Zakariya 1
1
Meɗevile ma uma o bono u Vuzavaguɗu
1Vuzavaguɗu u yaꞋin kadanshi n keneki Zakariya maku ma Berekiya matsukaya ma Ido, o wotoi kunla̱i u ka̱ya̱ ke ire ko tsugono tsu Dariyu. 2<<Vuzavaguɗu u yaꞋin wupa n ikaya i ɗa̱ ka̱u. 3Adama nannai dana uma a̱ nu, ili i na Vuzavaguɗu MalaꞋimili ma danai i ɗaɗa na, Bonoi wa̱ a̱ va̱, ka̱ta̱ mpa feu n bono wa̱ a̱ɗa̱. 4Ka̱ta̱ yo okpo ci ikaya i ɗa̱ ba, aza a na eneki a cau a danai le, <Kpatalai i ka̱sukpa̱ kutono uye u gbani-gbani u ɗa̱,> n ka gbani-gbani ka̱ ɗa̱. Ama a zuwaka ko a panaka mu ba mpa Vuzavaguɗu n dansai. 5Gogo na teɗai ikaya i ɗa̱ yi? Eneki a tankpamu? Teɗai i, o yongo ta̱ n wuma kowannai ɗa? 6Ama kadanshi ka̱ va̱, n wila̱ u va̱, u na n nekei eneki agbashi a̱ va̱, ka shana wi ikaya i ɗa̱ ba? Ɗa a̱ shika̱i unushi u le, a danai,<Tsu na Vuzavaguɗu MalaꞋimili u sheshei kuyaꞋanka tsu adama a uye u tsu, n ulinga utsu, ta tana u yaꞋin n a̱tsu nannai.> >>
Odoku a na Zakariya we enei tsa alatani
7A kanna ka kamanga n ka̱na̱shi ko wotoi u kupa n ute, ɗaɗa wotoi u Shebatu, a̱ ka̱ya̱ ke ire ko tsugono tsu Dariyu, Vuzavaguɗu u yaꞋin kadanshi n keneki Zakariya maku ma Berekiya ma tsukaya ma Ido. 8<<N kayin, me enei vuza e kelime ka̱ va̱ tsalatani ukumbi a gaɗi vu kodoku ka shili. Wi ta̱ kashani a̱ ka̱tsuma̱ ka nɗanga m Muritilu a̱ ka̱ra̱Ꞌa̱ ke kenu. Ka̱ca̱pa̱ ka̱ ni odoku a shili, n aza a̱ kpa̱ra̱sha̱ n odoku a̱ri. 9Ɗa me ecei Kalingata ka, yiɗa̱i na lo va? <Vuzagbayin vu va̱? Ɗa kalingata ka na ki a kadanshi nu mpa ka̱ ushuki u danai, mi ta̱ o kuyotsongu ko yiɗa̱i.> 10Ɗa Vuza na wi kashani punu a nɗanga m Muritilu ma, wu ushuki u danai, <Uma yoku a ɗa Vuzavaguɗu u suki a̱ ka̱ra̱Ꞌa̱ uduniyan ra̱ka̱.> 11Ɗa a̱ ushuki kalingata ka Vuzavaguɗu ka na ki punu kashani a̱ ka̱tsuma̱ ka nɗanga m Muritilu ma, a danai,<Tsu ka̱ra̱Ꞌa̱ ta̱ aduniyan ra̱ka̱, i ta̱ a̱ ida̱shi i ma̱ta̱na̱.> 12Ɗa kalingata ka Vuzavaguɗu ka, ka danai, <Vuzavaguɗu MalaꞋimili, wannai ɗai va kubula̱ kupana asuvayali a Urushelima n likuci i Yahuda? Ele na vu yaꞋin wupa n ele ali a̱ya̱ amangatatsunkupa?> 13Ɗa Vuzavaguɗu u wu ushiki kalingata ka na ki a kadanshi nu mpa va, n kadanshi ka singai n ka uremi u ka̱ɗu. 14Ɗa kalingata ka na ka yaꞋin kadanshi nu mpa ka danai, <Sala ukuna u nampa, na ɗa ili i na Vuzavaguɗu MalaꞋimili u danai, n ciga ta̱ Urushelima koɓolo n Sihiyona n a̱bunda̱i, 15ama mi ta̱ a wupa ka̱u n uduniyan u na wi a̱ ida̱shi i ma̱ta̱na̱, ana n yaꞋin wupa kenu n uma a̱ va̱, ɗa uduniyan wa u doki le atakaci a na a laꞋi. 16Adama nannai, ili i na Vuzavaguɗu u dansai i ɗaɗa na, mi ta̱ a kukucikpa kupana asuvayali a Urushelima, ta ɗe n kumaꞋasaka kpaꞋa ku va̱. I ta̱ kpamu a̱ kuba̱rukpa̱ kagisamkpatsu ka kawin a Urushelima, Vuzavaguɗu MalaꞋimili u dansai. 17Sala ukuna u nampa kpamu, Vuzavaguɗu MalaꞋimili u dansai, likuci i va̱ yi ta̱ o kudoku kuyimkpa n uciyi. Vuzavaguɗu kpamu wi ta̱ o kudoku ku ɗengusa̱ Sihiyona, ka̱ta̱ u zagba Urushelima wo okpo likuci i ni.> >>
Avana n ayimi a̱ na̱shi
18Ɗa n ɗengusa̱i a̱shi gaɗi, ɗa menei avana a̱ na̱shi e kelime ka̱ va̱. 19Me ecei kalingata ka na ka yaꞋin kadanshi nu mpa, n danai, <<Yiɗa̱i na lo va?>> Ɗa wu ushuki mu u danai, <<Avana a nanlo a, iyoci yi utsura wu uduniyan u na u wacuwai Yahuda ɗa, Isaraila koɓolo n Urushelima.>> 20Ɗa Vuzavaguɗu u yotsongi mu ayimi a̱ na̱shi. 21Ɗa n danai, <<Yeɗei uma a̱ na̱shi a nampa a kuta̱wa̱ ku yaꞋan?>> Ɗa Vuzavaguɗu u danai, <<Avana a nanlo, a ɗaɗa a wacuwai uma a Yahuda ali ko vuza na u kufuɗa kuɗa̱ngusa̱ kaci ka ni ba. Ama ayimi a nanlo a̱ ta̱wa̱ ta̱ adama a na e neke uduniyan wovon, o koɗoso uduniyan u na u ɗa̱ngusa̱i avana ele a tsurala n iɗika i Yahuda adama a na u wacuwa i ɗa.>>
©️2025 Language Development and Translation Initiative (LDTI)