Emosu 1
1
Atakaci a̱ Ka̱shile wa aza a na i a̱ ida̱shi ɗevu n aza a Isaraila
1Na ɗa kadanshi ka Emosu vuza na maguɓi maꞋa a̱ likuci i Tekowa. Ka̱shile ke nekei Emosu akaka a nampa a, ali a̱ya̱ kafu iɗika i gba̱ɗa̱, a makyan ma na Uziya wi o tsugono tsu Yahuda, Jerobuwam maku Jowashi o tsugono ci Isaraila. 2Emosu u danai,
<<Vuzavaguɗu wi ta̱ a̱ yura̱ a Sihiyona,
ka̱la̱ka̱tsu ka̱ ni ki ta̱ a̱ ka̱ɗa̱ngu a Urushelima,
ubuta̱ u kaguɓa wi ta̱ e kuɗekpe, gaɗi vu kusan ku Kamelu wi ta̱ e kuɗekpe.>>
3Ili i na Vuzavaguɗu u dansai i ɗanna,
<<Aza a Dimaska a lyaꞋa ta̱ kelime n kuyaꞋan unushi a̱ ka̱tsuma̱ ku unushi.
Mayun mi ta̱ a kutakacika le,
adama a na una ta̱ aza a Giliyadu,
n lapai le tsu na a tsu lapa ishina n kalangu.
4Adama a nanai, mi ta̱ a̱ kusuku n akina,
a kpaꞋa ku Haziyelu mogono ma Siriya,
i ta̱ o kusongu ubuta̱ wu ukanji u mogono Ben-hadadu.
5Mi ta̱ o koɗoso iyim yi utsutsu u Dimaska,
ka̱ta̱ mu una mogono ma aza a Betu-eden,
n aza a na i a̱ ka̱ra̱Ꞌa̱ ka Aven,
i ta̱ a̱ kupura̱ aza a Siriya a kubana ugbashi a iɗika i Kiru.>> Mpa Vuzavaguɗu n dansai.
6Vuzavaguɗu u danai,
<<Aza a Gaza a lyaꞋa ta̱ kelime n kuyaꞋan unushi a̱ ka̱tsuma̱ ku unushi,
mayun mi ta̱ a kutakacika le,
adama na a̱ pura̱ ta̱ uma a̱ likuci ra̱ka̱,
e dengei le okpoi agbashi a Edom.
7Adama a nannai, mi ta̱ a̱ kusuku n akina,
a mashilya ma Gaza o songu ubuta̱ wu ukanji u ni.
8Mi ta̱ a ku una aza a na i n ida̱shi a Ashidodu,
koɓolo n mogono ma Ashikelon,
Mi ta̱ a kuyaꞋan tsurala n Ekoron,
aza a Filisitiya i ta̱ a̱ kukuwa̱,>>
Mpa Vuzavaguɗu n dansai.
9Vuzavaguɗu u danai.
<<Uma a Taya a yaꞋan ta̱ unushi wu ucigi u ka̱ɗu,
o doku a yaꞋin unushi a̱ ka̱tsuma̱ ka̱ unushi
mi a̱ kukpa̱ɗa̱ kutakacika le ba,
adama a na a̱ pura̱ ta̱ uma a kubana ugbashi,
e dengei le ekiye aza a Edom,
a ciɓa n uzuwukpani wo o toku e le ba. 10Adama a nannai, mi ta̱ kusuku n akina a mashilya ma Taya,
o songu nshilya n likuci ma.>>
11Vuzavaguɗu u danai. <<Aza a Edom a yaꞋan ta̱ unushi wu ucigi u ka̱ɗu,
a lyaꞋi kelime n kuyaꞋan unushi a̱ ka̱tsuma̱ ku unushi,
mayun mi ta̱ a kutakacika le,
adama a na a guva ta̱ aza e le, aza a Isaraila,
a̱ kpa̱ɗa̱i kupana asuvayali e le,
a lyaꞋi kelime n wupa u le.
12Adama a nannai, mi ta̱ a̱ kusuku n akina a Teman,
o songu mashilya ma Bozara.>>
13Vuzavaguɗu u danai.
<<Aza a Amon a yaꞋan ta̱ unushi wu ucigi u ka̱ɗu, a lyaꞋa ta̱ kelime n kuyaꞋan unushi a̱ ka̱tsuma̱ ku unushi,
mayun mi ta̱ a kutakacika le
adama a̱ vishili vi iɗika,
ali a ka̱ra̱kpa̱sa̱i a̱ma̱ci a̱tsuma̱ aza a Giliyadu. 14Adama a nanai, mi ta̱ a̱ kusuku n akina a mashilya ma Raba,
o songu mashilya ma̱ likuci ma,
i ta̱ a kuyaꞋan yoroli a kanna ko kuvon,
vishili va vi ta̱ a kuyaꞋan tsu kabatalikpau.
15Mogono n aza e kelime e le,
i ta̱ a kubanka le iɗika i yoku kau.>> Mpa Vuzavaguɗu n dansai.
©️2025 Language Development and Translation Initiative (LDTI)