2 Koronito 10
10
Eꞌyo Paulo nɨ ɨ̀cele àzí ɨ̀rɨ nɨ ngale vɨɨ drìa vɨɨ
1Ma ɨ Paulo ɨ, ma lè àꞌí àmɨ bʉ ìnzìtaa yɨ̀ àloo asíánzú yɨ̀ kòꞌbò Kristo lé, káꞌdí àmɨ alóo téè ꞌyoo kɨ́nɨ̀ ma eꞌyo sɨ̀ɨ àdrà drʉ waragà alɨa te dèe ma òrì drʉ àmɨ drìlia. 2Ma kɨ̀sà àꞌíi àmɨ bʉ àmɨ izí kɨ́nɨ̀, manɨ carɨa àmɨ bʉ àle, màá ovʉ àdrà drʉ àmɨ bʉ kɨ̀le manɨ ovʉle àdrà drʉ ꞌba eꞌyo ꞌole rúá yɨ̀ vɨɨ ɨnɨ bʉ vɨ́nɨ kʉ. 3Àrɨ̀yɨ̀kʉ káꞌdí àmanɨ ovʉjʉ ɨdrɨ rúá nɨ vɨɨ alɨa ra kpé, àma ꞌbàa àꞌdí òtìtaa díká léti rúá nɨ vɨɨ yɨ̀ kʉ. 4Àmá ànyàfa patí òkpo drʉ Orɨ awo vɨɨ àyʉ àꞌdí ꞌdijʉ ɨ, ovʉʉ ànyàfa patí rúá nɨ vɨɨ ɨ kʉ te àꞌdí patí òkpo Orɨ awo vɨɨ ɨnɨ àyʉ àrɨꞌboo òkpo drì arújʉ́ ɨ. 5Àꞌdí àfa jó vɨɨ ɨnɨ yɨ̀, àma ombe àgatà ɨ̀nzò drʉ àloo àfʉ́ drʉ léti ombele eꞌyo Orɨ awo vɨɨ ònìjʉ drɨ́á vɨɨ ɨnɨ cɨ. Àma òkpo àlátárá vɨɨ àyʉ ɨnɨ ɨmbajʉ Kristo buti òbɨ̀jʉ. 6Díká àmɨ tè ngaa eꞌyo Kristo nɨ ɨmbale vɨɨ butia òbɨ̀ɨ ra, àma ngaa drìrima fèe ꞌba eꞌyo Kristo awo vɨɨ butia òbɨ̀le kʉ vɨɨ ɨnɨ yɨ́ rá.
7Àmɨ kíríá eꞌyo ɨꞌdale àmɨ mulia vɨɨ ɨnɨ ndrèe ɨ. ꞌBa alóo àmɨ ɨ̀sɨlɨa vɨ́ɨvɨɨ té àfʉ́ ꞌoo kɨ́nɨ̀ ànɨ Kristo awo nɨ, lè ɨnɨ níra pàbaa àma Kristo awo nɨ ɨ̀ndɨ̀. 8Àrɨ̀yɨ̀kʉ ma drì ngaa nza kʉ káꞌdí ma tè àfʉ́ ꞌoo òkpo Opɨ nɨ fèle àma yɨ́ vɨɨ yɨ̀, àrɨ̀yɨ̀kʉ ovʉʉ àmɨ ɨrejʉ Kristo bʉ vɨɨ yɨ̀ kʉ, ɨ̀ndɨ̀a ráaka àmɨ yɨ́ òkpo fèjʉ. 9Ma lèe ɨ̀rɨ ɨꞌda kɨ́nɨ̀ ma lèe àmɨ yɨ́ òrì fèe waragà manɨ sɨ̀le vɨɨ yɨ̀ vɨ́ɨvɨɨ kʉ. 10Àrɨ̀yɨ̀kʉ ꞌba alóo ɨ ꞌyo kɨ́nɨ̀, “Waragà Paulo nɨ sɨ̀le vɨɨ ɨnɨ òká drʉ díká òkpo drʉ, te rúá yɨ̀ ɨ̀rɨ ngʉlʉpɨ nɨ ꞌba èꞌyere nɨ díká eꞌyo ɨ̀rɨ nɨ nzele vɨɨ kaa ɨkɨ́ kʉ.” 11Lè ꞌba ꞌdɨ̀vɨ́ɨvɨɨ ɨnɨ ní rá kɨ́nɨ̀ ɨ̀sɨle cozà eꞌyo àma nɨ sɨ̀le dèè àma yʉ vɨɨ cóó ɨ̀sɨle eꞌyo àma nɨ ngale ꞌole sawà àma nɨ ngajʉ ovʉjʉ àmɨ be vɨɨ yɨ̀ vɨɨ be kʉ.
12Àma rɨɨ àma òꞌbi nòsɨ̀kʉ gawú sɨ ꞌba ànɨ ɨ̀nyàle tʉ̀ vɨɨ ɨbe kʉ. Té rɨɨ ànɨ rʉʉ cenɨ̀cenɨ̀ díká ànɨ òꞌbìi ànɨ yɨ̀ cenɨ̀cenɨ̀, dèènaa ɨnɨ òndʉ̀ʉ̀ kodrʉ. 13Àma ngaa muu àma ɨ̀nya tʉ̀ òkpo fèle àma yɨ́ vɨɨ drìlia kʉ. Àma ngà kírí rɨɨ àma ɨ̀nyàa àzí Orɨ nɨ fèle ngale àma yɨ́ kpere àmɨ bʉ vɨɨ yɨ̀ ovʉʉ eꞌyo alóo vɨɨ ɨnɨ yɨ̀ kʉ. 14Ovʉʉ kɨ̀nɨ̀ àma nɨ ꞌyojʉ àma òkpo àmɨ drìa cɨ vɨɨ ovʉʉ kɨ́nɨ̀ àma ꞌbà àma àzítáá drìlia mbʉʉ vɨ́nɨ kʉ, te àma ꞌba òkò Eꞌyo ba Kristo awo vɨɨ òlʉ̀jʉ òlʉ̀le àmɨ yɨ́ vɨɨ ɨnɨ ɨ. 15Ànɨ àma ngaa àma ɨ̀nya azí ꞌba alóo ɨnɨ ngale nɨ̀ vɨɨ yɨ̀ kʉ. Àma asíꞌbàzà be kɨ́nɨ̀, àꞌɨ̀taa àmɨ ꞌyowa vɨɨ tè ngaa tuu ꞌba, pàbaa kara àma nɨ mujʉ azí ngajʉ vɨɨ nɨ ngaa nɨ ɨ̀mèꞌdɨɨ ra, 16azílé àma ɨco nga ànɨ eꞌyo ba Orɨ awo vɨɨ òlʉ àngʉ̀ alóo vɨɨ ɨnɨ alɨa benì. Àrɨ̀yɨ̀kʉ àma lèe àma ɨ̀nya azí ꞌba alóo ɨnɨ nɨ ngale ꞌba alóo ꞌyowa àngʉ̀a vɨɨ ɨnɨ yɨ̀ kʉ. 17Te, eꞌyo sɨ̀zà nɨ ꞌyole vɨɨ lé kɨ́nɨ̀, “Lè ꞌbarʉʉ nɨ ɨ̀nyàle vɨɨ ɨ̀rɨ ɨ̀nyà nɨ eꞌyo Opɨ àwo vɨɨ yɨ̀.” 18Àrɨ̀yɨ̀kʉ ꞌba ngáá ꞌbarʉʉ nɨ ɨ̀nyàa nɨ ngʉlʉpɨ yɨ̀ cenɨ̀cenɨ̀ vɨɨ àtì ɨ kʉ, te ꞌba Opɨ nɨ gí tìle drìa nɨ̀ vɨɨ ɨ.
Currently Selected:
2 Koronito 10: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
