Oroome Asaas 15

1Nuni ammanon minnidayti hankko ammanon minnonttayta meto tookkanaas bessees attiin nu xalla ufayettizayta gidanaas bessenna. 2Nuni wurikka hara asi ba ammanon minnana mala iza go7izaazinne ufayssiza miish ane ooththoos. 3Kirstoosi bana ufayssibeenna; harappeka, «Asay nena cayida cashshay tana gakkides» geetetti kase Geeshsha Maxaafan xaafettidayssi polettides.#Maza 69:9 4Nuni Geeshsha Maxaafatappe demmiza dandayaynne minoteththi nuus daana mala koyroppe xaafettidayssi wurikka nu izappe nuus timirte demmana mala xaafettides.

5Minoteththinne dandaya immiza Xoossi intte Yesus Kirstoosa kaallishin inttes intte giddon Ayana issifeteth immo. 6Hessika intte issi wozinaninne issi doona gididi nu Godaa Yesus Kirstoosa Aawaa Xoossa bonchchanaassa.

Ammanontta Deretas Sabbakettida Mishiraachcho Qaala

7Hessa gishshas Xoossi inttena Xoossa bonchchon mokki ekkida mala intteka issoy issaa ufayssan mokki ekkite. 8Kase aawatas imettida hidota qaalaa polanaas Xoossa tumateththi erettana mala Kirstoosi Ayhudatas ooththizaade gididayssa ta inttes yootays. 9Hessaththoka Ayzaabeti iza maaroteththaa gishshas Xoos galatana mala; hessika,

«Ta nena dere giddon galatana;

ne sunththaaska

galata mazamure yexxana»

geetetti Geeshsha Maxaafan xaafettida mala.#2Same 22:50; Maza 18:49

10Qasseka, «Ayzaabetoo!

Intteka Xoossa

deretara ufayettite»

geetetti Geeshsha Maxaafan xaafettides.#Zaare 32:43

11Nam7anththoka, «Ayzaabeti

intte wurikka Godaa galatite;

derey wuri iza sabbite»

geetetti Geeshsha Maxaafan xaafettides.#Maza 117:1

12Hessaththo Isayaasan,

«Ba dere asaa bolla

kawotiza Isseye nay yaana.

Alame asaa ayssizaadey dendana;

isttika izan ufayettana» gees.#Isa 11:10

13Intte izan ammaniza gishshas hidota Xoossi inttenan ufayssinne saroteth kunththo; hessika Xillo Ayana wolqqa hidotay inttes daranaassa.

Ayzaabeta Oosanchcha Phawuloosa

14Ta ishatoo! Intte lo7eteththan, erateth ubbaan kumidaytanne harata zoranaas eray dizayta gididayssa ta addafe shaakka eradis. 15Ta Xoossafe ekkida imotaa gina qasseka inttena qofsanaas issi issi yo7ota xalateththan inttes xaafadis. 16Hessa he kiyateththi imettiday tani Xoossa Mishiraachcho qaalaa hankko deretas yootana malassa; qasseka qeese mala gidida Yesus Kirstoosas ooththanaassa; hessa gishshas hankko dere asay Xillo Ayanan dummatidi Xoos ufayssiza yarsho gididi shiiqana mala ooththays.

17Hessa tani Xoossas ooththiza gishshas Yesus Kirstoosan ceeqettays. 18Ta yootidayssaninne ta ooththidayssan hankko dere asay Xoossas azazettana mala Kirstoosi tanan gididi ooththidaazappe attiin hara haasayana xalikke. 19Hessika haniday Xillo Ayana wolqqan malaatata baggara hanides; hessa malankka Yerusalaameppe Ilwaqoore gakkanaas ta Kirstoosa Mishiraachcho qaalaa sabbakadis.

20Hara asi kase ooththidason ta gelontta mala gaada kase Kirstoosa sunththi xeygetti eronttason Mishiraachcho qaalaa sabbakanayssi taas amo. 21Harappeka,

«Iza gishshas isttas yootetonttayti

iza beyana;

siyi eronttayti akeekana»

geetetti kase Geeshsha Maxaafan xaafettida mala hanides.#Isa 52:15

22Hessa gaason ta intteko bontta mala daro wode digettadis.

Oroome Beyanaas Phawuloosa Giigeteth

23Ha7i qasse taas haan oosoy baynda gishshas daro layththatappe haa simmiin inttena beyanaas ta daro laamotadis.#Oro 1:13 24Hayssa ta qofaa tani Ispeene biza wode polanaas qoppays; heera aadhdhashe inttena beyanaassinne inttenara guuththa wode gam7ada laamota aaththida mala intte tana maaddana gaada hidota ooththays.

25Ha7i qasse ammanizaytas imettiza maado miish ekkada Yerusalaame bays. 26Gaasoykka Maqidooniyaninne Akayan diza manqota maaddana Xoossa derey dendides.#1Qoro 16:1-4 27Hayssa ha maadoza istti ba dosan immiday istti ooththanaas bessiza gishshassa; Ayzaabeti Ayhudatara issife Ayana anjjo ekkizayta gidikko isttika baas diza biittaa anjjon Ayhudata maaddanaas bessees.#1Qoro 9:11 28Hessa gishshas hayssa shiiqida maado miishshaa Yerusalaamen immidaappe guye intte achchara ta Ispeene baana. 29Ta hee intteko bashe inttes Kirstoosa anjjo kunththa ekka baanayssa ta erays.

30Ta ishatoo! Tani Xoossa woosan baaxetiza mala intteka tanara baaxetana mala ta inttena Godaa Yesus Kirstoosaninne Xillo Ayana siiqon woossays. 31Tani Yuhudan diza ammanontta asaa kusheppe attana malanne Yerusalaamen diza ta oosoykka heen ammanizayta achchan ekettana mala taas woossite. 32Hessika Xoossa shene mala hee intteko ta ufayssara baana malanne inttenara issife shempanaassa. 33Saroteththa Goday inttenara ubbatara gido. Amiin.

Currently Selected:

Oroome Asaas 15: GM

Highlight

Copy

Compare