Habaku 1
1
1Akaka a Vuzavaguɗu a na keneki Habaku wu enei a̱ ka̱tsuma̱ ka alatani.
Mavura ma Habaku
2Vuzavaguɗu, mi ta̱ a̱ ma̱shi ma̱ kula̱nsa̱ uɓa̱nki u nu,
ama ɗa vu kpa̱ɗa̱i kupanaka mu,
ali wannai ɗai vu kupana?
Mi ta̱ a̱ kula̱nsa̱ uɓa̱nki wa̱ a̱ nu adama a kawuya,
ama vu keɓece ukuna ba.
3Yiɗa̱i i zuwai ɗa vu ka̱sukpa̱i mu me enei kawuya,
yiɗa̱i i zuwai ɗa vi a ku inda ukuna u wasasa?
Munuka n ka gbani-gbani a̱ ubuta̱ dem,
mawansa n kanananai ki ta̱ lo.
4Adama a nannai o doku o tono wila̱ ba,
u ɗa u buwa n utsura ba.
Aza a gbani-gbani a kanzai aza a usuɓi,
adama a na ka̱ta̱ kasingai ka̱ ciya̱ uye ba.
Wu ushuki u Vuzavaguɗu
5<<Vara a̱shi punu a uduniyan vu la̱na̱,
vi ta̱ a kuyaꞋan mereve ka̱u.
Adama a na mi ta̱ a kuyaꞋan ili i yoku a̱ ka̱tsuma̱ ka ayin a̱ nu,
i na va̱ kushuku ba,
ko o tonuko wu baci.
6Mi ta̱ a̱ kuɗa̱ngusa̱ aza a Babila,
uma a nanlo aza asuvu a usuɗukpi a ɗa n vishili,
ele na a tsu dasa a̱ ubuta̱ dem aduniyan,
isa ubuta̱ wi ida̱shi u na wi u le ba.
7Aza a na e ci neke uma wovon n ka̱rikpa̱ni a ɗa,
a kuyaꞋan afada e le n ulinga u le tsu na a cigai.
8Odoku e le a laꞋa ta̱ kanama ilaɗi,
a laꞋa ta̱ nkunzukunzu n kambulu asuvu a̱ usuɗukpi,
akumbi odoku e le a̱ kuta̱wa̱ n ilaɗi,
akumbi o odoku e le a̱ kuta̱wa̱ daꞋangi.
a tsu imkpa ta̱ a̱ zura̱ tsu na mashangi ma shaɗa inyama.
9Ra̱ka̱ vi le a̱ tsu ta̱wa̱ ta̱ n kusheshe ku na a̱ ɗengusa̱ vishili,
uma a tsu pana ta̱ wovon u le kafu ma a yawa,
ka̱ta̱ o ɓolongu agbashi n a̱bunda̱i tsu kayala.
10A ci yaꞋanka ta̱ ngono ulami,
o tsu bonoko ta̱ aza o tsugono ili i ma̱ka̱n,
o tsu zoꞋoso ta̱ likuci i na yi nu nshilya mu utsura dem,
ka̱ta̱ a maꞋa adasukpatsu a kayala na a kuꞋuwa ku una le.
11A tsu laza ta̱ gogoꞋo lo tsu wunla̱i a yaꞋan nwalu n le,
aza a unushi a ɗa, adama a na utsura u le ɗaɗa ka̱ma̱li.>>
Mavura ma Habaku me ire
12Avu Vuzavaguɗu, kowannai ɗa vi lo ba?
Vuzavaguɗu Ka̱shile ka̱ va̱, vuza Ciɗa vu va̱,
ci a̱ ku kuwa̱ ba.
Vuzavaguɗu, avu ɗa vu zuwai le okpo aza a afada,
Avu Katali, vu zuwa le ta̱ adama a na a takacika tsu.
13Avu vuza vu Ciɗa ɗa,
vu laꞋa ta̱ utsura u na vu inda ukuna u wuya,
avu na vu tsu inda ka gbani-gbani ba.
Yiɗa̱i i zuwai ɗa vi a ku inda aza a kalyaꞋa?
Yiɗa̱i i zuwai ɗa vu paɗai bini a kinda aza a gbani-gbani,
a ku una aza a na a laꞋi le usuɓi?
14Vu bonokoi uma tsa adan a mala,
ci ili i wuma i na yi a nkuɗa̱ru a iɗika babu mogono.
15Aza a Babila e ku reme uma n oɗopi,
a̱ ka̱na̱ le a maza ma̱ bilili me le,
ka̱ta̱ a̱ tsungu le akpaɓu a̱ ka̱vura̱ e le,
a yaꞋan ma̱za̱nga̱ n izoshi.
16Adama a nannai, ɗa a yaꞋankai i bilili i le alyuka,
ali ɗa kpamu a yaꞋankai ibilili i le,
adama a na i bilili i ɗaɗa i ci neke le ili ba̱ri,
n ilikulya yi a̱bunda̱i.
17Ta a kulyaꞋa kelime n kuyaꞋan nannai m maza me le?
I ta̱ a̱ kuka̱na̱ ku una uma a iɗika kakau babu asuvayali?
©️2025 Language Development and Translation Initiative (LDTI)