Marka 6

Nazareth ah Jesuh Cu Hnon A Tuar

(Matthai 13.53–58; Luka 4.16–30)

1Jesuh cu cuvai hmun in a suahnak khua ah a feh ih a dungthluntu pawl nih an thlun. 2Sabbath ni ah sinakok ah thu zirh a thok. A thuzirhmi a theitu mi tampi cu an mang a bang ngai ih, “Hivai pa nih hi thil pawl hi khoituʼn a ngah? A sinih pekmi hivai fitnak hi zangtu fitnak a i? Zangtin himang mangbangza hi teh a kut in a tuah thiam? 3Ani cu Mary ih fapa, James, Joses, Judas le Simon le pawl ih upa, lettama pa khi a si lo maw? A naunu le khaw hiva kan sinah an um ve i lo maw?” tiah an ti. Cun an ni le nih Jesuh cu an hnong.

4 # Joh 4.44 Cun Jesuh nih an sinah, “Profet cu ama ih khua le ram, a sungkhat pawl le a sungkua hrello hmun dang ah cu an upat,” tiah a ti hnei.

5Cun cuvai hmun ah cun mifak temte tlunah a kut a suang ih a damter; cuvai hrello mangbangza zangkhaw a tuah lo. 6Cun an zuplonak ruangah Jesuh cu a mangbang.

Jesuh nih Dungthluntu Hleinih A Thlah

(Matthai 10.5–15; Luka 9.1–6)

Cun a kaingkap khua pawl ah a feh ih thu a zirh. 7Cule minung hleinih cu a ko hnei ih pa nih panih in a thlah hnei. Cun thlarau sia pawl tlunih thuneih theinak a pe hnei. 8#Luk 10.4–11 Cule an sinah, “Nan khualtlotnak ah fiangṭhulh hrello zangkhaw keng hlah uh — caw i seh, khualtlotnak zal i seh, paisa bawm sungah paisa i seh, keng hlah uh. 9Kedap cu hru uh, asinain angki hlei keng hlah uh,” tiah thu a pe hnei. 10Cun an sinah, “Inn sung nan luh cangcang in, nan feh sal hlan lo cuvai inn ah nan cam thok. 11#Forh 13.51Cun riah-inn nan ta cohlang lo ih nan thu nan ta ngai lo tu khua cu, an khua nan suah tak tikah, anma dokalhnak fiahpittu ah, nan ke ih leivut cu thingta uh,” tiah a ti hnei.

12Curuangah an feh ih sirfaknak ding thu an phuang. 13#Jam 5.14Khawsia tamngai an dawi suak ih mifak tamngai khaw hriak an culh ih an damter.

Baptisma Petu Johan ih Thihnak

(Matthai 14.1–12; Luka 9.7–9)

14 # Mat 16.14; Mar 8.28; Luk 9.19 Jesuh ih hmin a than tuk ruangah Siangpahrang Herod#6.14 Siangpahrang Herod: Herod Antipas, Galilee uktu. nih Jesuh ih thuhla cu a thei ve. Mi hrekkhat nih, “Baptisma petu Johan cu thihnak in a thosal. Curuangah hi mangbangza thil pawl tuahtheinak huham cu Jesuh sinah ṭuan a ṭuan i thok,” tiah an ti.

15Mi dang pawl nih, “Elijah a si,” tiah an ti.

Asinain mi dang pawl sei nih, “Profet a i, a sih lole profet pawl lakih pakhat khat mang a i,” tiah an ti.

16Asinain Herod nih cuvai thu a theih ve tikah, “A hngawng ka ṭhawh termi Johan a si kau, thihnak in a thosal si lai tu!” tiah a ti. 17#Luk 3.19,20 Zangahtihle Herod ama rori nih a naupa Filip ih nupi Herodias ruangah mi a thlah ih Johan cu a tlai ter hnei, cule hri thawn khit pit in thawng thla dingin thu a pek dahmi a i. Zangruangah tih le Herod nih a nau pa Filip ih nupi Herodias cu nupi ah a ṭhit ruangah a i. 18Zangahtihle Johan nih Herod sinah, “Na naupa ih nupi na ṭhit cu daan nih a duh lo,” tiah a tih tak dah ruangah a i.

19Curuangah Herodias nih Johan cu a mit a kem ih thah a duh; Asinain a that thei lo. 20Zangruangah tih le Johan cu mi dingfel le mi thianghlim a i tih Herod nih a fiah ruangah a ṭih ih a hum. Herod nih Johan ih thu a theih tikah, thin buai ngai in a um, cule a thusipmi cu lungawi ngai in ngai a duh thotho.

21Cun Herod nih a suahni lopnak ah bawi upa pawl, ralbawi pawl le Galilee peng ih upa pawl hrangah zanriah ei khatnak puai a tuah ih, Herodias cu tikcu remcang a ngah. 22Herodias ih fanu#6.22 Herodias ih fanu; a hrekkhat kutngan cabu pawl sungah Ama ih fanu Herodias, tiah a um. cu a rong lut ih a lam, Herod le a mikhual pawl cu an lung a awi ngai. Cun Siangpahrang pa nih numi nute sinah cun, “Na duhmi hmahhmah cu ka hler la ta pe thok,” tiah a ti. 23Cun cuvai nute sinah, “Ka na hlerhmi poh cu ta ka pe thok, ka ram a hrek tiang khaw ta pe thok!” tiah siatti dingin thu a kam.

24Cun cuvai nute cu a feh ih a nu sinah, “Zangtu ka hler thok?” tiah a sut.

Cun a nu nih, “Baptisma petu Johan ih lu,” tiah a ti.

25Cun cuvai nu cu zamrang ngai in siangpahrang pa sinah a feh lohli ih, “Baptisma petu Johan ih lu cu kheng thawn in ka pe lohli la ka duh,” tiah a hler.

26Cun siangpahrang pa cu a riah a se ngai, asinain siatti dingin thu a kam cem ruangah le a mikhual pawl ruangah cuvai nu ih hlerhmi cu a el thei lo. 27Siangpahrang pa nih mithattu a thlah lohli ih Johan ih lu la dingin thu a pe. Cuvai pa cu thawnginn songah a va feh ih Johan ih lu cu a va tan. 28Cun Johan ih lu cu kheng thawn a keng ta ih numi nute cu a pe. Cule numi nute nih a nu sinah a pe. 29Cuvai thu cu Johan ih dungthluntu pawl nih an fiah tikah, an feh ih a ruak cu an la, cule thlan ah an phum.

Jesuh nih Mi 5,000 Caw A Dar

(Matthai 14.13–21; Luka 9.10–17; Johan 6.1–14)

30Cun a forhthlah pawl cu Jesuh sinah an hmuakkhawm fa ih an tuahmi hmahhmah le an zirhmi hmahhmah cu a zaten an sim. 31Cun ani nih an sinah, “Ram ṭhing ah nanma thawn hlang kan feh thok ih kan va cawlhnga thok,” tiah a ti hnei. Zangahtihle mi lut suak an tamtuk ruangah caw ei can rori hman an nei lo. 32Cun ram ṭhing la ah anma hlang lawng thawn an feh.

33Mipi pawl nih an pawh lai cu an hmu ih hutu le an si tih an fiah tikah khua cangcang in ke thawn an zuang. Cule Jesuh le a dungthluntu pawl ih bat hlan ah an ban. 34#Mat 9.36Jesuh cu lawng sungin a suah tikah, miburpi cu a hmu hnei, cule khaltu nei lo tuu mang an ih ruangah a thinfak hnei. Cule thu tamngai a zirh hnei. 35Cun ni a sim i tikah, a dungthluntu pawl cu Jesuh sinah an feh ih, “Hi hmun hi ram ṭhing a i, ni le a sim ngai i cem. 36Mipi pawl hi, kiangkap ih lo le khua pawl ah thlah hnei la, ei ding thil zangtumaw tal leih fa seu,” tiah an ti.

37Asinain Jesuh nih, “Ei ding cu nan nih pe uh,” tiah a sawn hnei.

Cun an ni nih, “Ngun tangka#6.37 Ngun tangka: Ngun tangka fangkhat cu mi pakhat ih ni khat hlawhman a i (Mat 20.2 ah zoh). 200 man in caw lei pit in mipi pawl hi kan pe thok maw?” tiah an sut.

38Cule ani nih an sinah, “Sang hlawm khawzat nan nei? Feh uhla zoh uh,” tiah a ti hnei.

Cun an va zoh ih, “Sang hlawm nga le nga panih,” tiah an ti.

39Cule a dungthluntu pawl sinah, mipi pawl cu ta hring tlun ah a bur a bur in to ter dingah, thu a pe hnei. 40Curuangah mipi pawl cu zakhat bur, sawmnga bur tin an to. 41Cun sang hlawm nga le nga panih cu a la ih, van la zoh in lungawithu a sim. Cule sang cu a seu ih mipi pawl zem dingah a dungthluntu pawl sinah a pe. Cun nga panih khaw cu an zate sinah a zem. 42Cule an zaten an ei ih an khop ngai. 43An hlahmi nga le sang nepnawi pawl cu a dungthluntu pawl nih an sar ih khoto hleinih a khat in an sar. 44Cuvai sang eitu pawl cu pami hlang ah 5,000 an i.

Ti Tlun ah Jesuh A Feh

(Matthai 14.22–33; Johan 6.15–21)

45Jesuh nih mipi pawl a tlun ter hnei laiah, tili ral ih Bethsaida khua ah feh khan dingin a dungthluntu pawl cu hmakhatte ah lawng sungah a lut ter hnei. 46Cun Jesuh cu mipi pawl tlun hnukah, thla cam dingin tlang tlunah a kai. 47Cun ni a sim i tikah, lawng cu tili laifang ah a um ih Jesuh cu tili kam ah ama kau a um. 48Zil cu anma la ah a zuan ruangah, a dungthluntu pawl cu harsa ngaiin lawng an to cu a hmu hnei. Curuangah zingmaw khawvang hlan hrawngah tili tlunin an sinah a feh. An sin a tian tikah lattak#6.48 lattak hnei; lole kop hnei. hnei a tum. 49Cun ti tlunih a feh cu an hmuh tikah, muthla ah an tih ih an hek ciamco. 50Zangahtihle an zaten an hmu ih an ṭih tuk.

Asinain hmakhatte ah Jesuh nih an sinah, “Thinphang hlah uh, kei ka si, ṭih hlah uh,” tiah a ti hnei. 51Cun a dungthluntu pawl sin lawng sungah a lut ih zil cu a dai. Cun dungthluntu pawl cu an mang a bang ngai. 52Zangahtihle an lung a ruh tuk ruangah mi 5,000 caw a darmi ih a tih duhsatnak khaw an fiahthiam lo.

Jesuh Nih Gennesaret ah Mifak A Damter

(Matthai 14.34–36)

53Cun tili an tan ngah tikah Gennesaret ah an ban, cule an lawng cu tikap ah an khit. 54Lawng sung in an ṭum tikah, mipi pawl nih Jesuh cu an fiah thiam lohli. 55Cun cuvai ram kiangkap pawl hmahhmah ah an zuang ih, Jesuh a um tih an fiahnak hmun cangcang ah mifak pawl cu an ihnak tangthah thawn an tian pit. 56Cun Jesuh ih fehnak hmun khawte cang ah iseh, khawpi cang le lo tiangah khaw iseh, mifak pawl cu dawr hmun ah an tian pit. Jesuh ih hnipuan zimte tal tham ter dingah an hler. Cule a tham ngahtu hmahhmah cu an dam.

Currently Selected:

Marka 6: NTLTB25

Highlight

Copy