Dèmo kè Apôtre o 6
6
1Nè nou‐pè mè hi, ndo disciple o doko danga jou ma gana i siti mè hi nè oli, ndo Helléniste o chi guènè to oui̱ne tè Hébreu o, nédaka ndo ouo̱ do ko‐guèlè bo‐ouo̱‐o nè sènè kè‐mo, ndo ouo̱ kè nè hi ouichi nè oli. 2Ndo apôtre o boua‐pome‐nè‐joua‐litou hi, samo ho ba doko disciple o, ouo̱ to oui̱ne ho ouo̱‐o, ègui̱: Hè dinè nomo nd’alè raka oui̱ne oussou oui̱ne kè Nzapa di̱, k’alè dè nè tome tablo o iè hi. 3Nèda mo hi, o yan’lè o, ènè hoko dé oui‐mbo‐jou‐mo o, mbéa‐pome‐kè‐pakana, bo’nè‐o hi, ndo ouili to dé oui̱ne to ouo̱‐o, nè Saint‐Esprit dè i̱ngi‐mo dounou ko sèlè ouo̱‐o bo hi, h’alè é tome b‐è ho ouo̱ dè o. 4H’alè mono sènè toro Nzapa dè oussou oui̱ne ko‐a da.
5Ndo ouo̱ koda oui̱ne d‐è o nè oli. Ndo ouo̱ ba Étienne, nè foi dounou ko sèl’a dè Saint‐Esprit hi, dè Philippe, dè Prochore, dè Nicanor, dè Timon, dè Parménas, dè Nicolas, prosélyte sarli̱ Antioche. 6Ndo ouo̱ mbo ouo̱‐o tèno dida apôtre o nè, ko ouo̱ toro Nzapa jou ouo̱‐o sa, ndo ouo̱ é éli ouo̱‐o jou ouo̱.
7Nè oui̱ne kè Nzapa houlou danga jou ma gana i siti hi, ko disciple o bo doko danga jou ma, sarli̱ Jérusalem hi, ndo ba doko sacrificateur o ba oui̱ne kè Nzapa.
8Nè Étienne, nè grâce dounou ko sèl’a dè ngaïli hi, k’a dè prodige o dè di̱ngguè miracle o nè bo̱ o ba doko ouili o. 9Ko ma bo̱bo̱ ouo̱‐o hi, ouo̱ bo‐ouo̱‐o nè ouili synagogue, ndo ouo̱ sa yin’a nè synagogue kè Affranchi o hi, ndo ma nè Cyrénéen o, ndo ma nè Alexandrin o, ndo ma nè Juif nou Cilicie o dè Asie, ndo ouo̱ ma ango̱ne o guènè téli‐oui̱ne dè Étienne; 10Ouo̱ oui dè holi i̱ngi‐mo ko‐a dè Esprit n’a to nè oui̱ne hi go. 11Ndo ouo̱ nda oui‐to‐ndèlè o, ndo oui‐to‐ndèlè no‐o hi to oui̱ne o, ègui̱: Alè zili k’a dan Moïse dè Nzapa ouo̱. 12Ndo ba doko ouili o zili nè oui̱ne d‐è hi, nè hou sèlè danga zan ouo̱‐o, do nga‐oui o, do scribe o, ndo ouo̱ tèno, ouo̱ b’a o, ouo̱ chi nè di ko toa‐to‐mbanga mè. 13Ndo ouo̱ samo ho oui‐to‐ndèlè, ndo ouo̱ ka o bènè hi, ndo ouo̱ to oui̱ne o, ègui̱: Ouaïl’è h‐è tè raka li to na oui̱ne jou saint oloyar’a dè mboulou di̱ nè; 14nèdaka nd’alè zili k’a to oui̱ne, ègui̱: Jésus, Nazaréen hi, hè yara oloyara h‐è, è para doli kè’lè nè Moïse oussou hè’lè hi ouo̱.
15Ndo ba doko ouino‐o nè doungounou ko toa‐to‐mbanga hi, chi guènè pi̱ li Étienne hè joko, kè li a sanra hèmo nè li ange o̱ nè higo.
Currently Selected:
Dèmo kè Apôtre o 6: GBANU
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1932-1939
