú Onesifora awo vɨɨ drìa àrɨ̀yɨ̀kʉ ɨ̀rɨ nɨ ibúlé rɨle ma andrílé ra àloo ma así ɨ̀kale ra vɨɨ yɨ̀. Ovʉʉ ndráánɨ́ ma yɨ̀ drìnza yɨ̀ kʉ manɨ ovʉrɨa ombezà drʉ nyòrò síá àrújóá. 17Ɨ̀ndɨ̀a ráaka ɨ̀rɨ nɨ cajʉ Romua ꞌba, ndrù ma kara drɨ́á alɨa kpere ɨ̀rɨ nɨ ma isúrɨ́á. 18Ma Opɨ nɨ zii ɨ̀rɨ nɨ asíndrɨ̀zà ɨ̀rɨ awo vɨɨ fèjʉ ɨ̀rɨ yɨ́ oꞌdú Kristo nɨ cajʉ vɨɨ yɨ̀. Díká àmɨ nì ko ma àzà léti tre yɨ̀ Efesoa ngóni yà vɨɨ ra.
Currently Selected:
2 Timeteo 1: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
