Mika 1
1
1Vuzavaguɗu u yaꞋin kadanshi m Mika vuza va aza a Moreshetu, a ayin o tsugono tsu Jotam n Ahazu n Hezekaya ngono n Yahuda. U yaꞋankai ni kadanshi adama a Samariya n Urushelima.
Kpalu adama a Samariya n Urushelima
2Zuwai atsuvu a̱ɗa̱ uduniyan ra̱ka̱,
panai a̱ɗa̱ aduniyan,
n ili i na yi punu ra̱ka̱,
yaꞋan Vuzavaguɗu Ka̱shile ɗe A̱Ꞌisa̱ a gbayin a ciɗa a̱ ni wo okpo magan wa̱ a̱ ɗa̱.
3La̱na̱, Vuzavaguɗu wi ta̱ a̱ kuta̱wa̱,
a̱ ubuta̱ wi ida̱shi i ciɗa i ni,
wi ta̱ a̱ kucipa̱ u wala a gaɗi vu nsasan m gbagbaꞋin ma aduniyan.
4Nsasan m gbagbaꞋin ma mi ta̱ e kuderikpe,
a ɗaka vu ene a̱ ni,
tsu na abashi a ishigi e tsu derikpe akina,
e kuyene tsu mini a kaginda a kubana a̱ ka̱gida̱la̱u.
5Na va ra̱ka̱ adama a̱ unushi wu ucigi u ka̱ɗu,
u kpaꞋa ku Yakubu ɗa,
ɗaɗa unushi u kpaꞋa ki Isaraila.
Yiɗa̱i unushi u kumaci ku Yakubu?
Ɗaɗa kutono ka̱ a̱ma̱li ku na aza a Samariya a piꞋisakai le ba?
Yiɗa̱i unushi wu nva̱li aginda aza a Yahuda?
Ɗaɗa kutono ka̱ a̱ma̱li ku na aza a Urushelima a piꞋisakai le ba?
6Adama a nannai mpa Vuzavaguɗu,
mi ta̱ o kubonoko Samariya ka̱kiza̱,
ubuta̱ u kucimba kashina ki itacishi.
Mi ta̱ a̱ ku gida̱la̱kpa̱ atali a̱ ni punu a̱ ka̱ra̱Ꞌa̱,
ka̱ta̱ n ciɗukpa̱ atali a̱ kumiꞋi ku kumaꞋa ku ni.
7Mi ta̱ o kuɓoso a̱ma̱li a̱ ni miri-miri,
kuneꞋe ku na e nekei ashakanlai a̱ ubuta̱ u kutono ka̱ a̱ma̱li,
i ta̱ o kusongu ku ɗa n akina,
a̱ma̱li a̱ ni ra̱ka̱ i ta̱ o ku okpo ili i gbani,
Adama a na a̱ ciya̱ ta̱ i ɗa a̱ ubuta̱ u kuneꞋe ku cishakanlai,
kuneꞋe ku cishakanlai kpamu ki ta̱ o kubono a iɗika yi uduma.
Ma̱shi adama a Samariya n Urushelima
8Mika u danai, adama a ili i nampa mi ta̱,
a̱ kuna̱mgba̱ ka̱tsuma̱ n shika̱,
mi ta̱ o kufoɗo ucanuku n wala koshomboɗi.
Mi ta̱ a kuyaꞋan yura̱ tsu mesheꞋe ma kakamba,
ka̱ta̱ n ɗumgba̱ tsu a̱da̱la̱.
9Adama a na usa̱n u Samariya u kupotso ba,
u ta̱wa̱ ta̱ ta na a Yahuda.
U yawa ta̱ Urushelima utsutsu u uma a̱ va̱.
10Ka̱ta̱ i dansa kaꞋa a̱ ubuta̱ wi irala i tsu a Gatu ba,
ko, ka̱ta̱ i shika̱ ba.
A Betu-liyafira,
i gandalasa a kayala.
11A̱ɗa̱ na yi ida̱shi a Shafiri,
walai oshomboɗi n wono.
A̱ɗa̱ na yi ida̱shi a ZaꞋana,
ka̱ta̱ yi uta̱ ba.
Betu-ezelu n uma a̱ ni a̱ ma̱shi,
ama yi a̱ kuciya̱ uɓa̱nki wa aza a ZaꞋana ba.
12Adama a na aza a ida̱shi a Marotu,
i ta̱ a kuvana n mali a̱ ciya̱ kasingai,
ama kawuya ka̱ uta̱ ta̱ a̱ ubuta̱ u Vuzavaguɗu ka yawai a Urushelima.
13A̱ɗa̱ na yi ida̱shi a Lakishi,
foɓusoi ekeke o odoku a̱ ɗa̱ i suma.
Adama a na a̱ɗa̱ ɗa i gita̱i kuyaꞋan unushi,
a Sihiyona,
adama a na a cina ta̱ unushi wi Isaraila a̱ ka̱tsuma̱ ka̱ ɗa̱,
14Adama a nannai, a̱ɗa̱ aza a Yahuda,
i neke kuneꞋe ku kupecemgbenei,
wa aza a Moreshetu-gatu,
iꞋuwa ya aza a Akizibu, aza o modoruko a ɗa,
ngono mi Isaraila feu i ta̱ e kuyeve.
15Vuzavaguɗu u danai,
mi ta̱ a̱ kutuka̱ ɗa̱ n vuza na u kulyaꞋa ɗa̱ n kuvon,
a̱ɗa̱ na yi ida̱shi a Maresha.
mogono mi Isaraila, vuzagbayin,
wi ta̱ a kusuma we sheɗeku a kaɓatsu ka Adulam.
16A̱ɗa̱ aza a Yahuda punai aci a̱ ɗa̱,
adama a kpalu ku muku n ɗa̱ n na i cigai,
gbonduwoi aci a̱ ɗa̱ tsa asakali,
adama a na a banka ta̱ muku n ɗa̱ ugbashi.
©️2025 Language Development and Translation Initiative (LDTI)