1 Koronito 1

1Waragà ꞌdɨ̀vɨɨ ma ɨ Paulo Orɨ nɨ omvele kòndè drʉ Yesu Kristo awo díká ɨ̀rɨ nɨ òtìtaa nɨ awo vɨɨ azílé ɨ̀rɨ yɨ́ vɨɨ sɨ̀ nɨ̀. Àdrì àma ꞌyowa Kristiani drʉ omvele Sositeni drʉ vɨɨ sɨ̀ pàbaa ɨ̀ndɨ̀. 2Àma sɨ̀ waragà vɨɨ kristiani àkú ìmgbélé Korinito nɨ vɨɨ alɨa vɨɨ ɨnɨ yɨ́ díká ꞌba ꞌbanɨ omvele Orɨ awo àlátárá drʉ vɨɨ ɨbe. ꞌBà àmɨ àlátárá drʉ léti Kristo Yesu bʉ vɨɨ yɨ̀ kɨ̀le ɨ̀rɨ nɨ ꞌole ꞌba drɨ́á Opɨ àma ꞌyowa Yesu Kristo nɨ omvele Opɨ ꞌyowa nɨ, díká àma ꞌyowa nɨ ra kara drɨ́á alɨa vɨɨ ɨnɨ yɨ́ vɨɨ lé. 3Asíndrɨ̀zà díká asíánzú Orɨ Ata àma ꞌyowa vɨɨ awo díká opɨ Yesu Kristo awo vɨɨ ɨ̀rɨ ovʉ àmɨ bʉ.

Àwàꞌdɨ̀fóò fèzà

4Ma rɨ àwàꞌdɨ̀fóò fe Orɨ ma awo vɨɨ yɨ́ àmɨ eꞌyo yɨ̀, àrɨ̀yɨ̀kʉ ɨ̀rɨ nɨ asíndrɨ̀zà fèle àmɨ yɨ́ Kristo Yesu alɨa vɨɨ yɨ̀. 5Àrɨ̀yɨ̀kʉ Kristo alɨa, àmɨ isú àfa drɨ́á ònyɨ̀be vɨɨ ɨnɨ rá, eꞌyo àmɨ nɨ nzele díká nìle vɨɨ ɨnɨ be drɨ́á 6àrɨ̀yɨ̀kʉ eꞌyo soti àmanɨ nzele Kristo drìa vɨɨ ꞌonɨ léti àmɨ bʉ vɨɨ yɨ̀ kòꞌbò. 7Ànɨyɨ̀, fètaa Orɨndɨ àlátárá awo àloo àmɨ lilea yʉ àmɨ nɨ Opɨ Yesu Kristo àma ꞌyowa vɨɨ awo drìkàtaa tèrɨa otaa ɨ̀rɨ awo vɨɨ be. 8Orɨ nɨ ngaa fèe àmɨ ka sòo kirikiri àꞌɨ̀taa alɨa kpere oꞌdú àsìjʉ naa yɨ̀, ànɨ ꞌba ngáá onotaa ji àmɨ rúá oꞌdú Opɨ Kristo Yesu nɨ drìkàjʉ vɨɨ yɨ̀ kʉ benì. 9Orɨ àmɨ omvele jile ti ɨ̀cɨtaa alɨa Mvápia Yesu kristo Opɨ àma ꞌyowa vɨɨ be vɨɨ ɨ̀rɨ àꞌɨ̀taa be.

Awataa Kànísà ɨnɨ alɨa vɨɨ

10Ma lè ꞌyo àmɨ yɨ́ adrímà Kristiani drʉ vɨɨ ɨnɨ lá rú Opɨ Yesu Kristo awo vɨɨ yɨ̀, àmɨ ɨrɨ́ àmɨ àmɨ ɨsɨlɨa. Ànɨ azílé ɨ̀sɨle cozà ɨ̀rɨ ovʉ àmɨ ɨ̀sɨlɨa kʉ benì díká ànɨ àmɨ ti ɨ̀cɨɨ kílílí àmɨ omɨ̀a díká ɨgataa alɨa benì. 11Àrɨ̀yɨ̀kʉ adrímà Kristiani drʉ Kole awo àkúá vɨɨ ꞌyó má yɨ́ kɨ́nɨ̀ àmɨ ɨ̀sɨlɨa àwàtaa cɨ. 12Eꞌyo manɨ ꞌyole vɨɨ ɨkɨ́á nóni, Àmɨ alóo ɨnɨ ꞌyoo, “Ma eꞌyo Paulo awo vɨɨ butia òbɨ̀ɨ ɨ,” àlóo kɨ́nɨ̀, “Ma eꞌyo Apolo awo vɨɨ butia òbɨ̀ɨ ɨ,” alóo kɨ́nɨ̀, “Ma eꞌyo Kefa#1:12 Vɨɨ omvele Petero drʉ vɨɨ ɨ. awo vɨɨ butia òbɨ̀ɨ ɨ,” alóo kɨ́nɨ̀, “Ma eꞌyo Kristo awo vɨɨ butia òbɨ̀ɨ ɨ.”

13Kristo ale ace awazà drʉ mgbimgbi yà? ꞌBa dí ndráánɨ́ Paulo nɨ Patí àlazà rúá àmɨ eꞌyo yɨ̀ ɨ yà? ꞌBa fé àmɨ yɨ́ bàbùtízìmù Paulo rú yɨ̀ yà? 14Ma fè àwàꞌdɨ̀fóò Orɨ yɨ́ manɨ awɨle bàbùtízìmù fèle àmɨ ɨ̀sɨle yɨ́ kʉ pè lʉ́ Kirispo ɨnɨ yɨ́ Gayo be vɨɨ yɨ̀. 15Ànɨ ꞌba àloo ɨcoo ꞌyo ma fé àmɨ yɨ́ bàbùtízìmù ma rú yɨ̀ vɨ́ɨvɨɨ kʉ. 16Èè, ma fè Pàbaa bàbùtízìmù ꞌba Sitefuna awo àkúá vɨɨ ɨnɨ yɨ́ ra, te àlóo ɨnɨ cɨ yà vɨɨ ma ɨcoo ɨga kʉ. 17Àrɨ̀yɨ̀kʉ Kristo pèe ma ti mu bàbùtízìmù fe ɨ kʉ, te eꞌyo àlá Orɨ awo vɨɨ òlʉ ɨ. Ovʉʉ òndʉ̀ʉ̀ ꞌba nɨ yɨ̀ kʉ, àrɨ̀yɨ̀kʉ ma lèe ɨ̀cetaa ꞌbanɨ Kristo nɨ dijʉ patí àlazà drìa vɨɨ òkpoa ki kʉ.

18Àrɨ̀yɨ̀kʉ eꞌyo Kristo nɨ dijʉ patí àlazà drìa vɨɨ ɨ̀rɨ ꞌba àvɨ̀le ra vɨɨ ɨnɨ yɨ́ eꞌyo àzíkó nɨ te àma ꞌba Opɨ nɨ òpale ra drʉ, ɨ̀rɨ òkpo Orɨ awo nɨ. 19Àrɨ̀yɨ̀kʉ Eꞌyo sɨ̀zà ꞌyo kɨ́nɨ̀;

“Ma ngaa ꞌba òndʉ̀a drʉ vɨɨ ꞌyowa òndʉ̀ʉ̀ drìjàa ra;

díká ꞌba eꞌyo vàzà be vɨɨ ꞌyowa eꞌyo vàzà òmvaa ra.”

20ꞌDɨ̀vɨɨ ɨkɨ́a agú òndʉ̀ʉ̀ be vɨɨ yɨ́ ngóni yà? ꞌBa ònìtaa be vɨɨ ngóni yà? ꞌBa eꞌyo ale nyale vàtaa angɨrɨ yɨ̀ iwú ꞌdònoo yɨ̀ vɨɨ ɨnɨ yɨ́ ngóni yà? Orɨ fèe òndʉ̀ʉ̀ wúdrìkúrù awo vɨɨ ca azazà drʉ kʉ yà? 21Àrɨ̀yɨ̀kʉ òndʉ̀ʉ̀ Orɨ awo vɨɨ yɨ̀ wúdrìkúrù òbòrí ɨ̀rɨ nìle kpé òndʉ̀ʉ̀ ꞌyowa nyawú nɨ vɨɨ yɨ̀, Orɨ ovʉʉ àyɨ̀kò yɨ̀ eꞌyo oyʉzà ɨꞌdale azazà drʉ ꞌba àꞌɨ̀le ra vɨɨ ɨnɨ òpale ra vɨɨ yɨ̀. 22Léti Orɨ awo vɨɨ rɨ ɨꞌda azazà drʉ ꞌba Yahudi nɨ vɨɨ ɨnɨ yɨ́ àrɨ̀yɨ̀kʉ lé ɨ̀cetaa talɨ nɨ vɨɨ ndre ráká ɨnɨ nɨ àꞌɨ̀jʉ ndò. ꞌBa Giriki nɨ vɨɨ ɨnɨ yɨ́ pàbaa eꞌyo ndee rɨ ɨꞌda azazà drʉ àrɨ̀yɨ̀kʉ ɨ kírí eꞌyo nɨ ꞌole òndʉ̀ʉ̀ ꞌyowa yɨ̀ vɨɨ àti ɨ, 23te àma òlʉ̀ eꞌyo Kristo nɨ dijʉ vɨɨ ɨ. ꞌDɨ̀vɨɨ eꞌyo ꞌba Yahudi nɨ vɨɨ ɨnɨ yɨ́ àako fèle vɨ́ɨvɨɨ ɨ díká ꞌba ꞌba júrú drʉ vɨɨ ɨnɨ nɨ ꞌdule eꞌyo azazà drʉ vɨɨ ɨ, 24te ꞌba Orɨ nɨ òpèle pataa isújʉ́ ꞌba Yahudi drʉ àloo ꞌba Giriki drʉ vɨɨ ɨnɨ ɨ̀sɨlɨa vɨɨ ɨnɨ yɨ́, oꞌdúkó ꞌdɨ̀vɨɨ ɨkɨ́á Kristo ɨ̀ce òkpo àloo òndʉ̀ʉ̀ Orɨ awo vɨɨ ɨ. 25Àrɨ̀yɨ̀kʉ eꞌyo ɨꞌdale Orɨ ꞌo azazà drʉ vɨɨ ɨ̀gàtɨ ꞌba ada òndʉ̀ʉ̀ ra díká nɨ ꞌole òkpoàkò Orɨ awo vɨɨ ɨ̀gàtɨ ꞌba ada òkpo ra. 26Adrímà Kristiani drʉ vɨɨ ɨnɨ lá, àmɨ ɨgá ngà ndráánɨ́ àmɨ ngùa yà vɨɨ oꞌdú Orɨ nɨ àmɨ omvejʉ vɨɨ yɨ̀. Àmɨ drɨ́á ovʉ́ʉ́ ndráánɨ́ òndʉ̀ʉ̀ ꞌbanɨ be kʉ, díká àmɨ drɨ́á ovʉ́ʉ́ ndráánɨ́ ꞌba ìgènizà nɨ kʉ àloo ɨngáá àkú ìnzìzà alɨa kʉ. 27Te Orɨ òpè àfa ɨꞌdale azazà vɨɨ ɨnɨ ɨngajʉ nyawúá drìnza fèjʉ ꞌba òndʉ̀ʉ̀ be vɨɨ ɨnɨ yɨ́ díká pè àfa ɨꞌdale òkpoko nyawúá vɨɨ ɨnɨ drìnza fèjʉ àfa òkpo be vɨɨ ɨnɨ yɨ́. 28Orɨ òpè àfa ɨꞌdale òròdríkóko nyawúá vɨɨ ɨnɨ, àfa ꞌbanɨ ɨ̀dele ɨ̀de vɨɨ ɨnɨ, díká àfa ꞌbanɨ ɨgale àzíkó drʉ vɨɨ ɨbe àfa nyawú nɨ ɨgale òròdrí be vɨɨ ɨnɨ àsʉjʉ 29azílé ꞌba àloo ɨ̀rɨ ɨ̀nyà nɨ Orɨ drìlia kʉ benì. 30Eꞌyo drɨ́á Orɨ nɨ ꞌole vɨɨ fè àmɨ ɨ̀cɨ Kristo Yesu be nɨ̀, díká fè ca àmɨ́ yɨ́ òndʉ̀ʉ̀ ngajʉ Orɨ bʉ vɨɨ be nɨ̀, vɨɨ ɨ̀rɨ eꞌyo kílílí Orɨ nɨ lèle vɨɨ ꞌojʉ ɨ, ovʉjʉ ꞌba àlátárá drʉ díká àma òpajʉ ɨ̀zatà alɨa. 31Ànɨyɨ̀, kɨ̀le Eꞌyo Sɨ̀zà nɨ ꞌyole vɨɨ lé kɨ́nɨ̀, “ꞌBarʉʉ nɨ ɨ̀nyàa vɨɨ ɨ̀rɨ ɨ̀nyà nɨ eꞌyo Opɨ nɨ ꞌole vɨɨ yɨ̀.”

Currently Selected:

1 Koronito 1: MADI-URL

Highlight

Copy