Marka 3

Kutze Pa

(Matthai 12.9–14; Luka 6.6–11)

1Cun Jesuh cu Sinakok ah a lut sal ih, cuva ah kutze pa pakhat a um. 2Mi hrekkhat nih Jesuh cu sual an puh theinak dingah, Sabbath ni ah cupa cu a damter thok maw damter thok lo tiah ṭhangai in an zoh. 3Jesuh nih cuvai kutze pa cu, “Hang ding la, hmai ah va suak hnik,” tiah thu a pe. 4Cun Jesuh nih an sinah, “Daan nih Sabbath ni ah thil ṭha tuah maw, thil ṭha lo tuah hi a kham? Mi nunnak run maw, thah hi a kham?” tiah a sut hnei.

Asinain an dai ṭhipṭhep. 5Cun Jesuh nih thinsia in a zoh hnei vivo ih an thinlung a ruh tuk ruangah a riah a se ngai. Cun cuvai kutze pa cu, “Na ban cu pharh,” tiah a ti. 6Farasi pawl cu lengah an suak ih Herod ih milai pawl thawn Jesuh thah thei dan ding an relkhawm lohli.

Tili Kap ih Miburpi

7Jesuh cu a dungthluntu pawl thawn Galilee Tili ah an va feh; miburpi nih Jesuh cu an thlun. Anni cu Galilee peng, Judea peng, 8Jerusalem khua, Idumea peng, Jordan tikua kiangkap, Tai-ar le Sidon khua kiangkap in a tiangmi pawl an i. Jesuh ih thil tuahmi pawl an theih ruangih a tiangmi pawl an i. 9#Mar 4.1; Luk 5.1–3Minung an tamtuk ih mipi pawl nih an pah lonak dingah lawng fate timlam sak cia dingin Jesuh nih a dungthluntu pawl cu a forh hnei. 10Mifak tamngai a damter ruangah mifak pawl cu Jesuh tham ngah dingin an cuh fa deido. 11Cun thlarau sia pawl nih Jesuh an hmuh cangcangin a hmai ah an bok ih, “Nang cu Pathian ih Fapa na si,” tiah an hek.

12Cun Jesuh nih ama cu hutu a si tih khi mi an sip lonak dingah cuvai thlarau sia pawl cu ralrinnak a pe hnei.

Jesuh nih Forhthlah Hleinih A Hril

(Matthai 10.1–4; Luka 6.12–16)

13Cun Jesuh cu tlang cungah a kai ih a duh mi pawl a sinah a ko hnei; cule a sinah an tiang. 14Cun a sinih umtu dingah le thusimtu dingih a thlah hnei theinak dingah minung hleinih a hril. 15Cule khawsia pawl dawisuah theinak thuneihnak khaw a pe hnei.

16Cun minung hleinih a hril mi ih hmin pawl cu: Simon (Peter tiah hmin a sakmi), 17Zebedi ih fapa James le a naupa Johan (Jesuh nih Boanerges tiah hmin a sak hnei, Khawhri ih fale tinak a i), 18Andru, Philip, Bartholomeo, Matthai, Thomas, Alfias ih fapa James, Thaddaeus, Phunṭan Simon le, 19Jesuh zuarthlaitu Judas Iskariot pawl an si.

Jesuh le Beelzebul

(Matthai 12.22–32; Luka 11.14–23; 12.10)

20Cun Jesuh cu inn ah a ṭin. Mipi cu a sinah an tiang sal sei ruangah Jesuh le a dungthluntu pawl cu caw hman an ei man lo. 21Cuvai thu cu a sungkua pawl nih an fiah ih, mi nih “Jesuh cu a aa i,” tiah an tih ruangah, Jesuh kilkhawi dingah an feh.

22 # Mat 9.34; 10.25 Jerusalem ih a tiangmi daanthiam pawl nih, “Hi pa hi Beelzebul ih luhhnawhmi a i. Khawsia uktu bawi ih thuneihnak thawn khawsia pawl a dawisuak,” tiah an ti.

23Cun Jesuh nih a sinah a ko hnei ih tahṭhipnak hmangin thu a sim hnei, “Zangtin Seihtan nih Seihtan lala a dawisuak thei thok maw? 24Ram pakhat cu ṭhenṭhek fa in ama le ma a dohfak ahcun, cuvai ram cu rei a ding thei thok lo. 25Innsang pakhat cu ṭhenṭhek fa in ama le ma a dohfak ahcun, cuvai sungkua cu rei a ding thei thok lo. 26Cun Seihtan cu ama le ma do fa in a ṭhenṭhek fak a sih ahcun, rei a ding thei thok lo ih a siatral thok.

27“Asinain thaṭha pa cu hri thawn an khih hmasak lo ahcun, hutukhaw nih a inn songah lut pit in a thil an laksak thei thok lo.

28“Thutak in nan ta sim, minung pawl ih sualnak hmahhmah le zangmang midang thangsiatnak#3.28 midang thangsiatnak; lole Pathian thangsiatnak. an ṭonmi pawl cu ngaihthiam an i thok. 29#Luk 12.10Asinain hutukhaw Thlarau Thianghlim a thangsiattu cu ngaihthiam a i kel thok lo, zangahtihle kumkhua daih sualnak a tuah,” tiah a ti. 30Zangruangah tih le “Hi pa hi thlarau thianglo a sungah a um,” tiah an tih ruangah a si.

Jesuh ih Nu le A Unau pawl

(Matthai 12.46–50; Luka 8.19–21)

31Cun Jesuh ih nu le a unau pawl cu an tiang, inn lengah an ding ih, Jesuh kawhsak dingah mi an forh. 32Jesuh ih hramah minung tamngai an to ih an ni nih, “Zohhnik, na nu le, na naunu le, na naupa le pawl nih ta hrawl eng, inn leng ah an um,” tiah an ti.

33Jesuh nih, “Ka nu le ka unau pawl cu hutu le an si?” tiah a sut hnei. 34A hramih totu pawl cu a zoh hnei ih, “Ka nu le ka unau pawl cu hiva ah an um. 35Hutu khaw sisehla Pathian ih duhnak a tuahtu hmahhmah cu ka nu le ka unau pawl an si,” tiah a ti.

Currently Selected:

Marka 3: NTLTB25

Highlight

Copy