2 Koronito 12

Eꞌyo ndrèzà Paulo awo vɨɨ ɨnɨ ɨ̀cetaa be

1Lè màá ɨ̀nyà ma asúú káꞌdí ma tè òròdrí isúu alɨa kʉ kpé. Te ma ngaa ɨ̀tàa orobɨ Opɨ awo díká ɨ̀cetaa ɨ̀rɨ awo vɨɨ be. 2Ma nì eꞌyo agú àloo Kristo nɨ àꞌɨ̀le ra ɨlɨ ɨ̀gàtɨle mudrí drìa su vɨɨ alɨa ꞌbanɨ ɨbúlé ꞌdule jile ꞌbù urule drʉ tʉ̀ nambà na zorè Orɨ nɨ ovʉjʉ vɨɨ alɨa vɨɨ drìa ra. Te ɨ̀rɨ dèè rúá ɨdrɨ drʉ vɨɨ alɨa yà nòsɨ̀kʉ yʉ yà vɨɨ ma nìi kʉ, pè lʉ́ Orɨ nì nɨ̀. 3Díká ma nì agú ndee tu àle rúá ɨdrɨ alɨa vɨɨ yà nòsɨ̀kʉ yʉ yà vɨɨ kʉ pè lʉ́ Orɨ nì nɨ̀. Te ma nìra 4ꞌba jí ɨ̀rɨ Paradisia díká ɨrɨ eꞌyo òrì òrì tàsìle ɨ ɨ̀tá drìa kʉ vɨ́ɨvɨɨ ɨnɨ, eꞌyo lèle ꞌba ada ɨ̀rɨ òlʉ̀ kʉ vɨ́ɨvɨɨ ɨbe. 5Ma ngaa ma ɨ̀nyàa agú ꞌdànaa yɨ̀ ra, te ma ngaa ma ɨ̀nya ma ngʉlʉpɨ yɨ̀ kʉ pè lʉ́ kíríá ma awo òkpo àkò vɨɨ ɨnɨ yɨ̀. 6Káꞌdí ma tè lèe ma ɨ̀nyàa, ma ɨcoo té ovʉ ànɨ ꞌba azazà nɨ kʉ, àrɨ̀yɨ̀kʉ ma ngaa eꞌyo ada nzee ɨ. Te ma ɨcoo ꞌo vɨ́nɨ kʉ àrɨ̀yɨ̀kʉ ma lèe ꞌba àloo ɨ̀rɨ ɨga eꞌyo ma drìa àlá drʉ dèè ngà ndrèe eꞌyo manɨ ꞌole vɨɨ ɨnɨ kʉ díká ɨrɨɨ eꞌyo manɨ òlʉ̀le vɨɨ kʉ.

7Te ma ògajʉ cajʉ àfʉ́ yɨ̀ tʉ̀ ɨ̀cetaa tree ꞌdɨ̀vɨɨ ɨnɨ eꞌyo yɨ̀, ꞌbà fé má yɨ́ ocí ma rúá za telea vɨɨ ɨnɨ kòndè sitani awo vɨɨ be ma ɨnzajʉ azílé manɨ ovʉjʉ àfʉ́ yɨ̀ tʉ̀ kʉ benì. 8Ma òꞌbì màa ꞌba Opɨ bʉ paaleko na ɨ̀rɨ nɨ àfa ndee nzejʉ ma rúá za telea vɨɨ yɨ̀ ra. 9Te ꞌyo má yɨ́ kɨ́nɨ̀, “Asíánzú ma awo vɨɨ ca mɨ́ yɨ́ rá. Òkpo ma awo vɨɨ nɨ ngaa mɨ àzà ko kílílí mɨnɨ ovʉrɨa òkpoàkò alɨa.” Ànɨyɨ̀ ma àyɨ̀kò yɨ̀ ma ɨ̀nyàjʉ òkpoàkò ma awo vɨɨ yɨ̀ azílé òkpo Kristo awo vɨɨ ɨ̀rɨ nga àzí léti ma bʉ yɨ̀ benì. 10Ɨ̀ndɨ̀ate eꞌyo Kristo awo ꞌdɨ̀vɨɨ yɨ̀, ma àyɨ̀kò yɨ̀ ovʉjʉ òkpoàkò alɨa, àꞌda alɨa, eꞌyo ɨ̀wa alɨa, ɨnzamatara alɨa, díká càndɨ alɨa. Àrɨ̀yɨ̀kʉ ma tè ovʉʉ òkpoàkò alɨa, òkpo Kristo awo vɨɨ ɨ fe ma ca òkpo be.

Eꞌyo Paulo nɨ ɨgale ꞌba Korinitoa vɨɨ ɨnɨ drìa vɨɨ

11Ma ꞌbà ma ngʉlʉpɨ ꞌba azazà lé, te àmɨ fè má yɨ́ ꞌo vɨ́nɨ nɨ̀. Lè àꞌbaa àmɨ àtí ndráánɨ́ ma nɨ̀, àrɨ̀yɨ̀kʉ ma coo ɨ̀sɨle “kòndè ɨ̀gàtɨle tʉ̀” vɨɨ ɨnɨ be tʉ̀ kʉ, ma tè káꞌdí àdrɨ̀ɨ ꞌba tòó nɨ ra kpé. 12Ma nɨ ndráánɨ́ ovʉrɨa àmɨ be ma ɨ̀ꞌda àmɨ yɨ́ ma Kòndè nɨ vɨɨ ra. Àrɨ̀yɨ̀kʉ ma fè ɨ̀cetaa ɨnɨ, ma ꞌo eꞌyo òrìòrì vɨɨ ɨnɨ ra díká ma ꞌo talɨ ɨnɨ àmɨ ɨ̀sɨlɨa ra. 13Eꞌyo ꞌbanɨ àmɨ ꞌbàjʉ butibuti drʉ àva Kristiani alóo vɨɨ ɨnɨ ɨ̀sɨlɨa vɨɨ ngoo ɨ yà? Kíríá manɨ ovʉjʉ àmɨ drìa térí drʉ kʉ vɨɨ ɨ yà? Àmɨ trʉ́ ma eꞌyo ònzɨ ꞌdɨ̀vɨɨ yɨ̀ ra!

14Acete ma ngónde cajʉ àmɨ bʉ díká paaleko na zorɨa díká ma nga ovʉ térí drʉ àmɨ drìa kʉ, àrɨ̀yɨ̀kʉ àfa manɨ lèle àmi bʉ vɨɨ ovʉʉ lonyɨ àmɨ ꞌyowa vɨɨ ɨ kʉ te kíríá àmɨ ngʉlʉpɨ ɨnɨ ɨ. Adanɨa lèe anzɨ ɨnɨ mbá lonyɨ tà otíꞌbá yɨ́ nɨ̀ kʉ, te ráaka otíꞌbá ɨ́ àfa tà mba anzɨ yɨ́ nɨ̀. 15Ànɨ ma ngaa àfa drɨ́á ma bʉ vɨɨ ɨnɨ àyʉʉ díká ma ngʉlʉpɨ nɨ àyʉʉ drɨ́á àyɨ̀kò yɨ̀ àmɨ àzà kojʉ. Ma tè àmɨ lèe ambamba, àmɨ nga ma lèe were yà? 16Àmɨ alóo àtí rá kɨ́nɨ̀ ma ovʉʉ ndráánɨ́ àmɨ drìa térí drʉ kʉ. Te àmɨ alóo ɨgá kɨ́nɨ̀, ma ꞌba lókìrí be nɨ díká ma rɨ àfa tra àmɨ bʉ àkɨ́rɨ̀ yɨ̀. 17Ma nya àmɨ àramʉ̀ drʉ léti àgu manɨ ɨnɨ ti pèle àmɨ bʉ vɨɨ ɨnɨ bʉ vɨɨ yɨ̀ ra yà? 18Manɨ ndráánɨ́ Tito nɨ àꞌíjʉ́ mujʉ àmɨ òndrèjʉ vɨɨ yɨ̀, ma pè àdrì Kristiani drʉ àma ꞌyowa vɨ́ɨvɨɨ tia mujʉ ɨ̀rɨ be ɨ̀ndɨ̀. Tito onya ndráánɨ́ àmɨ àramʉ̀ drʉ ra yà? Àma ngaa ndráánɨ́ àzí Orɨndɨ àlʉ vɨɨ yɨ̀ díká àma òbɨ̀ɨ eꞌyo àlʉ vɨɨ butia ɨ kʉ yà?

19Àmɨ ibú rɨ ɨga kɨ́nɨ̀ àma vɨɨ àma kambʉ rii ɨ yà? Te yʉ, Àma ibíi rɨɨ eꞌyo ada ɨ Orɨ drìlia ꞌba Kristo nɨ àꞌɨ̀le ra drʉ, díká eꞌyo drɨ́á àma nɨ ꞌole vɨɨ ɨnɨ arɨ́màònyɨ lá àmɨ ɨ̀còjʉ Kristo alɨa. 20Ma òrì yɨ̀ àrɨ̀yɨ̀kʉ manɨ ngarɨa carɨa, ma ngaa alóo àmɨ isú kɨ̀le ma así nɨ́ té lèle vɨɨ lé kʉ, pàbaa àmɨ ngaa alóo ma isú kɨ̀le àmɨ así nɨ lèle vɨɨ lé kʉ. Ma òrì yɨ̀ àrɨ̀yɨ̀kʉ alóo àwàtaa ɨco nga ovʉ cɨ, àꞌyà be, àdrà be, ɨ̀sɨle cozà be, àjídimara be, ndrotaa be, ꞌbàtaa tʉ̀ be díká eꞌyo ꞌozà bɨ̀lɨ̀rɨ̀ vɨɨ ɨnɨ be. 21Ma òrì yɨ̀ ma tè ngaa drì kàa díká rá, Orɨ ma awo vɨɨ nɨ ngaa muu ma ꞌbàa àmɨ drìlia ꞌba èꞌyere drʉ, díká ma ngaa ovʉʉ càndɨ yɨ̀ ꞌba òꞌbɨ́ ibúlé ɨ̀zatà ꞌole díká gàle ɨ̀zatà ꞌyowa eꞌyo òndi ꞌojʉ, àlɨ òꞌbàjʉ díká mule àcɨ be vɨɨ ɨnɨ kʉle sɨ̀ vɨɨ ɨnɨ yɨ́.

Currently Selected:

2 Koronito 12: MADI-URL

Highlight

Copy