Oroome Asaas 3

1Histtiko Ayhuda as gideththas aaza go7ay dizee? Qaxxaray ay go7izee? 2Awarakka gidiin go7ay daro; harappe koyro Xoossa qaalay hadara Ayhudatas imettides. 3Isttafe issotas issotas ammanoy baynda aggiko Xoossan ammaneteth diggizee? 4Mulekka diggenna! Asi wurikka wordanchcha,

«Neni ne qaalaappe

dendidayssan tumanchcha;

ne morkke pirdankka xoonaasa»

geetetti xaafettida mala

Xoossi qasse tumanchcha.#Maza 51:4

5Nu makkalla oosoy Xoossa xilloteth qonccen bessizayssa gidikko histtiin nu ay gaanee? Coo asa woga mala palamettanaas Xoossi ba hanqo nu bolla ehizayssi nuus bessenna gaaneyee? Hessaka ta gizay asaththo qofanna. 6Tumappe hessaththo hanenna; hessaththo hanizaa gidikko Xoossi alame bolla wostti pirdandee?

7«Ta wordoteththi Xoossa tumateth qonccisizayssan iza bonchcho gede gujjizaa gidikko histtiin ha7i gakkanaas wostti ta bolla nagaranchcha mala pirdettizee?» giidi palamettana asi daana dandayees. 8Hessa guussi, «Lo7oy yaana mala ane iita ooththoos» geettes giidi issi issi asati nu bolla woresizayssa mala. Hayta asata bolla gakkiza pirday tumu pirda.

Asi Wuri Nagaranchcha

9Histtiin nu ay giinoo? Nuni isttafe aadhdhizonii? Mulekka aadhdhoko. Ayhudata gidikkoka, Ayzaabeta gidikkoka wurikka nagarappe garsa baggara diza gishshas ta wursaka kasetada isttas yootadis.

10«Xilloy oonikka deenna;

issaadeyka deenna.

11Yuushshi qoppizaadey baa;

Xoos koyzay issaadeyka baa.

12Wurikka balettidanne

issi bolla go7onttayta gidida.

Lo7o ooththizay oonikka baa;

issaadeyka deenna.

13Istta doonay doya diza duufo mala;

istta doonay ubba wode

baleththo haasayees;

istta metershay

shooshsha marzera dees.#Maza 5:9; 140:3

14Istta doonan qanggeththinne

camo miishshi kumides.#Maza 10:7

15Istta tohoy

suuth gussanaas eesotees.

16Istta ogen dhayoynne

laafateththi dees.

17Istti saroteththa oge erettenna.

18Istta ayfeson Xoossas yashshateththi baa»

geetetti xaafettida mala.#Maza 36:1

19Hessa gishshas doonay wurikka gordettana mala derey kumeth Xoossas zaaro immana mala wogay gizay wurikka wogappe giddora dizaytas gididayssa nu eroos. 20Hessa gishshas wogay nagaray aazakko erisees attiin wogaa naagon oonikka iza achchan xillo geetettanaas dandayenna.

Ammanon Beettiza Xilloteth

21Ha7i qasse kase nabeti izas markkattidayssi wogaappe karera gidida Xoossa xilloteththi qonccides. 22Hessi Xoossa xilloteththi Yesus Kirstoosa ammanon dummateththi baynda beettiza xilloteththa.#Gala 2:16

23Gaasoykka asi wurikka nagara ooththides; Xoossa bonchchoyka asa naas paccides. 24Asay Yesus Kirstoosi asa naa gishshas ooththida kiyateththafe dendidayssan coo mela xillides. 25Iza suuththan gidida ammanon nagarappe maarettana yarsho histtidi Xoossi Yesusa shiishshides; izi hessa ooththiday kasetidi polettida nagara qaxxayontta dandayan aadhdhida ba xilloteth bessanaassa. 26Izi hessa ha wodezan ooththiday ba xilloteththaa; hessika ba baggara xillo gidida Yesus Kirstoosan ammanizaade xillisizayssa bessanaassa.

27Histtiin nuni izan ceeqettiza miishshi aazi dizee? Aykko miishshankka ceeqettoko; nu ceeqettana gaasoykka aazee? Wogaa naagiza gishee? Gidenna; ammanonna. 28Ay asikka ammanon attiin wogaa naagon attonttayssa nu geeshshi yootoos.

29Xoossi Ayhudatas xallaa? Ayzaabetaska Xoos gidennee? Ee Ayzaabetaska izi Xoossa. 30Qaxxarettidayssa ammanon qasse qaxxarettonttayssaka he ammanonkka xillisizaykka izi issi Xoossaa xalla.#Zaare 6:4; Gala 3:20 31Histtiin hessi hessa gidikko ammano gaason wogaa go7ay baynda miish ooththinoo? Mulekka hessaththo hanenna; Wogaa nu minththana attiin.

Currently Selected:

Oroome Asaas 3: GM

Highlight

Copy

Compare