1 Timoteo 3
3
ꞌBa ꞌba drìceꞌba Kànísà alɨa vɨɨ ɨnɨ
1ꞌDɨ̀vɨɨ ɨ̀rɨ eꞌyo ada nɨ. ꞌBarʉʉ àloo te lèe así isúu pɨla ovʉjʉ drìle drʉ àzí kànísà nɨ vɨɨ drìa cejʉ ra,#3:1 Eꞌyo aꞌbíá vɨɨ yɨ̀bisopu; pàbaa ɨ̀sɨle 2 vɨɨ alɨa vɨ́nɨ. dènaa pè azí òròdrí drʉ vɨ́ɨvɨɨ ngaa ɨ. 2ꞌBarʉʉ kànísà drìcele vɨɨ lè ɨ̀rɨ ovʉ ꞌba àloo òꞌbɨ nɨ ìgènile ra díká ꞌbanɨ ɨcole drìa ɨ̀nzò lile kʉ vɨ́ɨvɨɨ ɨ, lè ɨ̀rɨ awo izí ɨ̀rɨ ovʉ kíríá àlʉ, ꞌbarʉʉ eꞌyo ꞌduu ɨ̀ꞌyere vɨ́ɨvɨɨ ɨ, ꞌbarʉʉ ɨcole nɨ drì sile cenɨ̀cenɨ̀ ra vɨ́ɨvɨɨ ɨ, ꞌbarʉʉ ìnzìzà nɨ, ꞌbarʉʉ ɨcole ꞌba àꞌílé kílílí nɨ, ꞌbarʉʉ ɨcole ꞌba ɨmbale ra nɨ, 3ovʉʉ ꞌbarʉʉ nɨ fèe pɨla ɨwa mbuzà yɨ́ vɨ́ɨvɨɨ ɨ kʉ, ovʉʉ ꞌbarʉʉ òmbà drʉ nɨ kʉ te ꞌbarʉʉ ɨ̀ꞌyere vɨ́ɨvɨɨ ɨ, ovʉʉ ꞌbarʉʉ àwàtaa lèle tʉ̀ vɨ́ɨvɨɨ ɨ kʉ, ovʉʉ ꞌbarʉʉ séndè lèe tʉ nɨ kʉ. 4Lè ɨ̀rɨ mba nɨ awo àkú tà kílílí díká ɨ̀rɨ ndrè kɨ́nɨ̀ anzɨ nɨ awo vɨɨ ɨnɨ ìnzí nɨ kílílí drʉ ra. 5Te ꞌba àloo te ɨcoo nɨ awo àkú tàmba kílílí drʉ kʉ, ɨcoo Kristiani Orɨ awo vɨɨ ɨnɨ drì ce kílílí drʉ ngóni ngóni yà? 6Lè ɨ̀rɨ ovʉ ꞌbarʉʉ Kristo nɨ àꞌɨ̀le oꞌdɨ vɨ́ɨvɨɨ ɨ kʉ te ꞌbarʉʉ olaa nɨ fɨle àꞌɨ̀taa alɨa mgbemgbe nɨ, te vɨ́nɨ kʉ àfʉ́ ɨco nga fɨ ɨ̀rɨ alɨa ra díká ɨco nga fɨ eꞌyo lizà alɨa trótrò sɨ̀tanɨ̀ lé ra. 7Lè pàbaa ꞌba àꞌɨ̀taa be vɨɨ ɨnɨ fé ɨ̀rɨ yɨ́ ìnzìtaa ra, ànɨyɨ̀ ɨ̀rɨ nɨ ɨcojʉ ìnzìtaa àvɨ̀jʉ kʉ benì díká sitani nɨ ɨ̀rɨ pajʉ kʉ benì.
Àzíꞌbá kànísàa vɨɨ ɨnɨ
8Àzíꞌbá kànísà nɨ vɨɨ, lè pàbaa ɨnɨ ovʉ́ ꞌba ìnzìtaa be nɨ, eꞌyo ada be nɨ, lè ɨnɨ ovʉ́ ꞌba wínò mbule tʉ̀ nɨ kʉ, àwànyà séndè nɨ be nɨ kʉ. 9Lè ɨnɨ àtí eꞌyo ada àꞌɨ̀taa nɨ Orɨ nɨ ɨ̀cele àma yɨ́ Kristo drìa vɨɨ ɨgataa piri yɨ̀. 10Lè ɨ òꞌbí ꞌba ndee ɨnɨ ráká, te ꞌbà té eꞌyo ònzɨ isúu ɨnɨ bʉ kʉ, ɨnɨ ŋgá fɨ àzí ꞌba àzàkojʉ kànísà alɨa vɨɨ ngarɨa ndò.
11Léti àlʉ vɨɨ yɨ̀, lè pàbaa zi ꞌyowa vɨɨ ɨnɨ ovʉ́ zi ìnzìtaa be nɨ, ɨnɨ ovʉ́ òmbɨ́lɨ́ be kʉ, te ɨnɨ ovʉ́ ꞌba eꞌyo ꞌdule léti ɨ̀ꞌyere yɨ̀ nɨ díká ꞌba eꞌyo ada be nɨ.
12Lè azíꞌbá kànísà nɨ vɨɨ ɨ̀rɨ ovʉ izí be àlʉ díká lè ɨ̀rɨ mba nɨ awo anzɨ tà àkú be kílílí. 13ꞌBa àzí ꞌyowa vɨɨ ngale kílílí ꞌba vɨɨ ɨ́ ìnzìtaa ònyɨ̀be isú díká ɨnɨ así ɨ ovʉ dàà àꞌɨ̀taa ꞌyowa Kristo Yesu alɨa vɨɨ alɨa.
14Káꞌdí manɨ té lèjʉ cajʉ àmɨ bʉ mbele drʉ ra kpé, ma eꞌyo ꞌdɨ̀vɨɨ ɨnɨ sɨ̀ɨ àmɨ yɨ́ ɨ̀cetaa drʉ, 15ànɨ ma tè ngaa ma drì icíi ra, waragà ꞌdɨ̀vɨɨ nɨ ngaa ɨ̀cee àmɨ yɨ́ amʉti Kristiani drʉ vɨɨ ɨ́ adrɨzà ꞌo jó Orɨ awo vɨɨ alɨa ngóni yà vɨɨ nɨ̀, ꞌdɨ̀vɨɨ ɨ̀rɨ kànísà Orɨ ɨdrɨ be vɨɨ awo vɨɨ ɨ, ɨ̀rɨ pàbaa idíá drʉ àloo ɨmbama drʉ eꞌyo ada awo. 16Eꞌyo Orɨ nɨ ɨ̀ꞌdale àma yɨ́ Yesu Kristo drìa ibúlé ovʉle zìzà drʉ vɨɨ ɨ̀rɨ eꞌyo àloo ìmgbélé vɨ́ɨvɨɨ ɨ. Lè àma àtí drɨ́a eꞌyo ndee ra;
Ɨ̀ꞌda nɨ#3:16 Eꞌyo sɨ̀zà alóoOrɨ ɨ. rúá yɨ̀,
ɨ̀ce nɨ eꞌyo ada drʉ léti Orɨndɨ alɨa yɨ̀,
malaika ndré ɨ̀rɨ ra,
ꞌba òlʉ́ eꞌyo ɨ̀rɨ awo vɨɨ súrú mgbimgbi ale yɨ̀,
àꞌɨ́ ɨ̀rɨ wúdrìkúrù ale yɨ̀ ndulu,
díká ꞌdú ɨ̀rɨ oru ꞌbùa dìzà be.
Currently Selected:
1 Timoteo 3: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
