Matiyu 14

Mǝrti Yohanna thlǝ chǝt baptisma

1Ə fartǝˈini, Hiridus kwitiri hahi Galili, sǝkkan kusheˈtǝ Yesu. 2Ndangkan fǝ tarchiyan wa “Ai, thleya Yohanna thlǝ chit baptisma niya. Thlaˈan fee hur mǝmatecha, ndaˈan chicha mbǝstǝn alkǝt chǝt ǝna sakaˈinchiɗiya.”

3Nakanya Hiridus tapi kǝsan tǝ Yohana kǝnanchǝ, mǝthlan mǝk chǝ ndǝ kǝ Pursuna kǝthlǝm Hirudiya, nu wanmanan Filibus. 4Kǝthlǝm kǝ tangtang Yohana kurɓan tǝna mbuˈandǝ Hiridus. Ndat wa, “Kǝmwasi kǝ kahantǝ Hirudiya nu wanmanan Filibus, thla peˈchǝ ha tǝ shinshingnda wa.” 5Chǝka mǝnakan Hiridus yehsi kǝ ɓǝlantǝ Yohanna, paɗ mǝthlan kwarandǝ nafcha, kǝthlǝm tǝrchanda Yohana wa thlǝ shenuˈtǝ tǝ yahti Farta nakan.

6Kǝ nggǝrkǝ fartǝ nggǝtti Hiridus ɓata, waˈi Hirudiya kǝ nuwaa rǝɓkan pangngǝn ramcha fee ɓecha. Tǝrkǝ hwiri Hiridus ha kaan. 7Kǝthlǝm ndaˈan, ɗǝfkan mee tǝ ransata ndat wa, nan fǝran nat ǝnɗi shitǝn. 8Manan ndanchi waˈyan kǝ nuwaa ǝnɗi natǝn shita, ndat wa, “Fǝramitǝn indi Yohanna thlǝ chǝt baptisma nakanya ǝ hur tafata.” 9Hiridus kwitira chǝt maasǝnchi, paɗ kǝthlǝm ransaɗi chǝtǝn ǝ pangngǝn ramcha, fǝr kan mee tǝ ndat wa kǝ fǝran fee ǝnɗi shitǝn. 10Thlǝnkan fowun fǝ yaanchiyan kǝ pursuna kǝ thlendǝ indi Yohanna thlǝ chǝt baptisma. 11Ɓakandǝ tǝ indi Yohana thlǝ chǝt baptisma ǝ hur tafata, fǝran kǝ fee wan nuwanan, ɗankan manan. 12Ɓak kǝmsichi Yohanna, tǝr kandǝ takǝɗ faɗan thlohankanda. Ɗǝkandǝ mbuˈandǝ Yesu ǝnɗi sǝɓcha.

Sǝman Yesu ǝn nafcha aru ɗǝrman

13Kǝ sǝkkǝ Yesu ǝnɗi sǝɓcha, thlaˈkan yimkan kǝ kombawal chen kan kǝmɗi nawak tǝ nefsi kǝthlǝm kǝ chok tǝ kǝmsichiyan. Paɗ kǝ sǝnkǝ nggommǝn nafcha wa, maltǝ minni ha, chekanndǝ kesh thlaˈtǝ wan mǝrǝɓchiyanda, parakandǝ ndi tǝ sarcha. 14Kǝ chek Yesu kesh hur kombawal taˈan, nakan tertǝ nggommǝn nafchǝ kaan tandǝ pǝk ndi. Haɗankǝ nafchaˈan fa, kǝnan kan hachiɗi kaɗ ɓatndǝ tǝ tanda.

15Kǝ chǝk farwita, ɓak Kǝmsichi Yesu kǝmɗiyan ndangkanda wa, “Nefsi thlǝ chokchi mǝɗya wa, paɗ nakanya chi farwita. Kallu nggomǝn nafchǝɗa ha kǝthlǝm kǝ ɗǝndǝ kǝ wan mǝrǝɓcha kǝ ɗǝndǝ hi ǝnɗi natndǝ sǝmnda.”

16Nggǝran kǝ Yesu tandǝs wa, “Ngga nwaat kǝ pǝɗa nda wa, fǝraman tanda ǝna kǝ sǝmnda.”

17Nggǝrang kandǝs tǝ ndat wa, “Ənsi harˈyan mǝɗa wa, ɓilshet ɗǝrman tǝ yirfǝ chap nessiyaˈan ndak.” 18Ndang kan tanda wa, “Ɓamitǝn tandǝ kǝmɗiya.” 19Ɗǝfkan nggomǝn nafchaˈan kǝ chokndǝ ha kǝ ɗar ndau hwalita. Tǝrkǝ Yesu ɓilsheɗi ɗǝrman tǝ yirifɗi chap yu, thlaˈan kan indǝ kǝ hulafǝrta, chǝkan usuko kǝmɗi Farta. Chakan kan ɓilsheɗan ha, fǝrakan kǝmsichiyan, kǝmsichaˈan paɗ fǝrankandǝ nafcha. 20Natnda sǝm kanda nggal kanda. Nggomman kǝ kǝmsichiyan takǝt fishirchaˈan, inaftǝ kum nggǝrsǝ chap. 21Nafchǝɗi sǝmchǝ ɗǝsǝmnan saa ndǝ aru ɗǝrman kǝ hǝssa, shengngawu fee nǝssa, tǝ wan wancha hurang wa.

Wiˈ Yesu ɗar ema

22Chat kǝ tǝɓang kanda, ndang kǝ Yesu kǝmsichiyan wa, kǝ yimndǝ kǝ hur kombawal kǝ landǝ nggǝrandǝˈin kǝ kǝthlaar kufiˈ thlaa. Mǝthlan thlarkan ha kǝ wellantǝ nggommǝn nafchaˈan ha. 23Kǝrsǝ wellandǝ nggomnan ha, tǝrkan kǝ ɗar tingringnda ichiɗan kǝthlǝm kǝ shenuˈ tǝ Farta. Kǝ farwita mǝthlan minni ichiɗan.

24Paɗ ǝ wanshengngǝnˈini kombawal taˈan pǝɗi langnga tǝ mii chichangngǝn kufiˈan. Pǝrti ˈyaman nakan yiraˈandǝ kombawaltaˈan, kǝthlǝm rǝnniˈan kwaˈkwaˈ.

25Kǝ wanshengnan mahkan yi walwurta, nak Yesu wiˈta ɗar ˈyaman kǝ ɗi kǝmɗi kǝmsichiyan. 26Kǝ nak kǝmsichiyan ndi mǝthlan wiˈta ɗar ˈyaman, chat lǝkǝkanda, ndaka nda wa, “Ɓǝɓi shemeta.” Nggakkandǝ hwata kǝthlǝm tandǝ lekǝta.

27Paɗ chat kǝɗuyu, ndangkǝ Yesu tanda wa, “Kǝ sakkowunchǝ inda wa, nggǝta Yesu. Mǝ lekǝwun wa.”

28Nggǝman kǝ Biturus ndakan wa, “Chinda, ma kittaˈan cha, fǝritǝn mbanda kǝ wiˈi ɗar ˈyaman, kǝ ɓi mbǝswechi.”

29Ndak Yesu wa, “Ɓo lee.”

Kǝn Biturus chet kesh hur kombawal taˈan, nggakkan wiˈtǝ ɗar ˈyaman kǝ ɓi kǝmɗi Yesu. 30Paɗ kǝ nakan rǝnniˈan chit alkǝta, lekǝkan nggakan yimndǝ ha. Hwakan ndangkan wa, “Chinda, hǝraˈitǝn.”

31Chat fǝrkǝ Yesu heryan kǝskanndǝ har, ndangkan wa, “Cha thlǝ fǝr kit ngguɗyeh, kǝthlǝm mǝ saktu icha?”

32Kǝ yim kandǝ kǝ hur kombawal taˈan, chat thlar kǝ rǝnniˈan ha. 33Kǝmsichiɗi nech hur kombawaltaˈan fǝran kandǝ mandǝ Yesu, ndakanda wa, “Kittaˈan, chǝ Waˈi Farta.”

Kǝnan Yesu hachǝ kaɗi ǝ Janisarat

34Kǝ chen kǝndǝ Yesu hawurtaˈan tǝ kǝmsichiyan, saˈkandǝ kǝ thle hahi Janisarat. 35Kǝ sǝnkǝ nafchi mǝrɓan wun nech kǝ Yesu, thlǝnkandǝ fata kǝmɗi chikawuni thla nech tǝ choktǝ hur thle mǝɗan ndat wa ɓi Yesu. Ɓakandǝ tǝ nat nafchǝɗi nech hachan. 36Shiyankanda, kǝ nggǝm fa fee nech haˈchan kǝ tǝkandǝ chǝka mii kapatˈyan herfa. Nat fee tǝ kanchǝ mii kapatˈyan herfa, kǝndǝ kaɗi.

Currently Selected:

Matiyu 14: GQA

Highlight

Copy