1 Timoteo 6
6
Ɨmbataa atɨꞌboo yɨ́ vɨɨ
1Àmɨ Kristiani òmɨ̀le ovʉjʉ atɨꞌboo drʉ vɨɨ ɨnɨ lá, lè àmɨ ìnzì ꞌba ꞌwàrà àmɨ ꞌyowa vɨɨ ɨnɨ ìnzì, azílé ꞌba ngáá Orɨ rú òmva ɨmbataa àma ꞌyowa vɨɨ ɨbe kʉ benì. 2Le atɨꞌboo ꞌyowa ìmgbélé nɨ ovʉle Kristiani drʉ vɨɨ ɨnɨ fé ɨnɨ yɨ́ ìnzìtaa wereá drʉ kʉ, káꞌdí ɨnɨ nɨ ovʉjʉ Kristiani nɨ ra kpé. Ɨ̀ndɨ̀a, lè ɨnɨ ngá àzí ɨnɨ yɨ́ ɨ̀gàtɨzà drʉ àrɨ̀yɨ̀kʉ ꞌba òròdrí isúlé ɨnɨ ꞌyowa àzí alɨa vɨɨ ɨnɨ ꞌba àꞌɨ̀taa be díká ɨnɨ nɨ lèle tʉ̀ vɨɨ ɨnɨ ɨ. ꞌDɨ̀vɨɨ ɨnɨ eꞌyo lèle mɨ ɨmba díká mɨ ꞌyo ɨnɨ ꞌó vɨɨ ɨnɨ ɨ.
Ɨmbataa ɨ̀nzò drʉ vɨɨ ɨnɨ lonyɨ ada vɨɨ be
3ꞌBa àloo tè àzítáá ɨ̀nzò drʉ drì fule Opɨ Yesu Kristo awo vɨɨ be kʉ nòsɨ̀kʉ Orɨ awo vɨɨ be kʉ vɨ́ɨvɨɨ ɨmbaa, 4ɨ ovʉ àfʉ́ yɨ̀ te dèènaa nìi eꞌyo àloo tʉ́á kʉ. ꞌBa ꞌdɨ̀vɨ́ɨvɨɨ ɨnɨ así eꞌyo ònzɨ àgatà nɨ vɨ́ɨvɨɨ drìa. Díká eꞌyo ndee ɨ fe ɨ àwa ti ònzɨ yɨ̀ ngùtaa jijʉ, ngɨ̀rɨ̀ngɨ̀rɨ̀ jijʉ, àꞌda ꞌdajʉ, ɨgataa onzɨ jitaa be. 5Díká ɨ àgatà ga àsúú ꞌba ɨnɨ omɨ̀ nɨ ɨmbataa ònzɨ isúlé ꞌba vɨɨ ɨnɨ ɨ̀sɨlɨa. Vɨɨ ꞌba eꞌyo ada nɨ ovʉle ɨnɨ bʉ yʉ díká ɨgale dínì nɨ léti lonyɨ isújʉ́ nɨ vɨɨ ɨnɨ ɨ.
6Te ovʉjʉ ɨdrɨ Orɨ awo vɨɨ alɨa díká àma nɨ tràjʉ àfa àma be cɨ vɨɨ yɨ̀ ra vɨɨ ɨ́ fe àmá ca lonyɨ be angɨrɨ nɨ̀. 7Àrɨ̀yɨ̀kʉ àma ca ndráánɨ́ nyawú drìa àfa àloo kodrʉ díká àma ɨcoo àfa àloo ꞌdu alɨa vɨɨ yɨ̀ kʉ. 8Te tà tè ovʉʉ àma bʉ bòngo sùzà be cɨ, lè ɨnɨ cá àma yɨ́ ra. 9Te ꞌba lèle ovʉle lonyɨ be vɨɨ ɨ́ fɨ obetaa alɨa díká ꞌbá ɨnɨ ru eꞌyo òròdrí kó nɨ àloo ànyò fèle vɨ́ɨvɨɨ alɨa, eꞌyo ɨ ɨnɨ sɨ àva drìjàzà alɨa. 10Àrɨ̀yɨ̀kʉ alè séndè nɨ vɨɨ ɨ̀rɨ ola eꞌyo ònzɨ drɨ́á nɨ vɨɨ ɨ. ꞌBa alóo así ꞌbàle séndè drìa tʉ̀ vɨɨ ojá ànɨ ti àꞌɨ̀taa ꞌyowa vɨɨ àgapíá vɨɨ yɨ̀ ra díká ɨ ovʉ asíá càndɨ angɨrɨ be.
Àyotaa Paulo nɨ fèle Timitayo yɨ́ vɨɨ
11Te mɨ ɨ ꞌbarʉʉ àzí ngale Orɨ yɨ́ vɨɨ drʉ, lè mɨ kʉ eꞌyo onzɨ ꞌdɨ̀vɨɨ ɨnɨ drɨ́á rá díká mɨ bɨ̀ eꞌyo ada buti nɨ, mɨ ovʉ ɨdrɨ Orɨ awo vɨɨ alɨa, àꞌɨ̀taa alɨa, lètaa alɨa, eꞌyo ti tazà alɨa díká ovʉjʉ ɨdrɨ èꞌyere vɨɨ yɨ̀. 12Mɨ ꞌdi àꞌdí ònyɨ̀be àꞌɨ̀taa nɨ vɨɨ ɨ díká mɨ isú ànɨ ɨdrɨ nánináni vɨɨ benì. Orɨ fè ɨ̀rɨ mɨ yɨ́ mɨnɨ ndráánɨ́ eꞌyo ɨ̀cele àꞌɨ̀taa mɨ awo Kristo nɨ àꞌɨ̀jʉ vɨɨ drìa ndɨtɨrɨ drʉ, ꞌba òꞌbɨ drìlia vɨɨ yɨ̀ 13Orɨ ɨdrɨ fèle àfa drɨ́á yɨ́ vɨɨ drìlia, díká Kristo Yesu ndráánɨ́ sàdénì ònyɨ̀be nzele oꞌdú ꞌbanɨ ɨ̀rɨ jijʉ Pontio Pilato drìlia vɨɨ yɨ̀ vɨɨ drìlia, ma fè mɨ́ yɨ́ òkpo 14àzítáá ꞌdɨ̀vɨɨ ɨnɨ tàmbajʉ kílílí drʉ díká mɨ mba ɨnɨ tà nɨ òmva koko drʉ àꞌɨ̀taa yɨ̀, kpere oꞌdú Opɨ àma ꞌyowa Yesu Kristo nɨ cajʉ díká vɨɨ yɨ̀. 15Àrɨ̀yɨ̀kʉ sawà ꞌyéè vɨɨ alɨa Kristo awo cataa nɨ ngaa nɨ ɨ̀cee ra ngajʉ ꞌbùa vɨɨ yɨ̀ ngajʉ Orɨ ꞌbanɨ ìnzìle ìnzì vɨɨ bʉ yɨ̀ díká Orɨ òkpo be tʉ̀, Opɨ drʉ aꞌdúle, òpɨ alóo vɨɨ ɨnɨ drìlia vɨɨ drʉ, 16dràle kʉ díká ovʉle dìzà cale alɨa kʉ vɨɨ ɨ, ꞌba àloo nɨ ndrèle kʉ nòsɨ̀kʉ ɨcole ndrèle kʉ vɨɨ ɨ. Ìnzìtaa ɨ̀rɨ ovʉ ɨ̀rɨ yɨ́ díká òkpo be nánináni. Amena.
17Mɨ fè àyotaa ꞌba lonyɨ be iwú ꞌdònoo yɨ̀ vɨɨ ɨnɨ yɨ́ ovʉjʉ àfʉ́ yɨ̀ nòsɨ̀kʉ así ꞌbàjʉ lonyɨ ꞌbanɨ ɨcole àyʉle dele ra vɨɨ drìa kʉ. Te lè ɨnɨ ꞌbá así Orɨ àfa drɨ́á fèle àma yɨ́ àyɨ̀kò isújʉ́ nɨ vɨɨ drìa. 18Mɨ ꞌyo ɨnɨ àyʉ́ lonyɨ ɨnɨ nɨ ovʉle ɨbe vɨɨ ɨnɨ eꞌyo ònyɨ̀be ꞌojʉ ɨ, ɨnɨ ovʉ lonyɨ be àzí ònyɨ̀be ꞌozà yɨ̀ díká lè ɨnɨ fé afa àva yɨ̀ ꞌba afa koko vɨɨ ɨnɨ yɨ́, sawà drɨ́á ɨnɨ ovʉ́ ngónde afa Orɨ nɨ fèle ɨnɨ yɨ́ àyʉjʉ ꞌba alóo ɨbe. 19Léti ꞌdɨ̀vɨɨ yɨ̀, ɨnɨ ngaa lonyɨ tà mbaa ànɨ ka òꞌbàjʉ iwú adro vɨɨ alɨa azílé ɨnɨ ngajʉ ɨdrɨ ada vɨɨ tàa mbajʉ benì.
20Timitayo lá, mɨ mba àyotaa fèle mɨ gíá vɨɨ ɨnɨ tà. Mɨ kʉ eꞌyo ovʉjʉ ꞌba àgatà ɨkɨ́kó gale vɨɨ ɨbe ra díká àgatà ɨ̀nzò drʉ ꞌba alóo ɨnɨ àtìle omvele “Òndʉ̀a” nɨ vɨɨ ra. 21Àrɨ̀yɨ̀kʉ ꞌba alóo ɨ́ ondrí kɨ́nɨ̀ òndʉ̀a vɨɨ ànɨ bʉ cɨ díká eꞌyo ꞌdɨ̀vɨɨ ꞌotaa yɨ̀, àvɨ́ léti ꞌyowa àꞌɨ̀taa alɨa vɨɨ ra.
Asíndrɨ̀zà ɨ̀rɨ ovʉʉ àmɨ be.
Currently Selected:
1 Timoteo 6: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
