1 Koronito 6

Tòtaa Kristiani ɨnɨ ɨ̀sɨlɨa vɨɨ

1Àmɨ ɨ̀sɨle àloo tè ovʉʉ onotaa be àrípi kristiani bʉ, ɨ eꞌyo ndee ji li ꞌba eꞌyo liꞌba eꞌyo Orɨ awo vɨɨ àꞌɨ̀ꞌba kʉ vɨɨ ɨnɨ bʉ, ɨ̀ndɨ̀a jijʉ kristiani bʉ vɨɨ karaa àrɨ eꞌyo yɨ̀ yà? 2Àmɨ nìi ngà kírí kristiani Orɨ awo vɨɨ ɨnɨ muu eꞌyo lizà lii wúdrìkúrù drìa nɨ̀ vɨɨ kʉ yà? Díká àmɨ tè muu eꞌyo lii wúdrìkúrù drìa àmɨ ɨ nɨ, àmɨ òndʉ̀a caa ngà eꞌyo were vɨɨ ɨnɨ otʉjʉ kʉ yà? 3Àmɨ nìi kɨ́nɨ̀ àma muu malaika ɨnɨ eꞌyo lii nɨ̀ vɨɨ kʉ yà? Ànɨ tè ovʉ vɨ́nɨ ɨ̀ce kɨ́nɨ̀ àma ɨco onotaa mgbimgbi ɨdrɨ alɨa àfa eꞌyo yɨ̀ oꞌdú drɨ́á yɨ̀ vɨɨ ɨnɨ eꞌyo li ra! 4Ànɨyɨ̀, àmɨ tè ovʉʉ onotaa àfa nɨ ꞌdɨ̀vɨ́ɨvɨɨ ɨbe cɨ, àmɨ mu ꞌba eꞌyo liꞌba kristiani nɨ ìnzìle kʉ vɨɨ ɨnɨ omve eꞌyo lijʉ ɨ àrɨ eꞌyo yɨ̀ yà? 5Ma lè ngà àmɨ yɨ eꞌyo ꞌdònoo ꞌyo drìnza fèjʉ. Àmɨ nɨ ꞌyolea yɨ̀ ndùlʉ́ ꞌba àloo òndʉ̀a be àmɨ ɨ̀sɨlɨa ɨcole onotaa àmɨ ɨ̀sɨlɨa Kristiani drʉ vɨɨ amalea yʉ yà? 6Tebaa vɨɨ dèè, àmɨ alóo Kristiani drʉ vɨɨ ɨnɨ jii arípí nɨ tòo àzítáá drìlia díká fèjʉ eꞌyo lijʉ àmɨ drìa ꞌba eꞌyo Orɨ awo vɨɨ àꞌɨ̀le kʉ vɨɨ ɨnɨ yɨ́!

7Eꞌyo àmɨ nɨ jijʉ àmɨ tòjʉ àzítáá drìlia ꞌdɨ̀vɨɨ ɨ̀ce ndɨtɨrɨ drʉ kɨ́nɨ̀ eꞌyo lizà ndè àmɨ ra. Acete àmɨ lèe eꞌyo lizà ɨ̀nzò drʉ àmɨ drìa kʉ àrɨ eꞌyo yɨ̀ yà? Pàbaa àmɨ lèe ɨ nyá àmɨ àramʉ̀ drʉ kʉ àrɨ eꞌyo yɨ̀ yà? 8Ɨ̀ndɨ̀a ráaka, àmɨ́ ꞌba alóo ɨnɨ yɨ́ càndɨ fe díká ɨnɨ drì nya àramʉ̀ yɨ̀. Te ba vɨɨ dèè ꞌba ndee ɨnɨ pàbaa Kristiani nɨ àmɨ lé.

9Àmɨ nìi ra kɨ́nɨ̀ ꞌba asíonzɨ be vɨɨ ngáá Kárí Orɨ awo vɨɨ nya kʉ vɨɨ kʉ yà? Àmɨ fé ɨ olé àmɨ kʉ. Káꞌdí ꞌba àlɨ òꞌbàle vɨɨ ɨnɨ nòsɨ̀kʉ ꞌba orɨa ìnzì le vɨɨ ɨnɨ nòsɨ̀kʉ ꞌba àlɨ òꞌbàle zi be vɨɨ ɨnɨ nòsɨ̀kʉ àgu àlɨ ꞌbàle séndè yɨ̀ vɨɨ ɨnɨ nòsɨ̀kʉ àgu lale ànɨ yɨ̀ cenɨ̀cenɨ̀ vɨɨ ɨnɨ 10nòsɨ̀kʉ ogi nòsɨ̀kʉ ꞌba àwànyà be vɨɨ ɨnɨ nòsɨ̀kʉ omadɨ nòsɨ̀kʉ ꞌba àjídimara be vɨɨ ɨnɨ nòsɨ̀kʉ ꞌba ògì ògì le àkɨ́rɨ̀ yɨ̀ vɨɨ ɨnɨ ngáá Kárí Orɨ awo vɨɨ ꞌdu àfa ꞌyowa drʉ kʉ. 11Ɨ̀ndɨ̀a àmɨ alóo ɨnɨ ndráá kòꞌbò vɨ́nɨ. Te ꞌba òjɨ́ ɨ̀zatà àmɨ ꞌyowa vɨɨ ra, ꞌba ojá àmɨ àlátárá drʉ àloo ꞌbà lá ace àmɨ ꞌba ònyɨ̀be Orɨ awo vɨɨ ɨnɨ drʉ òkpo Opɨ Yesu Kristo awo vɨɨ yɨ̀ díká Orɨndɨ àlátárá Orɨ awo vɨɨ yɨ̀.

Adrɨzà àwù nɨ vɨɨ

12ꞌBa alóo ɨ ꞌyo kɨ́nɨ̀, “ꞌBa fé àyotaa eꞌyo drɨ́á ꞌojʉ ra,” Èè, te ovʉʉ ꞌbènɨ̀à àfa káyɨ̀ òròdrí be vɨ́ɨvɨɨ kʉ. “Àfa káyɨ̀ àzítáá ꞌba fè mɨ yɨ́ ra,” te lè màa fèe afa àloo ɨ̀rɨ ꞌbà ma nɨ awo àtɨꞌboo drʉ kʉ. 13ꞌBa àlóo ɨ ꞌyo pàbaa kɨ́nɨ̀, “Ɨnya ɨ̀rɨ àfa ale awo nɨ, díká ale ɨ̀rɨ àfa ɨ̀nya awo nɨ.” Èè, te Opɨ nɨ ngaa àfa ìrì vɨɨ ɨnɨ drìjàa ra. Rúá ovʉʉ àfa àlɨ òꞌbàjʉ nɨ kʉ, te ɨ̀rɨ àfa Opɨ awo nɨ díká Orɨ nɨ àfa rúá nɨ́ lèle vɨɨ fèe nɨ̀. 14Orɨ ɨ̀gà Opɨ nɨ drà alɨa vɨɨ yɨ̀ òkpo nɨ awo vɨɨ yɨ̀, díká ɨ̀rɨ ngaa pàbaa àma ɨ̀gàa nɨ̀. 15Àmɨ nìi kɨ́nɨ̀ àmɨ rúá ɨ̀cɨ àmɨ Kristo be túàlʉ vɨɨ kʉ yà? Ma ɨco nga Kristo rúá ꞌdu díká ɨ̀cɨ rúá ꞌba àlɨ òꞌbàꞌba séndè yɨ̀ vɨɨ ꞌyowa vɨɨ be ra yà? Ce yʉ! 16Àmɨ nìi ngà kɨ́nɨ̀ ꞌba ànɨ ɨ̀cɨle ꞌba àlɨ òꞌbàꞌba séndè yɨ̀ vɨɨ ɨbe be vɨɨ ɨ̀cɨ nɨ rúá ɨ̀rɨ be ɨ̀ndɨ̀ vɨɨ kʉ yà? Àrɨ̀yɨ̀kʉ eꞌyo sɨ̀zà ꞌyo ra kɨ́nɨ̀, “ꞌBa ìrì ꞌdɨ̀vɨɨ ɨnɨ ngaa caa rúá àlʉ drʉ.”#Iꞌdoza 2:24 17Te ꞌbarʉʉ nɨ ɨ̀cɨle opɨ be vɨɨ ɨ̀cɨ nɨ orɨndɨ yɨ̀ ɨ̀rɨ be ɨ̀ndɨ̀.#Iꞌdoza 2:24

18Àmɨ kʉ́ adrɨ̀zà ònzɨ àlɨ òꞌbàzà nɨ vɨɨ ra. Ɨ̀zatà alóo ꞌba ada nɨ ꞌole vɨɨ òmvaa ɨ̀rɨ rúá kʉ, te agú ɨ̀zatà àlɨ ꞌbàzà nɨ vɨɨ ꞌole vɨɨ òmva nɨ rúá nɨ. 19Àmɨ nìi ngà àmɨ rúá ɨ̀rɨ Orɨjó Orɨndɨ Àlátárá àwo nɨ, ovʉle àmɨ alɨa, àmɨ nɨ isúlé Orɨ bʉ vɨɨ ɨ vɨɨ kʉ yà? Àmɨ ovʉʉ àmɨ ngʉlʉpɨ awo nɨ kʉ, 20ꞌba agá àmɨ drì àje yɨ̀. Ànɨyɨ̀ àmɨ ìnzí Orɨ nɨ rúá àmɨ ꞌyowa vɨɨ yɨ̀.

Currently Selected:

1 Koronito 6: MADI-URL

Highlight

Copy