Zakariya 13
13
Kuciɗatangu a nushi
1<<A kanna ka nanlo i ta̱ a kuɓa̱yuwa̱ a̱shi a̱ mini a kpaꞋa ku Dawuda n aza a ida̱shi a Urishelima, adama a na a̱ saꞋa unushi u le n unata u le.>>
2<<A kanna ka nanlo, mpa Vuzavaguɗu MalaꞋimili, mi ta̱ a ku ura ula a̱ma̱li a iɗika ya, i o kudoku kuciɓa n ele ba. Mi ta̱ kpamu a ku una eneki aꞋuwa n wunla̱i u gbani-gbani a iɗika ya. 3Ɗa baci kpamu vuza yoku u yaꞋin kene, esheku a̱ ni n a̱na̱ku a̱ ni a dana yi, <Vi a ku laꞋa ba, adama a na vi ta̱ a kudansa aꞋuwa n kula ku Vuzavaguɗu.> A makyan ma na wi a kuyaꞋan kene, esheku a̱ ni n a̱na̱ku a̱ ni a na a matsai ni i ta̱ a kusapa yi n kotokobi.
4<<A kanna ka nanlo eneki aꞋuwa ra̱ka̱ i ta̱ a kupana wono u kene ku le. Wi a ku uka motogu mu ukpan adama a na u doro uma ba. 5Ama wi ta̱ a kudana, <Mpa keneki kaꞋa ba. Mpa kacimbi kaꞋa, ali mpa maku kenu, ɗa mi a vicimba.> 6Ɗa baci vuza yoku we ecei ni, <Untsu a n yiɗa̱i tamkpamu nanai a ikyamba i nu?> Wi ta̱ a̱ ku ushuku, u dana <Usa̱n u ɗa n ukai a kpaꞋa ka̱ a̱ja̱Ꞌa̱ va̱.>
A lapai maguɓi ɗa nkyon n wacuwai
7<<Jimgba, avu kotokobi, vu shilika̱ m maguɓi ma̱ va̱,
shilika̱ n vuza na wi ka̱ja̱Ꞌa̱ ka̱ va̱.>>
Vuzavaguɗu MalaꞋimili u danai.
<<Lapa maguɓi ma nlala ma,
ka̱ta̱ ushiga wu nlala wa u wacuwa.
ka̱ta̱ n lapa muku mu nlala ma.>>
8<<A iɗika i nampa ya ra̱ka̱,
a̱ ka̱tsuma̱ ka ugboku u tatsu i ta̱ a kulapa ejere.
N nannai dem i ta̱ a̱ kuka̱sukpa̱ ugboku ute
a̱ ka̱tsuma̱ ku ugboku u tatsu wa.>>
Vuzavaguɗu u dansai.
9<<U te a̱ ka̱tsuma̱ ku ugboku u tatsu u nanlo,
mi ta̱ o kukondo u ɗa n akina,
mi ta̱ a̱ ku utuka̱ n azurufa, n kondo le tsa azanariya.
I ta̱ e kuɗeke kula ku va̱,
mi ta̱ a̱ ku ushuku le.
Mi ta̱ a kudana, <Ele ɗa uma a̱ va̱,>
ka̱ta̱ ele feu a dana, <Vuzavaguɗu Ka̱shile ka̱ tsu kaꞋa.> >>
©️2025 Language Development and Translation Initiative (LDTI)